1 Samyel 3 - Labib An Kreol Seselwa

Bondye I Apel Samyel Koman Son Profet

¹ Sa zenn garson, Samyel, ti kontinyen servi SENYER anba sirveyans Eli. Dan sa lepok, mesaz sorti kot SENYER ti rar; i ti pa souvan kominik par vizyon.

² Eli ti pe dormi dan son plas. I pa ti war byen kler; son lizye ti'n vin sonm.

³ Lalanp ki alimen dan sanktyer pa ti ankor tennyen. Samyel ti pe dormi dan tanp SENYER kot Kof Bondye ti ete.

⁴ SENYER ti apel Samyel. Samyel ti reponn, “Wi, la mon la!”

⁵ I ti tay kot Eli e dir, “Wi, ou'n apel mwan.” Eli ti reponn, “Non, mon pa'n apel ou, retournen al dormi.” Alor, Samyel ti al dormi.

⁶ SENYER ti apel Samyel ankor. Samyel ti leve e al kot Eli. I ti dir, “La mon la! Ou'n apel mwan?” Eli ti reponn, “Non, mon pa'n apel ou, mon garson. Retournen, al dormi.”

⁷ Samyel pa ti ankor konn SENYER, e SENYER pa ti ankor adres li laparol.

⁸ SENYER ti apel Samyel pour en trwazyenm fwa. Ankor en fwa, Samyel ti al kot Eli. I ti dir, “Wi, ou'n apel mwan.” Eli ti konpran ki SENYER ki ti pe apel sa garson.

⁹ Alor, i ti dir Samyel, “Al dormi; si ou antann apel ou ankor, ou ava dir: Koze SENYER, ou serviter pe ekoute.” Samyel ti al dormi dan son plas.

¹⁰ SENYER ti vin ankor e prezant li parey lezot fwa. I ti apel li, “Samyel! Samyel!” Samyel ti reponn, “Koze. Ou serviter pe ekoute.”

¹¹ Alor, SENYER ti dir Samyel, “Mon pou fer arive dan Izrael, en keksoz ki pou fer tranble sa ki tande.

¹² Sa zour, mon pou akonpli tou sa ki mon'n predir lo Eli ek son fanmir, depi konmansman ziska lafen.

¹³ Mon'n deza averti li ki mon pou pini son fanmir pour touzour, pour bann krim ki i konnen. Son bann garson in ensilte Bondye; li i ti konnen, me i'n soutir zot.

¹⁴ Alor, mon'n fer en serman konsernan fanmir Eli; akoz sa krim, mon pa pou zanmen aksepte ni sakrifis, ni lofrann.”

¹⁵ Samyel ti dormi ziska bomaten. Ler i ti leve, i ti ouver bann laport tanp. I ti per pour rakont son vizyon avek Eli.

¹⁶ Me Eli ti apel dir, “Samyel mon garson.” Samyel ti reponn, “Wi, la mon la.”

¹⁷ Eli ti demann li, “Ki SENYER in dir ou? Pa kasyet mwan nanryen. Bondye ava pini ou severman si ou pa dir mwan tou sa ki i'n dir ou.”

¹⁸ Alor, Samyel ti rakont li tou, san kasyet nanryen. Eli ti dir, “Li menm SENYER, i ava fer sa ki fer li plezir.”

¹⁹ Samyel ti grandi. SENYER ti avek li e i ti fer realize tou son bann parol.

²⁰ Pep Izrael antye, depi Dann ziska Berseba, ti konnen ki SENYER ti'n swazir Samyel koman son profet.

²¹ Prezans SENYER ti kontinyen aparet dan silo. SENYER ti kominik avek Samyel dan Silo par son Parol.