1 Tesalonisyen 1 - Labib An Kreol Seselwa

¹ Sa let i sorti kot Pol, Silven ek Timote pour Legliz Tesalonik ki pour Bondye nou Papa ek Senyer Zezi-Kri: Lagras ek lape ava avek zot.

Lavi ek Lafwa bann Tesalonisyen

² Nou touzour remersye Bondye lo zot size e nou touzour mansyonn zot dan nou lapriyer.

³ Annefe, devan Bondye nou Papa, nou rapel zot lafwa ki efikas, zot lanmour ki aktif, e zot lesperans ki solid dan nou Senyer Zezi-Kri.

⁴ Nou bann frer ek ser! Nou konnen ki Bondye i kontan zot, e ki i'n swazir zot pour li.

⁵ Nou pa'n anons zot Bonn Nouvel zis an parol, me osi avek pwisans, ek sekour Lespri Sen e avek konviksyon. Annefe, zot i'n war koman nou'n konport nou parmi zot, pour zot dibyen.

⁶ Zot in swiv nou legzanp ek legzanp nou Senyer; menm si zot in bokou soufer, zot in resevwar Parol Bondye avek lazwa dan Lespri Sen.

⁷ Alor, zot in vin en legzanp pour tou bann krwayan dan Masedwann ek Lagres.

⁸ Annefe, parol Senyer in sorti kot zot e ganny proklanmen non selman dan Masedwann ek Lagres, me nouvel zot lafwa dan Bondye in osi repann partou. Nou pa bezwen koz plis lo la.

⁹ Dimoun i rakonte ki mannyer zot in akey nou e koman zot in abandonn bann zidol pour servi Bondye ki vivan e vre.

¹⁰ Zot pe espere ki son garson i retournen sorti dan lesyel. Li menm ki Bondye i'n resisite. In delivre nou kont lakoler Bondye ki pe vini.