1 Rwa 6 - Labib An Kreol Seselwa

Konstriksyon Tanp

¹ Salomon ti konmans konstriksyon tanp SENYER 480 lannen apre ki pep Izrael ti'n sorti Lezip, dan katriyenm lannen son renny lo Izrael, dan mwan Ziv, ki dezyenm mwan dan lannen.

² Tanp ki Salomon ti konstri pour SENYER ti mezir 30 met longer, 10 met larzer, e 15 met oter.

³ Lo devan tanp, ti annan en vestibil ki ti mezir 10 met larzer; menm larzer avek tanp e senk met profonder.

⁴ Tanp ti osi annan lafnet avek griyaz ankadre.

⁵ Salomon ti osi konstri letaz avek lasanm toultour, kont miray tanp ek son lasal pour ladorasyon.

⁶ Anba, ti de met edmi larzer, premye letaz ti trwa met larzer e dezyenm letaz, ti trwa met edmi. Deor, i ti met sipor avek miray, toultour pour tenir bann baro, san bezwen apiy zot dan miray tanp.

⁷ Tou bann ros pour konstriksyon tanp, ti ganny prepare depi dan karyer. Konmsa, pandan konstriksyon, ti napa okenn tapaz en sel koud marto, ni koud lars, ni okenn tapaz zouti an fer dan tanp.

⁸ Lantre pour parti anba, ti lo kote Sid tanp, e ou mont par leskalye tournan, pour ariv letaz, e kontinyen ziska trwazyenm letaz.

⁹ I ti fini konstriksyon tanp e met en plafon avek poto ek plans an sed.

¹⁰ Letaz ki ti ganny konstri toultour, ti mezir de met edmi oter; i ti tenir lo miray tanp par bann poto sed.

¹¹ SENYER ti koz avek Salomon:

¹² Ou pe konstri en tanp pour mwan; si ou mars dapre mon bann lalwa, si ou azir dapre bann regleman ki mon'n donn ou; si ou obei tou mon bann komannman, mon ava akonpli tou mon bann promes ki mon ti fer avek ou papa David, lo ou size.

¹³ Mon pou reste avek pep Izrael; mon pa pou abandonn mon pep Izrael.

¹⁴ Apre ki Salomon ti'n termin konstriksyon tanp,

¹⁵ i ti fer miray anndan, avek plans sed depi anba ziska plafon; i ti lanbri konpletman son anndan; e ater, i ti met en planse an bwa sapen.

¹⁶ I ti osi lanbri miray lasal deryer avek dibwa sed depi anba, ziska lao, lo en oter 10 met. Answit, anndan, i ti aranz en lasal sakre, Lasal Tre Sen.

¹⁷ Lasal tanp ki ti par devan, ti mezir 20 met longer; i ti form lasal sen.

¹⁸ Lo tou dibwa lanbri, ti annan skilptir laform kalbas ek fler ki'n ouver. Ou pa ti war okenn ros; partou ti kouver avek dibwa sed.

¹⁹ Salomon ti enstal Lasal Tre Sen dan milye tanp pour plas Kof lalyans SENYER.

²⁰ Devan lasal sen ki ti mezir 10 met longer, 10 met larzer e 10 met oter e kouver avek lor, i ti fer en lotel an bwa sed, osi kouver avek lor.

²¹ Salomon ti kouver partou anndan tanp avek lor pir. I ti plas en lasenn annor devan Lasal Tre Sen, ki ti osi kouver avek lor.

²² Tanp antye ti konpletman rekouver avek lor, ensi ki lotel ki ti devan Lasal Tre Sen.

²³ Zot ti fer de seriben an bwa zoliv, senk met oter, pour met dan Lasal Tre Sen.

²⁴ Lezel seriben ti mezir de met edmi, e son de lezel ouver ti mezir senk met, en bout ziska lot.

²⁵ Dezyenm seriben osi ti mezir senk met longer, e zot ti annan menm laform.

²⁶ Tou le de seriben ti senk met oter.

²⁷ Sa de seriben ti ganny plase dan milye Lasal Tre Sen. Zot lezel ti ouver. Lezel premye seriben ti tous en miray avek en kote son lezel e dezyenm seriben, ti tous lot miray avek son lezel; zot de lezot lezel ti tous kanmarad dan milye lasal.

²⁸ Tou le de seriben ti ganny rekouver avek lor.

²⁹ Lo tou bann miray tanp, zot ti grav bann motif dan laform seriben, brans palm ek bann fler ki'n ouver.

³⁰ Zot ti rekouver planse tanp dan tou le de lasal avek lor.

³¹ Zot ti ferm Lasal Tre Sen par en laport de batan an bwa zoliv; pilye ek lankadreman laport ti form en senkyenm son miray.

³² Lo tou le de batan laport ti osi annan skilptir seriben, brans palm ek fler ki'n ouver. Zot ti ganny rekouver avek bann plak annor: Seriben, brans palm.

³³ Zot ti osi fer laport pour lantre tanp; lankadreman ti form en kar dimansyon miray.

³⁴ Son de batan ti an bwa sapen e sak batan ti formen par de pano ki ti pivot lo zot menm.

³⁵ Zot ti osi grav lo la, bann seriben, brans palm ek fler ki'n ouver, e rekouver zot avek lor.

³⁶ Apre, zot ti antour lakour avek en miray fer avek trwa ranze ros taye, plase enn lo lot, avek en ranze dibwa sed.

³⁷ Pandan katriyenm lannen renny Salomon, dan mwan Ziv, zot ti poz fondasyon tanp SENYER.

³⁸ Konstriksyon antye ti terminen dan tou son bann detay dan onzyenm lannen renny Salomon, dan mwan Boul ki wityenm mwan. Sa konstriksyon ti pran 7 an.