Ròmànì 4 - Mokpwe: Bakwery (New Testament)

Lìlòkɛ̀ lɔ̀ndi lì mà gbeyà Lohwɛ̀ à mà emeyà Abràhamù

¹ Mamɛ rzɔ i tànɛyi lì òhwa lì hvòmɛ̀nɛ̀ e mbamba ya arzu Abràhamù e? Mamɛ e ma gbèyɛ̀nɛ ò e hvònda ya eni e?

² A ma ikahwa tɛ ehve-ehve na Lohwɛ̀ ò hweyà ema à mà gbeye, ò ma a òhvi yòma ema ayèkirzɛ ndi rzeketɛ ò wòrzò wò ama Lohwɛ̀.

³ È kààtì ya Lohwà è òhwa nanù ema, “Abràhamù à mà lòkɛ̀ Lohwɛ̀, lìlòkɛ̀ là eni lì èŋgànɛ̀lɛ̀ Lohwɛ̀ à mà mò emeyà nàa mòtò ema à tɛmì ehve-ehve.”

⁴ Mòtò à gbèyi tɛ èwòlò à lùwa mòrzahwèlì ò èwòlò ema à gbèyi, mòŋgò mòrzahwèlì mò rza wòwahwa ndi nàa jàhwèyà. Mòŋgò mòrzahwèlì mò hwèlì ndi mɔ̀rzɛ̀ŋgì mò etòkò ya eni.

⁵ Ndi mòtò à rza gbèyi tɛ èwòlò ndi à ika ŋmèma mò eni nanù ema nà òma mɔ̀ à lòkɛ̀ Lohwɛ̀ eŋge è mò gbeyà ema à tɛ̀mɛ̀ ehve-ehve ò wòrzò wò ama Lohwɛ̀, rzìi Lohwɛ̀ ema à gbeyà hwatò ema hwa gbeyà wòhwe hwa tɛ̀mɛ̀ ehve-ehve ò wòrzò wò eni, mɔ̀ à mò wòwa nàa mòtò ema à tɛmì ehve-ehve èhwanja à mò lòkɛ̀yi.

⁶ Nànù mɛnɛ hvɛ ndi kiŋgɛ̀ Dàhwitì mɔ̀ hvɛ à mà òhwe, e hvònda ema à mà òhwe lì hvòmɛ̀nɛ̀ mònàmɛ̀ mò hwaŋga hwatò ema Lohwɛ̀ a òhwa nanù ema hwa tɛmi ehve-ehve tɔ̀ nɛ wɔ̀ hwa rza gbeyɛ tɔ̀ èwòlò.

⁷ Dàhwitì à mà òhwa nanù ema, “Mònàmɛ̀ mò hwɛ na hwaŋga hwatò ema Lohwɛ̀ à mà làkìrzɛ̀ matònà ma awu, ema wòhwe wò awu wò ulɛhwɛyi.

⁸ Mònàmɛ̀ na òŋgò mòtò ema e Rzàŋgò Lohwɛ̀ e rza ò tuuwɛ wòhwe wò eni hvɛ.”

⁹ Mònò mònàmɛ̀ mò hwèlì ndi nà è mɔ̀ ema à èndàhwì mɛnɛ, ŋgà nà è mɔ̀ ema à rza èndàhwɛ̀ e? Irzɔ i mà màà lì òhwa nanù ema è kààtì yà Lohwà è òhwa nanù ema, “Abràhamù à mà lòkɛ̀ Lohwɛ̀ èhwanja lìlòkɛ̀ là eni, Lohwɛ̀ à mà mò emeyà nàa mòtò ema a tɛmì ehve-ehve.”

¹⁰ Ima hvònda ema Lohwɛ̀ à mà mò hwɛlɛ nàa mòtò ema à tɛmì ehve-ehve e? È mà hwɛ ndi ndèŋgàna Abràhamù à endàhwa ŋgà ò mburza hvònda e? Èŋge eyà è mà gbèyɛ̀nɛ̀ ndi è hvònda ò mà Abràhamù à rza endàhwi.

¹¹ Hwa mà mò endà ò mburza hvònda ema Lohwɛ̀ à mà màa lì mò emeyà. Nà òma hwa mà mò endè, eŋge è mà hwɛ ndi ɛ̀mɛ̀nɛ̀nì, ò lì òndìrzɛ̀ nanù ema, à mà emeyàlɛhwɛ ò wòrzò wò ama Lohwɛ̀ nàa mòtò ema à tɛmì ehve-ehve èhwanja à mà lòkɛ̀ Lohwɛ̀. Tɔ̀ nɛ è hvònda ema à mà emeyàlɛhwɛ ema à tɛmì ehve-ehve òma à rza endàhwi. Èŋge eyà è mà hwɛ ndi nanù aŋga nanù Abràhamù mɔ̀ ndi à hwɛ è tatɛ̀ yà hwaŋga hwatò hwa arzɛ ema hwa rza endàhwɛ̀, ema hwa emeyàlɛhwɛ nàa hwatò ema hwa tɛmì ehve-ehve èhwanja hwa lòkɛ̀ Lohwɛ̀.

¹² Èŋge e ma gbèyɛ̀nɛ hvɛ ndi nanù aŋga nanù Abràhamù à hwɛ hvɛ ndi è tatɛ̀ yà hwaŋga ema hwà mà endàhwɛ̀, ema wɔ̀ hvɛ hwa lòkɛ̀ Lohwɛ̀ na òma Abràhamù e tatɛ̀ ya arzu mɔ̀ hvɛ à mà lòkɛ̀ Lohwɛ̀ e hvònda ema a rza endàhwɛ̀.

Lìlòkɛ̀ là è mòtò wà hwènàmà nà lìkàkɛ̀nɛ̀ là ama Lohwɛ̀

¹³ Mamɛ ema i hwi e hwèlì ndi nanù ema, natɛ̀ɛ na e kòhwa Lohwɛ̀ a mà òhweyà Abràhamù nà e nyɔ̀ŋgɔ̀nì ya eni nanù ema a hwa ŋgba è rze ò màà mà awu. Lohwɛ̀ a rza òhwe ndi nanù èhwanja Abràhamù à mà ika e mbenda, Lohwɛ̀ à mà òhwa ndi nanù èhwanja Abràhamù à mà mò lòkɛ̀ ndèŋgàna Lohwɛ̀ à mà mò wòwa ndi nàa mòtò ema à tɛmi ehve-ehve nà Lohwɛ̀.

¹⁴ È ma hwɛ tɛ ndi nanù ema hwatò ema hwa ika e mbenda wɔ̀ ndi hwa luwa yòòma ema Lohwɛ̀ a kàkɛ̀nɛ̀yi nanù ema a ŋgba nanù òma lì lòkɛ̀ ema hwatò hwa lòkɛ̀yi Lohwɛ̀ lì hwèlì ndi ŋgundu, nanù òma tɔ̀ yòòma ema Lohwɛ̀ a kàkɛ̀nɛ̀ nanù ema a ŋgba e hwèlì ndi ŋgundu.

¹⁵ Èya ema e mbenda è gbeyà e hwèlì ndi ò lì jàneyà hwatò hwètàtò hwe ama Lohwɛ̀. Ndi ò rzà ènje tɛ mbenda, ò rzà enje lì unda la mbenda.

¹⁶ Ɔ̀ndeŋgàtɛ̀ Lohwɛ̀ a òhweyà ndi hwaŋga hwatò ema hwa mò lòkɛ̀yi nanù ema a gbeyà eyà ema a kàkɛ̀nɛ̀ nanù ema a gbeyà. Mɔ̀ a gbèyi ndi nanù aŋga nanù e ɛnɛhwɛ nanù ema e ndèli ya eni yɔ ndi e ma gbeyà mɔ̀ à mà òhweyà e nyɔ̀ŋgɔ̀nì ya ama Abràhamù ŋgèlì hvɔ̀kɔ ò i ŋgelì ja arzɛ nanù ema mɔ̀ à hwa gbèeyà eyà ema à mà òhwe nanù ema a gbeyà. Rzeketɛ hwatò ema hwa ika eŋge mbenda mɛnɛ ndi mɔ̀ à mà ŋgbe lìŋgi lì kàkɛ̀nɛ̀. A ma ŋgba hvɛ hwatò hwa arzɛ ema hwà mà lòkɛ̀ Lohwɛ̀ na òma Abràhamù à mà mò lòkɛ̀. Abràhamù ndi à hwèlì e tatɛ̀ ya irzɔ hwa arzɛ.

¹⁷ È tìlahwì ò kaàtì yà Lohwà nanù ema, Lohwɛ̀ à mà òhweyà Abràhamù nanù ema, “Ìmba nà ò gbèyi è tatɛ̀ yà rzayì-rzayì ja hwèkòmè.” O èŋgànɛ̀lɛ̀ ò wòrzò wò ama Lohwɛ̀ Abràhamù ndi à hwèlì e tatɛ̀ hwa arzu. Lòohwà ema Abràhamù a lòkɛ̀, lì hwèlì ndi Lòohwà ema lì ŋgba hwatò ema hwa ŋwelì lòŋgɛ lìŋgi Lohwɛ̀ ema lì hvùmùlɛ̀ɛ è wɔ̀ hwa ŋwelì lòŋgɛ, ndèŋgàna mɔ̀ ndi à òhwa aŋga nanù hwèèmà ema hwe rza enje hwe hwɛ.

¹⁸ Abràhamù à mà lòkɛ̀ Lohwɛ̀ rzìi a mò ika lìhvìta la eni tɔ̀ nɛ ò mìirzɔ̀ ma e mòtò wa hwènàmà ò rzi hwɛ̀ tɔ̀ lìtìŋga ò lì uŋmɛ̀lɛ̀ nanù ema, hweyà ema Lohwɛ̀ à mà òhwe nanù ema hwe gbèyɛ̀nɛ hwe ò gbèyɛ̀nɛ. A ma lòkɛ̀ nanù ema, mɔ̀ à ò hwɛ “È tatɛ̀ yà rzayì-rzayì ja hwèkòmè” nà òmà Lohwɛ̀ à mà mò òhweyà nanù ema, “È nyɔ̀ŋgɔ̀nì yà àŋgɔ̀ e ò hwɛ ndi hvèyi nàa imbɛ̀tɛ̀tù ja e ŋmanyu yà lohwà.”

¹⁹ Abràhamù à mà hwɛ eyà ya egbe yɔ̀kɔ ya meya e hvònda ema Lohwɛ̀ à mà mò òhweyà nanù. A mà hwiya nanù ema mɔ̀ à mà una ndèŋgànɛlɛ hvɛ à mà hwiya nanù ema e jòjìyɛ̀ ya eni e hwèlì ndi yòmbà, ndi tɔ̀ nanù lìlòkɛ̀ la eni lì rzìi ɔ̀tɔ̀.

²⁰ Ŋmèma mò eni mò rzi kɛ̀ɛyeyà lì hvòmɛ̀nɛ̀ hweyà ema Lohwɛ̀ à mà òhwe nanù ema a mò gbèeyà, ndi lìlòkɛ̀ la eni lì ma mò etìrzɛ rzìi a timbirzɛlɛlɛ Lohwɛ̀ èluhwe.

²¹ A ma lòkɛ̀ na e tɛ̀ɛ̀tɛ̀ɛ nanù ema Lohwɛ̀ a gbeyà mamɛ à mà kàkɛ̀nɛ̀.

²² O èŋgànɛ̀lɛ̀ rzɔ lìlòkɛ̀ la ama Abràhamù lì ma gbeyà Lohwɛ̀ ò lì mò wòwà nàa mòtò ema a gbeyà hweyà na òma Lohwɛ̀ a hwe àrzeyà.

²³ Nàŋgɛ e mbɔrzi ema e tìlahwì nanù ema, “A ma imanɛlɛhwɛ nàa mòtò ema a tɛmi ehve-ehve” e mbɔrzi e rzi tilàhwe ndi ò ma Abràhamù mɛnɛ.

²⁴ Ène mbɔrzi e jò hvòmɛ̀nɛ̀ irzɔ hvɛ. Lohwɛ̀ a ò jò emeyà irzɔ hvɛ ema i lòkɛ̀ nàa hwatò ema hwa tɛmi ehve-ehve, mɔ̀ ema à mà hvùmùlɛ̀ e Rzàŋgò ya arzu Yerzù Krirztò, ò kpelì.

²⁵ O nyòla wòhwe wò arzu ɔ̀ndeŋgàtɛ̀ Lohwɛ̀ à mà ŋgba Krirztò ema a jò ŋwèeyà. A ma hvùmùlɛhwɛ ò kpelì, aŋga nanù a jò tɛmìrzɛ ehve-ehve na Lohwɛ̀.