Ròmànì 8 - Mokpwe: Bakwery (New Testament)

Lòŋgɛ ema Èlìŋgɛ̀ ya ama Lohwɛ̀ e ŋgba

¹ O nàŋgɛ, Lohwɛ̀ a rza tùulɛ̀ mòtò ema a hwèlì na Yerzù Krirztò ŋmàŋgò.

² Ène eyà e hwèlì ndi nanù èhwanja, e mbenda yà Èlìŋgɛ̀ ema e jò jàneyà lòŋgɛ, na òma irzɔ i hwèlì mɔ̀kɔ na Yerzù Krirztò, e ma nò rzòlòwa ò e mbenda yà eyà ya wòhwe na ò màà mà kpelì.

³ È mbenda e rzi tanɛ lì kulɛ wòhwe èhwanja e mòtò wa hwènàmà a rzi hwɛnɛ e ŋginyà ya lì e òŋgama. O èŋgànɛ̀lɛ̀ Lohwɛ̀ à mà gbeyà eyà ema e mbenda e rzi tanɛ lì gbeyà. A ma òma è Ŋmanà wà eni na e nyò ya e mòtò wa hwènàmà ema e gbeyà wòhwe, ò lì lìmìrzɛ̀ e ŋginyà ya wòhwe. Nà òma Lohwɛ̀ à mà gbeye nanù e ma kulɛ e ŋginyà ya wòhwe ò tenì ya e mòtò wa hwènàmà.

⁴ Lohwɛ̀ à mà gbeyà ndi nanù, aŋga nanù hwatò ema hwa rza òŋgama hweyà na e ŋginyà ya e mòtò wa hwènàmà ndi ema hwa òŋgama ndi hweyà na e ŋginyà ya Èlìŋgɛ̀ ya ama Lohwɛ̀, hwa ò gbeyà ndi hweyà ema hwe hvòmɛ̀nɛ̀yi na òma e mbenda e òhwi nanù ema hwa gbeye.

⁵ Hwàŋga hwatò ema hwa lìya lòŋgɛ na òma e nyàmà ya nyò ya arza, hwa ika ndi mèèmà me awu ò hwèèmà hwe e nyò ya e mòtò wa hwènàmà. Ndi hwatò ema hwa gbeyà hweyà na òma Èlìŋgɛ̀ yà ama Lohwɛ̀ e òhwa, hwa ika ndi mèèmà me awu ò Èlìŋgɛ̀ ya ama Lohwɛ̀.

⁶ Mòtò a ika tɛ ŋmèma mò eni ò hwema hwe e nyàmà nyò nanù òma a hwɛni lì ŋwa. Ndi mòtò a ika tɛ ŋmèma mò eni ò hweyà hwe Èlìŋgɛ̀ nanù òma Lohwɛ̀ a mò ŋgba lòŋgɛ la gbìndèyà na ɛ̀yɔ̀lɛ̀.

⁷ È hwèlì tɛ nanù ema hwèèmà hwe e nyàmà nyò hwe kànèyà tɛ mòtò, òŋgò mòtò a kɔ Lohwɛ̀ ihvònda ja arzɛ èhwanja a rzi ika imbenda ja ama Lohwɛ̀, ndèŋgànɛlɛ a rza ò tànɛyi lì jò òŋgama.

⁸ Èŋge ŋgàna e uŋmɛ̀lɛ̀ ndi nanù ema, hwaŋga hwatò ema hwa òŋgama ndi hweyàrzèlì hwe e nyàmà ya nyò, hwa rza tànɛyi lì òkirzɛ Lohwɛ̀ mɔ̀nyɛ̀ŋgì.

⁹ Ndi inyɔ, e rza enje hwatò ema yòwò ya nyò ye e kànèyà, ndi inyɔ e lìya ndi na òma Èlìŋgɛ̀ yà Wòtani ye e kànèyà ò lì lìya. Nà e jɔ̀kɛ̀ Èlìŋgɛ̀ ya Lohwɛ̀ e hwèlì ò tenì ya anyu. Tɔ̀ njɛ̀nɛ ema a rza hwɛnɛ Èlìŋgɛ̀ ya ama Krirztò, a rza enje na Krirztò.

¹⁰ Ndi e hwèlì tɛ ema Krirztò a hwèlì ò tenì ja anyu, nanù òma e hwèlì lòŋgɛ èhwanja Krirztò à mà e gbeyà nanù ema e imanɛlɛhwɛ ò wòrzò wò ama Lohwɛ̀ tɔ̀ nɛ ò nyòla wòhwe ema inyɔ e ma gbeyɛ, e nyàmà nyò ya anyu e hwɛni lì ŋwa.

¹¹ È hwèlì tɛ nanù ema, Èlìŋgɛ̀ ya ama Lohwɛ̀ ema e ma hvùmùlɛ̀ Yerzù ò kpelì e hwèlì tɛ ò tenì ya anyu, nanù òma tɔ̀ e nyàmà nyò ya anyu ema e hwɛni lì ŋwa e ma màa tɛ lì ŋwa, nanù òma Lohwɛ̀ ema à mà hvùmùlɛ̀ Krirztò ò kpelì a hwɛni lì e hvùmùlɛ̀ yɔ hvɛ. A gbeyà ene na e ŋginyà ya Èlìŋgɛ̀ ema e hwèlì ò tenì ya anyu.

¹² Ìi wònyàmòwe kòkò nanù òma eyà ema ja àŋgàmɛ̀nɛ̀yi lì gbeyà, rzeketɛ eyà ya e nyàmà ya nyò, rzeketɛ ò lì hwɛ nà òma è nyò ya àrzeyà.

¹³ Èhwanja e gbèyi tɛ ndi na òma e nyàmà nyò ya arza nanù òma e hwɛni lì ŋwa. Ndi e hwèlì tɛ ò ŋginyà ya Èlìŋgɛ̀ ya ama Lohwɛ̀ rzìi e òŋwa hweyà hwe wòhwe ema e gbeyà, nanù òma e luwa lòŋgɛ.

¹⁴ Eyà ema e hwèlì e hwèlì ndi nanù ema hwatò hwa arzɛ ema Èlìŋgɛ̀ ya ama Lohwɛ̀ e timba, hwa hwèlì ndi hwàanà hwa ama Lohwɛ̀.

¹⁵ Èlìŋgɛ̀ ema Lohwɛ̀ à mà e ŋgbe e rza e gbèyi ema e hwɛ hwàkòmì, ndèŋgàna ema inyɔ e hwɛ ò wɔ̀ŋgɔ̀. Ndi Èlìŋgɛ̀ ya ama Lohwɛ̀ e ma e gbeyà na jɔ̀kɛ̀ ò lì hwɛ hwàna hwa ama Lohwɛ̀. Èŋge ŋginyà ya eŋge Èlìŋgɛ̀ yɔ ndi e jò gbeyà ò lì hwɛlɛ Lohwɛ̀ nanù ema, “Ìi Tatà! È Tatɛ̀ ya ami!”

¹⁶ Èlìŋgɛ̀ ya ama Lohwɛ̀ e ma jò gbeyà ò lì hwiya ò mèèmà me arzu nanù ema i hwèlì ndi hwàanà hwa ama Lohwɛ̀.

¹⁷ Kanatɛ irzɔ i hwèlì ndi hwàna hwa ama Lohwɛ̀, irzɔ i lùwà mònàmɛ̀ ema Lohwɛ̀ à mà uteya hwàanà hwa eni, ndeŋgànɛ̀lɛ̀ irzɔ i lùwà hwèèmà ema Lohwɛ̀ à mà uteya Yerzù, e hwèlì tɛ ò jɔ̀kɛ̀ nanù ema inyɔ e emelì ò lì taka na Krirztò aŋga nanù irzɔ hvɛ jò ò luwa èluhwe ema Lohwɛ̀ a mò ŋgba.

Èluhwe ema hwatò hwa ama Lohwɛ̀ hwa ò lùwɛ̀

¹⁸ Imba na ɛni nanù ema mètàkà ema jò ò luwa nàŋgɛ me rza enje tɔ̀ eyà nàa èluhwe ema hwa ò jò uŋmɛ̀lɛ̀hwɛ ò e hvònda ema e ò jɛ̀ɛ̀.

¹⁹ Hweema hwe arzɛ ema Lohwɛ̀ a wèki ò rze ya mɔ̀nyɛ̀ hwe hwèlì lì ambɛ̀lɛ̀ na nyɔ̀ŋgi ndɛnɛ ò lì ɛnɛ na òma Lohwɛ̀ a ò uŋmɛ̀lɛ̀ hwàna hwa eni, a ò gbeyà eŋge na èluhwe ya eni ya arzɛ.

²⁰ È ma hwɛ ndi nanù ema hwèèmà ema mɔ̀ à mà wèkè hwe hwèlì ndi hweyà hwe ŋgundu. Rzeketɛ hweŋge hwèmà ndi hwe ma tɛ̀yirzɛ nanù ema nanù ndi e hwɛni lì hwɛ, Lohwɛ̀ ŋmìti ndi à mà tɛ̀yirzɛ nanù. A ma gbeyà nanù na lìhvìta nanù ema wùùnya wò jà ema,

²¹ mɔ̀ à ò rzòlòwa hweŋge hwema ò e ŋgɔkɔhwi ya ndùtù ema e hwe kaki nanù ema hwe rzɔmbe. Hweŋge hwema hvɛ hwe ò luwa wònja ò lì luwa nyayi hvɔ̀kɔ ya èluhwe ema Lohwɛ̀ a ŋgba hwàanà hwa eni.

²² Èhwanja irzɔ i hwi nanù ema natɛ̀ɛ na ene hvònda ya nàŋgɛ, ewèkèlì ya arzɛ e ɔnyɔ na mòrziyò ema mò hwèlì ndi nàa mòrziyò mò lìyalì.

²³ Rzeketɛ ewèkèlì yiti mɛnɛ ndi e ɔnyɔ. Irzɔ hvɛ ema jò òhvi Èlìŋgɛ̀ ema Lohwɛ̀ à mà lòma lì jò ŋgba nàa jàhwèyà ja wòrzò, irzɔ hvɛ i hwèlì jò ɔnyɔ ò mèèmà me arzu. I ma ika mèèmà me arzu me arzɛ ò lì ambɛ̀lɛ̀ eŋge hvònda ema Lohwɛ̀ a ò jò gbèèyɛ̀ hwàanà hwa eni, ò lì jò rzòlòwà inyò ja arzu ja arzɛ ò ŋgɔkɔhwi rzi a jò ŋgba nyò hvènya.

²⁴ Kanatɛ i ma luwe lìrzùŋgàhwà la arzu ja àhvìtɛ̀ nanù ema i luwa mamɛ ema Lohwɛ̀ à mà kàkɛ̀nɛ̀ nanù ema a gbeyà. Ndi je ɛnɛ tɛ yòma ema ja ikayi mèèmà me arzu nanù ema i luwa, nanù òma rzeketɛ lìhvìtà là jɔ̀kɛ̀. Njɛnɛ a tànɛyi ò lì ika ŋmèma mò eni ò lì luwa yòma ema à mà màa lì luwa e?

²⁵ Ndi jì ikayi tɛ màhvìtà mà arzu ò mamɛ ema i rza ɛnɛ̀, ja e ambɛ̀lɛ na lì àjùlɛ̀.

²⁶ Nànù mɛnɛ hvɛ ndi Èlìŋgɛ̀ ya ama Lohwɛ̀ e jò òŋgòwànà e hwèlì tɛ ema i rza imbami tɛ. I rza hwi nɛ ja àŋgàmɛ̀nɛ̀yi lì kanɛ̀, ndi Èlìŋgɛ̀ yɔ yiti mɛnɛ ndi e jò kanɛ̀lɛ̀lɛ̀ na lì ɔnyɔ ema lì akayi tɔ̀ mamɛ ema e wàna e wurzirzɛ.

²⁷ Lohwɛ̀ ema a ɛnɛ e tenì ya mèèmà me arzu, ndèŋgàna hvɛ a hwi màlùtèyà ma Èlìŋgɛ̀ èhwanja Èlìŋgɛ̀ e hwèlì e kanɛ̀lɛ̀lɛ̀ mèèmà me hwatò nyayi ema Lohwɛ̀ a àrzeyà.

²⁸ I hwi nanù ema tɔ̀ mamɛ ema e gbèyɛ̀nɛ, Lohwɛ̀ à mà e gbèeyà ò gbaamù ò hwatò ema hwa mò lìŋgàni, wɔ̀ ema mɔ̀ à hwɛlɛyi ò lì gbeyà na òma mɔ̀ à arza.

²⁹ Lohwɛ̀ mɔ̀ à màa lì tɛ̀yirzɛ nanù ema hwatò ema à mà lòme lì hvɔ̀rzɔ̀, ɛ̀ɛ̀mɛ̀ ya awu e ò hwɛ ndi nàa e ya ama è Ŋmanà wà eni aŋga nanù òŋgò Ŋmanà à ò hwɛ ndi è Ŋmanà wà wòrzò ò ìtììtènì ja ama wònyanyàŋgò wa eni.

³⁰ O èŋgànɛ̀lɛ̀ rzɔ, hwatò ema Lohwɛ̀ à mà màa lì hvɔ̀rzɔ̀ mɔ̀ à hwa hwɛlɛyi ò lì hwɛ hwatò hwa eni. Ndèŋgàna e wɔ̀ ema mɔ̀ à hwɛlɛ a òhwi nanù ema hwa emeyàlɛhwɛ ò wòrzò wò eni, à mà hwa ŋgba èluhwe ya eni.

Lohwɛ̀ a jò lìŋgàni lì akeyà nà Yerzù Krirztò

³¹ Jò ɔ̀ŋgɔ tɛ hwenè hweyà hwe arzɛ ò tenì, mamɛ i tànɛyi ò lì òhwa e? È hwèlì tɛ ema Lohwɛ̀ a hwèlì na irzɔ, njɛ̀nɛ a tànɛyi lì jò teŋgɛ̀nɛ̀ e?

³² Jàyɛ̀, na òma Lohwɛ̀ a rzi utɛ tɔ̀ Ŋmanà wa eni. A ma mò wòwa rzìi a mò ŋgbà ema a jò ŋwèeyà. Èŋge ŋgàna e hwèlì ndi nanù ema mɔ̀ à rza ò jò ŋgba hvɛ tɔ̀ mamɛ ema i mò ijòwi e?

³³ Njɛ̀nɛ a tànɛyi lì òhwa nanù ema hwatò ema Lohwɛ̀ a hvɔ̀rzì hwa tùu ŋmàŋgò e? Lohwɛ̀ mɔ̀ ŋmìti ndi à òhwi nanù ema irzɔ i hwèlì ndi hwatò ema ji emeyàlɛhwɛ ò wòrzò wò eni.

³⁴ Njɛnɛ rzɔ à tànɛyi lì òhwa nanù ema ì tùu ŋmaŋgò e? Yerzù Krirztò à mà ŋwa, à hvùmùwà, rzi à lìya ò èhvàrzù yà lìya là mòmɛ̀ là ama Lohwɛ̀, ndèŋgàna aŋga ndi mɔ̀ à hwèlì à jò kanɛ̀lɛ̀lɛ̀.

³⁵ Njɛnɛ rzɔ à tànɛyi lì jò kakòhwà nà è ndìŋgɛ ema Krirztò à jò hwɛ̀nèlì e? È hwèlì ndi hweyà ema hwè jò ambani e? Ŋga indùtù e? Tɔ̀ lìtakìrzɛ̀ ema hwatò hwa jò tàkirzɛ̀ e? È hwèlì ndi e njàwò, ŋga nà òma i rza òhvɛ mààtù mà lì wɔtɔ̀ e? Ŋga è hwèlì ndi wòhwe ema hwatò hwa jò lùtaneyà, tɔ̀ nà òma hwatò hwa arza lì jò òŋwa e?

³⁶ Nà òma è kààtì yà Lohwà è òhwi nanù ema, “Hwatò hwa hwèlì hwa jò òŋwa hvònda tɛ ò nyòla inyɔ. Hwa jò ɛnɛ ndi nàa mɛ̀lɛ̀ŋgù ema mè timbawi ò lì òŋwahwa.”

³⁷ Jàyɛ̀, ò hwenè hweyà hwe arzɛ irzɔ i rzùù hvɔ̀mbɔ̀wɔ̀ lì akeyà nà Krirztò mɔ̀ ema à jò lìŋgàni, ndèŋgànɛlɛ à jò òŋgòwànà.

³⁸ Imba nà hwi kɔ̀yi-kɔ̀yi nanù ema ò rza enje tɔ̀ yòma ema è tànɛyi lì jò kakòhwà nà è ndìŋgɛ ema Krirztò à jò hwɛ̀nèlì. Ŋga kpelì, ŋga lòŋgɛ. Ŋga i aŋgèlì, ŋga hwàkànèlì, nà iŋginyà ema i hwèlì ò ŋmanyu yà lohwà. Ŋga ò ene hvònda ema i hwèlì naŋgɛ, ŋga ò è hvònda ema è ò jɛ̀ɛ̀ e?

³⁹ Ŋga iŋginyà ja ŋmanyu, ŋga è jà è rze yà mɔ̀nyɛ̀, ò rza enje tɔ̀ eyà ò ìtììtènì yà ewèkelì è arzɛ ema è tànɛyi lì wùùlɛ̀ è ndìŋgɛ ema Lohwɛ̀ à jò hwɛ̀nèlì lì akeyà nà Yerzù Krirztò, è Rzàŋgò ya arzu.