1 Zan 4 - Labib An Kreol Seselwa

Konman Disern bann Diferan Lespri

¹ Mon bann zanmi! Pa bezwen krwar tou sa bann ki pretann ki zot posed Lespri. Teste zot dabor pour konnen si sa lespri i sorti kot Bondye. Annefe, i annan bokou fo profet dan lemonn.

² La koman zot kapab rekonnet Lespri Bondye: Sa enn ki afirmen ki Zezi in vreman vin koman en zonm, i posed Lespri Bondye.

³ Me sa enn ki pa rekonnet Zezi, pa sorti kot Bondye. I lespri Ladverser Kris ki zot in tande pe vini. Annefe, i deza la dan lemonn.

⁴ Me zot, mon bann zanfan! Zot pour Bondye e zot in ranport laviktwar lo bann fo profet, akoz sa enn ki dan zot, i pli gran ki sa enn ki dan lemonn.

⁵ Sa bann dimoun, zot koz dan fason lemonn e lemonn i ekout zot akoz zot zanfan lemonn.

⁶ Me nou, nou pour Bondye, e sa enn ki konn Bondye i ekout nou. Me sa enn ki pa pour Bondye pa ekout nou. Konmsa menm ki nou kapab rekonnet ant Lespri Laverite ek lespri lerer.

Bondye I Lanmour

⁷ Mon bann zanmi! Annou kontan kanmarad, akoz lanmour i sorti kot Bondye. Sa enn ki kontan, i zanfan Bondye e i konn Bondye.

⁸ Sa enn ki pa kontan, pa'n zanmen konn Bondye, akoz Bondye i lanmour.

⁹ La ki mannyer Bondye in montre son lanmour pour nou: In anvoy son sel Garson dan lemonn, pour ki par li, nou ganny lavi.

¹⁰ Lala kisisa lanmour: Pa nou ki'n kontan Bondye, me Bondye ki'n kontan nou e i'n anvoy son Garson koman en viktim, pour ki par li, nou bann pese i ganny pardonnen.

¹¹ Mon bann zanmi! Si Bondye in telman kontan nou, nou osi, nou devre kontan kanmarad.

¹² Personn pa'n deza war Bondye. Si nou kontan kanmarad, Bondye i viv dan nou e son lanmour i parfe dan nou.

¹³ La konman nou konnen ki nou pe viv dan li, e i viv dan nou: I'n donn nou son Lespri.

¹⁴ E nou, nou'n war e nou proklanmen ki Bondye Papa in anvoy son Garson koman Sover lemonn.

¹⁵ Sa enn ki deklare ki Zezi i Garson Bondye, Bondye i viv dan li, e li i dan Bondye.

¹⁶ Nou, nou konn sa lanmour ki Bondye i annan pour nou, e nou krwar dan sa lanmour. Bondye i lanmour. Sa enn ki reste dan lanmour i reste dan Bondye e Bondye i reste dan li.

¹⁷ Si lanmour i parfe dan nou, nou annan sa konfyans pour zour Zizman, akoz nou lavi isi lo later i parey lavi Zezi-Kri.

¹⁸ Dan lanmour, napa okenn lafreyer. Lanmour parfe i fer disparet lafreyer, akoz lafreyer i fer mazin pinisyon. Sa enn ki per, son lanmour pa parfe.

¹⁹ Nou, nou kontan, akoz Bondye in kontan nou an premye.

²⁰ Si en dimoun i dir: Mon kontan Bondye me i deteste son frer, i en manter. Annefe, si en dimoun i deteste son frer ki i war, i pa kapab kontan Bondye ki i pa war.

²¹ La komannman ki Bondye i'n donn nou: Sa enn ki kontan Bondye i devre osi kontan son frer.