Matiyò 20 - Mokpwe: Bakwery (New Testament)

Ŋmàna mò hwàgbèelì hwa hvaya

¹ Yerzù à mà kpɛ ŋmàna nanù ema, “Likànèyà la ama Lohwɛ̀ lì hwèlì ndi nàa mòtò ema a òhvi e wàŋga ya eni, ema à mà akɛlɛ lì wurza ò ndawò ekpa ya arzɛ lì ɛ̀ndɛ lì arza hwatò a aka ò lì mò gbèeyà èwòlò ò hvaya ya eni.

² O mburza ya màrzèelì mò hwàgbèèlì, wɔ hwà mà ayemànɛ̀lɛ̀ ò mòrzahwèlì mò wùnyà wɔ̀kɔ, ndèŋgànà mò a e hwa òma ò eŋge hvaya.

³ O lìrzakò la ŋgɛŋgi luuwa, mɔ̀ à mà ɛ̀ndɛ hvɛ ò tenì ya mbòwa. Rzìi à ùŋmanɛlɛ lòŋgò la hwatò hwa tɛmi aŋga, ema hwa rzi hwɛ lì gbeyà tɔ̀ eyà.

⁴ A ma òhweyà hwaŋga hwatò ama, ‘Inyɔ hvɛ e ɛ̀ndɛ e gbèèye èwòlò ò hvaya ya ami. Imba na e rzaweya mòrzahwelì mò gbamù.’

⁵ Hwàŋga hwatò hwà mà ɛ̀ndɛ ò lì gbeyà eŋge èwòlò, rzìi ò kɔrzi ya ŋmerze na ŋgɛŋgi iyàwò ja ŋmerze à mà tìmba ò lì gbeyà hvɛ nanù mɛnɛ.

⁶ Eyà ya ŋgɛŋgi ita ja eŋge ŋgòmbe, à mà tìmba lì ɛ̀ndɛ hvɛ ò tenì ya mbòwa, rzìi a ɛnɛ hwahvɛhvɛ wunyanà hwa tɛmi aŋga, ema hwa rzi hwɛ lì gbeyà tɔ̀ eyà, rzìi a hwa ijòwa ama, ‘Mamɛ ndeŋgatɛ e hvaŋga wùnyà wò arzɛ ò lì hwɛ anù e rzi hwɛ lì gbeyà tɔ̀ eyà e?’

⁷ Hwà mà timbirzɛlɛlɛ hwa ama, ‘Tɔ̀ mòtò a rza jò akì ò lì gbeyà èwòlò.’ Rzi mɔ̀ à hwa òhweyà ama, ‘Inyɔ hvɛ e ɛ̀ndɛ e gbèèye èwòlò ò hvaya ya ami.’

⁸ “Ehvonda ya e ŋgòmbe ya Lohwà, e mòhwɛnɛ wa hvaya à mà òhweyà e mòkànèlì wa hwàgbèèlì hwa e hvaya ya eni nanù ema, ‘Rzaŋga hwàgbèèlì ò hwa rzaweya mòrzawelì me awu. O wòteyà ndi na hwatò ema hwa rzukanelì ò lì jà, rzi ò à agba natɛ̀ɛ nà e wɔ̀ ema hwa lòmeyayi lì jà.’

⁹ Hwàŋga hwàgbèèlì ema hwà mà akahwa ò èwòlò eyà ya ŋgɛŋgi ita, wɔ̀ hvɛ hwà mà rzawahwɛlɛ mòtò tɛ wòlì wɔ̀ wùnyà wɔ̀kɔ.

¹⁰ È hvònda e ma uke ya hwaŋga hwatò ema hwà mà lòma lì akahwa ò èwòlò ò lì luwa mòrzawelì mò awu, wɔ̀ hwà mà ɔ̀ŋgɛ̀lɛ̀ nanù ema hwa lùwa mòrzawelì lì aka hwanɛyi ema hwà mà wòteyà èwòlò ò lìrzakò la ŋgeŋgi ita. Ndi wɔ̀ hvɛ hwà mà rzawahwɛlɛ ndi mòtò tɛ mòrzawelì mò wùnyà wɔ̀kɔ.

¹¹ Nà òma hwaŋga ema hwà mà akɛlɛ lì akahwa ò èwòlò hwà mà luwe mòrzawèlì mò awu, hwa wòteyà lì arzarzòwɛ.

¹² Hwà mà hwɛ lì òhwa nanù ema, ‘Hwanù hwatò ema hwa rzukani lì akahwa ò ene èwòlò wɔ̀ hwa gbèyi ndi èwòlò ya awa hvɔ̀kɔ mɛnɛ. Irzɔ ema i ma gbeyɛ èwòlò ya arzɛ ò tenì ya igbe na ètumbatumba ya wùnyà wò arzɛ. Ndi ò jò atiŋgirzɛnɛyi etaŋgi na wɔ̀.’

¹³ È mòhwɛnɛ wa hvaya à mà alàhwɛ̀ mɔ̀kɔ wa awu nanù ema, ‘Ŋmàyi kòkò, rzeketɛ ema na e ɔ̀nji, rzeke e hwèlì ndi e jɔ̀kɛ̀ nanù ema e emeyà mòrzawèlì mò wùnyà wɔ̀kɔ e?

¹⁴ È wòwe mòrzawèlì mò anyu e ɛ̀ndɛ. Nà lìŋgàni ndi ò lì rzaweya e mòtò ema a rzukani lì ja ò èwòlò nyayi hvɔ̀kɔ na ò wa ema ò akɛ̀lèyayi.

¹⁵ O èŋgànɛ̀lɛ̀ na rza òhvi tɔ̀ wònjà ò lì gbeyà mamɛ na lìŋgàni lì gbeyàna e wa ami wòlì e? Ŋga ò nò nònelì ndi èhwanja na enji e?’

¹⁶ Yerzù rzìi a umbana mòŋgò ŋmàna ò lì òhwa nanù ema, ‘O èŋgànɛ̀lɛ̀ rzɔ, e mɔ̀ ema a hwèlì ò mburza, mɔ̀ ndi à ò hwɛ ò wòrzò, e mɔ̀ hvɛ ema a hwèlì ò wòrzò mɔ̀ ndi à ò hwɛ ò mburza.’”

Yerzù à mà òhwa hvɛ lì hvòmɛ̀nɛ̀ è kpelì ya eni

¹⁷ Yerzù nà hwà-òkòwèlì hwe eni hwà mà hwɛ lì agba ò mbòwà ndɛnɛ yà Jèrurzalɛ̀mù. Nà òma hwà mà hwɛ lì ɛndɛ à mà hwa hwɛlɛ njuka hvɔ̀kɔ rzi a hwa òhweyà ò wùndɛ̀ nanù ema,

¹⁸ “È hwiye ema ja ɛndɛ ò Jèrurzalɛ̀mù, ò tenì ɔ̀ndi è Ŋmanà wà è Mòtò wà Hwènàmà a hwɛnì lì akɛlɛhwɛ ò màà mà ama ipìlìrzì ndɛnɛ nà Hwà-òkòlèlì hwa mbenda. Wɔ̀ ndi hwa ò hwɛ e wɔ̀ ema hwa ò mò jemɛ ò kpelì.

¹⁹ Rzi hwa mò akɛlɛlɛ ò hwaŋga hwatò ema hwa rza enje wònyà Yudà ema hwa mò yɔ̀yeya, hwa mò gbiyɛ hvònji na lì mò wòmeya ò mbarza. O wùnyà ema wò ò ùkirzɛ̀ mèenyà meyawò, Lohwɛ̀ a ò mò hvùmùlɛ.”

Lì akòhwana là è nyàŋgò ya ama Jèmìrzì nà Yòwanìrzɛ̀

²⁰ O mburza hvònda, e jòjìyɛ̀ ya ama Rzɛ̀bɛ̀dì e ma jà òma Yerzù na hwàna hwa eni hwa wunyanà hwahwàkɛ. Rzi a rzùmeya Yerzù màwɔ̀ŋgɔ̀ŋgɔ̀ ò rze, rzìi a mò atɛkɛ ò lì mò gbeyà eyà.

²¹ Yerzù rzi a mò ijòwa nanù ema, “Mamɛ ò arza e?” Oŋgò mòlanà rzi a mò alàhwɛ̀ ama, “O nò kàkɛ̀nɛ̀ nanù ema e hvònda ema o ò hwɛ ò lìkànèyà lì aŋgɔ̀, hwanù hwàna hwa ami hwa wunyanà hwahwàkɛ hwa ò lìya, mɔ̀kɔ ò lìya la aŋgɔ̀ la mòme, ɔ̀nɛyi hvɛ ò lìya lì aŋgɔ̀ la ŋmalì.”

²² Yerzù rzìi a hwa alàhwɛ̀ ama, “Inyɔ e rza hwi mamɛ ema e ijòwa. È tànɛyi lì àjùlɛ̀nɛ̀ mètàkà ema imba na ò hwɛnɛ e?” Wɔ̀ hwà mà mò alàhwɛ̀ nanù ema, “I tànɛyi.”

²³ Yerzù rzi à hwa òhweyà nanù ema, “Ò jɔ̀kɛ̀ e ò àjùlɛ̀, ndi imba na rza òhvi e wònja ò lì hvɔ̀rzɔ̀ e mòtò ema a ò lìyà ò lìya lì ami la mòmɛ̀ tɔ̀ ò e lɔ la ŋmalì. Hwenè hwèlìyelì hwe hwɛnɛhwi ndi na hwaŋga hwatò ema Tatɛ̀ wa ami à mà hwe rzèkeya.”

²⁴ Nà òma lìnɛyi lìyòmɛ̀ la Hwà-òkòwèlì lì ma hweye nanù, rzi lì tàtànà hwaŋga hwàna hwahwàkɛ.

²⁵ Yerzù rzi a hwa hwɛlɛ wɔ̀ hwa arzɛ èki yɔ̀kɔ, rzìi a hwa òhweyà ama, “È hwɛni lì hwiya nanù ema hwàkànèlì na hwa ndɛnɛ hwa ene rze hwa gbeyàna ŋginyà ò lì kànèyà hwatò ema hwa hwèlì ò rze ya awu.

²⁶ Ndi e rza hwɛni lì hwɛ nanù na inyɔ. Tɔ̀ ima mɔ̀ wa anyu ema a arza lì hwɛ e mòndɛnɛ wa anyu, a hwɛnì ndi lì hwɛ nàa e mòkutu wa anyu.

²⁷ Ndèŋgànɛ̀lɛ̀ hvɛ, tɔ̀ ima mɔ̀ wa anyu ema a arza lì hwɛ e wa wòrzò ò ìtììtènì ja anyu, a hwɛnì ndi lì hwɛ nàa e mòkòme wa anyu,

²⁸ nyàyi hvɔ̀kɔ hvɛ mɛnɛ nàa è Ŋmanà wà è Mòtò wà Hwènàmà a rzìi jɛ̀ɛ̀ ema hwatò hwa mò gbèeyà, ndi mɔ̀ à jelì ò lì gbèeyà hwatò, na ò lì ŋgba lòŋgɛ la eni nàa tùŋge ò lì kɔ̀tɔ̀ rzayì-rzayì ja hwatò.”

Yerzù à mà wɔ̀wìrzɛ̀ hwatò hwahwàkɛ hwa ndima

²⁹ Nà òma Yerzù na Hwà-òkòwèlì hwa eni hwà mà hwɛ lì anjiya ò èkòmè ya Jèrìkò, ŋgìndì ndɛnɛ e ma hwɛ lì nɔ̀ŋgɔ Yerzù.

³⁰ Hwatò hwahwakɛ ema hwà mà hwɛ ndima hwà mà lìya ò tòŋgòŋgò ya njiya. Nà òma hwà mà hweye ema Yerzù mɔ̀ ndi à hwèlì a aka, rzìi hwa wòteyà lì tɛ nanù ema, “Ìi Rzàŋgò e Ŋmanà wà munyanà wà ama e nyɔ̀ŋgɔ̀nì ya ama Dàhwitì ò jò òkeya ììlì!”

³¹ È ŋgìndì e ma hwa lòmeya nanù ema, “È lìya ŋmɛ̀ɛ.” Ndi wɔ̀ hwà mà tɛɛ hvɛ ndi ò ŋmanyu nanù ema, “È Ŋmanà wà mùnyanà wa e nyɔ̀ŋgɔ̀ni ya ama Dàhwitì, Rzàŋgò, ò jò òkeya ììlì!”

³² Yerzù rzìi a tɛ̀mɛ̀, a hwa hwɛlɛ. A ma hwa ijòwa nanù ema, “Mamɛ e arza ema na e gbèeyà e?”

³³ Hwà mà mò alàhwɛ̀ nanù ema, “Ìi Rzàŋgò, irzɔ ja arza ema ò gbèèye ema je ɛnɛ.”

³⁴ Yerzù à mà hwa òkeya ììlì, rzi a hwa hwàkɛ̀ màà mà eni ò mirzɔ̀ ma awu. Lìwòkìmɛ̀nɛ̀ rzi hwa wòteyà lì ɛnɛ̀ rzìi hwa mò òŋgama.