Yòwanìrzɛ̀ 6 - Mokpwe: Bakwery (New Testament)

Yerzù à mà lìrzɛ rzayi-rzayi ja hwatò

¹ Ò mburzà yà hwenè hweyà Yerzù nà hwà-òkòwèlì hwa eni hwa mà aka ɔ̀nɛyi èhvàrzù yà yùlù yà Gàlìlì è mà e hwɛ̀lɛ̀hwɛ̀ yùlù yà Tìbɛ̀rìyàrzì.

² Ŋgindi ndɛnɛ è mà hwɛ lì mò òŋgama èhwanja hwa mà hwɛ lì ɛnɛ mànyakà mà hweyà ema à mà hwɛ lì gbèye mà lì wɔ̀wìrzɛ̀ là hwà-òkòlèlì.

³ Yerzù à mà agba ò mòòlì rzi a lìya ò rze na hwà-òkòwèlì hwa eni.

⁴ È mà hwɛ ndi e hvònda ema è Ndèma yà lì Akà ɔ̀nɛ̀yi yà wònyà Yudà ema kòmbɛ̀nɛ̀.

⁵ Nà òma Yerzù à mà kàrzɛ mììrzɔ̀ mà eni, rzìi à ɛ̀nɛ̀ è ŋgindi yà hwatò ema è mà hwɛ lì mò jèeyà. Rzìi à ijòwa Hvìlìpì nanù ema, “One ì tànɛyi lì ànda mòlèlì ò lì lìrzɛ̀ hwanù hwatò hwa arzɛ e?”

⁶ Yerzù à mà kèkìrzɛ̀ ndi Hvìlìpì èhwanja Yerzù à mà hwiya mamɛ ema à mà hwɛnɛ lì gbeyà.

⁷ Hvìlìpì rzìi à mò alàhwɛ̀ nanù ema, “È wòwà lì aka eyà yà egbe hwèhwàkɛ̀ hwe hwekòlì hwe hvìlàŋgì ò lì anda mòlèlì ema mò tànɛyi lì lìrzɛ̀ hwanu hwatò hwa arzɛ aŋga nanù tɔ̀ ima mòtò à làa tenyi.”

⁸ Rzìi òhvɛhvɛ Mòòkòwèlì hwa ama Yerzù, Àndèlè Rzimɔ̀ni Pètrò ŋmanyàŋgò wà eni à òhwa nanù ema,

⁹ “Ò hwèlì è rzɔ̀mbɛ yà ŋmanà wà munyanà anù ema à òhvi hwèhvòòtò hwèta ema hwe gbeyàhwɛnɛyi nà mbarzi jà balì, à òhvi hvɛ hwàanà nyàmà ja malìhwa ihwakɛ. Ndi nɛ mònò mòlelì mò tànɛyi lì lìrzɛ ene ŋgindi ya hwatò e?”

¹⁰ Yerzù rzìi à òhweyà hwà-òkòwèlì hwa eni àma, “Ohweyà hwanu hwatò hwa lìya ò rze.” Hwèwùle hwe mà aka lì kòka ò eŋge èki. Ò èŋgànɛ̀lɛ̀ hwaŋga hwatò hwa arzɛ hwa mà lìya ò rze. Ò ìtììtènì jà eŋge ŋgindi ò mà hwɛ hwekòlì hweta hwe wùnyànà.

¹¹ Yerzù rzìi à wòwà hwèŋge hwèhvòòtò, à ŋgbà Lohwɛ̀ jèka, rzìi à ŋgba hwà-òkòwèlì hwa eni rzìi hwa kahweyà hwatò. Ò mburzà yà nanù à mà gbeyà hvɛ nanù nà iŋgi nyàmà. Tɔ̀ ima mòtò à mà làa nà òma à mà arze.

¹² Nà òma wɔ̀ hwa arzɛ hwà mà lèè hwà mà ujè, Yerzù rzìi a òhweyà Hwà-òkòwèlì hwa eni nanù ema, “È rzàŋge rzɔ nàŋgɛ mòlelì mò arzɛ ema mò lìyelì. Tɔ̀ mòlelì mò rzi hvaŋgeyà.”

¹³ O èŋgànɛ̀lɛ̀ hwa mà kulɛ lì laa, rzì hwa rzàŋga mòlelì mò arzɛ ema mò ma lìiya mò mà ònda lìyòmɛ̀ la ŋgata na ihwàkɛ.

¹⁴ Nà òma hwaŋga hwatò hwà mà ɛnɛ manù mànyakà ma eyà ema Yerzù à mà gbeye rzìi hwa òhwa nanù ema, “O tɛ̀ɛtɛ̀ɛ e Mòòhwèlì wà èlìŋgɛ̀ ònò ema hwà mà òhwe ema a jà ò rze.”

¹⁵ Yerzù a mà hwiya nanù ema hwà mà arza lì mò lɛmbɛ ò lì mò gbeyà ema a hwɛ̀ e kiŋgɛ̀. O èŋgànɛ̀lɛ̀ à mà timba lì agba hvɛ ò mòòlì.

Yerzù à mà ɛ̀ndɛ ò ŋmanyu yà malìhwa

¹⁶ O èŋge ŋgòmbe mɛnɛ Hwà-òkòwèlì hwà mà Yerzù hwà mà rzihwa ò mòkòkò mò yùlu.

¹⁷ Hwà mà kpèeyà rzɔ ò wɔ̀lɔ̀, ò lì aka yùlu, hwà mà hwɛ ndi lì ɛndɛ ò èhvàrzù ya Kàpɛ̀nàwɔ̀mì. Jììtìtì i ma rzìhwa ema Yerzù a rzi uki èki ema hwà mà hwɛ.

¹⁸ O eŋge hvònda, mùulì nà è mbɛ̀hvɛ̀nì hwe ma aka, rzìi malìhwà mà hvùŋguweyà.

¹⁹ Hwa mà luka eyà yà màyìlì màyawò tɔ̀ mànìi rzìi hwa ɛnɛ Yerzù à ɛ̀ndɛ ò ŋmanyu yà malìhwa rzìi a jèeyà wɔ̀ɔ̀lɔ̀ wò awu. Hwà mà lɛmbeya mòkambiya mò ŋginyà.

²⁰ Àŋga ndi Yerzù a hwa òhwàna nanù ema, “È rza òka wɔ̀ŋgɔ̀, imba.”

²¹ Àŋga ndi hwa mò kpɛlɛ ò wɔ̀lɔ̀ na mɔ̀nyɛ̀ŋgì, ò lìwòkimɛnɛ rzìi hwa uka èki ema hwà mà hwɛ lì ɛ̀ndɛ.

Yerzù ndi à hwèlì ehvòòtò ema e ŋgbàà lòŋgɛ

²² O ɛnɛyi eka ya elele e ŋgìndì ya hwatò ema e ma lìiya ò eŋge ehvàrzu ya yùlu ema Yerzù na hwà-òkòwèlì hwa eni hwà mà uwɛlɛlɛ, wɔ̀ hwà mà hwiya nanù ema e ŋgòmbe e màa aka, wɔ̀lɔ̀ wɔ̀kɔ wɔ̀ ndi wò ma hwɛ aŋga. Ndèŋgana wɔ̀ hwà mà hwiya nanù ema Yerzù a rzi kpèeyà ò wòŋgò wɔ̀lɔ̀ na hwà-òkòwèlì hwa eni. Hwà mà hwiya nanù ema hwà-òkòwèlì hwa eni mɛnɛ ndi hwà mà ɛndɛ.

²³ Rzayì-rzayì ja mɔ̀lɔ̀ ma uhwɛlɛ ò mbòwa ya Tìbɛ̀rìyàrzì ma mà rzɛ̀wɛ̀hwɛ̀ lì kòmbɛ̀nɛ̀ èki ema e ŋgindi e ma lèeyà hwèhvòòtò ò mburza hvònda ema Rzàŋgò à mà ŋgbe Lohwɛ̀ jèka.

²⁴ Nà òma e ŋgìndì ya hwatò e ma ayèmbɛ nanù ema Yerzù na hwà-òkòwèlì hwa eni hwa rzi hwɛ aŋga, hwà mà kpèeyà ò maŋga mɔ̀lɔ̀ rzìi hwa aka ɔ̀nɛyi lì ɛndɛ ò Kàpɛ̀nàwɔ̀mì ò lì arza Yerzù.

²⁵ È hvònda ema hwaŋga hwatò hwa mà uke ò enɛyi èhvàrzù ya yùlu rzi hwa ɛnɛ Yerzù. Hwà mà mò ijòwa nanù ema, “Ìi Mòòkòlèlì, ima hvònda ò wa ò ùkelì anù e?”

²⁶ Yerzù rzìi a hwa alàhwɛ̀ nanù ema, “Nà è òhweyà e jɔ̀kɛ̀ ema e nò arza ndi èhwanja nà mà e lìrzɛ e ma uja rzeketɛ ò mànyakà ema nà mà gbeye.

²⁷ È rza atàkìrzɛ̀ ò mòlelì ema mò hvaŋgeyà, ndi è atàkìrzɛ̀ ndi ò mòlelì ema mò ò hwɛ̀ɛ natɛ̀ɛ na ò gbìndèyà mòŋgò mòlelì ndi mò ŋgba lòŋgɛ ema lì rza kuwa. Mòŋgò mòlelì ndi è Ŋmanà wà è Mòtò wà Hwènàmà a ò e ŋgba. Mɔ̀ ndi Tatɛ̀ Lohwɛ̀ à mà ika èèmbanelì ò lì gbeyà nanù.”

²⁸ Hwàŋga hwatò hwà mà ijòwa Yerzù nanù ema, “Mamɛ i tànɛyi lì gbeyà ò lì arza nanù ema i gbèye hweyà ema Lohwɛ̀ arza nanù ema i gbeye e?”

²⁹ Yerzù rzìi a hwa alàhwɛ̀ nanù ema, “Èya ema Lohwɛ̀ a arza ema e gbeye e hwèlì ndi nanù ema e nò lòkɛ̀ imba ema mɔ̀ à òmi.”

³⁰ Hwa mà alàhwɛ̀ Yerzù nanù ema, “Ima eyà ya mànyakà ema ò gbeyà i ɛnɛ rzi i ò lòkɛ̀ e? Mamɛ ò tànɛyi lì gbeyà ò tɛ̀ɛ̀tɛ̀ɛ e?

³¹ Imbamba ja arzu ja kòhwà hwà mà laa mana ò mòrzanjɛ̀, na òma e tìlahwì ò kààtì ya Lohwà nanù ema, ‘A ma hwa gba hwèhvòòtò ò lì laa ema hwe ma uhwɛlɛlɛ ò ŋmanyu yà lohwà.’”

³² Yerzù rzìi à hwa alàhwɛ̀ nanù ema, “Nà è òhweyà è jɔ̀kɛ̀, rzeketɛ Mòrzè ndi à mà è ŋgba hwèhvòòtò ema hwe mà uhwɛlɛlɛ ò ŋmanyu. Ndi Rzàŋgò hwa ami ndi à mà è ŋgbà hwèhvòòtò ema hwe mà uhwɛlɛlɛ ò ŋmanyu yà Lohwà.

³³ Èhwanja imba ndi nà hwèlì eŋge èhvòòtò ema Lohwɛ̀ à ŋgba, ema è uhwɛlɛlɛ ò ŋmanyu yà lohwà, ema è ŋgba hwatò hwa ene rze lòŋgɛ.”

³⁴ Hwa mà mò alàhwɛ̀ nanù ema, “Rzàŋgò è ò jò ŋgbè ene èhvòòtò wùnyà tɛ.”

³⁵ Yerzù rzìi à hwa alàhwɛ̀ nanù ema, “Imba ndi nà hwèlì èhvòòtò ema è ŋgba lòŋgɛ là gbìndèyà.” Tɔ̀ njɛnɛ ema à nò jɛ̀lɛ̀lɛ̀yi à rza ò hwèya njàwò hvɛ. Tɔ̀ njɛnɛ ema à nò lòkɛ̀yì à rza òhva nyìrzɛ̀ hvɛ.

³⁶ Nà è òhweyà nanù ema inyɔ è mà màà lì nò ɛnɛ ndi è rza nò lòkɛ̀.

³⁷ Hwatò hwa arzɛ ema Tatɛ̀ wà ami à nò ŋgbelì hwa ò nò jèeyà. Tɔ̀ njɛnɛ ema à nò jɛ̀lɛ̀lɛ̀ nà rza mò rzɔ̀rzɔ̀.

³⁸ Èhwanja na rza uhwɛlɛlɛ ò ŋmanyu yà lohwà ò lì jà lì gbeyà hweyà na òma na lìŋgàni. Nà jelì ndi ò lì gbeyà na òma Tatɛ̀ wa ami ema a nò òmi a àrzeyà.

³⁹ Ndèŋgànɛ̀lɛ̀ lì lùtèyà la ama e mɔ̀ ema a nò òmi lìini ema ò ìtììtènì ja hwatò hwa arzɛ ema a nò ŋgbelì, na rza wɔ̀lɛ̀nɛ̀ tɔ̀ mɔ̀kɔ, ndi ema na hwa hvùmùlɛ̀ hwa arzɛ ò wùnyà wò lìrzukù.

⁴⁰ Tatɛ̀ wa ami arza nanù ema, tɔ̀ ima mòtò ema a ɛni e Ŋmanà rzìi a mò lòkɛ̀ a ò luwa lòŋgɛ la gbìndèyà. Ndeŋgana imba na ò hwa hvùmùlɛ̀ ò wùnyà wò lìrzukù.

⁴¹ Hwàŋga hwatò hwa wònyà Yudà rzìi hwa wòteyà lì tɔ̀kìrzɛ̀nɛ̀ Yerzù èhwanja à mà òhwa nanù ema, “Imba ndi nà hwèlì èhvòòtò ema è uhwɛlɛlɛ̀ ò ŋmanyu yà lohwà.”

⁴² Hwa mà òhwa hvɛ nanù ema, “Rzeke Yerzù è ŋmana wà ama Jòrzɛ̀hvù ònò, e? Rzeke I hwi rzàŋgɛ na nyàŋgɛ e? Nɛ̀ rzɔ a tànɛyi lì òhwa naŋgɛ nanù ema a uwɛ̀lɛ̀lɛ̀yi ndi o ŋmanyu ya Lohwà e?”

⁴³ Ndi Yerzù ama timbirzɛlɛlɛ nanù ema, “È rza àyiŋgòwɛ̀.

⁴⁴ Ndi tɔ̀ mɔ̀kɔ a rza tànɛyi lì nò jèeyà e rza enje tɛ nanù ema, Tatɛ̀ ema a nò òmi mɔ̀ ndi à nò jàneyà e mɔ̀. Ndèŋgànɛ̀lɛ̀, imba na mò hvùmùlɛ̀ ò wùnyà wò lìrzukù.

⁴⁵ È tìlahwì na òma hwà-òhwèlì hwa hwèlìŋgɛ̀ hwa òhwi nanù ema, ‘Lohwà a ò hwa òkòlɛ wɔ̀ hwa arzɛ.’ Tɔ ima mɔ̀ ema a hweyàni Tatɛ̀ rzìi a òkòwa a nò jèeya imba.

⁴⁶ È rza enje nanù ema mòtò à mà ɛnɛ Tatɛ̀. È mɔ̀ ema a uwɛ̀lɛ̀lɛ̀yi ò ma Lohwɛ̀, mò ŋmìti ndi à mà ɛnɛ Tatɛ̀.

⁴⁷ Nà e òhweyà ndi e jɔ̀kɛ̀, tɔ̀ njɛ ema a nò lòkɛ̀yì a ò luwa lòŋgɛ la gbìndèyà.

⁴⁸ Imba ndi nà hwèlì èhvòòtò ema è ŋgba lòŋgɛ.

⁴⁹ Imbamba ja anyu ì mà là mana ò mòrzànjɛ, ndi tɔ̀ nanù hwa mà ŋwa.

⁵⁰ Ndi èhvòòtò ema è uwɛ̀lɛ̀lɛ̀yi ò ŋmanyu yà Lohwà è hwèlì ndi eŋge nyayi ema tɔ̀ ima mɔ̀ ema à è lelì à rza ŋwa.

⁵¹ Imba ndi nà hwèlì èhvòòtò ema è ŋgba lòŋgɛ ema è uwɛ̀lɛ̀lɛ̀yi ò ŋmanyu yà Lohwà. Tɔ̀ njɛnɛ à lelì ene èhvòòtò, à hwɛnɛ lòŋgɛ ema lì rza kùwa. Ndèŋgànɛ̀lɛ̀ ene èhvòòtò ema nà è ŋgba è hwèlì ndi è nyò yà ami ema nà ò ŋgba ò lì rzùŋga lòŋgɛ là ene rze.”

⁵² Hwàŋga hwatò hwà mà hweye nanù, hwà mà tata, hwa wòteya lì tɔ̀kirzɛnɛ wɔ̀ na wɔ̀, rzi hwa ijòwanɛ nanù ema, “Nɛ ònò mòtò a àŋgàmɛ̀nɛyi lì jò ŋgbà e nyàmà nyò ya eni ema i lee e?”

⁵³ Yerzù rzìi a hwa òhweyà àma, “Nà e òhweyà ndi e jɔ̀kɛ̀ e rza lelì tɛ e nyàmà nyò ya ama è Ŋmanà wà è Mòtò wà Hwènàmà rzi e nyɔ hvɛ màyija ma eni e rza tànɛyi lì òhva lòŋgɛ la gbìndèyà.

⁵⁴ Ndi tɔ̀ njɛnɛ ema a lelì e nyàmà nyò ya ami rzi a nyɔ hvɛ màyija ma ami a ò luwa lòŋgɛ la gbìndèyà ndèŋgàna na hvùmùlɛ̀ òŋgò mòtò ò wùnyà wò lìrzukù.

⁵⁵ È nyàmà nyò ya ami rzɔ e hwèlì mòlelì mò tɛ̀ɛ̀tɛ̀ɛ màyija ma ami mò hvɛ ma hwèlì ndi hwènyɔ̀ɔ̀nì hwe tɛ̀ɛ̀tɛ̀ɛ̀.

⁵⁶ Tɔ njɛnɛ ema a lelì e nyàmà nyò ya ami rzìi a nyɔ hvɛ màyija ma ami à hwèlì ndi na imba ndèŋgànɛlɛ imba hvɛ na hwèlì ndi na mɔ̀.

⁵⁷ Tatɛ̀ ema a gbèyi ema hwatò hwa hwɛ lòŋgɛ mɔ̀ ndi hvɛ a na òmi, mɔ̀ ndi hvɛ a gbèyi ema na hwèlì lòŋgɛ. Nànù ndi e hwèlì na tɔ̀ njɛnɛ hvɛ ema a lelì e nyò ya ami na mò gbeyà a hwɛ lòŋgɛ.

⁵⁸ O èŋgànɛ̀lɛ̀ imba ndi nà hwèlì èhvòòtò ema è uwɛ̀lɛ̀lɛ̀yi ò ŋmanyu yà lohwà. Nà rza enje ndi nàa èhvòòtò ema imbamba jà anyu ì mà lee tɔ̀ nɛ wɔ̀ hwa mà ŋwe. Ndi tɔ̀ njɛnɛ ema à ò lɛɛ è nyàmà nyò yà ami à ò hwɛnɛ ndi lòŋgɛ ema lì rza ò kuwa.”

⁵⁹ Yerzù à mà òhwa ndi hwenè hweyà hwe arzɛ e hvònda ema à mà hwɛ lì òkòlɛ ò tenì ya e ndawò ya màkanɛ̀ ò mbòwa ya Kàpɛ̀nàwɔ̀mì.

Hweyà hwe ama Yerzù hwe jànà lòŋgɛ là gbìndèyà

⁶⁰ Rzayì-rzayì ja hwatò ema hwà mà hwɛ lì òŋgama Yerzù na òma hwà mà hweye hwene hweyà rzìi hwa òhwa nanù ema, “Hwene hwèyòkòlèlì hwe ambi ò lì rzɔ̀ŋgìtɛ̀nɛ̀, njɛnɛ mɔɔ a tànɛyi lì e emeyà lìni lìtumba la eyà e?”

⁶¹ Yerzù a mà ayèmbɛ nanù ema hwà mà hwɛ lì àyiŋgòwɛ̀ lì mò hvòmɛ̀nɛ̀, rzi a hwa òhweyà nanù ema, “Ènè eyà ye e tàtìrzɛ̀ e?

⁶² Mamɛ e òhwa e ɛni tɛ è Ŋmanà wà è Mòtò wà Hwènàmà a kòòhwa tɛ lì timba ò èki ema à mà uwɛ̀lɛ̀lɛ̀yi!

⁶³ Èlìŋgɛ̀ yà ama Lohwɛ̀ yɔ ndi e hwèlì e yɔ ema e ŋgba lòŋgɛ. È nyàmà nyò e rza enje tɔ̀ eyà. Hweyà ema nà mà e òhweyà hwe hwèlì ndi èlìŋgɛ̀ na lòŋgɛ.

⁶⁴ Ndi ò hwèlì lòŋgò la hwa inyɔ ema e rza lòkɛ̀yì.” (Li wòteyà lìrzakò ema Yerzù à mà wòteyà lì òkòlɛ à ma hwiya hwatò ema hwa rza lòkɛ̀ ndèŋgàna hwà mà hwɛnɛ lì mò àhwirzɛ̀).

⁶⁵ Yerzù rzìi a hwa òhweyà nanù ema, “Nànù ndeŋgatɛ nà mà òhwa nanù ema tɔ̀ mòtò a rza tànɛyi lì nò jèeya natɛ̀ɛ Tatɛ̀ wa ami a mò gbeyà ema a nò jèeya.”

⁶⁶ Lìwòteyà eŋge hvònda, ene eyà e ma gbeyà hwatò ema hwà mà hwɛ lì nɔŋgɔ Yerzù hwà mà hwɛmɛ ò lì mò nɔŋgɔ rzi hwa timbeya ò mburza.

⁶⁷ Yerzù rzìi a ijòwa lìyòmɛ̀ la eni la hwà-òkòwèlì na hwahwàkɛ nanù ema, “Inyɔ hvɛ e arza lì timbeya ò mburza e?”

⁶⁸ Rzimɔ̀ni Pètrò rzi a timbirzɛlɛlɛ ama, “Rzàŋgò e, òma njɛnɛ irzɔ jɛ̀ɛ ɛ̀ndɛ e? O wa ndi òhvi e mbɔrzi ema e ŋgbà lòŋgɛ la gbìndèyà.

⁶⁹ Irzɔ i lòkɛ̀yì ndèŋgàna i hwi nanù ema ò wa ndi ò hwèlì e Mɔ̀ wa Wòtani ema a uwɛ̀lɛ̀lɛ̀yi ò ma Lohwɛ̀.”

⁷⁰ Yerzù rzìi a hwa alàhwɛ̀ nanù ema, “Rzeke nà mà è hvɔ̀rzɔ̀ inyɔ lìyòmɛ na hwahwàkɛ ndi mɔ̀kɔ hwa anyu a hwèlì ndi mòkarzɛ̀”

⁷¹ A mà hwɛ ndi lì òhwàna Jùdàrzì e ŋmanà wà ama Rzimɔ̀ni Ìrzìkalìyɔ̀tɛ̀. Tɔ nɛ à mà hwɛ ndi mɔ̀kɔ hwa lìyòmɛ̀ la eni la hwà-òkòwèlì na hwahwakɛ mɔ̀ ndi à mà hwɛnɛ lì àhwirzɛ̀ Yerzù.