1 Rwa 12 - Labib An Kreol Seselwa

Rasanbleman Sikenm

¹ Roboanm ti al Sikenm, akoz pep Izrael antye ti'n rasanble Sikenm pour proklanm li koman lerwa.

² Kan Zeroboanm, garson Nebat, ki ti'n sove Lezip, akoz lerwa Salomon, ti antann sa, i ti retournen sorti Lezip.

³ Zot ti fer apel li e Zeroboanm avek lasanble pep Izrael ti al koz avek Roboanm. Zot ti dir li.

⁴ “Ou papa ti rann nou fardo lour. Alor aprezan, si ou rann nou travay leze e tir sa fardo lour ki ou papa in enpoz lo nou, nou ava servi ou.”

⁵ I ti dir zot, “Ale e retourn kot mwan dan trwa zour.” Sa bann dimoun ti ale.

⁶ Lerwa Roboanm ti al konsilte bann ansyen ki ti dan servis son papa Salomon pandan son vivan. I ti demande, “Ki repons zot konsey mwan donn sa pep?”

⁷ Zot ti dir li, “Si ou montre ou koman en serviter anver sa pep, si ou servi zot byen, e koz byen avek zot, zot ava vin ou serviter pour touzour.”

⁸ Me i pa ti pran kont konsey sa bann ansyen. I ti prefere konsey bann zennzan ki ti'n grandi ansanm avek li e ki ti dan son servis.

⁹ I ti demann zot, “Ki konsey zot donn mwan pour reponn sa pep ki'n dir mwan: Alez fardo ki ou papa in met lo nou?”

¹⁰ Sa bann zennzan ki'n grandi ansanm avek li, ti reponn, “La sa ki ou pou dir sa pep ki'n dir ou: Ou papa ti rann nou fardo lour, me ou, alez sa fardo pour nou. La sa ki ou devre dir zot: Mon pti ledwa i pli gro ki leren mon papa.

¹¹ Si mon papa ti plas lo zot en fardo lour, mon pou rann li pli lour ankor. Mon papa ti bat zot avek en fwet. Me mwan, mon pou koriz zot avek skorpyon.”

¹² Alor, trwa zour plitar, Zeroboanm avek lepep antye ti vin kot Roboanm, parey lerwa ti'n dir: Retourn dan trwa zour.

¹³ Lerwa ti koz dir avek zot. I pa ti pran kont konsey bann ansyen.

¹⁴ I ti reponn zot dapre konsey bann zennzan: Mon papa ti rann zot fardo lour, me mwan, mon pou ogmant li. Mon papa ti pini zot avek fwet, me mwan, mon pou koriz zot avek skorpyon.

¹⁵ Alor, lerwa pa ti ekout sa ki lepep ti annan pour dir, akoz SENYER ti'n fer bann levennman tourn konmsa, pour fer son parol realize, parey SENYER ti'n dir avek Zeroboanm, garson Nebat par Silonit Ahiya.

Divizyon Rwayonm Izrael

¹⁶ Kan pep Izrael antye ti war ki lerwa pa pare pour ekout zot, zot ti reponn lerwa, “Ki par nou annan avek David? Nou napa nanryen avek garson Zese. Pep Izrael! Annou retourn dan nou latant. David! Okip ou prop zafer.” Alor, pep Izrael ti retourn se zot dan zot latant.

¹⁷ Roboanm ti kontinyen renny lo pep Izrael ki ti reste dan bann lavil Zida.

¹⁸ Roboanm ti anvoy Adoranm sef ki ti ansarz travoforse. Me bann Izraelit ti saboul li avek ros e touy li. Lerwa Roboanm ti sot lo son kales pour sove e al Zerizalenm.

¹⁹ Konmsa ki ziska ozordi, pep Izrael in revolte kont lafanmir David.

Zeroboanm I Renny lo Izrael

²⁰ Kan Izrael antye ti tande ki Zeroboanm ti'n retournen, zot ti fer li vin devan lasanble e proklanm li lerwa pep Izrael antye. Personn pa ti swiv lafanmir David, eksepte tribi Zida.

²¹ Kan Roboanm ti ariv Zerizalenm, i ti rasanble tou pep Zida ek tribi Benzamen: 180,000 meyer gerye pour lager kont rwayonm Izrael, pour li retourn, rwayonm Roboanm garson Salomon, anba son kontrol.

²² Me Bondye ti koz avek profet Semaya.

²³ “Dir Roboanm, garson Salomon, lerwa pep Zida, ek tou pep dan tribi Zida ek Benzamen ek leres pep Izrael,

²⁴ la sa ki SENYER i deklare: Zot pa pou monte pour al lager. Zot pa pou lager kont zot bann frer. Sakenn retourn se zot, akoz se mwan ki'n fer sa arive.” Zot ti obei parol SENYER, e zot ti retourn se zot parey SENYER ti'n dir.

Pese Zeroboanm

²⁵ Zeroboanm ti konstri lavil Sikenm dan rezyon montanny Efraim, kot i ti reste. Apre, i ti konstri Penouel.

²⁶ Zeroboanm ti dir dan li menm: Aprezan, rwayonm i kapab vin pour desandan David.

²⁷ Si sa pep i kontinyen mont Zerizalenm pour ofer sakrifis dan tanp SENYER, leker sa pep pou retourn ver son sef, Roboanm lerwa pep Zida. Zot pou touy mwan, e zot ava retourn avek Roboanm, lerwa Zida.

²⁸ Apre ki lerwa ti'n pran konsey, i ti fer stati de zenn bef annor. I ti dir lepep, “Zot in ase mont Zerizalenm. Pep Izrael! La zot bondye ki'n fer zot sorti Lezip.”

²⁹ I ti plas enn Betel e lot Dann.

³⁰ Sa ti en pese. Lepep ti al devan sa enn Betel e devan sa lot Dann.

³¹ Zeroboanm ti osi konstri bann dan landrwa sakre. Nenport ki ti ganny nonmen pret, menm sa bann ki pa ti sorti dan tribi Levi.

³² Zeroboanm ti etabli en lafet, kenzyenm zour dan wityenm mwan, parey lafet dan Zida e i ti ofer sakrifis lo lotel. I ti fer parey zot ti fer Betel kot i ti ofer sakrifis devan sa bann stati zenn bef ki i ti'n fer. I ti nonm bann pret lo bann oter ki i ti'n konstri

³³ I ti mont Betel devan lotel kenzyenm zour, dan wityenm mwan ki i ti'n etabli par son prop desizyon. I ti etabli en lafet pour pep Izrael e monte pour al bril lansan lo lotel.