Yòwanìrzɛ̀ 5 - Mokpwe: Bakwery (New Testament)

Yerzù à wɔ̀wìrzɛ̀ è mòtò wà njɛmbu

¹ O mburzà ya hwenè hweyà hwe arzɛ, Yerzù à mà ɛ̀ndɛ ò ndèma ya hwatò hwa wònyà Yudà, ò Jèrurzalɛ̀mù.

² Àŋga Jèrurzalɛ̀mù ò tòŋgòŋgò ya hwèkpèèlì hwe kɔtɔ̀ ya mɛ̀lɛ̀ŋgù, ò hwèlì yulu ema e tòŋgahwi na marzɛrzɛ mata ema hwà mà hwɛ lì hwɛlɛ ò mbɔrzi ya Hibrù, Bɛ̀trzàyìdà.

³ Ŋgindi ndɛnɛ ja hwà-òkèlì i ma hwɛ ò maŋga marzɛrzɛ ma atanɛ. I ndima, i mbòkò, na e wɔ̀ hwa e nyàmbɛ ya njɛmbu, hwà mà hwɛ aŋga.

⁵ Ò mà hwɛ mòtò mɔ̀kɔ aŋga ema à mà indana e nyambɛ rzàyiyàwò ja meya na hwàmbi.

⁶ Nà òma Yerzù à mà uke aŋga, à mà ɛnɛ na òma òŋgò mòtò à mà nàŋge aŋga, à mà hwiya nanù ema òŋgò mòtò, à mà indana e nyambɛ. Yerzù rzìi a mò ijòwa nanù ema, “O arza lì wɔ̀wìrzɛ̀hwɛ̀ e?”

⁷ Oŋgò mòtò rzìi à mà mò alàhwɛ̀ nanù ema, “Ìi Rzàŋgò kòkò, nà rza òhvi tɔ̀ mòtò anù ema a tànɛyi lì nò òŋgòwàna ò lì rzihwa ò tenì ya yulu, e hwèlì tɛ ema màlìhwà mà hvùŋguhwèlì tɛ e hvònda ema na keka lì rzihwa òhvɛhvɛ mòtò a hvùŋgana ò wòrzò lì kpèeyà.”

⁸ Yerzù à mà mò òhweyà nanù ema, “Tɛ̀mɛ̀ ò wòwè lìkɔ̀kɔ̀ lì àŋgɔ, ò ɛ̀ndɛ̀ wòteyà yɔ̀ndɔ̀.”

⁹ Ò Wòtɛ̀mɛ̀tɛ̀mɛ̀ òŋgò mòtò à mà wɔ̀wɔ̀, à lìŋgɛ̀lɛ̀ lìkɔ̀kɔ̀ là eni rzìi à wòteyà yɔ̀ndɔ̀. Ène eyà è mà gbèyɛ̀nɛ̀ ndi ò Wùnyà wò lì Arzìyòlɛ̀.

¹⁰ Nà òma hwàkànèlì hwa wònyà Yudà hwa mà ɛnɛ òŋgò mòtò ema Yerzù à mà wɔ̀wìrzɛ̀ rzìi hwa mò ijòwa nanù ema, “Wùùnyà wò yàwònò wò hwèlì ndi Wùùnyà wò lì Arzìyòlɛ̀. È hwèlì ndi eyà è teŋgɛ̀nɛ̀ è mbenda ema ò hwanɛ̀ lìkɔ̀kɔ̀ lì aŋgɔ̀ nà lì ahwànà.”

¹¹ Rzìi à hwa alàhwɛ̀ nanù ema, “È mòtò ema à nò wɔ̀wìrzɛ̀ mɔ̀ ndi à nò òhwèlì nanù ema, ‘Hwanɛ̀ lìkɔ̀kɔ̀ là aŋgɔ̀ ò ɛ̀ndɛ.’”

¹² Rzìi hwa mò ijòwa nanù ema, “Ima mòtò òŋgò ema à òhwèlì à mà ò wòwè lìkɔ̀kɔ̀ là aŋgɔ̀ ò ɛndɛ e?”

¹³ Ndi è mòtò ema à mà wɔ̀wìrzɛ̀hwɛ̀ à rzi hwiye njɛnɛ Yerzù à hwèlì nà òma Yerzù mɔ̀hvɛ à mà kpèeyà ò èŋge ŋgìndì ema è mà hwɛ aŋga.

¹⁴ O mburzà ya hvònda Yerzù à mà ɛnɛ òŋgò mòtò ò Ndawò yà Lohwà. Nà òma à mà mò ɛnɛ rzìi a mò òhweyà nanù ema, “Onò òkànèyà tɛ, nàŋgɛ nanù ò ma wɔ̀wìrzɛ̀hwɛ̀ ò rzi gbeyà hvɛ hweyà hwe wòhwe. Èhwanja ò gbèyi hvɛ tɛ wòhwe, ò taka lì aka nanù.”

¹⁵ Rzìi òŋgò mòtò a ɛ̀ndɛ lì òhweyà hwatò hwa lìkànèyà là wònyà Yudà nanù ema Yerzù ndi à mò wɔ̀wìrzɛ̀yi.

¹⁶ Rzìi hwaŋga hwatò hwa wòteya lì wòŋgìrzɛ̀nɛ̀ lì gbeyà Yerzù wòhwe, èhwanja à mà wɔ̀wìrzɛ̀ ndi òŋgò mòtò ò wùnyà wò lì arziyòlɛ.

¹⁷ Yerzù rzìi a hwa alàhwɛ̀ nanù ema, “Tatɛ̀ wa ami a gbeyà èwòlò hvònda tɛ, imbahvɛ na àŋgàmɛ̀nɛ̀yi lì gbeyà èwòlò.”

¹⁸ Hwenè hweyà ema Yerzù à mà òhwe hwe ma gbeyà hwatò hwa wònyà Yudà hwa mò kimeya ndi e kpelì. Rzìi hwa òhwa ema rzeketɛ tɔ̀ ema a undi ndi e mbenda mɛnɛ ndi à òhwi hvɛ nanù ema Lohwɛ̀ a hwèlì ndi Tatɛ̀ wa eni, a uŋmɛ̀lɛ̀ ndi nanù ema a hwèlì ndi èmɛ̀nɛ̀nì yɔ̀kɔ nà Lohwɛ̀.

È ŋginyà ya ama è Ŋmanà wà ama Lohwɛ̀ e uwɛ̀lɛ̀lɛ̀yi ndi na Lohwɛ̀

¹⁹ Yerzù rzìi a alàhwɛ̀ hwàmbaki hwa wònyà Yudà nanù ema, “Nà è òhweyà è jɔ̀kɛ̀ nanù ema è Ŋmanà wà Lohwà à rza tanɛ lì gbeyà tɔ̀ eyà nà mɔ̀ ŋmìti, à gbeyà ndi mamɛ ema mɔ̀ à ɛni ema Tatɛ̀ wa eni a gbeyà. Tɔ̀ mamɛ ema Tatɛ̀ à gbeyà, è Ŋmanà wa eni mɔhvɛ à è gbeyà.

²⁰ Èhwanja Tatɛ̀ a lìŋgàni è Ŋmanà wà eni, ò èŋgànɛ̀lɛ̀ a mò uŋmɛ̀lɛ̀ mamɛ ya arzɛ ema mɔ̀ à gbeyà. A ò mò uŋmɛ̀lɛ̀ hvɛ hweyà hwe ndɛnɛ ò lì gbeyà lì aka hwenè, aŋga nanù òma inyɔ hwa arzɛ e ma jeja.

²¹ Nà òma Tatɛ̀ a hvùmùlɛ̀ e wɔ̀ ema hwa ŋwelì lì hwa ŋgba lòŋgɛ, nanù mɛnɛ hvɛ ndi è Ŋmanà wà eni a gba lòŋgɛ ò hwatò ema mɔ̀ à lìŋgàni.

²² Tatɛ̀ mɔ̀ ŋmìti a rza kàyìrzɛ tɔ̀ mòtò. A ŋgbelì e Ŋmanà è wònjà ya arzɛ ya lì kàyìrzɛ.

²³ A gbeyà ndi ene eyà nanù ema hwatò hwa arzɛ hwa ŋgba è Ŋmanà wà eni èluhwe, nyayi hvɔ̀kɔ na òma hwa ŋgba Tatɛ̀ èluhwe. Tɔ̀ njɛnɛ ema a rza ŋgbelɛ è Ŋmanà wà eni èluhwe a rza ŋgbelì Tatɛ̀ ema a mò òmi èluhwe.”

²⁴ “Imba na e òhweyà e jɔ̀kɛ̀ nanù ema, hwaŋga hwatò ema hwa hweyi hwèyòkòlèlì hwe ami rzìi hwa lòkɛ̀ e mɔ̀ ema a nò òmi, hwa hwɛnì lòŋgɛ la gbìndèyà ndèŋgàna hwa rza ò kàyìrzɛ̀hwɛ. Hwa rza jà ò mòkòna ndi hwà mà akeyà e kpelì lì jà ò lòŋgɛ.

²⁵ Nà e òhweyà e jɔ̀kɛ̀ nanù ema, e hvònda e hwèlì e ja èŋge hvònda e ma màa lì jà, ema hwatò ema hwà mà ŋwɛɛ hwa hwèya lìlò la ama è Ŋmanà wà ama Lohwɛ̀, rzìi hwaŋga ema hwa hweyi lìŋgi lìlò hwa ò hwɛ ò lòŋgɛ.

²⁶ Nà òma Tatɛ̀ mɔ̀ ŋmìti a hwèlì lìwòndò la lòŋgɛ, nanù mɛnɛ hvɛ ndi à gbèyi è Ŋmanà wà eni lìwòndò la lòŋgɛ.

²⁷ A ŋgbelì è Ŋmanà è ŋginyà ò lì kàyìrzɛ̀ èhwànja e Ŋmanà ndi à hwèlì e mɔ̀ ema hwa hwɛlɛ è Ŋmanà wà è Mòtò wà Hwènàmà.

²⁸ È rzi tameya ene eyà, e hvònda e hwèlì e ja ema hwatò hwa arzɛ ema hwà mà ŋwɛɛ hwa hwèya lìlò la eni.

²⁹ Rzìi hwa wurza ò irzɔ̀ŋgɔ̀ ja awu. Hwàŋga ema hwà mà gbeyà gbamù, hwa hvùmùwà ò lì lùwa lòŋgɛ, rzìi hwaŋga ema hwà mà gbeyà wòhwe hwa hvùmùwà ò lì kɔkìrzɛhwɛ̀.

È mbòŋgi lì hvòmɛ̀nɛ̀ Yerzù

³⁰ “Nà rza tànɛ̀yi lì gbeyà eyà na è wònjà yà amì, na kàyìrzɛ̀ ndi na òma e Rzàŋgò a nò òhwèlì, ò èŋgànɛ̀lɛ̀ hwèkàyìrzèlèlì hwe tɛmi ehve-ehve, èhwanja na rza kàyìrzɛ̀ ndi na òma imba na arza, ndi na kàyìrzɛ̀ ndi na òma e mɔ̀ e ma a nò òmi a arza.

³¹ “Nà atɛ̀mɛ̀lɛ̀ tɛ imba mbiti mbòŋgi, mamɛ ya arzɛ ema na òhwa, e rza emànɛ̀lɛ̀hwɛ̀.

³² Ndi ò hwèlì ò hvɛhvɛ ema a ò nò tɛmeya mbòŋgi, na hwi hvɛ nanù ema màmɛ a òhwa lì nò hvòmɛ̀nɛ̀ e emànɛ̀lɛ̀hwɛ̀.

³³ È ma òmeya Yòwanìrzɛ̀ hwatò ndèŋgànɛlɛ mɔ̀ ndi à tɛmi e mbòŋgi lì hvòmɛ̀nɛ̀ e jɔ̀kɛ̀.

³⁴ Rzekɛtɛ ema e mòtò wa hwènàmà ndi à nò tɛmeya mbòŋgi. Ndi na e òhweyà ndi lì hvòmɛ̀nɛ̀ e mbòŋgi ya ama Yòwanìrzɛ̀, aŋga nanù e nò lòkɛ̀ rzìi e rzùŋgàhwa.

³⁵ Yòwanìrzɛ̀ à mà hwɛ ndi nàa etùlù ema e ma hvàalɛ̀hwɛ̀ ò lì ŋgba èki ŋmàye. Inyɔ e ma lìŋgàna ò lì nɔŋgɔ mòŋgò ŋmàye ò ŋmana hvòka wa hvònda.

³⁶ Ndi na hwɛni mbòŋgi ema e karzami lì aka Yòwanìrzɛ̀. Èwòlò ema Tatɛ̀ wa ami a nò ŋgbelì ò lì e gbeyàna lì e kulɛ, yɔ yiti ndi e nò tɛmelì mbòŋgi ema Tatɛ̀ wa ami ndi à na òmi.

³⁷ Tatɛ̀ wa ami ema a nò òmi, mɔ̀ ŋmìti hvɛ a nò tɛmelì mbòŋgi. Inyɔ e rzi hweyi lìlò la eni tɔ̀ lì mò ɛnɛ.

³⁸ È rza uti ŋmɛ̀ndi mò eni ò mèèmà me anyu, èhwanja e rza lòkɛ̀ e mɔ̀ ema no òmi.

³⁹ È òkòwe Èya ya Lohwà, èhwanja e lutelì nanù ema e òkò tɛ ye e lùwàna lòŋgɛ là gbìndèyà. Ndi ene Èya yɔ mɛnɛ ndi e òhwa lì nò hvòmɛ̀nɛ̀.

⁴⁰ Tɔ nɛ e rza arza lì nò jèeya ò lì lùwa lòŋgɛ là gbìndèyà.

⁴¹ “Nà rza arza ndi èluhwe ya hwatò hwa hwènàmà.

⁴² Ndi na hwi i nyayi ja hwatò ema e hwèlì, na hwi hvɛ nanù ema e rza lìŋgàni Lohwɛ̀ ò mèèmà me anyu.

⁴³ Nà jelì ò lìna la ama Tatɛ̀ wa ami ndi e rza nò emelì. Ndi ò hvɛhvɛ mòtò a jelì tɛ ò lìna la eni, e mò emeyà.

⁴⁴ È ayèkanɛ̀ tɛ mɔ̀kɔ na ɔ̀nɛyi e hweyà gbamù, ndi e rza gbeyà tɔ̀ eyà ò lì lùwa jèeka ema i uwɛlɛlɛ ndi na Lohwɛ̀. Nɛ rzɔ e tànɛyi lì nò lòkɛ̀ e?

⁴⁵ Tɔ nɛ e rza na emelɛ e rza lùtèyà nanù ema imba ndi na ò hwɛ e mɔ̀ ema a òhweyà Tatɛ̀ wa ami nanù ema e rza nò emelì Mòrzè ema inyɔ e ikayi mahvita mɔ̀ mɛnɛ ndi à hwèlì e mɔ̀ ema a òhwa nanù ema inyɔ e gbèyi wòhwe.

⁴⁶ È ma lòkɛ̀ tɛ Mòrzè ò tɛ̀ɛ̀tɛ̀ɛ, ò ma e nò lòkɛ̀ imbahvɛ èhwanja à mà tìla hweyà lì nò hvòmɛ̀nɛ̀.

⁴⁷ Ndi na òma e rza lòkɛ̀ hweyà ema à mà tile, nɛ e tànɛyi lì lòkɛ̀ mamɛ ema na òhwa e?”