Yòwanìrzɛ̀ 18 - Mokpwe: Bakwery (New Testament)

Lì ŋgbaŋgɛhwɛ la ama Yerzù

¹ È hvònda Yerzù à mà kulɛ lì kànɛ, rzìi a anjiya na Hwà-òkòwèlì hwa eni, rzìi hwa aka ituŋgu ema e ma hwɛ̀lɛ̀hwɛ̀ Kidrɔ̀ni. O ma hwɛ hvaya aŋga rzìi hwa kpèeyà ò tenì ya eŋge hvaya.

² Jùdàrzì ema à mà àhwirzɛ̀ Yerzù, mɔ̀ hvɛ à mà hwiya èŋge èki èhwanja Yerzù na Hwà-òkòwèlì hwa eni hwà mà hwɛ lì arzaŋganɛ aŋga.

³ Jùdàrzì rzìi à ɛndɛ ò eŋge hvaya ò tenì yà mùùtù mò Njàhwɛ̀, à tìmba è ŋgìndì yà hwanelì hwa njùma nà lòŋgò là hwàgbèèlì hwa è Ndawò yà Lohwà ema Ipilìrzi ndɛnɛ nà Ihvàlìrzàyì hwa mà òme wɔ̀ hwa mà hwanɛ̀ mèkakò, hwètùlù nà hwɛ̀ɛ̀kɛ̀ hwe njùma.

⁴ Yerzù à mà hwɛ à mà hwiya mamɛ yà arzɛ è mà hwɛnɛ lì mò gbèyɛ̀nɛ, ama wurza rzìi à hwa ijòwa nanù ema, “Njɛnɛ à hwèlì è mòtò è arza e?”

⁵ Hwà mà mò alàhwɛ̀ hwa nanù ema, “I arza ndi Yerzù wa Nàrzarɛ̀tì” rzìi mɔ̀ hvɛ a òhwa nanù ema, “Nà hwèlì ndi mɔ̀.” Jùdàrzì e mò àhwìrzèlèlì mɔ̀ hvɛ à mà hwɛ̀ aŋga na hwaŋga hwatò.

⁶ È hvònda ema Yerzù à mà òhwe nanù ema, “Nà hwèlì ndi mɔ̀,” hwà mà timbeya ò mburzà rzi hwa kpa ò rze.

⁷ Yerzù à mà hwa ijòwa hvɛ nanù ema, “Njɛnɛ a hwèlì e mòtò e arza e?” Hwà mà òhwa hwà nanù ema, “I arza ndi Yerzù wa Nàrzarɛ̀tì.”

⁸ Yerzù rzi a hwa òhweyà nanù ema, “Nà ma e òhweyà ema na hwèlì ndi mɔ̀. È hwèlì tɛ ema imba ndi e arza, e hwɛmɛ hwanù hwatò ema hwa hwèlì anu na imba hwa ɛ̀ndɛ.”

⁹ Ène eyà e ma gbèyɛ̀nɛ ndì aŋga nanù ò lì òndìrzɛ̀ hweyà hwa eni à mà òhwe, nanù ema, “Tatà na rza wɔ̀lɛnɛyi tɔ̀ mɔ̀kɔ wa hwaŋga ema ò nò ŋgbelì.”

¹⁰ Rzìmɔ̀nì Pètrò, ema à mà òhva è rzɔ̀lɔ̀ ò ekpa yà eni yà rzɔ̀lɔ̀, à è kòòhwà, à kɛ lìtò là mòme là ama è mògbèèlì wà ama è Pìlìrzì ema è kàrzamì. Lìinà lì ama òŋgò mògbèèlì lì mà hwɛ ndi Màlkurzì.

¹¹ Yerzù rzìi à òhweyà Pètrò nànù ema, “Timbirzɛ è rzɔ̀lɔ̀ yà aŋgɔ̀ ò ekpa yà rzɔ̀lɔ̀. Nà rza hwɛnì lì taka ò mètàkà ema Tatɛ̀ à mà tɛ̀yirzɛ nanù ema nà mè luwe e?”

Hwa mà ɛ̀ndɛnɛ Yerzù ò mà Anàrzì

¹² Rzìi hwaŋga hwanelì hwa njùma nà è mòtimbèlì wa awu, nà hwàgbèèlì hwa hwatò hwa Yudà, hwa mà lɛmbɛ Yerzù rzìi hwa mò kanya.

¹³ Hwa mà lòma ndi lì mò ɛ̀ndɛnɛ òma Anàrzì, Anàrzì à mà hwɛ ndi è rzàŋgò yà lìhwa yà ama Kàyìhvàrzì, è Pìlìrzì ema è mà kàrzamà yà mòŋgò ŋma.

¹⁴ Kàyìhvàrzì mɔ̀ ndi à mà kòkòwɛ̀lɛ̀ hwatò hwa Yudà ema, è ò lɔ̀wu nanù ema mòtò mɔ̀kɔ à ŋwèeyà hwatò.

Pètrò à mà rzɔ̀rzɔ̀ Yerzù

¹⁵ Rzìmɔ̀nì Pètrò nà òhvɛhvɛ mòòkòwèlì hwa mà hwɛ lì òŋgama Yerzù. È Pìlìrzì ema è kàrzamì è mà hwiya òŋgò mòòkòwèlì, ò èŋgànɛ̀lɛ̀ òŋgò mòòkòwèlì à mà kpèeyà ò tenì yà maŋga mààndà mà ama è Pìlìrzì è kàrzamì ema hwa mà kpeyaneya Yerzù.

¹⁶ Ndi Pètrò à lìiya ndi ò lìyòhva là kɔ̀tɔ̀. Oŋgò mòòkòwèlì ema à mà hwiyɛnɛ nà è Pìlìrzì è kàrzamì, ama tìmba ò lìyòhva là kɔ̀tɔ̀, rzìi à òhwìrzɛ̀nɛ̀ òŋgò ŋmanà wà ŋgɔndɔ ema mɔ̀ ndi à mà hwɛ lì àŋgòhweyà lìŋgi lìyòhva là kɔ̀tɔ̀, aŋga ndi òŋgò ŋmanà wà ŋgɔ̀ndɔ̀ a à kpɛɛlɛyi Pètrò ò màŋga màanda.

¹⁷ Oŋgò ŋmanà wà ŋgɔndɔ rzi à ijòwa Pètrò nànù ema, “Rzekɛ ò wà hvɛ ò hwèlì ndi mòòkòwèlì mɔ̀kɔ wà ama òŋgò mòtò e?” Pètrò rzi à alàhwɛ̀ nanù ema, “Jàyɛ̀, nà rza enje.”

¹⁸ Yùulùlì è mà hwɛ, ò èŋgànɛ̀lɛ̀ hwàgbèèlì hwa è Pìlìrzì è kàrzamì nà è wɔ̀ hwa è Ndawò yà Lohwà hwa mà tɛ̀mɛ̀, hwa atòŋgɛ mùnya ema hwa mà kòte ò lì atòwɛ. Pètrò mɔ̀ hvɛ à mà tɛ̀mɛ̀ aŋga nà wɔ̀, ò lì atòwɛ mòŋgò mùnya.

È Pìlìrzì è Kàrzàmi è mà kàyìrzɛ̀ Yerzù

¹⁹ È Pìlìrzì è kàrzamì ema ijòwa Yerzù mììjòwelì lì hvòmɛ̀nɛ̀ Hwà-òkòwèlì hwa eni nà hwèyòkòlèlì hwe eni.

²⁰ Yerzù à mà mò alàhwɛ̀ nanù ema, “Imba nà mà màa lì òhweyà hwatò hwa arzɛ hwene hweyà hwe arzɛ ò mòte. Nà mà hwɛ ndi lì òkòlɛ̀ ò ndawò jà màkanɛ̀, nà ò Ndawò yà Lohwà. Hwèki ema hwatò hwa Yudà hwa arzɛ hwà mà hwɛ lì arzàŋganɛ. Nà rzi òhwe tɔ̀ eyà ò jùtùtà.

²¹ Mamɛ ndèŋgàtɛ̀ ò nò ijòwa e? Ijòwa hwaŋga hwatò ema hwà mà hwèya hweyà ema nà mà hwa òhweyà. Ò jɔ̀kɛ̀ wɔ̀ hwa hwi mamɛ ema imba nà mà òhwe.”

²² È hvònda ema Yerzù à mà òhwe ene eyà, mògbèèlì mɔ̀kɔ a mò rzama luùmbɛ rzìi a òhwa nanù ema, “Mamɛ ndèŋgàtɛ̀ ò òhwirzɛnɛ e Pìlìrzì ema e karzami nanù e?”

²³ Yerzù rzi a mò alàhwɛ̀ nanù ema, “È hwèlì tɛ ema na rza òhwi tɛ eyà ya jɔ̀kɛ̀, òhweyà hwatò hwa arzɛ anu, mamɛ nò òhwi. Ndi e hwèlì tɛ ema na òhweyà ndi e jɔ̀kɛ̀, mamɛ ndèŋgàtɛ̀ ò nò rzami luùmbɛ e?”

²⁴ Àŋga ndi Anàrzì a mà òhwe ama hwa ɛ̀ndɛ̀nɛ̀ Yerzù òma Kàyìhvàrzì e Pìlìrzì ema è kàrzamì. Yerzù à mà kanyahwa nanù mɛnɛ.

Pètrò à mà rzɔ̀rzɔ̀ Yerzù hvɛ

²⁵ Rzìmɔ̀nì Pètrò ama tɛ̀mɛ̀ nanù mɛnɛ ò lì atòwɛ mùnya, hwaŋga hwatò ema hwa mà hwɛ aŋga hwa mà mò ijòwa nanù ema, “O rza enje ndi mòòkòwèlì mɔ̀kɔ wà ama òŋgò mòtò e?” Pètrò à mà rzɔ̀rzɔ̀ rzìi à òhwa nanù ema, “Jàyɛ̀, nà rza enje.”

²⁶ Mògbèèlì mɔ̀kɔ wà ama è Pìlìrzì è kàrzamì, ema à mà hwɛ hvɛ ndi mòtò wà lìtumba là ama òŋgò mòtò ema Pètrò ama kɛ lìtò là eni, rzi à mò kàrzɛ̀lɛ̀lɛ̀ lìlò nanù ema, “Rzekɛ nà mà ò ɛnɛ nà mɔ̀ ò hvaya e?”

²⁷ Anu hvɛ, Pètrò à mà rzɔ̀rzɔ̀ hvɛ. Lìwòkìmɛnɛ è mòme wà wuhwà rzi à tòŋga.

Pìlatò à kàyìrzɛ̀ Yerzù

²⁸ Nàŋgɛ rzɔ hwatò hwa Yudà rzi hwa tìmba Yerzù hwa mò anjiyana ò ndawò ya ama Kàyìhvàrzì natɛ̀ɛ na ò màandà mà ama e Gɔhwina ya Ròmànì. Ènè, e ma hwɛ ndi ò ekpà ya arzɛ. Wɔ̀ hwà mà òka wɔ̀ŋgɔ̀ ò lì kpèeyà ò ndawò èhwanja hwa rzì arze nanù ema hwa ɛneya kɔ̀wu-kɔ̀wu ò wòrzò wò ama Lohwɛ̀ ò lì arza nanù ema hwa le mòlelì mò Ndèma yà lì Akà Ɔnɛ̀yi.

²⁹ O èŋgànɛ̀lɛ̀ Pìlatò à mà wurza ò lì hwa ùŋmanɛlɛ rzìi a hwa ijòwa nanù ema, “Ima njɔ̀mi e lu lì teŋgɛ̀nɛ̀ ònò mòtò e?”

³⁰ Hwà mà mò alàhwɛ̀ nanù ema, “Mɔ̀ a rzi hwɛ tɛ mòtò wa wòhwe, òma irzɔ i rza ò akɛlɛlɛ e mɔ̀.”

³¹ Pìlatò rzi a òhwa nanù ema, “È mò wòwe inyɔ hwiti e gbeyàne imbenda ja anyu ò lì mò kàyìrzɛ̀.” Hwatò hwa Yudà rzìi hwa mò alàhwɛ̀ nanù ema, “Ndi irzɔ i rza hwɛnì tɔ̀ wònjà tɔ̀ hvɔ̀kɔ ò lì òŋwa tɔ̀ mòtò tɔ̀ mɔ̀kɔ.”

³² Ène eyà e ma gbèyɛ̀nɛ ndi nanù, ò lì òndìrzɛ̀ eyà e ma Yerzù à mà lòme lì òhwa, lì hvòmɛ̀nɛ̀ e tumba kpelì ema mɔ̀ à ò ŋwɛ.

³³ Pìlatò rzìi à kpèeyà ò ndawò yà eni à hwɛlɛ Yerzù, rzìi à mò ijòwa nanù ema, “Ò wà ndi ò hwèlì è Kiŋgɛ yà wònyà Yudà e?”

³⁴ Yerzù rzìi à mò alàhwɛ̀ nanù ema, “Ò wà ndi òhwa nanù, ŋga hwahvɛhvɛ hwatò ndi hwa ò òhwèlì lì nò hvòmɛ̀nɛ̀ e?”

³⁵ Pìlatò rzi à timbirzɛlɛlɛ nanù ema, “Imba nà hwèlì ndi mòtò wà Yudà e? Hwatò hwa aŋgɔ̀, nà Ipìlìrzì ndɛnɛ jà aŋgɔ̀, wɔ̀ ndi hwa ò akɛlɛ ò màa mà ami. Mamɛ ò wà ò gbèyi e?”

³⁶ Yerzù rzi à òhwa nanù ema, “Likànèyà là ami, lì rza enje ò ene rze. Lì mà hwɛ tɛ nanù, òma hwakutu hwa ami, hwa mà ana aŋga nanù o ma hwatò hwa ene rze hwa rzì nò akɛlɛlɛ ò màa mà wònyà Yudà. Ndi ò nàŋgɛ, Likànèyà là ami, lì rza enje là ene rze.”

³⁷ Pìlatò rzi a mò ijòwà nanù ema, “O hwèlì ndi Kiŋgɛ rzɔ e?” Yerzù rzi a mò alàhwɛ̀ nanù ema, “O wa ndi òhwi nanù ema na hwèlì ndi Kiŋgɛ. Lìtiŋga ema na ŋyaahwɛlɛyi na lì jàa anu rze lì hwèlì ndi ò lì tɛ̀mɛ̀ e mbòŋgi ya jɔ̀kɛ̀. Tɔ̀ ima mòtò ema a hwèlì ndì wa jɔ̀kɛ̀ a nò òkànèyà.”

³⁸ Pìlatò rzi a mò ijòwa nanù ema, “Mamɛ e hwèlì jɔ̀kɛ̀ e?” Nà òma Pìlatò à mà kulɛ lì ijòwa Yerzù mene miijòwelì rzi a wurza hvɛ ò ewòka ò lì ùŋmanɛlɛ hwatò hwa Yudà. Rzìi à wa òhweyà nanù ema, “Nà rza lùwànì ò nò mòtò tɔ̀ njɔ̀mi tɔ̀ hvɔ̀kɔ ema na òhwa nanù ema hwa mò òŋwa.”

Hwà mà Yerzù a hwɛnì lì ŋwa

³⁹ È hwèlì ndi ɛ̀ɛ̀mɛ̀ yà anyu ema nà hwɛnì lì è rzòlòhweya mòtò wa hwèwòwà mɔ̀kɔ ò è hvònda yà è ndèma yà lì aka ɔ̀nɛyi. È arza ema nà è rzòlòhweyà è Kìŋgɛ yà wònyà Yudà e?

⁴⁰ Wɔ̀ hwa mà alàhwɛ̀ nà mèrzeya nanù ema, “Jàyɛ̀! Rzekɛtɛ mɔ̀. Ò jò rzòlòhweya ndi Bàrabàrzì!” (Bàrabàrzì à mà hwɛ ndi ŋmìhwɛ̀ mò ndɛɛ̀ndɛ).