1 Timote 5 - Labib An Kreol Seselwa

¹ Pa bezwen koz dir avek en vyeyar, me koz avek li konmsi i ou papa. Tret bann zennzan koman frer,

² bann fanm aze koman ou manman, e bann zenn fanm koman ou ser, avek en lespri pir.

Respe pour bann Vev

³ Okip avek respe bann vev ki vreman viv koman vev.

⁴ Si en vev i annan zanfan oubyen pti zanfan, fodre ki sa bann zanfan i aprann met an pratik zot devwar relizye dabor anver zot prop fanmir. Konmsa, zot ava pe ranpli zot devwar anver zot paran oubyen zot gran paran. Sanmenm sa ki fer plezir Bondye.

⁵ En fanm ki vreman viv koman en vev, ki'n reste tousel, i'n met son lespwar dan Bondye. I pa arete priy Bondye, lizour koman aswar, pour demann li son led.

⁶ Me en vev ki viv dan plezir in deza mor malgre ki i vivan.

⁷ Sanmenm sa ki fodre ou rapel zot, pour ki personn pa kapab repros zot.

⁸ Sa enn ki pa pran swen son parante, sirtou son prop fanmir pros, i'n abandonn lafwa; i pir ki en non-krwayan.

⁹ Pour ganny enskri lo lalis bann vev, fodre ki en fanm i annan omwen 60 an, e ki i'n marye zis en sel fwa.

¹⁰ Fodre ki i ganny rekonnet pour son travay byenfezans. Fodre ki i'n byen elve son bann zanfan, pratik lospitalite, montre limilite an lavan lipye bann krwayan, port sekour bann malere e pratik bann bonn aksyon.

¹¹ Pa met bann zenn vev lo lalis, akoz, kan zot lanvi marye ava pran zot, zot pou abandonn Kris.

¹² Zot ava alor koupab pour kas zot premye langazman avek Kris.

¹³ An plis ki sa, akoz zot nanryen fer, zot pran labitid pas zot letan sorti dan en lakaz pour al dan en lot. Pir ki sa: Zot koz bonnavini, zot fournen, e koz lo sa ki pa konsern zot.

¹⁴ Pour sa rezon, mon oule ki bann zenn vev zot remarye; ki zot ganny zanfan e pran swen zot lakaz. Konmsa, zot pa ava donn okenn lokazyon nou bann ladverser dir dimal lo nou.

¹⁵ Annefe, i annan detrwa ki'n abandonn laverite pour swiv Satan.

¹⁶ Si en krwayan i annan detrwa vev dan son fanmir pros, i devre donn zot led ki zot bezwen, san ki Legliz i bezwen pran sa responsabilite. Konmsa, Legliz ava kapab port swen bann vre vev.

Bann Ansyen

¹⁷ Bann ansyen ki diriz byen Legliz, zot merit resevwar en doub lapey, sirtou bann ki annan responsabilite pour prese e ansennyen.

¹⁸ Annefe, Lekritir i deklare: Pa met bayon lo mizo en be ki pe kraz legren. E ankor: En travayer i merit son saler.

¹⁹ Pa aksepte okenn lakizasyon kont en ansyen, amwen ki i annan de, oubyen trwa temwen.

²⁰ Konsernan bann ki kontinyen reste dan pese, reprimann zot an piblik, pour ki lezot osi i ganny krentif.

²¹ Nou demann ou solannelman devan Bondye, devan Zezi-Kri e devan tou bann lanz Bondye: Swiv sa bann regleman san okenn prezize e san fer preferans pour personn.

²² Pa prese pour enpoz lanmen lo personn, pour konfye li en responsabilite dan Legliz. Pa bezwen partisip dan pese lezot; gard ou lekor pir.

²³ Aret bwar zis delo, me bwar en pe diven akoz ou lestoma e akoz ou souvan malad.

²⁴ Pese serten dimoun i fasil war avan menm ki zot ganny zize. Me pour serten dimoun, zot pese i ganny dekouver plitar.

²⁵ Demenm, i fasil war bann bon aksyon. Menm sa bann ki pa aparet toudswit, pa kapab reste toultan kasyet.