1 Rwa 5 - Labib An Kreol Seselwa

Salomon I Prepar Konstriksyon Tanp

¹ Hiranm, lerwa lavil Tir, ti en zanmi lerwa David. Ler i ti antann ki Salomon in ganny konsakre koman lerwa pour ranplas son papa, i ti anvoy en delegasyon kot Salomon.

² Salomon ti anvoy en mesaz kot Hiranm.

³ “Ou konnen ki mon papa David pa ti kapab konstri en tanp pour SENYER son Bondye, akoz lager avek son bann lennmi ki antour li, ziska ki SENYER in donn li laviktwar e fer zot soumet avek li.

⁴ Aprezan SENYER, mon Bondye, in akord mwan lape lo tou frontyer; mon nepli annan ni lennmi, ni maler.

⁵ Mon'n deside konstri en tanp konsakre pour SENYER mon Bondye. Annefe, SENYER ti'n deklare avek mon papa David: Ou garson, sa enn ki mon pou swazir pour ranplas ou lo tronn, ki pou konstri sa tanp an loner mon non.

⁶ Alor, donn lord pour koup bann pye sed Liban pour mwan. Mon konnen napa personn ki konn koup dibwa parey bann Sidonit. Mon bann zonm ava zwenn ansanm avek ou bann serviter; mwan menm mon ava pey ou tou sa ki ou ava demande pour zot lapey.”

⁷ Parol Salomon ti fer plezir Hiranm en kantite. I ti dir li, “SENYER i ganny beni, ozordi in donn David en garson ranpli avek lasazes pour gouvern sa gran pep.”

⁸ Alor, Hiranm ti anvoy sa repons pour Salomon: Mon'n ganny ou mesaz. Mon dakor pour fourni tou dibwa sed ek sapen ki ou bezwen.

⁹ Mon bann serviter ava koup dibwa dan montanny Liban e transport zot ziska borlanmer, e anmar zot ansanm pour fer flote ziska landrwa ki ou menm ou ava swazir. La, zot ava separ bann tron e ou bann serviter ava vin serse. Pour peyman, ou ava fourni manze pour bann serviter mon pale.

¹⁰ Alor, Hiranm ti fourni Salomon tou dibwa sed ek dibwa sapen ki i ti bezwen.

¹¹ Lo son kote, toulezan, Salomon ti fourni Hiranm 6,000 tonn dible ek 8,000 lit delwil doliv meyer kalite, pour son pale.

¹² SENYER ti donn Salomon lasazes parey i ti'n promet li. Lape ti rennyen ant Salomon ek Hiranm e zot ti fer en lalyans ant zot.

Salomon I Organiz Travay Latas

¹³ Lerwa Salomon ti enpoz travay latas lo pep Izrael; 30,000 Izraelit ti travay.

¹⁴ I ti anvoy zot Liban, par group 10,000 par mwan. Zot ti pas en mwan Liban, e de mwan se zot. Adoniranm ti kontrol tou travay.

¹⁵ Salomon ti annan ankor 70,000 mannev ek 80,000 tayer ros dan montanny,

¹⁶ san kont 3,300 zonm pour konmande, ki ti anba sirveyans bann gouverner Salomon.

¹⁷ Zot ti egzekit lord Salomon pour tay bann gran e zoli ros pour fer fondasyon tanp.

¹⁸ Bann zouvriye Salomon, bann zouvriye Hiranm ek bann ki ti sorti Gebal ti ed zot pour prepar dibwa e tay ros pour konstriksyon tanp.