1 Rwa 10 - Labib An Kreol Seselwa

Vizit Larenn Saba

¹ Larenn Saba ti'n antann koz lo renonmen Salomon akoz non SENYER, i ti vin teste li avek bann kestyon difisil.

² I ti ariv Zerizalenm avek en gran delegasyon, avek samo sarze avek en varyete zepis, en kantite lor, avek bann pyer presyez. Ler i ti ariv kot Salomon, i ti kestyonn li lo tou sa ki i ti mazinen.

³ Salomon ti reponn tou son bann kestyon; ti napa nanryen ki lerwa pa ti kapab eksplike.

⁴ Larenn Saba ti war tou lasazes Salomon, son pale ki i ti'n konstri,

⁵ bann repa ki ti ganny servi lo son latab, lafason viv son bann minis, labiyman son bann serviter, son responsab servis labwason, bann sakrifis konplet ki ganny ofer dan tanp SENYER. I pa ti konnen ki i pou dir.

⁶ Alor, i ti dir lerwa, “Tou sa ki mon ti'n antann lo ou size e lo ou lasazes dan mon pei, i vre;

⁷ me mon pa ti krwar sa bann rapor, ziska ki mon'n vin war avek mon prop lizye; me zot pa'n dir mwan lanmwatye. Ou larises ek ou lasazes i depas tou sa ki mon ti'n tande.

⁸ Ou bann fanm i ere; ou bann serviter ki servi ou toultan e antann ou bann parol lasazes i ere.

⁹ Loue SENYER, ou Bondye ki'n swazir ou e plas ou lo tronn Izrael! Akoz SENYER i kontan Izrael pour touzour; i'n etabli ou lerwa, pour ki ou azir dapre ladrwatir ek lazistis.”

¹⁰ I ti ofer lerwa trwa tonn edmi lor, en kantite zepis ek pyer presyez. Zot pa ti zanmen ganny otan zepis ki sa ki larenn Saba ti ofer lerwa Salomon.

¹¹ An plis ki sa, bann navir Salomon ki ti anmenn lor sorti Ofir, ti anmenn osi en kantite dibwa santal ek pyer presyez.

¹² Lerwa ti servi bann dibwa santal pour fer en balistrad pour tanp SENYER e pour pale rwayal. I ti fer osi bann laarp ek lir avek, pour bann santer. Depi sa zour, zanmen zot in ganny otan dibwa santal.

¹³ Avan ki larenn Saba ti retourn dan son pei avek son delegasyon, e an plis ki sa ki dan son zenerozite i ti'n fer li kado, lerwa Salomon ti donn li tou sa ki i ti kapab dezire.

Larises Salomon

¹⁴ Salomon ti resevwar 20 tonn lor par an.

¹⁵ San kont sa ki i ti gannyen dan komers avek bann marsan, bann lerwa etranze ek bann gouverner pei.

¹⁶ Lerwa Salomon ti fer 200 gran boukliye annor masif avek sis kilo lor pour sak boukliye.

¹⁷ I ti osi fer 300 pti boukliye annor masif. Pour sak boukliye i ti servi en kilo edmi lor. Lerwa ti plas zot dan Pale Lafore Liban.

¹⁸ Lerwa ti osi fer en gran tronn an livwar, kouver avek lor pir.

¹⁹ Sa tronn ti annan sis mars, en dosye dan en laform arondi ek lebra lo sak kote tronn, ek de lyon debout lo sak kote lebra.

²⁰ Lo peron, ti annan 12 lyon; enn lo sak kote sak mars. Okenn rwayonm pa ti'n zanmen fer en keksoz parey.

²¹ Tou son bann servis labwason ti annor, e tou bann vesel pale Lafore Liban ti annor pir; ti napa okenn vesel annarzan, akoz larzan pa ti annan gran valer dan letan Salomon.

²² Lerwa ti annan bann bato ki i ti anvoy Tarsis ansanm avek bann navir Hiranm. Enn fwa tou le 3 an, sa bann navir ti arive sorti Tarsis, sarze avek lor, larzan, livwar, zako ek pan.

²³ Par son larises ek son lasazes, lerwa Salomon ti pli gran lerwa lo later.

²⁴ Tou dimoun ti anvi ganny konsey Salomon pour ekout lasazes ki Bondye ti'n donn li.

²⁵ Sakenn ti anmenn bann kado, bann lobze annarzan oubyen annor, lenz, lamir, zepis, seval ek bourik. Zot ti fer sa tou le zour.

²⁶ Salomon ti rasanble bann kales lager, ek zot seval: 1,400 kales ek 12,000 seval; i ti plas dan bann lavil e kot lerwa dan Zerizalenm.

²⁷ Lerwa ti fer larzan dan Zerizalenm vin konmsi ros, e sed an gran kantite, parey sikomor dan Sefela.

²⁸ Salomon ti enport son bann seval Lezip ek Silisi kot son bann marsan ti al aste.

²⁹ En kales enporte sorti Lezip ti kout 600 pyes larzan e en seval ti kout 150 pyes larzan. Sa bann marsan ti osi fourni tou bann lerwa Hitit ek bann lerwa Aranm.