1 Samyel 30 - Labib An Kreol Seselwa

David I Detri bann Amalesit

¹ Trwa zour apre ki David ti'n ariv Ziklag avek son bann zonm, bann Amalesit ti'n fer en lenvazyon dan Negev e dan Ziklag, ki zot ti detri e brile.

² Zot ti'n fer prizonnyen bann fanm, tou bann zabitan, gran koman pti. Zot pa ti'n touy personn, me zot tou ti ganny anmennen, ler zot ti ale.

³ Ler David ek son bann zonm ti ariv dan lavil, zot ti trouv lavil brile, e zot bann fanm, bann garson ek bann fiy ti'n ganny pran prizonnyen.

⁴ Alor, David ek tou lepep ki ti avek li ti plere, ziska ki zot ti nepli annan lafors pour plere.

⁵ Bann fanm David, Ahinoanm ki sorti Zizreel ek Abigail, vev Nabal sorti Karmel, ti'n osi ganny pran prizonnyen.

⁶ David ti dan en gran tourman, akoz lepep ti pe mazin saboul li akoud ros. Zot tou, zot ti bokou ankoler, sakenn pour son bann garson e bann fiy. Me David ti repran kouraz e met son konfyans dan SENYER, son Bondye.

⁷ David ti dir pret Abiatar, garson Ahimelek, “Anmenn mwan lefod.” Abiatar ti anmenn lefod kot David.

⁸ David ti konsilte SENYER e demande, “Si mon pourswiv sa troup, eski mon pou zwenn zot?” SENYER ti reponn li, “Pourswiv zot; ou ava zwenn zot e delivre bann prizonnyen.”

⁹ Alor, David ti konmans marse avek son 600 zonm e zot ti ariv kot pti larivyer Besor, kot bann ki ti'n reste deryer, ti'n arete.

¹⁰ David avek 400 zonm ti kontinyen pourswiv lennmi; me 200 zonm ti tro fatige pour kontinyen.

¹¹ Zot ti trouv en Ezipsyen dan laplenn e zot ti anmenn li kot David. Zot ti donn li keksoz pour manze e bwar.

¹² Zot ti donn li en pake fig ek de pake rezen sek. I ti manze, e i ti reganny lafors, akoz i pa ti'n manze ni bwar depi trwa zour.

¹³ David ti demann li, “Lekel ou met, e kote ou sorti?” I ti reponn, “Mon en garson Ezipsyen, lesklav en Amalesit; mon met in abandonn mwan akoz mon ti tonm malad, i annan trwa zour.

¹⁴ Nou ti fer en latak dan teritwar bann Keretit, dan teritwar Zida, e dan teritwar bann Kalebit, dan Negev. Nou'n met dife dan Siklag.”

¹⁵ David ti demann li, “Eski oule kondwir mwan kot sa troup?” I ti reponn li, “Fer serman devan Bondye, ki ou pa pou fer touy mwan, e ki ou pa pou livre mwan dan lanmen mon met. Alor, mon ava kondwir ou kot sa troup.”

Laviktwar David lo bann Amalesit

¹⁶ Alor, sa Ezipsyen ti gid David. Bann Amalesit ti'n enstal zot partou dan sa pei. Zot pe manze, bwar e fer lafet, akoz sa kantite piyaz lager ki zot ti'n pran dan pei bann Filisten e dan pei Zida.

¹⁷ David ti atak zot, e bat zot depi bomaten ziska lannmen swar. Personn pa ti sape, eksepte 400 zennzan ki ti reisi sove lo samo.

¹⁸ David ti reganny tou sa ki bann Amalesit ti'n pran; i ti reisi repran son de fanm.

¹⁹ Personn pa ti manke, ni pti, ni gran, ni garson, ni fiy; nanryen pa ti manke dan tou sa ki zot ti'n pran; David ti retourn avek tou.

²⁰ David ti osi pran tou bann troupo; bann berze ki ti pe anmenn troupo ti dir: Sa piyaz lager ki David in pran.

²¹ David ti ariv kot sa 200 zonm ki, akoz zot ti tro fatige pour swiv, ti'n reste kot larivyer Besor. Zot ti sorti pour al zwenn David ek bann zonm ki ti avek li. David ti apros zot e demann zot nouvel.

²² Tou sa bann move zonm, san moral, parmi bann ki ti'n al avek David, ti dir, “Sa bann zans pa pou partisip dan sa ki nou'n repran, akoz zot pa ti vin avek nou. Sak zonm ava ganny zis son fanm ek son bann zanfan, e ale.”

²³ Me David ti dir, “Mon bann frer! Pa fer en keksoz parey, avek sa ki SENYER in donn nou; i'n protez nou e in livre dan nou lanmen sa troup ki ti'n mont kont nou.

²⁴ Lekel ki pou donn zot rezon dan sa zafer? Par pour bann ki'n desann pour al lager, i devre parey par pour sa bann ki'n reste pour vey bagaz: Zot ava partaze.”

²⁵ Depi sa zour, sa ti vin en lalwa e en regleman pour pep Izrael.

²⁶ Ler David ti ariv Siklag, i ti anvoy en par sa ki i ti'n anmennen kot son bann zanmi, bann ansyen dan Zida. I ti dir, “La en prezan pour zot dan sa ki nou'n pran avek bann lennmi SENYER.”

²⁷ David ti anvoy en par pour bann ansyen dan lavil partou kot li ek son bann zonm ti'n traverse: Betel, Sid Ramot, Yatir;

²⁸ dan Aroer, Sifmot ek Estemoa;

²⁹ dan Rakal ek lavil Yeramelit ek bann Kainit;

³⁰ dan Horma, Bor-Asann, Atak,

³¹ ek Hebron, ek tou bann landrwa kot zot in pase.