1 Zan 2 - Labib An Kreol Seselwa

Kris I Nou Avoka

¹ Mon bann pti zanfan! Mon pe ekri zot sa, pour ki zot pa komet okenn pese. Me si i annan parmi zot ki komet pese, nou annan en avoka kot Bondye. Sa i Zezi-Kri, ki nou Lazistis.

² I'n ofer li menm, koman sakrifis pour nou ganny pardon nou pese. Pa zis pour nou, me osi pour pese lemonn antye.

³ Kan nou gard son komannman, nou rekonnet ki nou konn li.

⁴ Sa enn ki dir: Mon konn li. Me i pa gard son komannman, i en manter; laverite pa dan li.

⁵ Me sa enn ki gard son parol, lanmour Bondye i vreman parfe dan li. Konmsa, nou asire ki nou ini avek li.

⁶ Sa enn ki dir ki i ini avek li, i devre mars dan menm semen kot li menm in marse.

Komannman Nouvo

⁷ Mon bann zanmi! Pa en komannman nouvo ki mon pe ekri, me en vye komannman ki zot in resevwar depi o konmansman. Sa vye komannman i Parol ki zot in deza tande.

⁸ Pourtan, i en nouvo komannman ki mon pe ekri pour zot, ki vre dan Kris e dan zot osi, akoz fernwanr pe disparet e vre lalimyer i deza pe briye.

⁹ Si en dimoun i dir i dan lalimyer, me i deteste son frer, i ankor dan fernwanr.

¹⁰ Sa enn ki kontan son frer, i reste dan lalimyer, e i pa pou kapab tonbe.

¹¹ Sa enn ki deteste son frer, i dan fernwanr; i pe mars dan fernwanr. I pa konnen kote i pe ale, akoz fernwanr in rann li aveg.

¹² Mon bann zanfan! Mon pe ekri zot, akoz zot bann pese in ganny pardonnen, gras non Zezi.

¹³ Bann papa! Mon pe ekri zot akoz zot konn sa enn ki'n egziste depi o konmansman. Bann zennzan! Mon pe ekri zot akoz zot in ganny laviktwar lo Move.

¹⁴ Mon bann zanfan! Mon pe ekri zot, akoz zot konn Papa. Bann papa! Mon pe ekri zot akoz zot konn sa enn ki egziste depi o konmansman. Bann zennzan! Mon pe ekri zot, akoz zot for. Parol Bondye i reste dan zot e zot in ganny laviktwar lo Move.

¹⁵ Pa kontan lemonn, ni sa ki dan lemonn. Si en dimoun i kontan lemonn, lanmour Papa pa dan li.

¹⁶ Tou sa ki dan lemonn: Move dezir natir imen, lanvi posed sa ki nou war ek lorgey dan lavi tou le zour; tousala pa sorti kot nou Papa, me i sorti dan lemonn.

¹⁷ Lemonn ek tou son bann dezir pou disparet. Me sa enn ki fer lavolonte Bondye i viv pour touzour.

Bann Lennmi Kris

¹⁸ Mon bann zanfan! Lafen i pros. Zot in deza antann dir: Lennmi Kris pe vini. Deza, en kantite lennmi Kris in fini aparet. Konmsa ki nou konnen lafen i pros.

¹⁹ Sa bann dimoun in sorti kot nou, me zot pa ti vreman avek nou. Annefe, si zot ti avek nou, zot ti ava'n reste avek nou. Me zot in ale e konmsa, zot in montre ki zot pa ti avek nou.

²⁰ Me zot ki'n ganny konsakre par sa enn ki Sen, zot tou, zot in ganny konnesans laverite.

²¹ Alor, mon pe ekri zot, pa akoz zot pa konn laverite, me akoz zot konnen, e zot osi konnen ki okenn mansonz pa kapab sorti dan laverite.

²² Alor, lekel ki manter? Sa enn ki deklare ki Zezi pa Kris. Li menm lennmi Kris: Sa enn ki rezet Papa ek son Garson.

²³ Annefe, sa enn ki rezet Garson Bondye, i rezet osi son Papa. Sa enn ki aksepte Garson, i aksepte son Papa osi.

²⁴ Kanta zot, gard byen dan zot leker sa ki zot in tande depi o konmansman. Si sa ki zot in tande depi o konmansman, i reste dan zot, zot osi, zot ava reste ini avek Garson e avek son Papa.

²⁵ Promes ki i'n fer nou, se lavi eternel.

²⁶ Mon ti bezwen ekri zot lo size bann ki pe fer mannyer tronp zot.

²⁷ Kanta zot, Lespri ki zot in resevwar avek Kris, i reste dan zot e zot pa bezwen personn pour ansenny zot. Me son Lespri i ansenny zot tou keksoz. I pe ansenny zot tou sa ki vre, pa sa ki mansonz. Alor, parey Lespri in ansenny zot: Reste ini avek Kris.

²⁸ Wi! Mon bann zanfan! Reste ini avek Kris, de sort ki kan i ava aparet, nou ava ranpli avek konfyans, e nou pa pou onte devan li, ler i vini.

²⁹ Zot konnen ki Kris i zis. Alor, zot devre rekonnet ki sa enn ki pratik lazistis, i en zanfan Bondye.