Matiyò 25 - Mokpwe: Bakwery (New Testament)

Ŋmàna mò lìyòme là mèyɔ̀mbɔ̀ mè ŋgɔ̀ndɔ̀

¹ Yerzù à mà kpɛɛ mɔ̀ hvɛhvɛ ŋmàna ò lì òhwa nanù ema, “Ò eŋge hvònda ema è Ŋmanà wà è Mòtò wà Hwènàmà à ò jɛ̀ɛ̀, lìkànèyà là ŋmanyu lì ò hwɛ ndi nàa lìyòmɛ̀ là mèyɔ̀mbɔ̀ mè ŋgɔ̀ndɔ̀ ema hwa mà wòwà hwètùlù hwe awu ò lì ɛ̀ndɛ lì ambɛlɛlɛ è mòhwayèlì ò lì ɛndɛ lì mò lìyɛlɛ.

² Ò ìtììtènì jà lìŋgi lìyòme là hwàna hwa ŋgɔ̀ndɔ̀ hwata hwa mà hwɛ èèti, hwanɛ̀yi hwàtànɛ̀ wɔ̀ hwa mà hwɛnɛ lìhwiyè.

³ Hweŋge hwèèti hwe hwàna hwa ŋgɔ̀ndɔ̀ hwe mà wòwa hwètùlù hwe awu ndi hwa rzìi òhve mà hvɛhvɛ mànyàŋga màŋgele.

⁴ Ndi hwaŋga hwa lìhwiyè hwa mà awòmbɛlɛ mahvɛhvɛ mànyàŋga màŋgele ò hwèhvòrzì ò lì gbeyàna ò hwètùlù hwe awu.

⁵ È mòhwayèlì à mà tɔ̀ɔ̀lɛ̀ hwèjèelì, ò èŋgànɛ̀lɛ̀ rzɔ hwaŋga hwàna hwa ŋgɔ̀ndɔ̀ hwa mà wòteyà lì rzìirza nà lì naŋga ijɔ.

⁶ Ò kɔ̀rzi yà awu jòŋgii, rzìi mòrzeya mò tɛ̀ɛ̀hwɛ̀ nanù ema, ‘È mòhwayèlì à mà jà! È wurze è jèe è mò ùŋma.’

⁷ Mèyɔ̀mbɔ̀ me ŋgɔ̀ndɔ̀ mè arzɛ mè tɛ̀mɛ̀nɛ mè agbɛlɛ hwètùlù hwe awu.

⁸ Iŋgi ŋgɔ̀ndɔ̀ jà èèti rzìi jò òhweyà è hwa lìhwiyè nanù ema, ‘Hwètùlù hwe arzu hwe à lìma è jò ŋgbè hwàànà mànyàŋga màŋgele.’

⁹ Hwàŋga hwa lìhwiyè rzìi hwa hwà alàhwɛ̀ nanù ema, ‘Jàyɛ̀! Mamɛ ema jò òhvi, è rza ò jò tànɛ, irzɔ nà inyɔ. È ɛ̀ndɛ ò ndawò jà nyòŋga, è andelɛ mànyàŋga màŋgele.’

¹⁰ Ndi nà òma hwa mà ɛ̀ndɛ lì anda mànyàŋga màŋgele, è mòhwayèlì à mà jà. Rzìi hwaŋga hwàna hwa ŋgɔ̀ndɔ̀ hwààtànɛ̀ ema hwa mà wòŋgirzɛnɛ hwa ɛ̀ndɛ nà mɔ̀ ò è ndèma yà lìhwa, rzìi lìyòhva lì umbahwa.

¹¹ Ò mburzà hvònda è wɔ̀ ema hwa mà ɛ̀ndɛ ò lì anda manyàŋgà maŋgele nà òma hwa mà timbe, hwa mà tɛɛ nanù ema, ‘Rzàŋgò, rzaŋgò ò jò lìhvòweya lìyòhva!’

¹² Rzìi è mòhwayèlì à hwa timbirzɛlɛ nanù ema, ‘Nà è jɔ̀kɛ̀, nà rza è hwi.’”

¹³ Yerzù rzìi à umba mònò ŋmàna ò lì òhwa nanù ema, “È wòwe hvònda, èhwanja è rza hwi wùùnya tɔ̀ è hvònda ema è Ŋmanà wà è Mòtò wà Hwènàmà à ò jɛ̀ɛ.”

Ŋmàna mò hwàgbèèlì hwàyàwò

¹⁴ Yerzù rzìi à hwatɛ ò lì òhwa nanù ema, “Ò eŋge hvònda lìkànèyà là ŋmanyu lì ò hwɛ ndi nàa mòtò mɔ̀kɔ ema à mà wòŋgirzɛnɛ ò lì ɛndɛ yɔ̀ndɔ̀. À mà hwɛlɛ hwàgbèèlì hwa eni rzìi à hwa lììyà erzaŋgò yà eni.

¹⁵ À ma ŋgba tɔ̀ ima mɔ̀ lì hvòmɛ̀nɛ̀ è hwɛ̀yìi yà eni. À mà ŋgba mɔ̀kɔ hwekòlì hweta hwe wòlì, à mà ŋgba òhvɛhvɛ hwekòlì hwe hwàkɛ hwe wòlì ndèŋgànà òhvɛhvɛ ikòlì jɔ̀kɔ jà wòlì. Nà òma à mà kùlɛ̀ lì ŋgba, rzìi à ɛndɛ è yà eni.

¹⁶ È mògbèèlì ema à mà lùwa hwekòlì hweta hwe wòlì, à mà hwa ika ò nyòŋga rzìi à yàlɛ̀ hwehvɛhvɛ hwekòlì hweta hwe wòlì.

¹⁷ Oŋgò mɔ̀ hvɛ wà hwekòlì hwehwakɛ hwe wòlì mɔ̀ hvɛ à mà gbeyà nyayi hvɔ̀kɔ nàa è wà wòrzò, rzìi à yàlɛ̀ mehvɛhvɛ hwekòlì hwehwakɛ hwe wòlì.

¹⁸ Ndi òŋgò ema à mà òhva ikòlì jɔ̀kɔ ja wòlì à mà ɛ̀ndɛ lì ima èhvɔ̀ndì ò mɔ̀nyɛ̀, rzìi à uta wòŋgò wòlì wò ama rzaŋgɛ wà eni wà èwòlò ò tenì.

¹⁹ “Ò mburzà yà hvòka hvònda e rzaŋgo yà awu ya èwòlò è mà tìmba, rzìi a kɔ̀kɔ̀ lìrzaŋgò na wɔ̀.

²⁰ È mɔ̀ ema à mà ŋgbààhwà hwekòlì hweta hwe wòlì à mà jànà hwehvɛhvɛ hwekòlì hweta hwe wòlì rzìi a òhweyà rzaŋgɛ wa eni wa èwòlò nanù ema, ‘O ma nò ŋgba hwekòlì hweta hwe wòlì. Nà ma hwe ika ò nyòŋga rzìi na yalɛ hwehvɛhvɛ hwekòlì hweta hwe wòlì.’

²¹ Rzaŋgɛ wà eni wa èwòlò à mà mò alàhwɛ̀ nanù ema, ‘O gbèyi gbamù, ò hwèlì ndi e mògbèèlì wa gbamù ema a tɛmi ehve-ehve. O awuŋmɛ̀lɛ̀ ò wà witi ò lì hwɛ e mògbèèlì wa gbamù na jɔ̀kɛ̀. Nà òma ò tanɛyi lì ɔ̀ŋgeya ŋmanà wòlì, ò èŋgànɛ̀lɛ̀ imba na ò ika ema ò kànèyà wòlì wò ndɛnɛ. Kpèeyà ònò i rzòmbìrzɛ̀ mɔ̀nyɛ̀ŋgì mò ami.’

²² “Oŋgò mògbèèlì wa hwekòlì hwehwakɛ hwe wòlì mɔ̀ hvɛ rzìi a ja a òhwa nanù ema, ‘Rzàŋgò, ò ma nò ŋgba hwekòlì hwehwakɛ hwe wòlì, nà mà hwa ika ò nyòŋga rzìi nà yàlɛ hvɛ hwekòlì hwehwakɛ hwe wòlì.’

²³ Rzàŋgò wa eni wa èwòlò rzìi a mò alàhwɛ̀ nanù ema, ‘O gbèyi gbamù, ò hwèlì ndi e mògbèèlì wa gbamù. Nà òma ò tanɛ lì ɔŋgeya ŋmanà wòlì, ò èŋgànɛ̀lɛ̀ imba na ò ika ema ò kànèyà wòlì wò ndɛnɛ. Kpèeyà ònò i rzòmbìrzɛ̀ mɔ̀nyɛ̀ŋgì mò ami.’

²⁴ È mɔ̀ ema à mà ŋgbààhwà ikòlì jɔ̀kɔ ja wòlì, mɔ̀ hvɛ à mà jà rzìi a òhwa nanù ema, ‘Rzàŋgò, na hwi ema ò ambirzɛnɛ, ò rzaŋga mbòtà ò hwe èki ema ò rza ònɛ, ndèŋgànɛ̀lɛ̀ ò rzaŋga mbòta ò èki ema ò rza mùŋgùlɛ̀ tɔ̀ hvɔ̀ŋgɔ̀.

²⁵ O èŋgànɛ̀lɛ̀ nà mà òka wɔ̀ŋgɔ̀ nà mà uta ikòlì ja aŋgɔ̀ ja wòlì ò mɔ̀nyɛ̀. Ɔ̀ŋgɔ tɛ, wòwa mamɛ e hwèlì e ya aŋgɔ̀.’

²⁶ “Rzàŋgò wa eni wa èwòlò rzìi a mò alàhwɛ̀ nanù ema, ‘Ò wà è mògbèèlì wa ekɔni na rziŋga! O èŋgànɛ̀lɛ̀ rzɔ ò wa ò hwi ema na rzaŋga mbòtà ò èki ema na rza ònɛ, ndèŋgànɛ̀lɛ̀ na rzaŋga mbòta ò èki ema na rza mùŋgùlɛ̀ tɔ̀ hvɔ̀ŋgɔ̀ e?

²⁷ Òole, òma ò ma ika wòlì wò ami ò ndawò ya lùùtà, aŋga nanù òma ò hwetimbelì hwe ami, mònò yàlɛlɛ jùùmɛ̀.’

²⁸ Aŋga ndi òŋgò mòtò a òhweyà hwàgbèelì hwa eni nanù ema, ‘È mò wòwane wòŋgò wòlì, e wò ŋgbè e mɔ̀ ema a òhvi lìyòmɛ̀ la hwekòlì hwe wòlì.

²⁹ Tɔ̀ njɛnɛ ema a òhvì yòmà, Lohwɛ̀ a ò mò hwàteyà hvɛ, rzìi òma à mà lùwà hveyii, ndi e mòtò ema a rza òhvɛ yòmà, tɔ̀ e tenyi ema a òhvì Lohwɛ̀ a ò mò wòwànà e yɔ.

³⁰ Lì hvòmɛ̀nɛ̀ ònò mògbèèlì hwa èèti, e mò hvume e mò hvake ɔ̀nɛyi ewòka ò tenì yà jìtìtì, aŋga ema a eeya na lì kɔ̀kɔ̀ mehvehve.’”

Hwèkàyirzèlì hwe lìrzùkù

³¹ “Ndi e hvònda ema è Ŋmanà wà è Mòtò wà Hwènàmà a ò jɛ̀ɛ̀ nàa Kiŋgɛ, na i aŋgèlì ja arzɛ ja ama Lohwà a ò lìya ndi ò kònda ya eni ya lìkànèyà là èluhwe ò lì kàyìrzɛ̀ hwatò.

³² Hwatò hwa arzɛ ò hwèkòmè hwe arzɛ hwe ene rze ya mɔ̀nyɛ̀ hwa ò arzàŋganɛ ò wòrzò wa eni. Rzìi mɔ̀ à ò hwa kakòwa mòòŋgò mahwakɛ nà òma e mɔ̀ɔŋgelì wa hwèembè a kakòwà mɛ̀ɛlɛ̀ŋgù ò ì mbòlì.

³³ Nànù ndi e Kiŋgɛ a ò ika hwatò ema hwa hwèlì ehve-ehve ò lìya la eni la mòme hwanɛyi hvɛ ema hwa rza enje ehve-ehve ò lìya la eni la ŋmalì.

³⁴ È Kiŋgɛ a òhweyà e hwaa lìya la mòme nanù ema, ‘È jèe inyɔ ema e nàmìrzɛ̀hwɛ̀yi na e Tatɛ̀ wa ami! È jèe e wòwe mònàmɛ̀ mò lìkànèyà la ama Lohwɛ̀ ema mò ma màa lì e rzekahwɛlɛ natɛ̀ɛ na e hvònda ema mɔ̀ à mà wèkè e rze.

³⁵ Inyɔ e luwa mònò mònàmɛ̀ èhwanja e hvònda ema nà mà òhve e njàwò e ma nò ŋgba mòlelì, e hvònda ema nà mà hwèya e nyìrzɛ̀ ema mà nò ŋgba malìhwà mà lì nyɔ, nà mà ja ŋmɛ̀ni ò mba anyu rzìi e nò karzɛ.

³⁶ È hvònda ema na rza òhvɛ màatù ma lì wɔ̀tɔ̀, e ma nò ŋgba màatù ò lì wɔ̀tɔ̀, nà mà ɔ̀kirzɛ̀ rzìi e ja ò lì nò ɔŋgeya, nà mà hwɛ ò hwèwòwà rzìi e ja lì nò hvɛhvɛ.’

³⁷ Rzìi hwaŋga hwa ehve-ehve hwa ò mò alàhwɛ̀ nanù ema, ‘Ìi Rzàŋgò, ima hvònda ima ò ɛnɛ na e njàwò rzìi jò ò lìrzɛ e? Tɔ̀ nyìrzɛ̀ ya malìhwa rzìi jò ò nyìrzɛ̀ e?

³⁸ Ima hvònda i ma ò ɛnɛ nàa ŋmɛ̀ni rzìi jò ò karzɛ e? Tɔ̀ lì ò ŋgba màatù ema ò rza òhvɛ lìhwatu mà lì wɔ̀tɔ̀ e?

³⁹ Ima hvònda i ma ò ɛnɛ ò nyàmbɛ tɔ̀ ò hwèwòwà rzìi i ja lì ò hvɛhvɛ e?’

⁴⁰ Ndi e Kiŋgɛ̀ e hwa alàhwɛ̀ nanù ema, ‘O tɛ̀ɛ̀tɛ̀ɛ na e òhweyà ema tɔ̀ mamɛ ema e ma gbèeyà mɔ̀kɔ wa hwanù wònyanyàŋgò wa ami ema hwa rza òhvɛ hwe tɛmelì, imba ndi ema gbèeyà.’

⁴¹ “Ndi e Kiŋgɛ̀ e ò ayèŋgòwɛ̀lɛ̀lɛ̀ hwaŋga ema hwa ò hwɛ ò lìya la eni la ŋmalì rzìi a hwa òhweyà nanù ema, ‘È nò anjiya anu inyɔ ema e jemahwi na Lohwɛ̀! È ɛndɛ e kpèeyà ò ehvɔ̀ndi ya mùnya ema Lohwɛ̀ à mà rzekeya Mòkarzɛ̀ na i aŋgèlì ja eni.

⁴² Lìrzàkò ema nà mà hwèye e njàwò, e rzi nò lìrzɛ, nà mà hwèya e nyìrzɛ ya malìhwa ndi e rzi nò nyìrzɛ.

⁴³ Nà ma hwɛ ŋmɛ̀ni ndi e rzi nò kàrzɛ ò màndawò ma anyu, na rza òhve lìhwatu la lì wɔ̀tɔ̀ e rzi nò wɔ̀tìrzɛ, nà mà ɔ̀kirzɛ̀ rzìi na hwɛ hvɛ ò hwèwòwà e rzìi jèe lì nò ɔŋgeya.’

⁴⁴ Ndi wɔ̀ hvɛ hwà mà mò timbirzɛlɛ nanù ema, ‘Ìi Rzàŋgò, ima hvònda ema i mò ɛnɛnɛ e njàwò, tɔ̀ nyìrzɛ̀ ya malìhwa, tɔ̀ nàa ŋmɛ̀nì, tɔ̀ ema ò rza òhvɛ lìhwatu, tɔ̀ na nyàmbɛ tɔ̀ ò hwèwòwà rzìi i rzi ò òŋgòwane e?’

⁴⁵ Ndi eŋge Kiŋgɛ e hwa alàhwɛ̀ nanù ema, ‘Nà e òhweyà na e jɔ̀kɛ̀ ema, tɔ̀ ima lìrzakò ema e ma rzɔ̀rzè ò lì gbeyà hwanù wònyànyàŋgò wa ami ema hwa rza òhvɛ hwe tɛmelì, imba ndi e ma rzɔ̀rze lì gbèeyà nanù.’

⁴⁶ Hwanù hwa arzɛ hwa ò òmahwa ndi ò e kɔ̀kìrzɛ̀ ya gbìndèyà, ndi e wɔ̀ hwa ehve-ehve hvɛ hwa ò ɛndɛ ndi ò lòŋgɛ la gbìndèyà.”