1 Korentyen 9 - Labib An Kreol Seselwa

Drwa e Devwar En Zapot

¹ Pa mon lib? Pa mon en zapot? Pa mon'n war Zezi nou Senyer? Pa zot rezilta mon travay dan servis Senyer?

² Menm si serten i refize rekonnet mwan koman en zapot, pour zot, mon enn sertennman. Annefe, zot laprev ki mon en zapot dan Senyer.

³ La koman mon defann mwan devan bann ki kritik mwan:

⁴ Eski mon napa drwa ganny nouritir ek labwason pour travay ki mon fer?

⁵ Eski mon napa drwa annan en fanm kretyen, parey lezot zapot, bann frer Senyer, ek Pyer?

⁶ Oubyen zis Barnabas ek mwan ki napa drwa pa travay pour nou ganny nou lavi?

⁷ Lekel sa solda ki servi dan en larme, ki bezwen pey son prop fre? Lekel ki plant rezen e napa drwa manz fri son plantasyon? Lekel ki gard mouton san ganny dile son troupo pour li bwar?

⁸ Mon pa pe dir sa baze zis lo lavi tou le zour. Lalwa osi i dir menm keksoz.

⁹ Annefe, i'n ganny ekri dan Lalwa Moiz: Pa met en bayon lo mizo en bef kan i pe pil lagrenn. Eski Bondye i enterese avek bef?

¹⁰ An realite, pa pour nou ki i'n koz konmsa? Sa parol in ganny ekri pour nou. Sa enn ki prepar later pour plante, sa enn ki prepar dible i travay avek lespwar pour li ganny en par dan rekolt.

¹¹ Nou'n senm dan zot en semans spirityel. Pa i normal ki nou rekolte en par dan zot byen materyel?

¹² Si serten i annan sa drwa lo zot, nou osi, nou annan plis rezon, pour nou annan sa drwa. Sepandan, nou pa'n servi sa drwa. O kontrer, nou'n siport tou pour pa met lobstak lo semen Bonn Nouvel Kris.

¹³ Zot konnen ki sa bann ki travay dan tanp, zot ganny zot manze dan tanp, e ki bann ki ofer sakrifis lo lotel, zot ganny zot par dan sa bann sakrifis.

¹⁴ Demenm, Senyer in ordonnen ki sa enn ki anons Bonn Nouvel, i devret viv par sa Bonn Nouvel.

¹⁵ Me mwan, mon pa'n servi okenn sa bann drwa, e mon pa pe ekri zot pour reklanmen. Mon prefere mor! Personn pa pou aras mwan sa ki fer mon lafyerte.

¹⁶ Pa akoz mon anons Bonn Nouvel ki mon annan rezon vant mon lekor, akoz sa i en lobligasyon pour mwan. Maler pour mwan si mon pa anons Bonn Nouvel!

¹⁷ Si mon ti'n swazir pour fer li par mon prop volonte, mon ti devre annan en saler. Me akoz mon'n ganny oblize fer li, mon ranpli senpleman sa tas ki mon'n ganny konfye.

¹⁸ Alor, ki saler mon merite? Se sa satisfaksyon pour anons Bonn Nouvel gratwitman, san servi bann drwa ki sa Bonn Nouvel i donn mwan.

¹⁹ Menm si mon lib anver tou dimoun, mon'n fer mwan lesklav tou dimoun, pour ganny pli gran kantite dimoun posib pour Kris.

²⁰ Parmi bann Zwif, mon fer mwan Zwif, pour mwan ganny bann Zwif. Parmi bann ki anba Lalwa Moiz, mon soumet mwan anba sa Lalwa, menm si mon pa anba sa Lalwa, pour mwan ganny sa bann ki anba sa Lalwa.

²¹ Demenm, parmi bann ki pa konn Lalwa Moiz, mon vin parey bann ki pa konn Lalwa, pour mwan ganny zot. Pourtan, devan Bondye, mon obei lalwa, akoz mon soumet mwan anba lalwa Kris.

²² Parmi bann ki feb, mon viv konmsi mwan osi mon feb pour mwan ganny zot. Alor, mon fer mwan vin tou avek tou dimoun, pour mwan sov par tou mannyer posib, detrwa parmi zot.

²³ Mon fer tousala pour Bonn Nouvel, pour ki mon ava ganny en par dan bann byen ki i promet.

²⁴ Zot konnen ki menm si tou dimoun i taye dan en stad, zis enn ki ganny premye pri. Alor, fer fason taye pour ganny sa premye pri.

²⁵ Tou bann atlet i soumet zot lekor anba en disiplin strik. Zot, zot fer sa pour en kouronn ki pa dire; me nou, nou fer li pour en kouronn ki pa pou zanmen fannen.

²⁶ Pour sa rezon mon pa tay an bonnavini. Mon parey en bokser ki pa donn koudpwen dan vid.

²⁷ Mon tret mon lekor severman, e mon gard li anba en kontrol strik, pour ki apre ki mon'n pres avek lezot, mwan menm mon pa ganny diskalifye.