1 Zan 3 - Labib An Kreol Seselwa

Zanfan Bondye

¹ Gete! Nou Papa in telman kontan nou, ki i apel nou zanfan Bondye. An realite se sa ki nou ete. Rezon akoz lemonn pa'n konn nou, se akoz i pa'n konn Bondye.

² Mon bann zanmi! Aprezan nou zanfan Bondye, e sa ki nou pou ete plitar pa ankor ganny revele. Me nou konnen ki kan Kris pou aparet, nou pou parey li, akoz nou pou war li parey i ete.

³ Tou dimoun ki annan sa lesperans dan Kris i vin pir, parey Senyer li menm i pir.

⁴ Sa enn ki fer pese, i kas Lalwa Bondye, akoz pese i dezobeisans Lalwa Bondye.

⁵ Annefe, zot konnen ki Zezi-Kri i'n vini pour fer disparet pese. Dan li napa okenn pese.

⁶ Sa enn ki reste ini avek li, pa fer pese. Sa enn ki fer pese pa'n war li e pa'n zanmen konn li.

⁷ Mon bann zanfan! Pa les personn tronp zot. Sa enn ki pratik lazistis, li osi i zis, parey Zezi-Kri li menm i zis.

⁸ Sa enn ki kontinyen fer pese i pour dyab, akoz dyab in fer pese depi o konmansman! Rezon akoz Garson Bondye in vini, se pour detri bann travay dyab.

⁹ Sa enn ki'n vin zanfan Bondye pa fer pese, akoz pwisans lavi ki sorti kot Bondye i dan li. I pa kapab kontinyen fer pese, akoz Bondye i son Papa.

¹⁰ La sa ki fer diferans ant zanfan Bondye ek zanfan dyab: Sa enn ki pa pratik lazistis, oubyen ki pa kontan son frer, i pa en zanfan Bondye.

Lanmour pour Kanmarad

¹¹ Annefe, la mesaz ki zot in tande depi o konmansman: Kontan kanmarad.

¹² Annou pa fer parey Kaen. I ti zanfan dyab e i ti touy son frer. Pour ki rezon i ti touy li? Akoz son bann aksyon ti move, e bann aksyon son frer ti zis.

¹³ Mon bann frer! Pa etonnen si lemonn i deteste zot.

¹⁴ Nou konnen ki nou'n sorti dan lanmor pour pas dan lavi. Nou konn sa, akoz nou kontan nou frer. Sa enn ki pa kontan, i ankor anba pouvwar lanmor.

¹⁵ Sa enn ki ay son frer, i en kriminel. Zot konnen ki en kriminel pa kapab posed lavi eternel ini avek Bondye.

¹⁶ La koman nou konnen kisisa lanmour: Zezi-Kri in donn son lavi pour nou. Donk, nou osi, nou devre donn nou lavi pour nou bann frer.

¹⁷ Si en dimoun ki annan plis ki ase dekwa viv, i war son frer dan bezwen me i ferm son leker, ki mannyer i kapab dir ki i kontan Bondye?

¹⁸ Mon bann zanfan! Annou pa kontan zis par bann zoli parol, e zoli diskour, me montre par nou bann aksyon ki nou lanmour i vre.

Lasirans devan Bondye

¹⁹ Konmsa ki nou pou konnen ki nou bann zanfan laverite. Konmsa, nou leker ava anpe devan li.

²⁰ Annefe, menm si nou leker i kondann nou, nou konnen ki Bondye i pli gran ki nou leker e ki i konn tou.

²¹ Mon bann zanmi! Si nou leker pa kondann nou, nou annan konfyans kan nou apros devan Bondye.

²² Nenport kwa ki nou demann li, nou pou gannyen, akoz nou gard son komannman e nou fer sa ki fer li plezir.

²³ La son komannman: Nou devre krwar dan non son Garson Zezi-Kri e nou devre kontan kanmarad parey Kris in ordonn nou.

²⁴ Sa enn ki obei komannman Bondye i viv dan Bondye, e Bondye i prezan dan li. Nou konnen ki Bondye i prezan dan nou, gras a Lespri Sen ki i'n donn nou.