Ròmànì 6 - Mokpwe: Bakwery (New Testament)

Wòhwe wò mà jò òŋwa ndi Krirztò à jò hvùmùlɛ̀yi

¹ Mamɛ i tànɛyi lì òhwa nàŋgɛ e? I hwɛni ndi lì eleyà ò wòhwe aŋga nanù e ndèli ya ama Lohwɛ̀ e ahwatɛ e?

² Jàyɛ̀ rzeketɛ nanù. Ì ma màa lì ŋwa ò èŋgànɛ̀lɛ̀ rzɔ i rza hwɛni hvɛ tɔ̀ eyà ò lì gbeyàna wòhwe hvɛ. Mamɛ ndeŋgatɛ je eleyà ò lì gbeyà wòhwe e?

³ Inyɔ e rza hwi nanù ema na òma i ma lùhwìrzɛ̀hwɛ̀ rzi i hwɛ mɔ̀kɔ na Krirztò i ma ŋwa na mɔ̀ e?

⁴ Lìlùhwìrzɛ̀ ema i ma luwe, lì uŋmɛ̀lɛ̀ nanù ema irzɔ i ma ŋwa rzi ji imawɛlɛhwɛ na mɔ̀. Ène eyà e ma gbèyɛ̀nɛ ndi nanù, aŋga nanù i luwa ɛ̀ɛ̀mɛ̀ e hvènya. Ène e hwèlì ndi na òma e Tatɛ̀ e ma tɛmirzɛ Krirztò ò lòŋgɛ lì hvènya.

⁵ O èŋgànɛ̀lɛ̀ rzɔ, irzɔ ima jà tɛ mɔ̀kɔ na mɔ̀ ò kpelì ya eni, ò tɛ̀ɛ̀tɛ̀ɛ jò ò hwɛ hvɛ mɔ̀kɔ na mɔ̀ ò hwèhvùmùwèlì wa eni.

⁶ Irzɔ i hwi nanù ema na òma hwà mà wòmeyà Krirztò ò mbarza hwà mà mò wòmeyà na ɛ̀ɛ̀mɛ̀ ya mòlòmɛ̀ ema i ma òhve. Ène e ma gbèyɛ̀nɛ ndi nanù aŋga nanù e ŋginyà ya eŋge ɛ̀ɛ̀mɛ̀ ya mòlòmɛ̀ ema e ma hwɛ lì jò gbèeyà ò lì gbeyà wòhwe e hwɛni lì hvaŋgahwa ya arzɛ ya arzɛ. Ène eyà e gbeyà nanù ema wòhwe wò rza jò wòwa hvɛ nàa hwàkòmì.

⁷ Mòtò a ŋwelì tɛ, wòhwe wò rza mò lɛmbɛ hvɛ.

⁸ Nàŋgɛ na òma irzɔ i ma ŋwɛɛ na Krirztò, i lòkɛ̀ nanù ema jò ò hwɛ hvɛ ò lòŋgɛ na mɔ̀.

⁹ Irzɔ i lòkɛ̀ nanù èhwanja i hwi nanù ema Krirztò à mà hvùmùwà ndèŋgàna mɔ̀ à rza ò ŋwa hvɛ. Ndèŋgana e kpelì e rza hwɛni hvɛ tɔ̀ ŋginyà ò ŋmanyu ya eni hvɛ.

¹⁰ Èhwanja Krirztò à mà ŋwa, wòhwe wò rza òhvi tɔ̀ ŋginyà ò ŋmanyu ya eni hvɛ, ò nàŋgɛ a lìya lòŋgɛ na òma a hwèlì na Lohwɛ̀.

¹¹ Ŋgàna hvɔ̀kɔ hvɛ mɛnɛ inyɔ e hwɛni ndi lì a ɛnɛ inyɔ hwiti hvɛ nàa hwàtò ema hwà mà ŋwɛɛ, aŋga nanù wòhwe wò rza hwɛni lì e kànèyà hvɛ. Ndèŋgana e àŋgàmɛ̀nɛ̀ ndi ò lì a ɛnɛ inyɔ hwiti hvɛ na hwàtò ema hwa hwèlì ò lòŋgɛ na Lohwɛ̀ ò lì akeyà na Yerzù Krirztò.

¹² O èŋgànɛ̀lɛ̀ rzɔ, e rzi hwɛmɛ wòhwe wò kànèyà e nyàmà ya nyò ya anyu ema e ŋwaa. Èŋge e gbeyà nanù ema inyɔ e rza òŋgama e nyɔŋgi ya e nyàmà nyò hvɛ.

¹³ È rzi inyɛ tɔ̀ èhvàrzù yɔ̀kɔ ya anyu ya enama ya nyò e gbeyànɛhwɛ nàa ɛ̀ɛkɛ̀ ò lì gbeyàna wòhwe. Ndi e aŋgbɛ inyɔ hwìti ò ma Lohwɛ̀ nàa hwatò ema hwa hvɔ̀ɔtɔ̀wi ò kpelì rzìi hwa ŋgbàhwi lòŋgɛ lì hvènya. È ŋgbe inyò ja anyu ja arzɛ ò ma Lohwɛ̀ aŋga nanù, mɔ̀ à e gbeyàna ò lì gbeyà hweyà ema hwe hvòmɛ̀nɛ̀yi ò wòrzò wò ama Lohwɛ̀.

¹⁴ O èŋgànɛ̀lɛ̀ e rza hwɛnì lì hwɛmɛ wòhwe wò e kànèyà, èhwanja e rza lìya ò rze ya e mbenda ndi e hwèlì ndi ò rze ya e ndèli ya ama Lohwɛ̀.

I hwɛ hwàkòmì ò lì gbeyà mamɛ ema Lohwɛ̀ a arza

¹⁵ Mamɛ rzɔ irzɔ i hwɛni ò lì òhwa naŋgɛ e? Nà òma i hwèlì ò rze yà è ndèli ya ama Lohwɛ̀, e hwèlì ndi nanù ema je ɛ̀ndɛ̀nɛ̀ ndi lì gbeyà la wòhwe ò wòrzò èhwanja irzɔ i rza enje ò rze ya e mbenda hvɛ e? Jàyɛ̀ rzeketɛ nanù.

¹⁶ Ò jɔ̀kɛ̀ e hwɛni lì hwiya nanù ema, mòtò aŋgbɛ tɛ mɔ̀ ŋmìti nàa mòkòmè ò rze ya òhvɛhvɛ mòtò, ò lì gbeyà tɔ̀ ima lìtumba la eyà ema òŋgò mòtò à mà òhwèlì ò lì gbeyà, nanù òma mɔ̀ à hwèlì ndi e mòkòmì wa ama òŋgò mòtò e? Hwàtò ema hwà mà aŋgbɛ wɔ̀ hwiti ò lì gbeyà hweyà hwe wòhwe, mamɛ ema hwa luwa, e hwèlì ndi e kpelì. Ndi e mòtò ema a aŋgbɛ mɔ̀ ŋmìti ò lì gbeyà na òma Lohwɛ̀ a àrzeyà, a hwèlì ndi mòtò ema a gbeyà hweyà ema hwe hvòmɛ̀nɛ̀yi ò wòrzò wò ama Lohwɛ̀.

¹⁷ Ndi jèka i hwɛ nà Lohwɛ̀. Èhwanja tɔ̀ nɛ ò hvònda hvɔ̀kɔ e ma hwɛ hwàkòmì ò rze ya wòhwe, ndi ò naŋgɛ e òŋgama e jɔ̀kɛ̀ ya hweyà hwe arzɛ ema hwà mà e òkòlɛ na ŋmèma mɔ̀kɔ.

¹⁸ Nàŋgɛ ema Lohwɛ̀ à mà e ulɛ ò tenì yà è ŋginyà yà wòhwe, e ma jà ndi hwàkòmè ò lì gbèeyà mamɛ ema Lohwɛ̀ a arza.

¹⁹ Nà òhwa ndi hwene hweyà hwe arzɛ nanù, ò hwèhwɛ̀ɛlì nàa e mòtò wa hwènàmà èhwanja inyɔ nàa hwatò hwa hwènàmà, lì rzɔ̀ŋgìtɛ̀nɛ̀ la anyu lì rza imbami. O mòlòmɛ̀ e ma aŋgbɛ inyɔ hwiti nàa hwàkòmì ò lì gbeyà hweyà hwe mbindò na e hwe wòhwe. È ma lìmeya ndi ò lì gbeyà hweyà hwe wòhwe nanù mɛnɛ. Nàŋgɛ e àŋgàmɛ̀nɛyi lì aŋgbɛ inyɔ hwiti nàa hwàkòmì, ò lì gbeyà hweyà na òma Lohwɛ̀ a hwe àrzeyà. Ène eyà ndi e gbeyà mòŋgɛ ma anyu ò lì hwɛ wòtani.

²⁰ È hvònda ema e ma hwɛ hwàkòmì ò wòhwe inyɔ e rza òhve tɔ̀ eyà ò lì gbeyàna mamɛ ema Lohwɛ̀ à mà arze nanù ema e gbeye.

²¹ I ma mɔ̀rzɛ̀ŋgi e ma luwe na òma e ma hwɛ lì gbeyà hweŋge hweyà ema hwe e jàneyà ìrzɔnì naŋgɛ e? Eyà ema hweŋge hweyà hwe arzɛ hwe jànà e hwèlì ndi e kpelì.

²² Ndi ò naŋgɛ Lohwɛ̀ à mà e ulɛ ò rze ya e ŋginyà ya wòhwe ò èŋgànɛ̀lɛ̀ e hwèlì ndi hwàkòmì hwa ama Lohwɛ̀. Mɔ̀rzɛ̀ŋgi ema e luwa mò hwèlì ndi nanù ema Lohwɛ̀ à mà e gbeyà ò lì hwɛ wòtani na òma hwatò hwa eni hwa àŋgàmɛ̀nɛ̀yi lì hwɛ. Èŋge eyà ye e gbeyà nanù ema e luwe lòŋgɛ la gbìndèyà.

²³ Inyɛ̀ inyɔ e hwiye nanù ema mòrzàhwèlì ema mòtò a luwa ò lì gbeyà wòhwe mò hwèlì ndi e kpelì. Ndi jàhwèyà ema Lohwɛ̀ a ŋgba hwatò ò ŋgundu i hwèlì ndi lòŋgɛ la gbìndèyà. Irzɔ i ma lì luwa èhwanja i hwèlì ndi na Yerzù Krirztò e Rzàŋgò ya arzu.