Ê-sai 4 - Parnai Yiang Sursĩ - Kinh Thánh tiếng Bru

¹ Tữ tangái ki toâq, tapul náq mansễm tampỗr manoaq samiang, cớp alới pai neq: “Tỗp hếq têq chứm siem cớp chuaq tampâc tâc bữm; ma sễq mới yỗn hếq arô mới la cayac hếq dŏq hếq tỡ bữn casiet cỗ ŏ́q cayac.”

Nỡ‑ra Vil Yaru-salem Cỡt Tamái Loah

² Tữ tangái ki toâq, Yiang Sursĩ ễ táq yỗn máh sarnóh cớp nỡm aluang tâng cutễq cỡt toâr cớp ramoong o. Nheq tữh cũai proai I-sarel ca noâng tamoong, ễ sâng bũi ỡn lứq tễ máh palâi sarnóh ca dáh tâng cutễq.

³ Dũ náq ca noâng khlâiq tâng vil Yaru-salem, la máh cũai Yiang Sursĩ khoiq rưoh yỗn bữn tamoong, noau amứh alới la ‘cũai bráh o’.

⁴ Nhơ tễ chớc Yiang Sursĩ, án rablớh cớp sambráh dống cruang, cớp sambráh máh lôih yỗn pứt nheq tễ vil Yaru-salem, dếh máh aham cũai noau cachĩt tâng ntốq ki hỡ.

⁵ Chơ Yiang Sursĩ lứq tễng ramứl yỗn ỡt dớng pỡng cóh Si-ôn cớp dũ náq cũai ca toâq rôm tâng ntốq ki; Yiang Sursĩ yỗn ramứl ỡt dớng tâng tangái cớp phĩac; cớp pla ũih ỡt dớng tâng sadâu pỡ cóh ki. Chớc ang‑ữr tễ Yiang Sursĩ toâq pul cadớp nheq vil ki.

⁶ Chớc ang‑ữr tễ Yiang Sursĩ lứq pul cadớp nheq vil dŏq cupáng tễ phũac claq tangái; chơ vil ki cỡt ntốq bữn plot ien dŏq tooq sandũ bo mia choân cớp rapuq toâq.