1 Tesalonisyen 3 - Labib An Kreol Seselwa

¹ Alor, akoz nou ti nepli kapab siporte espere, nou ti deside reste tousel Atenn.

² Nou ti anvoy Timote, nou frer e serviter Bondye dan lanons Bonn Nouvel Kris. I ti pou fortifye e ankouraz zot dan zot lafwa,

³ pour ki personn parmi zot pa les li dekouraze par bann persekisyon ki nou pe sibir. Annefe, zot konnen ki sa bann persekisyon i fer parti plan Bondye pour nou.

⁴ Annefe, kan nou ti kot zot, nou ti anons zot ki nou ti pou ganny persekite. Parey zot konnen, sanmenm sa ki'n arive.

⁵ Pour sa rezon, akoz mon ti nepli kapab siporte espere, mon ti anvoy Timote pran nouvel zot lafwa. Mon ti per ki dyab ti'n tant zot e ki tou nou travay ti ava'n vin initil.

⁶ Aprezan, Timote in retournen sorti kot zot. I'n donn nou bann bon nouvel konsernan zot lafwa ek zot lanmour. I'n dir nou ki zot mazin nou avek bokou lafeksyon e ki zot osi, zot anvi war nou, parey nou anvi war zot.

⁷ Ensi, mon bann frer ek ser! Dan tou nou bann langwas ek nou bann soufrans, nouvel zot lafwa in ankouraz nou.

⁸ Aprezan nou reviv, akoz zot reste solid dan Senyer.

⁹ Ki mannyer nou pou remersye Bondye lo zot size, pour tou lazwa ki nou gannyen akoz zot, devan li?

¹⁰ Nou sipliy li aswar koman lizour, pour permet nou revwar zot fas a fas e konplet sa ki manke dan zot lafwa.

¹¹ Mon demann Bondye nou Papa, e nou Senyer Zezi, diriz nou semen pour nou vin kot zot.

¹² Mon demann Senyer ogmant lanmour ki zot annan pour kanmarad e pour tou dimoun, parey lanmour ki nou annan pour zot.

¹³ I ava fortifye zot leker e rann zot sen e parfe devan Bondye nou Papa, pour sa zour ki nou Senyer Zezi ava retournen avek tou son bann ki i'n konsakre pour li. Amenn.