Ròmànì 1 - Mokpwe: Bakwery (New Testament)

Pàwolò a òmi ikɔ̀mi

¹ Imba, Pàwolò, e mògbèèlì wa ama Yerzù Krirztò, imba ndi na tìlì ene kààti. Lohwɛ̀ à mà nò hvɔ̀rzɔ̀ ò lì hwɛ e àpɔ̀rzìtòlò ya eni ndèŋgànɛlɛ à mà nò ŋgbàà èwòlò ò lì òhwa Ŋmɛ̀ndì mò eni mò Gbamù.

² Mòŋgò Ŋmɛ̀ndì mò Gbamù mɔ̀ ndi Lohwɛ̀ à mà òhwe ndèŋgànà e hvònda nanù ema a ò ŋgba hwatò hwa eni. À mà òhweyà hwà-òhwèlì hwa hwèlìŋgɛ̀ hweyà lì hvòmɛ̀nɛ̀ mòŋgò Ŋmɛ̀ndì mò Gbamù na òma mò tìlahwì ò tenì ya e kààtì ya wòtani.

³ Mònò Ŋmɛ̀ndì mò Gbamù, mò hwèlì ndi lì hvòmɛ̀nɛ̀ è Ŋmanà wà eni. O hwehwɛ̀ɛlì hwe e mòtò wà hwènàmà òŋgò Ŋmanà à mà ŋyàahwɛlɛ ndi ò lìhwende la ama kiŋgɛ̀ Dàhwitì.

⁴ O hwehwɛ̀ɛlì hwe èlìŋgɛ̀, Lohwɛ̀ à mà uŋmɛ̀lɛ̀ ò lì akeyà nà màyìmbì ma Èlìŋgɛ̀ yà Wòtani nanù ema mɔ̀ à hwèlì ndi è Ŋmanà wà ama Lohwɛ̀, na òma à mà mò hvùmùlɛ ò kpelì. Oŋgò Ŋmanà a hwèlì ndi Rzàŋgò wa arzu Yerzù Krirztò.

⁵ O lì akeyà nà lìinà là eni ɔ̀ndeŋgàtɛ̀ Lohwɛ̀ à nò ŋgbelì è ndèli yà eni ema nà hwɛ è àpɔ̀rzìtòlò, aŋga nanù hwatò ema hwa rza enje wònyà Yudà hwa ò lòkɛ̀ nà lì hweyàna Krirztò. Ène è gbeyà lìinà là eni lì hwɛnɛ èluhwe.

⁶ Inyɔ ema e hwèlì o èkòmè ya Ròmànì, è hwèlì ndi ò ìtììtènì ja hwatò ema Lohwɛ̀ à mà hvɔ̀rzɛ̀ nanù ema hwa hwɛ hwatò hwa ama Yerzù Krirztò.

⁷ Ò èŋgànɛ̀lɛ̀ rzɔ, nà è tìlèlì inyɔ hwa arzɛ ema è hwèlì ò èkòmè ya Ròmànì. È hwèlì ndi hwatò ema Lohwɛ̀ à lìŋgàni ndèŋgànɛ̀lɛ̀ à mà è hvɔ̀rzɔ̀ ò lì hwɛ hwatò wà eni. Inyɛ̀ è ndèli nà ɛ̀yɔ̀lɛ̀ ema hwe uwɛ̀lɛ̀lɛ̀yi òma Lohwɛ̀ è Tatɛ̀ yà arzu, nà è Rzàŋgò Yerzù Krirztò è hwɛ nà inyɔ.

Pàwolò a eka Lohwɛ̀

⁸ Eyà ya wòrzò, nà eka Lohwɛ̀ là ami ò inyɔ hwa arzɛ ò lìnà là ama Yerzù Krirztò. Nà mò eka ehwànja lìlòkɛ̀ ema è hwɛni nà Yerzù Krirztò lì hwèlì lì lìŋgòwa è rze yà mɔ̀nyɛ̀ yà arzɛ.

⁹ Lohwɛ̀ ema nà gbèeyà nà ŋmèma mɔ̀kɔ ò lì òhwa Ŋmɛ̀ndì mò Gbamù mò ama è Ŋmanà wà eni, mɔ̀ ndi à hwèlì è mbòŋgi yà ami nanù ema nà è ɔ̀ŋgɛ̀lɛ,

¹⁰ tɔ̀ ima hvònda ema nà kànɛ. Nà kanɛ̀ nanù ema Lohwɛ̀ à keke à nò gbèye ema nà tànɛyi lì jà ò lì e ɛnɛ, è hwèlì tɛ nanù ema Lohwɛ̀ à emelì.

¹¹ Nà hwɛni nyɔ̀ŋgi rzayi-rzayi ò lì è ɛnɛ aŋga nanù nà uki tɛ, nà è embɛ nà jàhwèyà ema èlìŋgɛ̀ yà Lohwɛ̀ è mà nò ŋgbɛ.

¹² Jànda ja mamɛ ema nà òhwa ì hwèlì ndi nanù ema, inyɔ nà imba jè èmbɛ̀ mɔ̀kɔ nà ɔ̀nɛyi. Lìlòkɛ̀ là amì lì è èmbɛ̀ inyɔ hvɛ lìlòkɛ̀ là anyu lì nò embɛ.

¹³ Wònyamòwè kòkò, nà lìŋgàna nanù ema è hwiye nanù ema, nà mà òhva mɔ̀ŋgɛ̀lɛ̀ rzayi-rzayi ja ŋgelì ò lì jà lì è ɛnɛ ndi nàtɛ̀ɛ nà nàŋgɛ è njiya è rzi lìhvòhwèlì. Nà lìŋgàna lì jà aŋga ò lì gbeyà èwòlò ò ìtììtènì jà anyu ema è ŋyàa hwehvùma nyàyi hvɔ̀kɔ nà òma nà mà gbèeyà hvɛ hwahvɛhvɛ hwatò ema hwa rza enje wònyà Yudà.

¹⁴ Èwòlò ema imba nà hwɛni è hwèlì ndi ò lì òhweyà tɔ̀ ima mòtò ŋmɛ̀ndì mò gbamù, tɔ̀ hwa hwɛ ndi hwatò hwa mbowà tɔ̀ hwatò hwa wàŋga.

¹⁵ Ò èŋgànɛ̀lɛ̀ rzɔ, nà òhvi nyɔ̀ŋgi yà ŋginyà ò lì è òhweyà inyɔ hvɛ ema e hwèlì ò Ròmànì Ŋmɛ̀ndì mò Gbamù.

Ŋmɛ̀ndì mò Gbamù mò hwɛni màyìmbì

¹⁶ Imba nà rza òka ìrzɔnì ò lì òhwa Ŋmɛ̀ndì mò Gbamù, èhwanja mɔ̀ ndi mò hwèlì màyìmbì mà ama Lohwɛ̀ ema mò mà jànà lì rzùŋgàhwa ò hwatò hwa arzɛ ema hwa mò lòkɛ̀ lìwòteyà ò hwaŋga hwatò ema hwa hwèlì wònyà Yudà nà hwaŋga ema hwa rza enje wònyà Yudà.

¹⁷ Èhwanja Ŋmɛ̀ndì mò Gbamù, mò wùluwà nɛ Lohwɛ̀ à tɛ̀yirzɛ̀ hwatò ehve-ehve ò wòrzò wà eni. Hwatò hwa èmàyɛ̀lɛ̀hwɛ̀ ò lì hwɛ ehve-ehve ò wòrzò wò ama Lohwɛ̀ èhwanja hwa lòkɛ̀yi. Lìŋgi lìlòkɛ̀ ndi lì gbèeyà hwatò lì emàyɛ̀lɛ̀hwɛ̀ ò wòrzò wò ama Lohwɛ̀ nàa hwatò ema hwa tɛ̀mì ehve-ehve. Ène eyà è hwèlì ndi nanù, nà òma è tìlahwì ò tenì yà è kààtì yà ama Lohwɛ̀ nanù ema, “È mòtò ema à emàyɛ̀lɛ̀hwɛ̀ ò wòrzò wò ama Lohwɛ̀ nàa mòtò ema à tɛ̀mì ehve-ehve èhwanja à lòkɛ̀yi à ò hwɛ lòŋgɛ.”

Hwatò hwènàmà hwarzɛ hwà mà gbeyà wòhwe ò wòrzò wò ama Lohwɛ̀

¹⁸ Hwètàtò hwe ama Lohwɛ̀ hwe awuluhwɛyi lì anjiya ò ŋmanyu yà lohwà, lì teŋgɛ̀nɛ̀ wòhwe hwa arzɛ ema hwatò hwa gbeyà nà hweyà hwe wòhwe hwe arzɛ ema hwatò hwa gbeyà. Hweŋge hweyà hwe wòhwe hwe iŋgà hwatò ò lì nɔ̀ŋgɔ è jɔ̀kɛ̀.

¹⁹ Lohwɛ̀ à hwèlì à hwa kɔ̀kìrzɛ̀ èhwanja, wɔ̀ hwa hwi hweyà hwe arzɛ gbamù ema hwatò hwa àŋgàmɛ̀nɛ̀yi lì hwiya lì hvòmɛ̀nɛ̀ Lohwɛ̀, èhwanja Lohwɛ̀ mɔ̀ ŋmìti à mà hwa uŋmɛ̀lɛ̀ è yɔ̀.

²⁰ Lìwòteya è hvònda ema Lohwɛ̀ à mà wèke è rze yà mɔ̀nyɛ̀, hwèèmà ema à mà wèkè hwe uŋmɛ̀lɛ̀ hwatò nà è jɔ̀kɛ̀ nanù ema, hweyà hwe ama Lohwɛ̀ ema tɔ̀ mòtò à rza ɛ̀nɛ̀nɛ̀ nà mìrzɔ̀ mà eni hwe hwèlì ndi è jɔ̀kɛ̀. Ndèŋgànɛ̀lɛ̀ è uŋmɛ̀lɛ̀ ndi nanù ema, è ŋginyà yà eni è hwèlì nà ò gbìndèyà ndèŋgàna mɔ̀ à akayi hwèèmà hwe arzɛ. Ò èŋgànɛ̀lɛ̀ rzɔ hwaŋga hwatò hwa rza òhvi tɔ̀ lìtiŋga ò lì làkìrzɛhwɛ.

²¹ Tɔ̀ nɛ wɔ̀ hwa hwi nanù ema Lohwɛ̀ à hwèlì, ndi hwa rza mò kàrzɛ̀nɛ̀ nà èluhwe nàa Lohwɛ̀, ndèŋgàna hwa rza mò eka. Ndi tɔ̀ nanù màlùtèyà mà awu mà wòteyà ndi ò lì lùteyà hweyà hwe ŋgundu. Ndèŋgànà màlùtèyà mà awu mà òndi nà jìtìtì.

²² Wɔ̀ hwa òhwa ndi nanù ema hwa aŋgò, ndi hwa mà timba ndi hwèèti hwe hwatò.

²³ Hwa hwɛmi ò lì ŋgba Lòohwà ema lì hwèlì lòŋgɛ èluhwe rzìi hwa ŋgba ndi hwèrzìrzà ema hwatò hwa wòndɛyi nà màà mà awu èluhwe. Hwene hwèmà hwe ayèkɛnɛ̀ hwema ema hwe ŋwa, ema hwe hwèlì nàa è mòtò wà hwènàmà, hwenɔ̀ni, inyàmà nà mààhwà.

²⁴ Ò èŋgànɛ̀lɛ̀, Lohwɛ̀ à mà hwa kìnyɛ̀lɛ̀ ò lì gbeyà hweyà hwe mbindò ema mèèmà mè awu mè arza, ema hwe hwa ɔ̀ndɛ̀lɛ̀lɛ̀ èluhwe yà awu.

²⁵ Wɔ̀ hwa mà kìnyɛ̀lɛ̀ è jɔ̀kɛ̀ ema è òhwa lì hvòmɛ̀nɛ̀ Lohwɛ̀ hwa hwèlì hwa nɔ̀ŋgɔ ndi mòlaŋgà. Hwa mà kìnyɛ̀lɛ̀ ò lì ŋgba Lohwɛ̀ èluhwe mɔ̀ ema à wèki hwèèmà hwe arzɛ, wɔ̀ hwa ŋgba ndi hwèèmà ema Lohwɛ̀ à wèki èluhwe. Ndèŋgana Lohwɛ̀ ndi wɔ̀ hwa kànɛyi lì eka nà ò gbìndèyà. Inyɛ̀ wò lìya nanù!

²⁶ Ò eŋgànɛ̀lɛ̀ rzɔ Lohwɛ̀ à mà hwa ulɛ̀ mììrzɔ̀ mà eni, ndèŋgàna à mà hwa rzɔnjɛ̀lɛ̀ ema hwa nɔ̀ŋge è nyɔ̀ŋgi yà awu ema è gbeyà hwa gbeyà hweyà hwe mbindò. Hwààlanà hwa awu hwa rzɔnjɛ̀lɛ̀ ò lì nàŋgana wùùnyanà ndi hwa nàŋgana hwahvɛhvɛ hwàlàna ema hwa rza àŋgàmɛ̀nɛ̀yi lì gbeyà nanù.

²⁷ Mòlandakò mɔ̀kɔ hvɛ mɛnɛ wùùnyanà wɔ̀ hvɛ hwa mà rzɔnjɛ̀lɛ̀ ò lì nàŋgana hwààlanà nà òma è àŋgàmɛ̀nɛ̀yi lì hwɛ. Ndi hwa hwɛni eŋge nyìrzɛ̀ ndɛ̀nɛ̀ yà lì nàŋgana hwahvɛhvɛ wunyanà. Wunyanà hwa gbeyà hweyà hwe ìrzɔnì nà hwahvɛhvɛ wunyanà. Ène eyà è hwa gbèyi ema hwa lùwa kɔ̀kìrzɛ̀ ema hwa àŋgàmɛ̀nɛ̀yi lì lùwa lì hvòmɛ̀nɛ̀ hwene hweyà ema hwa gbeyà.

²⁸ Nà òma è hwèlì nanù ema hwanu hwatò hwa rza hwɛni hvònda nà Lohwɛ̀ ò lòŋgɛ là awu, Lohwɛ̀ à mà hwa ulɛ̀ mììrzɔ̀ mà eni nanù ema hwa ɛ̀ndɛ̀nɛ̀ màlùtèyà mà awu mà wòhwe ò wòrzò ema mà hwèlì ò lì gbeyà hweyà ema hwa rza àŋgàmɛ̀nɛ̀yi lì gbeyà.

²⁹ Wɔ̀ hwa òndanɛ nà inyàyi jà arzɛ jà wòhwe ò mèèmà mè awu. Hwa hwèlì ekɔ̀nì, hwa hwèlì wɔ̀ɔ̀, hwa uŋmɛ̀lɛ̀ ŋmèma mò wòhwe, hwa àwòndànɛ̀ ìnòna, hwa òŋwa hwatò, hwa lìŋgàni mòhvùŋgu, hwa lìŋgàni jɔ̀ɔ̀nji, hwa òndi mèhvìlì, hwa lìŋgàni lì inda hwatò.

³⁰ Hwa lìŋgàni lì òhwa ò lì hvàŋga mìinà mà hwatò, hwa kɔ̀wu Lohwɛ̀, hwa hwɛ̀nyɛ̀nɛ̀, hwa rza ŋgbɛ̀ɛ̀nɛ̀ èluhwe, hwa àyèkìrzɛ̀, wɔ̀ hwa lìŋgàni ndi ò lì tɛ̀yìrzɛ̀ nɛ̀ hwa gbeyà wòhwe, ndèŋgàna hwa rza hweyàna irzàŋgo nà inyàŋgò ja awu.

³¹ Hwa hwèlì èèti, hwa rza òndìrzɛ̀ mòni mà awù, hwa rza òhvi ndìŋgɛ ò mèèmà mè awu, ndèŋgàna hwa rza òhvi mèèmà mè ììlì.

³² Wɔ̀ hwa hwi nanù ema Lohwɛ̀ à mà òhwa nanù ema, hwatò ema hwa gbeyà iŋgi nyayi jà hweyà hwa àŋgàmɛ̀nɛ̀yi lì ŋwa, ndi tɔ̀ nanù hwa lìmelì ndi ò lì gbeyà hweŋge hweyà. Ndèŋgàna rzeketɛ hvɛ tɔ̀ nanù wɔ̀ hwa eka hwatò ema hwa gbeyà iŋgi nyayi ja hweyà.