1 Samyel 1 - Labib An Kreol Seselwa

¹ Ti annan en zonm ki ti apel Elkana, sorti Ramataim-Sofim, en lavil dan montanny Efraim. I ti garson Yerohanm, garson Tohou, garson Elihou, garson Souf, en Efratit.

² Elkana ti annan de fanm; enn ti apel Ann e lot ti apel Penina. Penina ti annan zanfan, tandis ki Ann ti napa.

³ Toulezan, sa Elkana ti kit son lavil e mont dan tanp Silo pour al adore e ofer sakrifis SENYER liniver. Sa ti tanp kot de garson Eli, Hofni ek Fineas ti pret devan SENYER.

⁴ Zour Elkana ti ofer sakrifis, i ti annan labitid donn son fanm Penina, son bann garson ek son bann fiy, en morso lavyann sakenn.

⁵ Me i ti donn Ann en pli bon morso, akoz i ti kontan li bokou, menm si SENYER pa ti'n donn li zanfan.

⁶ Penina, lot fanm Elkana, ti touzour pe provok Ann pour fer li sagren, akoz SENYER pa'n donn li zanfan.

⁷ Sa ti kontinyen lannen apre lannen. Sak fwa ki Ann ti mont dan tanp SENYER, Penina ti provok li e Ann ti plere e i pa ti manze.

⁸ Son mari Elkana ti demann li, “Ann! Akoz ou plere e ou pa manze? Akoz ou tris? Eski mon pa vo pour ou plis ki dis garson?”

⁹ Apre ki zot ti'n manze e bwar Silo, Ann ti leve. Pret Eli ti pe asiz lo son sez obor tanp SENYER.

¹⁰ Ranpli avek lanmertim, Ann ti priy SENYER e plere asodlarm.

¹¹ I ti fer sa ve: SENYER Toupwisan! Si ou zet en regar lo ou servant, dan son leta mizer, si ou pran pitye e pa oubliy ou servant; si ou donn mwan en garson, mon pou konsakre li tou son lavi pour servi ou. Razwar pa pou zanmen pas lo son latet.

¹² Pandan ki i ti pe priy SENYER, Eli ti obzerv son labous.

¹³ Ann ti pe priy dan son leker, zis son lalev ki ti bouze, okenn son pa ti sorti. Eli ti mazinen ki Ann ti sou.

¹⁴ I ti dir li, “Ziska kan ou pou reste sou? Aret bwar! Al desoule!”

¹⁵ Ann ti reponn, “Non, mon pa sou, me mon en fanm byen malere. Mon pa'n bwar ni diven, ni okenn lalkol, me mon pe devid mon leker devan SENYER.

¹⁶ Pa pran ou servant pour en fanm san moral. Pandan tou sa letan, se mon soufrans ek mon douler ki mon pe eksprimen.”

¹⁷ Eli ti reponn, “Al anpe! Bondye Izrael ava donn ou tou sa ki ou'n demande.”

¹⁸ Ann ti dir, “Mon ou servant; mon swete ki ou ava touzour bon anver mwan!” Apre, i ti ale. I ti manze e i ti nepli tris.

¹⁹ Lannmen byen granmaten, zot ti leve e al ador SENYER. Apre, zot ti retourn se zot Rama. Elkana ti dormi avek son fanm Ann, SENYER ti ekout lapriyer Ann.

²⁰ Ver lafen lannen, Ann ti tonm ansent e i ti ganny en garson ki i ti apel Samyel an dizan: Mon ti demann li SENYER.

²¹ Plitar, Elkana avek son fanmir antye, ti mont Silo pour ofer SENYER son sakrifis parey son labitid toulezan e pour akonpli son ve.

²² Me Ann pa ti al avek li. I ti dir son mari, “Ler nou garson ava'n sevre, mon ava anmenn li e prezant li devan SENYER; i ava reste laba pour touzour.”

²³ Elkana ti reponn, “Fer sa ki fer ou plezir. Reste isi ziska ki i fini ganny sevre. Mon demande ki SENYER i tenir son promes.” Alor, Ann ti reste Rama pour kontinyen donn tete son garson ziska ki i ti sevre li.

²⁴ Apre ki i ti'n sevre li, i ti anmenn li dan tanp Silo. I ti pran osi avek li en pti toro 3 an, en sak lafarin ek en sak ranpli avek diven.

²⁵ Zot ti ofer sa toro an sakrifis. Apre, zot ti anmenn sa garson devan Eli.

²⁶ Ann ti dir Eli, “Pardon mon senyer! I vre! Mwan menm sa fanm ki ti debout isi pour priy SENYER.

²⁷ Pour sanmenm sa zanfan ki mon ti pe priye; SENYER in donn mwan sa ki mon ti pe demann li.

²⁸ Aprezan, i mon tour pour donn li SENYER. I ava reste pour SENYER tou dilon son lavi.” Alor, zot tou, zot ti prosternen devan SENYER.