2 Pyer 2 - Labib An Kreol Seselwa

Lavertisman kont Fo Lansennyman

¹ Parey ki ti annan bann fo profet parmi pep Izrael, pou osi annan bann fo ansennyan parmi zot. Sekretman, zot pou entrodwir bann fo doktrin destrikter. Zot pou menm renye zot Met ki'n sov zot. Zot pou menm atir destriksyon rapid lo zot.

² Bokou pou swiv zot dan zot lavi imoral, e akoz zot, dimoun pou malparl semen laverite.

³ Akoz zot lanmour pour larzan, sa bann dimoun pou eksplwat zot par bann fo rezonnman pour trik zot. Me zot zizman in pare pour zot depi lontan; zot kondannasyon pe esper zot, e zot destriksyon pa pe dormi.

⁴ Annefe, Bondye pa ti eparny bann lanz ki ti koupab. I ti zet zot dan labim fernwanr kot zot in ganny ansennen pour zour zizman.

⁵ Bondye pa'n eparny lemonn ansyen, me i ti anvoy deliz lo son bann move zabitan. I ti prezerv lavi wit dimoun ansanm avek Noe, ki ti proklanm lazistis.

⁶ Bondye ti pas kondannasyon e detri lavil Sodonm ek Gomor ki i ti fer zot vin lasann. Sa ti en leson pour bann move dimoun dan lavenir.

⁷ Me i ti delivre Lot, en zis, ki ti byen sagrinen par kondwit deregle bann kriminel dan son lepok.

⁸ Annefe, sa zonm zis ki ti viv parmi zot, ti soufer kan i ti war e antann zot bann move aksyon.

⁹ Sa i montre ki Senyer i konnen ki mannyer i pou delivre dimoun ki atase avek li kan zot dan difikilte, e gard bann malfeter pour pinisyon zour zizman.

¹⁰ I pou pini sirtou bann ki swiv zot bann dezir enpir e mepriz lotorite Bondye. Sa bann fo ansennyan, zot annan lodas ek larogans, san okenn respe, pour ensilte bann kreatir glorye ki dan lesyel.

¹¹ Menm bann lanz ki pourtan bokou pli for e pli pwisan, pa fer okenn lakizasyon ensiltan kont bann kreatir glorye devan Senyer.

¹² Me sa bann zans, zot azir avek zot lensten, parey bann zannimo sovaz ki'n ne zis pour ganny atrape e touye. Zot ensilte dimoun ki zot pa ni menm konnen. Zot pou ganny detri parey sa bann zannimo sovaz.

¹³ Konmsa ki zot pou rekolte lapey zot bann lenzistis. Zot pran gran plezir satisfer zot prop dezir an plen zour. Kan zot fer lafet avek ou, zot pran plezir dan mansonz. Zot prezans i degoutan e fer onte.

¹⁴ Zot regar i ranpli avek dezir pour komet adilter; zot pa zanmen komet ase pese. Zot atir bann ki feb dan zot pyez. Zot leker in byen antrennen dan dezir pour ganny larzan. Zot in ganny malediksyon!

¹⁵ Zot in abandonn vre semen e zot in egare lo zot larout. Zot in swiv menm semen ki Balaanm, garson Bosor ki ti kontan larzan, ki i ti gannyen pour fer lemal.

¹⁶ Me i ti ganny reprimande pour son pese. Annefe, en bourik, ki ti koz avek li koman en imen ti aret sa profet dan son aksyon ensanse.

¹⁷ Sa bann zonm, zot parey bann sours ki'n sek, zot parey bann nyaz pouse par en tanpet. I annan en plas dan fernwanr rezerve pour zot.

¹⁸ Zot pronons bann gran diskour vid e bet. Zot servi dezir imoral zot prop natir, pour met dan zot pyez, bann ki apenn fek sape parmi bann ki viv dan lerer.

¹⁹ Zot promet laliberte, tandis ki zot menm, zot lesklav bann plezir ki detri zot. Annefe, sakenn i lesklav sa ki domin li.

²⁰ Annefe, i annan ki'n sape anba move lenfliyans lemonn, gras a konnesans nou Senyer e Sover Zezi-Kri. Me, si zot les zot reganny atrape e reganny anpaye, e ganny bate, zot kondisyon i vin pir ki avan.

²¹ I ti ava'n preferab si zot pa ti'n zanmen konn semen lazistis, si, apre ki zot in konnen, zot detourn zot avek sa sen komannman ki zot ti'n resevwar.

²² Sa ki'n ariv zot i parey sa ki sa proverb i dir: Lisyen in retourn dan son vomi. Oubyen ankor: Koson ki'n fek fini ganny lave, in retourn dan son labou.