1 Samyel 11 - Labib An Kreol Seselwa

Laviktwar Sail lo bann Amonit

¹ Nahas, lerwa bann Amonit ti dres son kan kont Yabes-Galaad. Tou bann zonm Yabes ti dir Nahas, “Fer en lalyans avek nou e nou ava servi ou.”

² Me Nahas, lerwa bann Amonit, ti reponn zot, “Mon ava aksepte lo sa kondisyon: Mon pou krev lizye drwat zot tou e zet en dezoner lo pep Izrael antye.”

³ Bann ansyen dan Yabes ti dir li, “Donn nou en dele set zour, letan pour nou anvoy bann mesaze dan tou teritwar Izrael. Si personn pa oule sov nou, nou ava rann nou lekor.”

⁴ Kan bann mesaze ti ariv Gibea kot Sail ti reste, zot ti raport sa nouvel avek lepep e tou dimoun ti plere.

⁵ Sail ti pe vini, sorti dan laplenn avek son bann bef. I ti demande, “Ki lepep i gannyen pour li plere?” Zot ti raport li mesaz sorti kot bann zabitan Yabes.

⁶ Ler Sail ti antann sa parol, lespri Bondye ti sezi li e i ti pran en gran lakoler.

⁷ I ti pran de bef, koup zot an morso e par lentermedyer bann mesaze, i ti anvoy partou dan teritwar Izrael, avek sa mesaz: La sa ki pou arive avek bef tou bann ki pa swiv Sail ek Samyel dan lager. Lafreyer pour SENYER ti tonm lo lepep, e zot tou, ti zwenn ansanm avek Sail.

⁸ Sail ti rasanble zot Bezek. Ti annan 300,000 zonm lo kote Izrael, e 30,000 zonm sorti Zida.

⁹ Zot ti dir bann mesaze, ki ti'n vini, “Al dir bann popilasyon Yabes ek Galaad: Demen, avan soley i vin so, zot ava ganny laviktwar.” Kan popilasyon Yabes ti antann bann mesaze dir sa, zot ti rezouir.

¹⁰ Zot ti dir bann Amonit, “Demen, nou ava rann nou lekor e zot ava fer sa ki zot oule avek nou.”

¹¹ Lannmen, Sail ti diviz lepep an trwa group. Granmaten, zot ti antre dan kan bann Amonit e bat zot ziska lasaler lazournen ti monte. Tou bann sirvivan ti disperse.

Sail i Ganny Konfirmen koman Lerwa

¹² Lepep ti dir Samyel, “Lekel ki ti dir: Eski Sail ki pou vin nou lerwa? Livre nou sa bann zonm e nou ava touy zot.”

¹³ Me Sail ti dir, “Personn pa pou touy en zonm ozordi, akoz ozordi, SENYER in realiz en laviktwar dan Izrael.”

¹⁴ Samyel ti dir lepep: Annou mont Gilgal pour konfirm Sail koman lerwa.

¹⁵ Alor, tou dimoun ti al Gilgal. La, zot ti proklanm Sail lerwa devan SENYER. Zot ti ofer sakrifis lape devan SENYER; la, Sail ek tou bann Izraelit ti fer en gran lafet.