Matiyò 8 - Mokpwe: Bakwery (New Testament)

Yerzù à wɔ̀wìrzɛ̀ è mòtò wà è nyàmbɛ yà mɔ̀lɔ̀ŋgɔ

¹ Nà òma Yerzù à mà rzihwe ò mòŋgò mòòlì, ŋgìndì ndɛnɛ yà hwatò è mà hwɛ lì mò nɔ̀ŋgɔ.

² Munyanà mɔ̀kɔ ema à mà ɔ̀kirzɛ̀ è nyàmbɛ yà mɔ̀lɔ̀ŋgɔ rzi à jà à rzùmeya Yerzù màwɔ̀ŋgɔ̀ŋgɔ̀ à mò òhweyà nanù ema, “Ìi Rzàŋgò ò lìŋgàni tɛ, ò gbèèye ema nà rzàŋge.”

³ Yerzù à mà enyòwa lìya là eni à lì hwàkɛ òŋgò mòtò ò nyò yà eni, à òhwa nanù ema, “Nà lìŋgàni, rzàŋga!” O wòtɛmɛ̀tɛmɛ̀ è nyàmbɛ yà mɔ̀lɔ̀ŋgɔ è mà kuwa ò nyò yà eni.

⁴ Yerzù rzìi à mò òhweyà nanù ema, “O rzìi keka lì òhweyà tɔ̀ mòtò tɔ̀ mɔ̀kɔ eyà ema è gbèyɛ̀nɛ̀. Ndi ò ɛ̀ndɛ wà awuŋmɛ̀lɛ̀ ò wà hwitì ò mà è Pìlìrzì à ò inje. Rzìi ò ŋgbe hvɛ jàhwèyà nàa è mbenda yà ama Mòrzè è òhwa ò lì uŋmɛ̀lɛ̀ nanù ema ò mà rzàŋga.”

Yerzù à mà wɔ̀wìrzɛ̀ è mògbèèlì wà ama è mɔ̀ɔ̀ŋgèlì wà hwàànà njùma

⁵ Lìrzakò ema Yerzù à mà kpèeyà ò mbòwà yà Kàpɛ̀nàwɔ̀mì, mɔ̀ɔ̀ŋgèlì mɔ̀kɔ wà hwàànà njùma wà Ròmànì ema à mà hwɛ lì kànèyà egbe yà hwàànà njùma, rzìi à mò jèeyà à mò rzòrzòmeyà nanù ema,

⁶ “Rzàŋgò kòkò, è mògbèèlì wà ami à ɔ̀kirzɛ̀ à nàŋgayi ò lìnɔ̀ŋgɔ. À rza lùwa tɔ̀ lì tɛ̀mɛ̀ ndèŋgànɛ̀lɛ̀ à atàkìrzɛ̀ rzayi-rzayi.”

⁷ Yerzù rzìi à mò òhweyà nanù ema, “Nà ɛ̀ndɛ, lì mò wɔ̀wìrzɛ̀.”

⁸ Oŋgò mɔ̀ɔ̀ŋgèlì wà hwàànà njùma rzìi à alàhwɛ̀ Yerzù nanù ema, “Ìi Rzàŋgò nà rza uki tɔ̀ mòtò ema nà tànɛyi lì ò arzàŋgànɛ̀lɛ̀ nàa ŋmɛ̀nì ò ndawò yà ami, ndi òhwa mbɔrzi hvɔ̀kɔ òma è mògbèèlì wà amì à mà wɔ̀wɔ̀.

⁹ Imba mbiti nà hwèlì ndi mòtò ò rze yà lìkànèyà. Nà kànèyà hvɛ hwàànà njùma. Nà òhweyà ŋmànèlì mɔ̀kɔ wà njuma nanù ema, ‘Ɛ̀ndɛ,’ ndèŋgànɛ̀lɛ̀ à ɛ̀ndɛ. Nà òhweyà hvɛ ɔ̀nɛyi nanù ema, ‘Jà,’ mɔ̀ hvɛ à jà. Nà òhweyà hvɛ è mògbèèlì wa ami nanù ema, ‘Gbeyà ene eyà,’ mɔ̀ hvɛ à è gbeyà.”

¹⁰ Nà òma Yerzù à mà hweye hwenè hwèyòhwèlì, à mà tàmà rzayi-rzayi, rzìi à òhweyà hwaŋga ema hwa mà mò nɔ̀ŋgɔ nanù ema, “Nà è òhweyà ndi è jɔ̀kɛ̀, nà rzì ɛnì tɔ̀ mòtò tɔ̀ mɔ̀kɔ ò èkòmè ya arzɛ yà Irzàyɛ̀lì ema à òhvi ene tumba ya lìlòkɛ̀ ema ònò ŋmɛ̀nì à òhvi.

¹¹ Nà è òhweyà ndi nanù ema, è hvònda ema o ò hwɛ ndèma ò lìkànèyà là ama Lohwɛ̀, rzayì-rzayì ja hwatò ema hwa rza kànɛ̀yi ò lì hwɛ aŋga hwa ò uhwɛ̀lɛ̀lɛ ɔ̀nɛyi nà wàteŋyi, ema hwa ò wòwɛ hwèki hwe awu hwe hwèlìyelì ò eŋge ndèma yà lìkànèyà là ŋmanyu yà lohwà nà imbamba ja arzu Abràhamù, Irzàkì, nà Jèkɔ̀bù.

¹² Ndi hwaŋga ema hwa kànɛ̀yi lì hwɛ i wònjà ò lìkànèyà là ama Lohwɛ̀ hwa ò aŋgbahwa ò èwòka ò tenì ya jìtìtì. Aŋga rzɔ ndi wɔ̀ hwa ò kɔ̀kɔ̀ mehvehve me awu, na lì ahvahvɛ.”

¹³ Yerzù rzìi à òhweyà òŋgò ŋmanèlì wà njùma nanù ema, “Ɛndɛ! Yò ò gbèyɛnɛ̀ nà òma ò lòkɛ̀ nanù.” Ò lìŋgi lìrzàkò mɛnɛ, è mògbèèlì wà ama òŋgò mòkànèlì à mà wɔ̀hweyà.

Yerzù à mà wɔ̀wìrzɛ̀ rzayì-rzayì ja hwatò

¹⁴ Nà òma Yerzù à mà uke ò è ndawò yà ama Pètrò, à mà ɛnɛ Pètrò nyàŋgò wà eni wà lìhwa, à naŋgani è ŋgɔwu ò lìnɔ̀ŋgɔ.

¹⁵ Nà òma Yerzù à mà lɛ̀mbɛ̀ lìya là eni, rzìi eŋge ŋgɔwu è mò hwɛ̀mɛ̀. Rzìi à tɛ̀mɛ̀ à hwa kàrzɛ̀.

¹⁶ È hvònda yà è ŋgòmbe yà lohwà, hwatò hwa mà jàneyà Yerzù rzayì-rzayì ja hwatò ema hwa mà òhva hwèlìŋgɛ̀ hwe wòhwe ò tenì ja awu. Yerzù à mà gbeyànà è mbɔrzi yà eni yà wàna ò lì ulɛ̀ hweŋge hwèlìŋgɛ̀ hwe wòhwe, rzìi à wɔ̀wìrzɛ̀ hvɛ hwaŋga hwatò hwa arzɛ ema hwa mà ɔ̀kìrzɛ̀.

¹⁷ Yerzù à mà gbeyà ndi hwene hweyà hwe arzɛ nanù, ò lì òndìrzɛ̀ ŋmɛ̀ndì ema Lohwɛ̀ à mà òme lì akeyà nà è mòòhwèlì wà èlìŋgɛ̀ Àyìrzayà nanù ema, “À mà jò wòwàna inyambɛ ja arzu ja arzɛ. À mà wòwà hvɛ mètàkà mè arzu mè arzɛ.”

Hwatò ema hwa mà òhva ŋmèma ò lì nɔ̀ŋgɔ Yerzù

¹⁸ È hvònda ema Yerzù à mà ɛnɛ è ŋgìndì ema è mà mò tòŋga, rzìi à òhweyà hwà-òkòwèlì hwa eni nanù ema, hwa ɛndɛ ò ɛnɛyi èhvarzù yà yulu.

¹⁹ Mòòkòlèlì mɔ̀kɔ wà è mbenda rzìi à mò jèeyà, à mò òhweyà nanù ema, “Ìi Mòòkòlèlì, nà ò òŋgama tɔ̀ ima èki ema ò ɛ̀ndɛ.”

²⁰ Yerzù rzìi à mò alàhwɛ̀ nanù ema, “I njùhwɛ̀ ja òhvi hvòkò ema i nàŋgeya. Hwenɔ̀ni hwe ŋmanyu hwèyɔ̀hvɛ hwe òhvi màwùmbù, ndi è Ŋmàna wà è Mòtò wà Hwènàmà mɔ̀ à rza òhvi tɔ̀ èki ema à nàŋgɛlɛ mòòhvò mò eni.”

²¹ Òhvɛhvɛ mòtò mɔ̀kɔ ema à mà hwɛ lì òŋgama Yerzù rzìi à mò òhweyà nanù ema, “Ìi Rzàŋgò kòkò, ambɛ̀lɛ nà lòma lì ɛ̀ndɛ lì imeyà è rzàŋgò yà amì.”

²² Ndi Yerzù à mà mò alàhwɛ̀ nanù ema, “Ò nò òŋgame, hwɛ̀mɛ̀ hwaŋga hwatò ema hwa mà ŋwɛ, hwa ìmeyà hwaŋga hwatò ema hwa ŋwelì.”

Yerzù à mà lɔ̀kɔ mùùlì

²³ O eŋge hvònda, Yerzù à mà kpèeyà ò tenì yà wɔ̀lɔ̀ nà Hwà-òkòwèlì hwa eni rzìi hwa wòteyà lì luka wɔ̀lɔ̀.

²⁴ Nà òma hwa mà uke ò tenì yà malìhwa, è mbɛ̀hvɛ̀nì rzìi è wòteyà lì uŋgɛlɛ. È mà imbama nyayi ema è mà arze lì indirzɛ wɔ̀ɔ̀lɔ̀, ndi Yerzù mɔ̀ à mà hwɛ ndi ò ijɔ̀.

²⁵ Hwà-òkòwèlì hwa eni rzìi hwa ɛ̀ndɛ lì mò ìmòlɛ̀ hwa mò òhweyà nanù ema, “Ìi Rzàŋgò kòkò, ò jò rzùŋge! Kàà irzɔ ja à ŋwa!”

²⁶ Yerzù rzìi a hwa alàhwɛ̀ nanù ema, “Mamɛ ndèŋgatɛ̀ è òka wɔ̀ŋgɔ̀ nanù e? Mamɛ ndeŋgatɛ lìlòkɛ̀ la anyu lì tùù nanù e?” Rzìi à tɛ̀mɛ̀ ò ŋmanyu, à lòmeyà è mbɛ̀hvɛ̀nì ema e ma hwɛ lì hvɛhvɛ na hwèmùnɛ̀. O wòtɛmɛ̀tɛmɛ̀ e mbɛ̀hvɛ̀nì e ma kɛ̀ɛ̀yà rzìi hwèmùnɛ̀ hvɛ hwe lɔ̀kɔ̀meyà.

²⁷ Hwà-òkòwèlì hwa eni hwa ma tàmà rzayi-rzayi, rzìi hwa ijòwa nanù ema, “Ima ŋgàna mòtò ònò, ema natɛ̀ɛ na è mbɛ̀hvɛ̀nì na hwèmùnɛ̀ hwe ŋmànja hwe mò hweyànà e?”

Yerzù à mà wɔ̀wìrzɛ̀ hwatò hwahwàkɛ ema hwa mà òhva hwèlìŋgɛ̀ hwe wòhwe

²⁸ È hvònda ema Yerzù na hwà-òkòwèlì hwa eni hwa ma uke ò ɛnɛyi èhvarzù yà yulu, yà erzòòkà yà Gɛ̀ràrzɛ̀nì, hwatò hwahwàkɛ ema hwa mà òhva hwèlìŋgɛ̀ hwe wòhwe ò tenì ja awu, hwa ma uwɛ̀lɛ̀lɛ ò mòònda mò rzɔ̀ŋgɔ̀ hwa ma mò ùŋmanɛlɛ. Hwanù hwatò hwa ma ambìrzɛ̀nɛ̀ ema, tɔ̀ mòtò à rzìi tanɛ lì akeyà ò eŋge èhvàrzù ya njiya ema hwa ma hwɛ.

²⁹ Nà òma hwa ma ɛnɛ Yerzù, rzìi hwa wòteyà lì tɛɛ nanù ema, “È Ŋmàna wà ama Lohwɛ̀, mamɛ ò hwɛnì lì jò gbeyàna e? O jelì ndi anù ò lì jò kɔ̀kìrzɛ̀ ema e hvònda e rzìi uki e?”

³⁰ O ma hwɛ gbàka wò ŋgòwa ema wò ma hwɛ lì leeya ŋmanà hvòka lì hwa kòmbɛ̀nɛ̀.

³¹ O èŋgànɛ̀lɛ̀ hweŋge hwèlìŋgɛ̀ hwe wòhwe rzìi hwe rzòrzòmeya Yerzù nanù ema, “I hwi nanù ema ò hwɛni lì jò hvaya, ò jò òme ò wòŋgò gbàka wò ŋgòwa.”

³² Yerzù rzìi à kaneyà hweŋge hwèlìŋgɛ̀ hwe wòhwe nanù ema, “È wurze” lìwòkìmɛnɛ rzɔ hweŋge hwèlìŋgɛ̀ hwe ma hwa wurza rzìi hwe kpèeyà wòŋgò gbàka wò ŋgòwa. Iŋgi ŋgòwa ja arzɛ rzìi ì hwaŋga lìhwaŋgi la mànyakà ò mbèmbè yà lìyòwà rzìi, i unda ò tenì yà yùlu ya malìhwa, ì kùwa lì indeya aŋga.

³³ Hwàŋga hwatò ema hwa ma hwɛ lì ɔ̀ŋgeyà iŋgi ŋgòwa hwa mà hwaŋga, hwa ɛ̀ndɛ lì kpèeyà ò mbòwà. Hwa wòteyà lì òhweyà hwatò mamɛ ya arzɛ ema e gbèyɛ̀nɛ̀ na hwaŋga hwatò ema hwa ma òhva hwèlìŋgɛ̀ hwe wòhwe.

³⁴ Nà òma hwatò hwa eŋge mbòwà hwa ma hweye nanù, rzìi hwa wurza ò lì ɛ̀ndɛ lì ùŋma Yerzù. Nà òma hwa ma mò ɛnɛ, hwa mò rzòrzòmeyà ema a anjiye ò erzòòkà ya awu.