Ròmànì 9 - Mokpwe: Bakwery (New Testament)

Lohwɛ̀ na hwatò hwa eni hwa Irzàyɛ̀lì

¹ Nà òhwa ndi e jɔ̀kɛ̀ nàa e mòtò ema a lòkɛ̀ Krirztò, na rza kɔwu hweyà. Ŋmèma mò ami ema èlìŋgɛ̀ yà wòtani e kànèyà mò nò òhweyà nanù ema na rza kɔwu hweyà.

² Nà òhvi ndùtù ya ŋginyà na mòtaka mò ŋginyà ò ŋmèma mò ami,

³ ò wònyànyàŋgò hwa ami, hwa màyija. O nyòla awu, ò mà nà àhvìtɛ̀ nanù ema, Lohwɛ̀ à mà nò ŋgba mòjèmà, na lì nò akakòwɛ ò ma Krirztò.

⁴ Hwàtò hwa ami hwa hwèlì ndi hwatò hwa Irzàyɛ̀lì. Lohwɛ̀ à mà òhwa nanù ema mɔ̀ à mà hwa wòwa nàa hwàanà hwa eni, rzi a hwa wuluweya hvɛ ŋmàye mò eni. Lohwɛ̀ à mà gbeyà hwèyòmbò hwe eni na wɔ̀, rzi a hwa ŋgba e mbenda. A ma hwa uŋmɛ̀lɛ̀ nɛ hwa hwɛni lì mò ŋgba èluhwe, ndèŋgànɛ̀lɛ̀ à mà hwa òhweyà nanù ema a gbeyà mamɛ ema à mà òhwe nanù ema a gbeyà.

⁵ Wɔ̀ hwa uwɛlɛlɛyi ndi ò mòtende mò ama imbamba ja arzu ja kòhwa. Ndeŋgànɛ̀lɛ̀ Krirztò ò hwehwɛ̀ɛlì hwe eni nàa e mòtò wa hwènàmà, mɔ̀ à uwɛlɛlɛyi ndi ò mòtende mò awu. Inyɛ̀ Lohwɛ̀ ema a kànèyà hweyà hwe arzɛ a ekàhwè i hvònda ja arzɛ. Inyɛ̀ wò lìya nanù.

⁶ Nà rza òhwa ndi nanù ema Lohwɛ̀ a rza ò gbeyà mamɛ ema à mà òhwa nanù ema a gbeyà. Èhwanja rzeketɛ hwatò hwa arzɛ ema hwa uwɛ̀lɛ̀lɛ̀yi ò mòtendè mò Irzàyɛ̀lì ndi hwa hwèlì hwatò hwa ama Lohwɛ̀.

⁷ Ndeŋgànɛ̀lɛ̀ rzeketɛ e nyɔ̀ŋgɔ̀nì yà arzɛ yà ama Abràhamù ndi è hwèlì hwàànà hwa ama Lohwɛ̀. Lohwɛ̀ à mà òhweyà Abràhamù nanù ema, “O ò lùwa ndi mèmbamba mè aŋgɔ̀, ò mòtende mò è ŋmanà wà munyanà wà aŋgɔ̀ Irzàkì.”

⁸ Ène eyà è hwèlì ndi nanù ema, rzeketɛ hwàànà ema hwa ŋyààhwì nà òma hwàànà hwa arzɛ hwa ŋyààhwà ndi hwa hwèlì hwàànà hwa ama Lohwɛ̀ ndi hwàànà ema hwa ŋyààhwì lì akeyà nà lì kàkɛ̀nɛ̀ ema Lohwɛ̀ à mà ŋgbe Abràhamù, wɔ̀ ndi hwa wòwàhwà nàa è nyɔ̀ŋgɔ̀nì yà jɔ̀kɛ̀ yà ama Abràhamù.

⁹ È hvònda ema Lohwɛ̀ à mà kàkɛ̀nɛ̀ Abràhamù, Lohwɛ̀ à mà òhwa nanù ema, “Ò è hvònda yà jɔ̀kɛ̀, nà ò timba lì jà, ndeŋgànɛ̀lɛ̀ Rzèla à ò lùwa ŋmanà wà munyanà.”

¹⁰ Ndèŋgàna rzeketɛ ya arzɛ ene. Èhwanja hwàanà hwa wunyanà hwa ahwakɛ hwa ama Lìbɛ̀kà hwà mà hwɛnɛ ndi rzàŋgò hvɔ̀kɔ. Èŋge rzàŋgò e ma hwɛ ndi e mbamba ya arzu Irzàkì.

^11-12 Ndi ndèŋgàna màŋga mayɛzɛ ma e ŋyahwa, tɔ̀ ndèŋgàna wɔ̀ hwa e hwiya ò lì gbeyà tɔ̀ eyà yɔ̀kɔ ya gbamù tɔ̀ wòhwe, Lohwɛ̀ à mà òhweyà Lìbɛ̀kà nanù ema, “È mùlulu wa ŋmanà a ò gbèeyà e ŋmanà wa mòrzalì.” Lohwɛ̀ à mà gbeyà ndi nanù ò lì uŋmɛ̀lɛ̀ nanù ema à mà gbeyàna ndi màlùtèyà ma eni aŋga nanù ŋmanà mɔ̀kɔ a ò hwɛ ò rze ya enɛyi. È ma mò lɔ̀ɔ̀nɔ ò lì hvɔ̀rzɔ̀ e mɔ̀ ema à mà lìŋgana ò lì hvɔ̀rzɔ̀, rzeketɛ lì hvòmɛ̀nɛ̀ eyà ema òŋgò mòtò à mà gbeyà.

¹³ È tìlahwì ò kààtì ya Lohwà nanù ema, Lohwɛ̀ a òhwi nanù ema, “Nà ma lìŋgana Jèkɔ̀bù ndi na kɔwu Èrzàwu.”

¹⁴ O eŋgànɛ̀lɛ̀ rzɔ, i tànɛyi lì òhwa nanù ema Lohwɛ̀ a timbana lòŋgò la hwatò mburza e? Jàyɛ̀, rzeketɛ nanù.

¹⁵ O mòlòmɛ̀ Lohwɛ̀ à mà òhweyà Mòrzè nanù ema, “Nà ò hwɛnɛ ììlì ò tɔ̀ ima mòtò ema na lìŋgàni lì hwɛneya ììlì. Nà ò hwɛnɛ hvɛ ŋmèma mò gbamù na tɔ̀ njɛnɛ ema na lìŋgàni.”

¹⁶ O eŋgànɛ̀lɛ̀ rzɔ, mamɛ ema Lohwɛ̀ a hvɔ̀rzì e rza hwɛni tɔ̀ eyà ò lì gbeyà na eyà ema hwatò hwa arza nanù ema e gbèyɛ̀nɛ tɔ̀ mamɛ ema hwa gbeyà. Lohwɛ̀ ndi à gbeyàna ŋmèma mò eni mò gbamù ò lì gbeyà tɔ̀ mamɛ ema mɔ̀ à arza lì gbeyà.

¹⁷ È tìlahwì ò e kààtì ya Lohwà nanù ema Lohwɛ̀ a òhwèlì Hvèro nanù ema, “Nà ma ò hvɔ̀rzɔ̀ ò lì hwɛ kiŋgɛ̀, aŋga nanù nà ò gbeyàna ò lì uŋmɛ̀lɛ̀ e ŋginyà ya ami na ò lì nyàlìrzɛ̀ lìinà là ami, ò e rze ya arzɛ.”

¹⁸ O eŋgànɛ̀lɛ̀ rzɔ, Lohwɛ̀ mɔ̀ à hwɛnɛ ììlì ò tɔ̀ ima mòtò ema mɔ̀ à mà hvɔ̀rzɔ̀, ndeŋgànɛ̀lɛ̀ mɔ̀ à mà gbeyà tɔ̀ ima mòtò ò lì hwɛ maniya na òma mɔ̀ à arza nanù ema a hwɛ maniya.

Hwètàtò na ììlì ja ama Lohwɛ̀

¹⁹ Ndi mɔ̀kɔ wa anyu a ò nò ijòwa nanù ema, “Ène eyà e hwèlì tɛ nanù, mamɛ rzɔ e ma gbeyà Lohwɛ̀ ò lì òhwa nanù ema hwatò hwa gbeyà lùurzè e? Irzɔ i hwi nanù ema tɔ̀ mòtò a rza tanɛ lì òhwa nanù ema a rza gbeyà mamɛ ema Lohwɛ̀ à mà mò òhweyà nanù ema a gbeye.”

²⁰ Ndi ò wa mòtò wa hwènàmà ò wa ò hwèlì ndi njɛnɛ ò lì ijòwa Lohwɛ̀ eyà e? Njɔ̀ŋgɔ̀ ja lìhwànya i rza tanɛyi ji ijòwa e mòtò ema e mò weki nanù ema, “Mamɛ ndèŋgàtɛ̀ ò nò weki na òma ò nò weki nanù e?”

²¹ Lì aka hvɛ tɔ̀ nanù, rzeke e mòtò ema a wòndɛ màànyà, a hwɛni wònjà ò lì gbeyàna jeka nà òma mɔ̀ àrza ò lì gbeyà lìhwànya e? A lìŋgàni tɛ, mɔ̀ à tanɛyi lì wòwa lìtuta la jeka jɔ̀kɔ ò lì gbeyà màànyà ma hwàkɛ̀; Lìhwànya lɔ̀kɔ lì hwɛ ndi lìhwànya ya èluhwe ndèŋgànà lìnɛi hvɛ lì hwɛ ndi e lɔ ema lì gbeyànɛhwɛ ò tɔ̀ ima hvònda.

²² Àŋgàmɛ̀nɛ̀ Lohwɛ̀ à mà arza ò lì uŋmɛ̀lɛ̀ hwètàtò wa eni ndèŋgànà à mà arza nanù ema hwatò hwa ɛnɛ e ŋginyà ya eni. Ndi mɔ̀ à mà àjùlɛ̀ rzayi-rzayi ndèŋgànà à mà àjùlɛ̀nɛ̀ hwatò ema hwà mà mò tàtirzɛ. Hwàŋga hwatò hwà mà aŋgàmɛ̀nɛ̀yi lì luwa e kɔ̀kìrzɛ̀.

²³ Ndeŋgàna Lohwɛ̀ à mà arza hvɛ ò lì wuluhwa èluhwe ya eni ndɛnɛ, ò hwatò ema mɔ̀ à mà uŋmɛ̀lɛ̀ ŋmèma mò eni mò gbamù. A ma màa lì wòŋgirzɛnɛ hwaŋga hwatò ò lì luwa èluhwe ya eni.

²⁴ Irzɔ i hwèlì ò ìtììtènì ja hwaŋga hwatò ema à mà hwɛlɛ. Rzeketɛ ò ìtììtènì ja wònyà Yudà mɛnɛ ema à mà jò hwɛlɛ. A ma hwɛlɛ lòŋgò la hwatò mɛnɛ ò ìtììtènì ja hwaŋga hwatò ema hwa rza enje wònyà Yudà.

²⁵ O e kààtì ya Hòrzeyà, Lohwɛ̀ a òhwi nanù ema, “Hwàtò ema hwa rzi hwɛ hwatò hwa ami, na ò hwa hwɛlɛ ‘Hwàtò hwa ami.’ Èkòmè ema na rzi lìŋgàne na ò e hwɛlɛ nanù ema, ‘Èkòmè ema na lìŋgàni.’

²⁶ Ndeŋgànɛ̀lɛ̀ ò eŋge èki mɛnɛ ema nà mà hwa òhweyà nanù ema, ‘È rza enje hwatò hwa ami,’ aŋga mɛnɛ ndi na ò hwa hwɛlɛ nanù ema hwa hwèlì ndi hwàanà wa ami, hwàanà hwa ama Lohwɛ̀ ema a ŋgbàà lòŋgɛ.”

²⁷ È mòòhwèlì wà èlìŋgɛ̀ Àyìrzayà à mà òma e njàmbɛ̀ lì hvòmɛ̀nɛ̀ hwatò hwa Irzàyɛ̀lì nanù ema, “Tɔ̀ e hwɛ nanù ema hwatò hwa Irzàyɛ̀lì hwa kòki ndi nàa e nyàŋga ema e hwèlì ò mòkòkò mò ŋmànja, ŋgurzu mɛnɛ ndi yò ò rzùŋgàhwa.

²⁸ Rzàŋgò a rza ò hvaŋga hvònda ò lì gbeyà hweyà hwe arzɛ ema à mà akɛlɛ hwèkayirzelì ema a ò gbèeyà ò e rze.”

²⁹ Ène e hwèlì ndi na òma e mòòhwèlì wà èlìŋgɛ̀ Àyìrzayà à mà òhwe nanù ema, “È rzi hwɛ tɛ nanù ema Rzàŋgò Lohwɛ̀ ema a Kàrzamì e rzi jò lìiya irzɔ lòŋgò là è nyɔ̀ŋgɔ̀nì, òma irzɔ i timbi ndi nàa e mbòwa ndɛnɛ ya Rzòdòmi, na Gòmòrà.”

Pàwolò a kànɛ̀lɛ̀ hwatò hwa Irzàyɛ̀lì

³⁰ Mamɛ rzɔ irzɔ i tànɛyi lì òhwa e? Èma hwatò ema hwa rza enje wònyà Yudà, hwa hwèlì ehve-ehve ò wòrzò wò ama Lohwɛ̀ lì akeyà na lì lòkɛ̀ la awu ema hwa òhvi na Krirztò, tɔ̀ nɛ hwa rzi keke ò lì hwɛ ehve-ehve ò wòrzò wò ama Lohwɛ̀.

³¹ Ndi hwatò hwa Irzàyɛ̀lì hwà mà hwɛ lì keka ò lì ika e mbenda aŋga nanù hwa ò tɛ̀mɛ̀ ehve-ehve ò wòrzò wò ama Lohwɛ̀, ndi hwa rzi tanɛyi.

³² Mamɛ ndèŋgàtɛ̀ wɔ̀ hwa rzi tanɛyi e? Wɔ̀ hwa rzi tanɛyi èhwanja wɔ̀ hwà mà hwɛ lì keka ò lì hwɛ ehve-ehve ò wòrzò wò ama Lohwɛ̀ èhwanja ò èwòlò ema wɔ̀ hwiti hwà mà gbeye ndèŋgànà rzeketɛ èhwanja wɔ̀ hwà mà lòkɛ̀ Lohwɛ̀. O eŋgànɛ̀lɛ̀ rzɔ wɔ̀ hwà mà ayirzɛ màtaŋgà mà awu ò lìŋyàyi ema hwatò hwa ayirzɛ mataŋgà mà awu rzi hwa kpa.

³³ È tìlahwì ò e kààtì ya Lohwà lì hvòmɛ̀nɛ̀ eŋge nanù ema, “Inyɔ e ɔ̀ŋgɔ tɛ, na ikayi lìŋyàyi ò Rzàyɔ̀nì ema lì ma gbeyà hwatò ò lì ayirzɛ màtaŋgà mà awu, ewòmɛ ya lìŋyàyi ema e gbeyà ò lì nòŋgòwa. Ndi tɔ̀ njɛnɛ ema a mò lòkɛ̀yì, a rza ò timba màa màtò.”