Matiyò 12 - Mokpwe: Bakwery (New Testament)

Mìijowelì lì hvòmɛ̀nɛ̀ Wùnyà wò lì Arzìyòlɛ̀

¹ O mburza ŋmanà hvòka hvònda Yerzù na hwà-òkòwèlì hwa eni hwa ma hwɛ lì akeyà ò tenì ya e hvaya ya mbarzi. Wòŋgò wùnyà wò ma hwɛ ndi Wùnyà wò lì Arzìyòlɛ̀. Hwà-òkòwèlì hwa eni hwa ma hwèya e njàwò rzìi hwa hvata iŋgi mbarzi hwa nyuŋguhwa iŋgi hvɔ̀ŋgɔ̀ rzìi hwa wòteyà lì ji làa.

² Nà òma Ihvàlìrzàyì i ma ɛnɛ mamɛ ema hwa ma gbèye rzìi hwa òhwàna Yerzù nanù ema, “Ɔ̀ŋgɔ tɛ, Hwà-òkòwèlì hwa aŋgɔ̀ hwa gbeyà mamɛ ema e mbenda e rza ŋgbelɛ wònja ò lì gbeyà ò wùnyà wò lì Àrzìyòlɛ̀!”

³ Yerzù à mà hwa alàhwɛ̀ nanù ema, “È rzi làŋgi ò e Kààtì yà Lohwà mamɛ ema Kìŋgɛ Dàhwitì à mà gbèyè na hwatò hwa eni e hvònda ema hwa mà hweye è njàwò e?

⁴ È tìlàhwì nanù ema, à mà ɛ̀ndɛ ò Ndawò yà Lohwà na hwatò ema hwà mà hwɛ na mɔ̀, rzìi hwa làa hwèhvòòtò ema hwe ma rzekawɛlɛhwɛ nàa jàhwèyà ja ama Lohwà ema e mbenda ya arzu e rza ŋgbelɛ tɔ̀ mòtò e wònja ò lì hwe laa. Ipìlìrzì mɛnɛ ndi i ma hwɛnɛ wònja ò lì hwe làa.

⁵ Ŋga e rzi laŋgi ò mbenda ya ama Mòrzè nanù ema tɔ̀ ò Wùnyà wò lì Arzìyòlɛ̀ Ipìlìrzì ja e Ndawò yà Lohwà i unda e mbenda yà Wùùnyà wò lì Arziyòlɛ lì wowana èwòlò ema hwa gbeyà, ndi tɔ̀ nanù rzeketɛ wòhwe wòŋgò ò wòrzò wò ama Lohwɛ̀.

⁶ Nà è òhweyà nanù ema ò hwèlì mɔ̀kɔ anù ema a karzami lì aka e Ndawò yà Lohwà.

⁷ È tìlahwì na òma Lohwɛ̀ à òhwi nanù ema, ‘Mamɛ ema na arzana hwatò e hwèlì ndi mèèmà mè ììlì, rzeketɛ màahweyà.’ Ndi e ma rzɔ̀ŋgìtɛ̀nɛ̀ tɛ kɔ̀yi-kɔ̀yi mamɛ ene mbɔrzi e ò òhwa, òma e rza hwɛlɛ hwatò nanù ema hwa hwèlì ndi hwatò ema hwa gbeyà wòhwe ema wɔ̀ hwa rza enje wòhwe.

⁸ È hwɛni lì hwiya nanù ema, è Ŋmanà wà è Mòtò wà Hwènàmà à hwɛni wònja tɔ̀ ò ŋmanyu ya Wùnya wò lì Arzìyòlɛ̀.”

Yerzù à wɔ̀wìrzɛ̀yi è mòtò wà mɔɔ mò njɛmbu

⁹ Yerzù rzìi a hwɛ̀mɛ̀ eŋge èki, a ɛ̀ndɛ lì kpèeyà ò tenì ya e ndawò ya màkanɛ̀ yà wònyà Yudà.

¹⁰ O ma hwɛ mòtò mɔ̀kɔ aŋga ema à mà ɔ̀kirzɛ̀ mɔ̀ɔ̀ mò njɛmbu. O ma hwɛ hvɛ hwatò aŋga e ma hwa ma hwɛ lì arza ò lì rzɔ̀ɔ̀ Yerzù njɔ̀mì. Rzìi hwa mò ijòwa nanù ema, “È mbenda e arzu e ŋgbelì wònja ema mòtò a wɔ̀wìrzɛ̀hwɛ ò Wùnya wò lì Arzìyòlɛ̀ e?”

¹¹ Yerzù rzìi a alàhwɛ̀ nanù ema, “O hwèlì tɛ mɔ̀kɔ wa anyu anu ema a òhvi mɔ̀lɛ̀ŋgù mɔ̀kɔ rzìi mò unda ò tenì ya èhvɔ̀ndì ò Wùnya wò lì Arzìyòlɛ̀, ò rza rzihwa ò lì mò ulɛ e?

¹² È tànɛyi tɛ lì gbeyà Mɔ̀ɔ̀lɛ̀ŋgù nanù, ŋgelì iti nà è mòtò wà hwènàmà ema a hwɛni wòlìtò lì aka mɔlɛ̀ŋgù e? O èŋgànɛ̀lɛ̀ rzɔ, e mbenda e arzu e ŋgbelì ehvòlò ò lì òŋgòwànà mòtò, ò Wùnyà wò lì Arzìyòlɛ̀.”

¹³ Yerzù rzìi a òhweyà òŋgò mòtò ema à mà ɔ̀kirzɛ̀ mɔ̀ɔ̀ mò njɛmbu nanù ema, “Ènyòwa mɔ̀ɔ̀ mò aŋgɔ̀.” A ma enyòwa mɔ̀ɔ̀ mò eni, rzìi mò wɔ̀hweyà gbamù nàa mɔnɛ̀yi mɔ̀.

¹⁴ Nà òma ene eyà e mà gbèyɛ̀nɛ nanù, rzìi Ihvalìrzàyì i mà wurza ò ndawò yà màkanɛ̀ rzìi hwa wòteyà lì weka ŋmanò mò lì òŋwa Yerzù.

Yerzù, è mògbèèlì ema Lohwɛ̀ à hvɔ̀rzì

¹⁵ Nà òma Yerzù à mà ayèmbɛ nanù ema hwa mò kimelì e kpelì. À mà hwɛmɛ eŋge èki rzìi ŋgindi ndɛnɛ ya hwatò e mò nɔ̀ŋgɔ. Ndèŋgànà à mà wɔ̀wìrzɛ̀ hwà-òkèlì hwa arzɛ.

¹⁶ Ndi à mà hwa kòkòhwɛ̀lɛ̀ à mà hwa rzi keka lì òhweyà tɔ̀ mòtò njɛnɛ mɔ̀ à hwèlì.

¹⁷ À mà gbeyà ndi nanù ò lì òndìrzɛ̀ e mbɔrzi ema Lohwà à mà òme e mòòhwèlì wà èlìŋgɛ̀ Àyìrzayà ò lì òhwa nanù ema,

¹⁸ “Ɔ̀ŋgɔ tɛ, e mògbèèlì wa ami ònò ema na hvɔ̀rzì, na mò lìŋgàni, ndèŋgànɛ̀lɛ̀ a nò lìŋgìrzɛ. Nà ò òma èlìŋgɛ̀ ya ami e ò hwɛ na mɔ̀. A ò akɛlɛ hwèkàyìrzèlì hwe jɔ̀kɛ̀ ò ìtììtènì ya hwaŋga ema hwa rza enje wònyà Yudà.

¹⁹ A rza kɔ̀ɔ hvenda tɔ̀ lì tɛɛya hwatò mòrzeya. Lìlò la eni lì rza ò hwɛ̀ɛnɛ̀ ò tenì ya mbòwa.

²⁰ A rza ò kakòhwa ɛ̀kɔ̀kɔ̀ ema e ma hwɛndeya, ndèŋgànà a rza ò lìmìrzɛ̀ ètùlù ema e arza lì lìmà. A ò gbeyà nanù natɛ̀ɛ hwɛ̀ɛ̀mɛ̀ hwe gbamù hwe ò hvuŋgana.

²¹ Hwatò ema hwa rza enje wònyà Yudà hwa ò ika màhvìtà mà awu ò lìna la eni.”

Hwatò hwa òhwa nanù ema Yerzù a gbeyàna ndi e ŋginyà ya ama Bɛ̀lrzɛ̀bùlì

²² O mburza nanù rzìi lòŋgò la hwatò hwa jàneyà Yerzù mòtò mɔ̀kɔ ema à mà hwɛ ndima na mbuke, èhwanja èlìŋgɛ̀ ya wòhwe e ma hwɛ ò tenì ya e nyò ya eni. Yerzù à mà wɔ̀wìrzɛ̀ òŋgò mòtò natɛ̀ɛ à mà wòteyà lì ɛnɛ na lì òhwa.

²³ Ene eyà ema Yerzù à mà gbèèye e ma tàmìrzɛ̀ e ŋgìndì ya hwatò ya arzɛ. Rzìi hwa wòteyà lì ayijòwanɛ mɔ̀kɔ na ɔ̀nɛyi nanù ema, “Aŋgàmɛnɛ ònò mòtò ndi à hwèlì è Ŋmanà wà e nyɔ̀ŋgɔ̀nì ya ama Dàhwitì ema a ambɛlɛhwɛyi e?”

²⁴ Ndi e hvònda ema Ihvàlìrzàyì i ma hwèye nanù ema, hwa ma òhwa nanù ema, “Rzekɛ à gbeyànà ndi è wònjà yà èlìŋgɛ̀ ya ama Bɛ̀lrzɛ̀bùlì ema a hwèlì e mòkànèlì hwa hwèlìŋgɛ̀ hwe wòhwe ò lì ulɛ hwèlìŋgɛ̀ hwe wòhwe ò inyò ja hwatò e?”

²⁵ Yerzù à mà hwiya mɔ̀ŋgɛ̀lɛ̀ ma awu, rzìi a hwa òhweyà nanù ema, “Tɔ̀ ima èkòmè ema e akahwanɛ ema e rzà òhwa eyà yɔ̀kɔ, e hwenì ndi lì hvaŋgeyà. Ndèŋgànà tɔ̀ ima mbòwà, tɔ̀ lìtumba ema lì akahwanɛ lɔ̀ lìti, ndèŋgànà hwatò hwa rza ahweyànɛlɛ lì rza tànɛyi lì tɛ̀mɛ̀.

²⁶ O èŋgànɛ̀lɛ̀ mòkarzɛ̀ a anana tɛ mòkarzɛ̀, eŋge ŋgàna e hwèlì ndi ema a ananɛyi mɔ̀ ŋmìti. Nɛ rzɔ lìkànèyà la eni lì tànɛyi lì tɛ̀mɛ̀ e?

²⁷ Nà gbeyàna tɛ ndi è ŋginyà ya ama Bɛ̀lrzɛ̀bùlì ò lì hvayana hwèlìŋgɛ̀ hwe wòhwe ò hwatò ima ŋginyà hvɛ ema hwatò hwa anyu wɔ̀ hvɛ hwa gbeyàna ò lì hvaya hwèlìŋgɛ̀ hwe wòhwe e? Mamɛ ema hwatò hwa anyu hwa gbeyà e uŋmɛ̀lɛ̀ nanù ema e tòni.

²⁸ Ndi na òma na gbeyàna e ŋginyà ya èlìŋgɛ̀ ya ama Lohwɛ̀, ò lì hvaya hwèlìŋgɛ̀ hwe wòhwe ene ŋgàna e uŋmɛ̀lɛ̀ ndi nanù ema lìkànèyà là ama Lohwɛ̀ lì mà jà ò ìtììtènì ja anyu.

²⁹ “Inyɛ̀ na e òhweyà, ò rza tànɛyi lì kpèeyà ò ndawò ya mòtò ema a imbami rzìi ò mò hvùmana erzaŋgò ya eni ema ò rza lòmɛ̀ lì mò kakà. Ò mà kùlɛ̀ tɛ lì mò kakà, lìŋgi lìrzàkò ɔ̀ndi ò mò wòwànà erzaŋgò ya eni ya arzɛ.

³⁰ “Tɔ̀ ima mɔ̀ ema a rza enje na imba òma a nò teŋgɛ̀nɛ̀yi, tɔ̀ è mɔ̀ hvɛ ema a rza nò òŋgòwànà ò lì rzàŋga, òma a hwèlì ndi ò lì bùulɛ.

³¹ Nà è òhweyà ndi e jɔ̀kɛ̀ nanù ema, tɔ̀ ima wòhwe na ìrzìlàkò ema mòtò a gbèyi Lohwɛ̀ a ò mò làkìrzɛ̀, ndi tɔ̀ njɛnɛ ema a òhwi eyà ya wòhwe lì hvòmɛ̀nɛ̀ Èlìŋgɛ̀ yà Wòtani a rza ò làkìrzɛ̀hwɛ̀.

³² Tɔ̀ ima mɔ̀ ema a òhwi ìrzìlàkò lì nò teŋgɛ̀nɛ̀ imba è Ŋmanà wà è Mòtò wà Hwènàmà Lohwɛ̀ a ò mò làkìrzɛ̀ ndi e mɔ̀ ema a òhwi ìrzìlàkò lì teŋgɛ̀nɛ̀ Èlìŋgɛ̀ yà Wòtani a rza ò làkìrzɛ̀hwɛ̀ ò ene nyɔ̀ŋgɔ̀ni ya naŋgɛ na e yɔ hvɛ ema e ò jɛ̀ɛ̀.

O hwehvùma ndi gbee a èmbahwà

³³ “Ehvùma e lɔ̀wu tɛ nanù òma gbèe ema wò ŋyàayi eŋge ehvùma wɔ̀ hvɛ wò lɔ̀wu. Ehvùma e rza lɔ̀wu tɛ nanù òma gbèe ema wò ŋyaayi eŋge ehvùma wɔ̀ hvɛ wò rza lɔ̀wu. Ehwanja ò hwehvùma ndi gbèe wò hwiyàhwà.

³⁴ Inyɔ ini hvèyi! Nɛ inyɔ e tànɛyi lì òhwa eyà ya gbamù ema inyɔ hwiti è hwèlì wòhwe e? Èhwanja, hweyà ema hwe òndi mòtò ò ŋmèma mò eni hwe ɔ̀ndi à wurzirzɛ ò wàna yà èni.

³⁵ Mòtò wà gbamù a gbeyà gbamù èhwanja e uhwɛ̀lɛ̀lɛ ndi ò ŋmèma mò eni ema gbàamù wò utahwi. Mòtò wa wòhwe a gbeyà wòhwe èhwanja e uwɛ̀lɛ̀lɛ̀yi ndi ò mèèmà mò eni ema wòhwe wò utahwi.

³⁶ Nà e òhweyà nanù ema ò wùnyà wò hwèkàyìrzèlì tɔ̀ ima mòtò a hwɛnì lì ŋgbà ikɔki ja tɔ̀ ima mbɔrzi ya èèti ema e wurza ò wàna ya eni.

³⁷ Tɔ̀ ima eyà ema ò ma òhwe, yɔ ndi e ò gbeyàhwɛnɛ ò lì ò kàyìrzɛ̀.”

Ihvàlìrzàyì ja arzanì Yerzù embànèlì ya Mànyakà

³⁸ Wùnyà wɔ̀kɔ Hwà-òkòlèlì wà è mbenda nà Ihvàlìrzàyì hwa ma ja rzìi hwa òhweyà Yerzù nanù ema, “Mòòkòlèlì kòkò, i arza ema ò jò uŋmɛ̀lɛ̀ embànèlì ema e uŋmɛ̀lɛ̀ nanù ema e ŋginyà ya aŋgɔ̀ e uwɛ̀lɛ̀lɛ̀yi ndi òma Lohwɛ̀.”

³⁹ Ndi Yerzù à mà hwa timbirzɛlɛlɛ nanù ema, “Ene nyɔ̀ŋgɔ̀nì ya wòhwe ema e rza arza lì hweyàna Lohwɛ̀, e hwèlì e ijòwa embànèlì ya mànyakà! Ndi inyò e rza e luwa, lì aka tɛ embànèlì ya ama mòòhwèlì wà èlìŋgɛ̀ Jona.

⁴⁰ Jona à mà hwɛ ò lùuŋga la nyàmà màlìhwa ndɛnɛ menya meyawò. Ŋgàna hvɔ̀kɔ, mɛnɛ ndi è Ŋmanà wà è Mòtò wà Hwènàmà mɔ̀ hvɛ a ò hwɛ ò rze ya mɔ̀nyɛ̀ menya meyawò.

⁴¹ O wùnyà wò hwèkàyìrzèlì hwatò hwa Nìnìhvɛ̀ hwa ò hvùmùwà ò rzɔ̀ŋgɔ̀ nà ène nyɔ̀ŋgɔ̀nì yà hwatò. Hwa ò tɛ̀mɛ̀ mbòŋgi ema è gbeyà ène nyɔ̀ŋgɔ̀nì yà hwatò è tuwà ŋmàŋgò, èhwanja hwatò hwa Nìnìhvɛ̀ hwa ma rzɔ̀njɛlɛ wòhwe wò awu è hvònda Jona a mà hwɛ lì hwa òhweyà Eyà ya Lohwà, ndi na òhweya e jɔ̀kɛ̀ nanù ema mòtò a hwèlì anu naŋgɛ ema à akayi Jona.

⁴² O wùnyà wò hwèkàyìrzèlì è mòkànèlì wa mòlanà ema à mà hwɛ lìkànèyà èkòmè ya Rzebà mɔ̀ hvɛ à ò hvùmùwà ò rzɔ̀ŋgɔ̀ nà ène nyɔ̀ŋgɔ̀nì yà hwatò ò wùnyà wò hwèkàyìrzèlì. À ò tɛ̀mɛ̀ mbòŋgi ema è ò gbèyɛ ema hwa tuwe ŋmàŋgò. Hwa ò tuwa ŋmàŋgò èhwanja a uwɛ̀lɛ̀lɛ̀yi èki hvòòhvò ò lì òkànèyà hweyà hwe lìhwiyè ema Rzòlòmɔ̀nì à mà hwɛ lì òkòlɛ̀. Ndi yàwònò, ò hwèlì mòtò mɔ̀kɔ ema à akàyì Rzòlòmɔ̀nì.”

Èlìŋgɛ̀ ya wòhwe e timbelì tɛ mòtò ò nyò hvɛ

⁴³ Yerzù a ɛ̀ndɛ̀nɛ̀ e mbɔrzi ò wòrzò rzìi a òhwa nanù ema, “Èlìŋgɛ̀ ya wòhwe e wurzi tɛ̀ mòtò ò nyò, ya amàmìyɛ̀nɛ̀ɛ ndi ò mòrzanjɛ̀ ò lì àrza èki ema ya Arzìyòlɛ̀. È rzà lù tɛ èki,

⁴⁴ e àwòhwànɛ̀lɛ̀ yɔ yiti nanù ema, ‘Nà tìmbà hvɛ ò èŋge ndawò mɛnɛ ema nà mà hwɛ,’ e tìmbi tɛ, e ùŋmànɛ̀lɛ̀ èŋge ndawò è hwèlì ŋgundu, e rzàŋgi, nà lì rzeyàhwɛlɛ.

⁴⁵ Èŋge èlìŋgɛ̀ e ɛ̀ndɛ̀ ò lì jànà hwehvɛhvɛ hwèlìŋgɛ̀ hwe wòhwe lìrzambà, ema hwe hwèlì wòhwe lì mò àka, rzìi hwe jà ò lì kpèeyà òŋgò mòtò, rzìi hwe arzɛ̀kɛ̀lɛ̀ aŋga. Lìŋgi lìrzàkò rzɔ, òŋgò mòtò a hwɛ wòhwe lì aka mamɛ à mà lòme lì hwɛ. O èŋgànɛ̀lɛ̀, nanù ndi e ò gbèyɛ̀nɛ na ene nyɔ̀ŋgɔ̀nì ya yàwònò.”

Lìtumba lì ama Yerzù

⁴⁶ Nà òma Yerzù à mà hwɛ lì òhwànà e ŋgìndì, nyàŋgɛ nà wònyanyàŋgò hwa eni hwa ma tɛ̀mɛ̀ ò èwòka lì arza lì mò òhwirzɛnɛ rzìi

⁴⁷ mòtò mɔ̀kɔ a òhweyà Yerzù nanù ema, “Nyɔ̀ŋgɛ nà wònyanyàŋgò hwa aŋgɔ̀ hwa hwèlì ò èwòka hwa arza lì ò òhwirzɛnɛ.”

⁴⁸ Yerzù rzìi à hwa alàhwɛ̀ nanù ema, “Njɛnɛ à hwèlì nyàŋgò wa ami, hwa njɛnɛ hvɛ hwa hwèlì wònyanyàŋgò wa amì e?”

⁴⁹ Rzìi à uŋmɛ̀lɛ̀ jɔ̀nɔ ja eni òma Hwà-òkòwèlì hwa eni rzìi a òhwa nanù ema, “È ɔ̀ŋgɔ tɛ, nyàŋgò hwa ami na hwa wònyanyàŋgò hwa ami wɔ̀ hwa anù!

⁵⁰ Tɔ̀ ima mɔ̀ ema à gbèyi lì emeyà la ama Tatɛ̀ wa ami ema a hwèlì ò ŋmanyu yà lohwà, mɔ̀ ndi à hwèlì nyàŋgò wa ami, nà wònyanyàŋgò hwa amì.”