1 Korentyen 4 - Labib An Kreol Seselwa

Zapot pour Kris

¹ Zot devre konsider nou koman bann serviter Kris, bann administrater plan sekre Bondye.

² Tou administrater, i devre ganny trouve fidel.

³ Pour mwan, i pa fer mwan nanryen si mon ganny zize par zot, oubyen dan nenport ki lakour imen. Mon pa ni menm ziz mon prop lekor.

⁴ Mon konsyans i kler; me sa, pa rann mwan inosan. Senyer li menm ki mon ziz.

⁵ Alor, pa ziz personn avan son letan fikse. Espere ki zour Senyer i vini: Li menm ki pou met okler sa ki'n ganny kasyet dan fernwanr, e met okler bann lentansyon sekre ki dan leker imen. Alor, Bondye pou felisit sakenn, dapre sa ki i merite.

⁶ Mon bann frer ek ser! Mon'n servi sa konparezon ant mwan ek Apolos pour enstri zot. Konmsa, par nou legzanp, zot ava aprann pour pa fer plis ki sa ki'n ganny ekri. Personn pa devre fer vantar pour fer preferans pour enn e mepriz en lot.

⁷ Lekel ki fer ou diferan avek lezot? Ki ou posede ki ou pa ti resevwar? Alor, si ou'n resevwar, akoz ou vant ou lekor konmsi ou pa'n resevwar?

⁸ Deza zot posed tou sa ki zot anvi: Zot in vin ris; zot in vin bann lerwa san nou. Mon ti ava kontan si zot ti vreman bann lerwa, pour ki nou osi, nou ti ava pe rennyen ansanm avek zot.

⁹ Annefe, i sanble mwan ki Bondye in met nou, bann zapot, dan dernyen plas, parey bann kondannen anmor: Nou'n ganny ekspoze an spektak pour lemonn antye, devan bann lanz e devan bann zonm.

¹⁰ Akoz Kris, nou pas pour bann fou. Me zot, zot saz dan linyon avek Kris. Nou, nou feb, me zot, zot for. Nou, nou ganny meprize, me zot, zot ganny loner.

¹¹ Konmela menm, nou pe siport lafen ek laswaf, nou napa lenz pour mete; nou ganny bate, e nou napa en demer.

¹² Nou travay dir avek nou prop lanmen. Kan nou ganny ensilte, nou beni. Kan nou ganny persekite, nou siporte.

¹³ Kan dimoun i kalonmnye nou, nou reponn avek parol lankourazman. Konmela ankor, nou ganny konsidere koman salte lemonn, e koman rebi limanite.

¹⁴ Si mon ekri zot tousala, se pa pour fer zot onte, me pour averti zot koman mon bann zanfan ki mon kontan.

¹⁵ Annefe, si zot arive ganny 10,000 ansennyan dan zot lavi avek Kris, zot napa plizyer papa. Annefe, kan mon ti vin anons zot Bonn Nouvel, se mwan ki'n vin zot papa pour zot lavi avek Zezi-Kri.

¹⁶ Alor, mon sipliy zot, swiv mon legzanp.

¹⁷ Pour sa rezon, mon'n anvoy zot Timote mon Garson byenneme ki fidel dan Senyer. I ava rapel zot mon bann lansennyman dan lavi avek Kris, parey mon ansennyen partou dan tou bann Legliz.

¹⁸ I annan ki arogan parmi zot, akoz zot mazinen ki mon pa pou vin kot zot.

¹⁹ Me, par lavolonte Senyer, mon pou vin kot zot byento. Alor, mon ava konn pa zis sa ki sa bann dimoun arogan i dir, me osi sa ki zot fer.

²⁰ Annefe, Rwayonm Bondye i pa en zafer parol, me pwisans.

²¹ Ki zot prefere? Ki mon vin kot zot avek en baton, oubyen avek en leker ranpli avek lanmour ek ladouser?