Matiyò 28 - Mokpwe: Bakwery (New Testament)

Yerzù à mà hvùmùwà

¹ O mburzà wùnyà wò lì Arzìyòlɛ̀, na òma wùùnyà wò wòrzò wò e wiki wò ma wòteyà lì yahwa, Màlìyɛ̀ Màdàlènì, na Màlìyɛ̀ ema a mà ŋya Jèmìrzì nà Jòrzɛ̀hvù hwà mà ɛ̀ndɛ ò lì ɔ̀ŋgɔ e rzɔ̀ŋgɔ̀ ya ama Yerzù.

² Lìwòkìmɛ̀nɛ̀ ò ma hwɛ mònyìŋgìrzɛ̀nɛ̀ mò ndɛnɛ e aŋgèlì ya ama Rzàŋgò e ma uwɛ̀lɛ̀lɛ̀ ò ŋmanyu yà lohwà rzìi e jà e iŋgòlɛ lìŋgi lìŋyàyi ema lì mò umba eŋge wàna ya eŋge rzɔ̀ŋgɔ̀ rzìi a lì lìya ò ŋmanyu.

³ Wòrzò wò ama eŋge aŋgèlì wò ma hvaya ndi nàa lìŋmɛ̀tiŋmɛ̀ti, lìwɔtì la eni hvɛ lì ma ɛneya ndi rzìlìhwà.

⁴ Hwàŋga hwàànèlì wa njuma ema hwà mà hwɛ lì ɔŋgeya eŋge rzɔ̀ŋgɔ̀ hwà mà òhva wɔ̀ŋgɔ̀. Wòŋgò wɔ̀ŋgɔ̀ wò ma hwa tumìrzɛ̀ mòkambiya rzìi hwa kpa ò rze hwa embama na hwèembè.

⁵ Èŋge aŋgèlì rzìi e òhweyà hwaŋga hwalanà nanù ema, “È rza òka wɔ̀ŋgɔ̀. Nà hwi nanù ema e arza ndi Yerzù ema à mà wòmàwɛlɛ̀hwɛ̀ ò mbarza.

⁶ A rza enje anù. A ma hvùmùwà na òma à mà e òhweyà. È jèe e ɔ̀ŋgɔ èki ema à mà nàŋgɛlɛhwɛ.

⁷ È ɛ̀ndɛ rzɔ karzi-karzi e òhweyà Hwà-òkòwèlì hwa eni nanù ema, ‘À mà Hvùmùwà ò kpelì. A ma màa lì ɛ̀ndɛ ò wòrzò wò anyu ò Galìlì, aŋga ndi e mò ɛnɛ.’ È ɔ̀ŋgɛ̀lɛ̀ mamɛ ema na e òhweyà.”

⁸ Hwàŋga hwalanà rzìi hwa anjiyana lì ahwèŋgɛ̀ ò rzɔ̀ŋgɔ̀ na wɔ̀ŋgɔ̀ ndi hwà mà ònda na màlìŋgò. Hwa hwaŋga ò lì ɛndɛ lì òhweyà Hwà-òkòwèlì hwa ama Yerzù mamɛ ya arzɛ ema e ma gbèyɛ̀nɛ.

⁹ Nà òma hwaŋga hwalana hwà mà hwɛ lì ɛndɛ, lìwòkimɛnɛ Yerzù rzìi a hwa taneya, a hwa òhweyà nanù ema, “Ɛ̀yɔ̀lɛ̀ e hwɛ na inyɔ” hwà mà mò jèeyà hwa mò lɛ̀mbɛ matàŋgà hwa mò kànɛ.

¹⁰ Yerzù rzìi a hwa òhweyà nanù ema, “È rza òka wɔ̀ŋgɔ̀. È ɛ̀ndɛ e òhweyà hwà-òkòwèlì wa ami ema hwa hwèlì ndi nàa wònyànyàŋgò wa ami ema hwa ɛ̀ndɛ ò Galìlì. Aŋga ndi hwa nò ɛnɛ.”

Hwàanèlì hwa njuma hwa ò hwi mamɛ ema e gbeeyɛnɛ

¹¹ Nà òma hwaŋga hwalanà hwà mà hwɛ lì ɛ̀ndɛ lòŋgò la hwàanèlì hwa njuma ema hwà mà hwɛ lì ɔŋgeya e rzɔŋgɔ ya ama Yerzù, hwà mà ɛ̀ndɛ ò mbòwà lì òhweyà Ipìlìrzì ndɛnɛ mamɛ ya arzɛ ema e ma gbèyɛ̀nɛ e hvònda ema e aŋgèlì e ma jèe.

¹² Ipìlìrzì ndɛnɛ i ma lìya wùndɛ̀ na hwàmbaki hwa mbòwà ò lì wòŋgirzɛnɛ mamɛ ema hwa gbeyà. Rzìi hwa ŋgba hwaŋga hwàanèlì hwa njùma ema hwà mà hwɛ lì ɔŋgeya eŋge rzɔ̀ŋgɔ̀ wòlì wò ndɛnɛ.

¹³ Hwa mà hwa kòkòwɛ̀lɛ̀ ò lì òhwa nanù ema, “Hwà-òkòlèlì hwa ama Yerzù hwà mà jà lì ihwa èèmbè ya ama Yerzù wùuwù ema hwa ma hwɛ lì naŋga.

¹⁴ Pìlatò a hweyi tɛ ene eyà e mò gbeyà a hwiya nanù ema rzeketɛ e njɔ̀mì ya anyu. Aŋga nanù inyɔ e rza hwɛnɛ tɔ̀ mòhvùŋgu.”

¹⁵ Hwàŋga hwàànà njùma rzìi hwa wòwa wòŋgò wòlì rzìi hwa gbèeya na òma hwà mà kòkòwɛlɛhwɛ. Nàtɛ̀ɛ na yawònò, wònyà Yudà hwa hwèlì hwa òhwa wònò gbitò.

Yerzù a wurzelì hwà-òkòwèlì hwa eni

¹⁶ Rzìi lìŋgi Lìyòmɛ̀ la eni la Hwà-òkòwèlì na mɔ̀kɔ hwa ama Yerzù hwa ɛ̀ndɛ ò mòòlì ò Galìlì ema à mà hwa òmeya ŋmɛ̀ndì ema hwa ɛndɛ.

¹⁷ Nà òma hwà mà mò ɛnɛ hwà mà mò kanɛ̀ tɔ̀ nɛ lòŋgò hwa rzi lòkɛ nanù ema mɔ̀ ŋmitɛ-ŋmitɛ òŋgò.

¹⁸ Yerzù rzìi a tòmbeya lì hwa kòmbɛnɛ rzìi a hwa òhweyà nanù ema, “Nà ŋgbààhwi wònja ò lìkànèyà la ŋmanyu na e rze.

¹⁹ O èŋgànɛ̀lɛ̀ rzɔ e ɛndɛ ò hwèkòmè hwe arzɛ hwe ene rze, e gbèèye hwatò ò lì hwɛ hwà-òkòwèlì hwa ami. È hwa lùhwìrzɛ̀ ò lìna la ama Tatɛ̀, ò lìna la ama e Ŋmanà, na ò lìna la Èlìŋgɛ̀ yà Wòtani.

²⁰ È hwa òkòlɛ̀ hvɛ ò lì nɔ̀ŋgɔ hweyà hwe arzɛ ema na e kànèlì ò lì gbeyà. È hwiye nanù ema na hwɛ na inyɔ natɛ̀ɛ na ò lìrzùkù la rze.”