1 Timote 1 - Labib An Kreol Seselwa

Konpliman

¹ Sa let i sorti kot Pol, zapot Zezi-Kri lo lord Bondye, nou Sover ek Zezi-Kri ki nou lesperans.

² Pour Timote, mon vre garson dan lafwa: Mon demande ki Bondye nou Papa, ek Zezi-Kri nou Senyer i donn ou lagras, pardon, ek lape.

Pol I Averti Kont Fo Doktrin

³ Parey mon ti dir ou kan mon ti pe al Masedwann, reste Efez kot serten dimoun pe ansenny fo doktrin. Fodre ou fer zot arete.

⁴ Dir zot aret krwar dan sa bann fab ek sa bann long lalis zanset. Tousala i plito anmenn diskisyon, e i pa ede realiz plan Bondye par lafwa.

⁵ Sa lord ki mon donn ou, i annan pour bi prodwir lanmour ki sorti dan en leker pir, en bon konsyans ek en lafwa senser.

⁶ Serten pa'n swiv sa legzanp e zot in egare dan bann diskisyon bet.

⁷ Zot in pretann ki zot profeser Lalwa Bondye; me zot pa konpran sa ki zot pe dir, ni sa ki zot pe ansennyen avek en tel konviksyon.

Vre Rol Lalwa

⁸ Annefe, nou tou nou konnen ki Lalwa i bon, a kondisyon ki nou servi li byen.

⁹ Annou rapel an partikilye ki Lalwa pa'n fer pour bann ki zis, me pour bann malfeter ek bann rebel; pour bann dimoun mesan ek bann peser; pour bann ki napa respe pour Bondye, ni pour sa ki sen; pour bann ki touy zot manman oubyen zot papa; pour bann kriminel;

¹⁰ pour dimoun ki viv dan limoralite, bann omoseksyel, bann ki fer trafik lesklav, bann manter, bann ki fer fo serman e bann ki fer toudsort keksoz kontrer avek prensip ek lansennyman kretyen.

¹¹ Sa lansennyman i dapre Bonn Nouvel laglwar ki Bondye ki sours nou boner, in konfye mwan.

Lagras Bondye pour Pol

¹² Mon remersye Zezi-Kri, nou Senyer ki'n donn mwan lafors pour sa travay. Mon remersye li ki'n met son konfyans dan mwan, e ki'n swazir mwan pour son servis,

¹³ menm si dan letan pase mon ti blasfenm li, persekit li e ensilte li. Me li, i'n tret mwan avek konpasyon, akoz mon ti fer tousala dan linyorans, san lafwa.

¹⁴ Nou Senyer in repann son lagras annabondans lo mwan. I'n donn mwan lafwa ek lanmour ki sorti dan lakominyon avek Zezi-Kri.

¹⁵ Sa parol i vre. I merit ganny aksepte plennman par tou dimoun: Zezi-Kri in vin dan lemonn pour sov bann peser; mwan an premye.

¹⁶ Me i'n tret mwan avek konpasyon, mwan ki pli gran peser. Konmsa, Zezi-Kri i montre tou son pasyans pour servi koman en legzanp pour tou bann ki pou krwar plitar dan li e resevwar lavi eternel.

¹⁷ Annou rann loner ek laglwar anver Lerwa eternel, sel Bondye imortel e envizib pour touzour! Amenn.

¹⁸ Timote, mon garson! Mon konfye ou sa lansennyman, ki annakor avek parol bann profet. Fer ki sa bann parol, i ou lafors dan sa bon konba ki ou'n livre

¹⁹ avek lafwa ek en konsyans trankil. Serten pa'n ekout zot konsyans; zot in arive ziska perdi lafwa.

²⁰ Parmi zot, i annan Imene ek Aleksann ki mon'n livre avek pwisans Satan, pour montre zot, ki zot devre aret ensilte Bondye.