1 Rwa 4 - Labib An Kreol Seselwa

Salomon I Organiz Son Rwayonm

¹ Lerwa Salomon ti lerwa lo pep Izrael antye.

² La bann sef dan son servis: Pret: Azarya, garson Sadok;

³ bann sekreter: Elioref ek Ahiya, garson Sisa; arsivis: Zozafat, garson Ahiloud;

⁴ sef larme: Benaya, garson Yoyada; bann pret: Sadok ek Abiatar.

⁵ Azarya, garson Natan, ti sef bann gouverner; Zaboud, garson Natan, ti pret e konseye personnel lerwa;

⁶ Ahisar ti sef pale lerwa; Adoniranm, garson Abda, ti sirveyan travay latas.

⁷ Salomon ti osi annan douz gouverner dan pei Izrael antye. Zot ti fourni provizyon pour lerwa ek pale antye, sakenn son tour pour en mwan dan lannen.

⁸ La zot non: Benn-Hour pour rezyon montanny Efraim;

⁹ Benn-Deker pour rezyon Makaz, Saalbim, Bet-Semes, Elonn ek Bet-Hanann;

¹⁰ Benn-Hesed, dan Aroubot pour rezyon Soko, ek pei Hefer antye;

¹¹ Benn-Abinadab dan tou rezyon Dor. I ti'n marye avek Tafat, fiy Salomon.

¹² Baana, garson Ahiloud pour rezyon Taanak, Megido ek rezyon Bet-Seann antye, ki ti pre Sartann; par anba Zizreel, depi Bet-Seann dan Abel-Mehola ziska lot kote Yokneanm.

¹³ Benn-Geber ti ganny Gamot-Galaad; i ti osi gouvern bann vilaz Yair, garson Manase, dan Galaad, ek rezyon Argob, lo plato Basann. Dan sa rezyon ti annan 60 lavil antoure avek miray ek baro ki ti annan verou an bronz.

¹⁴ Ahinadab, garson Ido, ti ganny rezyon Mahanaim;

¹⁵ Ahimas, ki ti'n osi marye avek en fiy Salomon, rezyon Neftali;

¹⁶ Baana, garson Ousai, rezyon Aser ek Bealot;

¹⁷ Zozafat, garson Paroua, rezyon Isakar.

¹⁸ Simei, garson Ela, ti ganny rezyon Benzamen;

¹⁹ Geber, garson Ouri, pei Galaad ek pei Sihonn, lerwa bann Amorit ek Og lerwa Basann. Ti annan en sel gouverner dan pei Zida.

²⁰ Zabitan rwayonm Zida ek Izrael ti nonbre koman disab dan bor lanmer. Zot ti annan dekwa pour manze e bwar.

²¹ Salomon ti gouvern tou bann rwayonm depi gran larivyer Efrat, pei Filisten, ziska frontyer Lezip. Lerwa sa bann rwayonm ti pey taks avek Salomon pandan tou zot lavi.

²² Provizyon ki Salomon ti servi tou le zour ti nef tonn semoul, 18 tonn lafarin,

²³ 10 bef gra, 20 bef ki nouri dan laplenn, 100 mouton, san kont bann serf, gazel, ek volay angrese.

²⁴ Salomon ti domin lo rezyon Was antye, tou dilon larivyer Efrat, depi Tifsa, ziska Gaza e tou bann lerwa dan sa rezyon ti soumet avek li. I ti viv anpe avek tou son bann vwazen.

²⁵ Bann zabitan Zida ek pep Izrael antye ti viv dan sekirite depi Dann ziska Berseba, sakenn anba son prop pye rezen ek son prop pye fig pandan renny Salomon antye.

²⁶ Salomon ti annan lekiri pour 40,000 seval; i ti annan 12,000 kavalye.

²⁷ Bann gouverner ti fourni tou neseser lerwa Salomon ek son bann envite, sakenn son mwan; zot ti fer sir ki i pa mank nanryen.

²⁸ Zot ti osi fourni lorz ek zerb pour bann seval, partou kot ti neseser, dapre son lord.

Lasazes Salomon I Depas pour tou Dimoun

²⁹ Bondye ti donn Salomon gran lasazes ek lentelizans, ek en grander lespri larz koman disab dan bor lanmer.

³⁰ Lasazes Salomon ti depas lasazes tou bann saz, Les avek Lezip.

³¹ Son lasazes ti depas zot tou, menm plis ki sa Ezrahit, Etann, menm Hemann, Kalkol ek Darda, bann garson Mahol. I ti renonmen pour son lasazes parmi tou bann nasyon vwazen.

³² I ti konpoz 3,000 proverb ek 1,005 sanson.

³³ I'n koz lo bann pye dibwa: Depi lo sed Liban, ziska lo izop ki pous lo miray. I'n osi koz lo zannimo, zwazo, reptil ek pwason.

³⁴ Dimoun sorti partou dan tou nasyon, anvoye par bann lerwa ki'n antann renonmen lasazes Salomon, ti vin ekout son lasazes.