Matiyò 5 - Mokpwe: Bakwery (New Testament)

Yerzù à mà òkòlɛ hwatò ò mòòlì

¹ Nà òma Yerzù à mà ɛnɛ è ŋgìndì rzìi à agba ò ŋmanyu yà mòòlì à lìya ò rze. Hwà-òkòwèlì hwa eni wɔ̀ hvɛ hwa mà agba lì mò ùŋmanɛlɛ aŋga.

² Rzìi à wòteya lì hwa òkòlɛ̀ nà lì òhwa nanù ema,

³ “Mònàmɛ̀ nà hwatò ema hwa hwèlì mòlìrzà ò èlìŋgɛ̀, èhwanja hwa hwèlì ò rze yà Likànèyà la ama Lohwɛ̀.

⁴ Mònàmɛ̀ nà hwatò ema hwa ɛhwɛ, èhwanja Lohwà à ò gbèya hwa òhva mɔ̀nyɛ̀ŋgì hvɛ.

⁵ Mònàmɛ̀ nà hwatò ema hwa arzìhwìrzɛ̀yi, èhwanja è rze ya arzɛ è ò hwɛ ndi è yà awu.

⁶ Mònàmɛ̀ nà hwatò ema hwa òhvi è njàwò nà è nyìrzɛ̀ ò lì gbèya hwèyà ema Lohwà arza nanù ema hwa gbèèye èhwanja Lohwɛ̀ à ò hwa ujirzɛ̀.

⁷ Mònàmɛ̀ nà hwatò ema hwa uŋmɛ̀lɛ̀ hwahvɛhvɛ hwatò ììlì, èhwanja Lohwɛ̀ mɔ̀ hvɛ à ò hwa ùŋmɛlɛ ììlì.

⁸ Mònàmɛ̀ nà hwatò ema hwa rzàŋgi mèèmà, èhwanja wɔ̀ hwa ò ɛnɛ Lohwɛ̀.

⁹ Mònàmɛ̀ na hwatò ema hwa jàneyà hwahvɛhvɛ hwatò ɛ̀yɔ̀lɛ̀, èhwanja Lohwɛ̀ à ò hwa hwɛlɛ hwàànà hwa eni.

¹⁰ Mònàmɛ̀ nà hwaŋga hwatò ema hwa ò hwɛnɛ mètàkà, èhwanja hwa gbèya mamɛ ema Lohwɛ̀ arza nanù ema hwa gbèèye. Hwa hwèlì ndi ò rze yà Likànèyà la ŋmanyu yà lohwà.”

¹¹ Mònàmɛ̀ mò hwɛ nà inyɔ hwatò ema hwatò hwa hwɛnyɛ, inyɔ ema hwa tàkirzɛ̀, rzìi hwa è òhwàna inyayi ja hwèyà hwe wòhwe na lì è tɛmeya imbòŋgì ja mòlàŋgà ò lìnà la ami.

¹² È hwɛ gbamù, è òhve mɔ̀nyɛ̀ŋgì èhwanja etaŋgi ema è ò luwɛ ò ŋmanyu yà lohwà jò ò kòka. Nanù ndi hwatò hwa ma hwɛ lì tàkìrzɛ̀ hwà-òhwèlì hwa hwèlìŋgɛ̀ hwa kòòhwa.

Ikpa ema i wɔ̀lɛ̀nɛ wɔ̀tɛ̀wu wò eni nà ètùlù ema è utàhwi

¹³ “È hwèlì wòlitò ò mòŋgɛ mà hwatò hwa ene rze ŋgànà hvɔ̀kɔ nà òmà ikpa hvɛ i hwɛni wòlitò ò mòlèlì. Ndi ikpa i wɔ̀lɛ̀nɛyi tɛ̀ wòtɛ̀wu wò eni, nɛ i tànɛyi lì tɛ̀yirzɛ hvɛ e? Jɔ̀ i rzà hwɛnɛ hvɛ tɔ̀ eyà yà gbamù ò lì gbèya. O èŋgànɛ̀lɛ̀ i hvimbahwa ɔ̀nɛyi rzi hwatò hwa ji laala.

¹⁴ È gbeyi ndi nàa ètùlù ema e uŋmɛ̀lɛ̀ hwatò hwa arzɛ hwa ene rze e njiya ya ama Lohwɛ̀. Mbòwà e ma e òŋgàhwi ò ŋmanyu ya mòòlì e rza tanɛ lì utàmà.

¹⁵ Mòtò a rza tànɛyi lì hvààlɛ̀ ètùlù rzi à è ika ò rze yà èwòki. À hwɛnì ndi lì è tɛ̀yìrzɛ̀ ò ŋmanyu yà è mbòkò ema hwètùlù hwe tɛ̀mɛ̀. Aŋga nanù e uŋmɛ̀lɛ̀ ŋmàye ò hwatò hwa arzɛ ema hwa hwèlì ò ndawò.

¹⁶ Inyɛ̀ inyɔ hvɛ è pànye ndi ŋgàna hvɔ̀kɔ nàa ètùlù. Hwatò hwa ɛni tɛ hwèwòlò hwe anyu hwe gbamù ema è gbèya, hwa eka Lohwɛ̀ Tatɛ̀ hwa anyu ema à hwèlì ò ŋmanyu yà lohwà.”

Lì òkòlɛ̀ lì hvòmɛ̀nɛ̀ è mbendà

¹⁷ “È rza ɔ̀ŋgɛ̀lɛ̀ nanù ema nà jelì ndi ò rze ò lì limirzɛ imbenda ja ama Mòrzè nà hwèyà ema hwà-òhwèlì hwa hwèlìŋgɛ̀ hwa mà è òkòlɛ. Nà rza jelì ndi ò lì hwe limirzɛ̀ ndi nà jelì ndi ò lì hwe òndìrzɛ̀.

¹⁸ Nà è òhwèyà ndi è jɔ̀kɛ̀, natɛ̀ɛ è ŋmanyu yà lohwà nà e rze hwe è ò uka ò lìrzùkù, tɔ̀ ŋmanà mbumbu wà lìtɔ̀ti là mòtìla ema lì tìlahwì ò mbenda yà Lohwà è rza tànɛyi lì wuŋguhwèyà ò èki ya eni natɛ̀ɛ hwèyà hwe arzɛ hwe òndìrzɛ̀hwɛ.

¹⁹ O èŋgànɛ̀lɛ̀ rzɔ tɔ̀ ima mòtò ema à undi tɔ̀ mbenda tɔ̀ hvɔ̀kɔ ò ini mbenda ja ama Lohwɛ̀, tɔ̀ eŋge mbenda ema hwa ɔ̀ŋgɛ̀lɛ̀ nanù ema è rza òhvi wòlìtò, rzìi à è òkòlɛ̀ hwahvɛhvɛ hwatò ema wɔ̀hvɛ hwa gbèye nanù mɛnɛ, eŋge tumba mòtò è hwɛ ndi è wà lìrzùkù ò likànèyà là ama Lohwɛ̀. Ndi tɔ̀ njɛnɛ ema à gbèyi mamɛ ema è mbenda è òhwa rzìi à a òkòlɛ̀ hwahvɛhvɛ hwatò nanù mɛnɛ, à ò hwɛ̀nɛ̀ wòlìtò rzayi-rzayi ò ìtììtènì ja hwatò ema hwa hwèlì ò rze yà likànèyà là ama Lohwɛ̀.

²⁰ O èŋgànɛ̀lɛ̀ rzɔ, na e òhwèyà nanù ema natɛ̀ɛ inyɔ è gbèèyà Lohwɛ̀ lì aka Ihvàlìrzàyì, nà Hwà-òkòlèlì hwa mbenda, inyɔhvɛ è rza ò kpèèyà a kpèèyà ò Likànèyà là è ŋmanyu yà lohwà.”

Hwèyòkòlelì hwe ama Yerzù lì hvòmɛ̀nɛ̀ hwètàtò

²¹ Yerzù à hwatɛ hvɛ nanù ema, “Inyɔ è mà hweya nanù ema imbamba ja arzu ì mà òhwawɛlɛhwɛ nanù ema, ‘Mòtò à rzi òŋwa mòtò. Tɔ̀ ima mɔ̀ ema à òŋwi mòtò à ò ikahwa ò hwèkàyìrzelèlì.’

²² Ndi nà è òhwèyà ema tɔ̀ ima mòtò ema à tatani òhvɛhvɛ mòtò, mɔ̀hvɛ à ò ikahwa ò hwèkàyìrzelèlì. Tɔ̀ ima mòtò hvɛ ema à hwɛnyi ŋmànyàŋgò wà eni nanù ema, ‘Èleŋgè’ à hwɛnì lì alàhwɛ̀ è ndawò yà hwèkàyìrzelèlì yà hwa ndɛnɛ. Ndi tɔ̀ njɛnɛ hvɛ ema à hwɛlɛ ŋmànyàŋgò wà eni nanù ema, ‘Ò wà èèti yà mòtò,’ à ò aŋgbahwa ò mùnya ema mò rza lìma.

²³ Ò arzi tɛ lì ŋgbà Lohwɛ̀ làhwèya là aŋgɔ̀ ò lììyɔ̀ là màkanɛ̀, rzìi ò ɔ̀ŋgɛ̀lɛ̀ ema è à òhvanɛ lùùrzè nà mòtò,

²⁴ ò àŋgàmɛ̀nɛyi lì lìya làhwèya là aŋgɔ̀ aŋga wòrzò wò lììyɔ̀ là màkanɛ̀. Ò lòma lì ɛ̀ndɛ lì gbèya ɛ̀yɔ̀lɛ̀ nà oŋgo mòtò. Rzìi ò ja ò ahwèya làhwèya là aŋgɔ̀ òma Lohwɛ̀.

²⁵ ‘O rzeeya hwèyà nà è mɔ̀kɔ̀ɔ̀yèlì wà aŋgɔ̀ ema àrza lì ò ɛ̀ndɛnɛ ò ndawò yà hwèkàyìrzèlì. O gbèèyè nanù ndèŋgànà è uka ò hwèkàyìrzèlèlì. È rza enje tɛ nanù, mɔ̀ à ò rzɔ̀mɔ̀nɔ̀ ò kòti. Oma è kòti è mà ò akɛlɛ̀lɛ i pòlìrzi, òma ò mà aŋgɛhwɛ ò hwèwòwà.

²⁶ Nà ò òhwèyà ndi è jɔ̀kɛ̀ nanù ema ò rza tanɛ lì anjiya ò tenì yà hwèwòwà natɛ̀ɛ ò rzààwà lìyɛmɛ là aŋgɔ̀ là arzɛ.’”

Hwèyòkòwèlì lì hvòmɛ̀nɛ̀ mòrzònje ò lìhwa

²⁷ “È mà hweya nanù ema è òhwàhwi nanù ema, ‘O rzi gbèya mòrzònje ò lìhwa.’

²⁸ Ndi nà è òhwèyà ema, tɔ̀ ima mòtò ema à ɔ̀ŋgɔ mòlanà nà màlùtèyà ema mɔ̀ à mò naŋgane, mɔ̀ à mà màa lì mò gbèyana mòrzònje ò ŋmèma mò eni.

²⁹ È hwèlì tɛ ema lìirzɔ̀ là aŋgɔ̀ lì ò gbèya ema ò gbèyè wòhwe, ò lì tɔ̀ŋge, ò lì hvimbe ɔ̀nɛyi. O lɔ̀wu ema ò lì wɔ̀lɛ̀nɛ̀, lì aka ema è nyò yà aŋgɔ̀ yà arzɛ è hvimbahwe ò mùnya.

³⁰ È hwèlì hvɛ tɛ nanù ema lìya là aŋgɔ̀ là mòmɛ̀ lì gbèya ema ò gbèye wòhwe, ò lì kɛ ò lì hvimbe ɔ̀nɛyi. È hwèlì gbamù ema ò wɔ̀lɛ̀nɛ̀ èhvarzù yɔ̀kɔ yà aŋgɔ̀ yà nyò, lì aka ema è nyò yà aŋgɔ̀ yà arzɛ è aŋgbawe ò mùnya.”

Lì òkòlɛ là ama Yerzù lì hvòmɛ̀nɛ̀ lì hvaŋga là lìhwa

³¹ “È kààtì yà lohwà è òhwa hvɛ nanù ema, ‘Tɔ̀ ima mòtò ema a hvayi jòjìyɛ̀ wà eni ò lìhwa, à hwɛnì lì mò ŋgbà lìhvahve ò lì uŋmɛ̀lɛ̀ nanù ema à mò hvayì ò lìhwa.’

³² Ndi imba nà è òhwèyà nanù ema, tɔ̀ ima mòtò ema à hvayì jòjìyɛ̀ wà eni ò lìhwa, è rzi hwɛ ema à mò lùwànì njɔ̀mi yà mòrzònje, rzi òŋgò mòlanà à hwààhwà òhvɛhvɛ munyanà, nanù òma è mòjòmɛ̀ wà eni ema à mò hvayi ò lìhwa mɔ̀ ndi à mò gbèyi ema à gbèyè mòrzònje. Tɔ̀ ima mòtò hvɛ ema à hwàà è mòlanà ema à hvayahwi ò lìhwa nanù òma mɔ̀ hvɛ à undi ò mòrzònje mò lìhwa.”

Hwèyòkòlelì hwe ama Yerzù lì hvòmɛ̀nɛ̀ è Hweyi

³³ “Inyɔ ema hwèya hvɛ nanù ema hwa mà òhwèyà hwatò hwa kòhwa nanù ema, ‘È rzi àtɛ̀ɛ̀ ò ŋgundu, ndi è gbèèye mamɛ ema inyɔ è àtɛ̀ɛ è hweyi ò lì gbèèyà Lohwɛ̀.’

³⁴ Ndi imba nà è òhwèyà nanù ema, è rzi keka lì ààtɛ̀, è rzì keka hvɛ là ààtɛ̀ ò lìnà là likànèyà là ŋmanyu, èhwanja aŋga ndi Lohwɛ̀ à òhvi likànèyà là eni.

³⁵ Tɔ̀ lì ààtɛ̀ hvɛ ò rze, èhwanja aŋga ndì matàŋgà mà ama Lohwɛ̀ ma mà ìkahwɛ̀. Tɔ̀ lì àtɛ̀lɛ̀lɛ̀ hvɛ ò lìnà là è mbòwà ya Jèrurzalɛ̀mù, èhwanja yɔ ndi e hwèlì e mbòwà ya ama e Kìŋgɛ ndɛnɛ.

³⁶ È rzi keka hvɛ tɔ̀ lì àtɛ̀lɛ̀lɛ̀ inyɔ hwiti èhwanja inyɔ e rza tànɛyi lì tanìrzɛ̀ tɔ̀ lì indìrzɛ̀ rzòwe hvɔ̀kɔ ya lìhvumbu la anyu.

³⁷ È òhwi tɛ nanù ema e gbèya eyà, e òhwe ndi ema, ‘Ɛ̀ɛ, na e gbèya.’ Tɔ e ò hwɛ ndi nanù ema, ‘Jàyɛ̀, na rza e gbèya.’ Tɔ̀ mamɛ ema e òhwi lì aka nanù, e uhwɛ̀lɛ̀lɛyi ndi na Mòkarzɛ̀.”

Hwèyòkòlelì lì hvòmɛ̀nɛ̀ lì timbirzɛlɛlɛ la wòhwe

³⁸ “È ma hwèya ema e ma òhwahwa nanù ema, ‘Mòtò a tuhwi tɛ lìrzɔ la ama ò hvɛhvɛ mòtò, hwa mò tuhwe mɔhvɛ e la eni lìrzɔ. Mòtò a hvɔ̀ki tɛ lìrzòŋga la mòtò mɔhvɛ hwa mò hvɔ̀kɔ e la eni lìrzòŋga.’

³⁹ Ndi imba na e òhwèyà nanù ema, mòtò à è gbèyi tɛ wòhwe, è rzi timbirzɛlɛ. È hwèlì tɛ ema mòtò à ò rzamì tɛ lùùmbɛ̀ ò lìyamà lì aŋgɔ̀ lɔ̀kɔ, ò mò uŋmɛ̀lɛ̀ hvɛ lìnɛyi lìyamà.

⁴⁰ Ndèŋgànɛ̀lɛ̀ hvɛ mòtò à àrzi tɛ lì ò rzɔ̀mɔ̀nɔ̀ kòti, ò lì ò wòwàna è rziŋgɛ̀lɛ̀tì yà aŋgɔ̀, ò mò ŋgbe hvɛ è rzɔ̀tì yà aŋgɔ̀.

⁴¹ Mòtò à inyàmɛnɛ tɛ ema ò ɛ̀ndɛ nà mɔ̀ hvòka yà mayelì mɔ̀kɔ, ò ɛ̀ndɛ nà mɔ̀ mayelì mahwakɛ.

⁴² O ŋgbe òŋgò mòtò ema à ò ɔ̀mbɔ̀, ndèŋgànɛ̀lɛ̀ hvɛ ò bàlɛ̀ òŋgò ema à arza lì ò bàlɛ̀nɛ̀.”

Yerzù à òkòlɛ lì hvòmɛ̀nɛ̀ hwàkɔ̀yèlì

⁴³ “È ma hwèya ema è mà òhwahwa nanù ema, ‘Lìŋgàna ŋmànyàŋgò wà aŋgɔ̀, kɔ̀ɔ̀ hvɛ è mòtò ema à ò kɔ̀ɔ̀.’

⁴⁴ Ndi imba nà è òhwèyà nanù ema, è lìŋgàne hwatò ema hwa è kɔ̀wu. È kanɛ̀lɛ̀lɛ̀ hvɛ hwaŋga hwatò ema hwa è tàkìrzɛ̀.

⁴⁵ È gbèyi tɛ nanù, è ò hwɛ ndi hwàànà hwa ama Tatɛ̀ wà anyu ema à hwèlì ò ŋmanyu yà lohwà. Mɔ̀ à gbèya igbèyi ì hvanyeya nà è mbuwà ò lì yɔ̀yèyà hwatò hwa wòhwe nà hwatò hwa gbamù, nyàyi hvɔ̀kɔ.

⁴⁶ O lìŋgàni tɛ ndi hwaŋga hwatò mɛnɛ ema hwa ò lìŋgàni, eŋge eyà è rza ò jànèyà tɔ̀ mɔ̀rzɛ̀ŋgì. Tɔ hwàrzàŋgèlì hwa è njàŋge yà lìkànèyà wɔ̀ hvɛ hwa gbèya ndi nanù mɛnɛ

⁴⁷ O kɔmɔ̀ tɛ hwatò hwà aŋgɔ̀ mɛnɛ, òma ò wà hvɛ ò mà gbèya ndi nà òma hwahvɛhvɛ hwatò hwa gbèya. Tɔ̀ hwaŋga hwatò ema hwa rza enje wònyà Yudà hwa gbeyà nanù mɛnɛ.

⁴⁸ È gbèèyè ndi hweyà hwe gbamù, nà òmà Tatɛ̀ wa anyu wa ŋmanyu yà lohwà mɔ̀hvɛ à hwe gbeyà.”