Makòrzì 8 - Mokpwe: Bakwery (New Testament)

Yerzù à lìrzɛyi hwèkòlì hwenì hwe hwatò

¹ Ò ìtììtènì ja mèŋge mèènyà, è hvɛhvɛ ŋgìndì ema jèeyà Yerzù. Kanatɛ hwa rza òhvɛ tɔ̀ yòma ya lì làa, Yerzù rzìi a hwɛlɛ hwà-òkòwèlì hwa eni, rzìi a hwa òhweyà nanù ema,

² “Nà òkeya hwanù hwatò ììlì. Èhwanja hwà mà hwɛ anù na imba mèènyà meyawò, hwa rzi lelì tɔ̀ yòma.

³ Nà hwa òhwèlì tɛ ema hwa ɛ̀ndɛ ò màandà mà awu nà e njàwò, lòŋgò la awu hwa tànɛ̀yi lì rzòòwà ò njiya èhwanja lòŋgò la awu hwa uhwɛlɛlɛ hwèki hwe rzɔlɛnɛyi.”

⁴ Hwà-òkòwèlì hwa eni rzìi hwa mò alàhwɛ̀ nanù ema, “One ì tanɛ̀yi lì lùwa mòlelì anù mòrzanjɛ̀ ema mò tanɛ̀ hwanù hwatò hwa arzɛ e?”

⁵ Yerzù rzìi a ijòwa nanù ema, “Hwehvòòtò hweti inyɔ e òhvi e?” Hwà-òkòwèlì hwa eni rzìi hwa mò alàhwɛ̀ nanù ema, “Lìrzàmbà la hwèhvòòtò.”

⁶ À òhweyà è ŋgìndì nanù ema, hwa lìya ò rze a wòwa lìŋgi lìrzàmbà la hwèhvòòtò, rzìi a ŋgba Lohwɛ̀ jeka. A hwe kɛrzɛ, rzìi a ŋgba hwà-òkòwèlì hwa eni ò lì kahweyà hwatò, rzìi hwa gbeyà nanù.

⁷ Hwà mà òhva ŋgurzu ja nyàmà rzàlì ja malìhwa. Yerzù a ŋgba hvɛ Lohwɛ̀ jeka ò iŋgi nyàmà, rzìi a òhweyà hwà-òkòwèlì hwa eni ama hwa kahweyà èŋge ŋgìndì.

⁸ Hwatò hwà mà làa, natɛ̀ɛ hwà mà uja. Hwà-òkòwèlì hwa eni rzìi hwa rzaŋga lìrzàmbà la ŋgata ja mbumbu ja hwehvetelɛ.

⁹ Ò ma tɛ̀mɛ̀ eyà ya hwèkòlì hweni hwe hwatò hwa mà hwɛ aŋga. Yerzù à mà hwa òhweyà ama hwa ɛ̀ndɛ.

¹⁰ Rzìi hwa ɛ̀ndɛ hwa kpèya ò wɔ̀lɔ̀ wò ndɛnɛ na hwà-òkòwèlì hwa eni rzi hwa ɛ̀ndɛ ò erzòòkà ya Dalmanùta.

Ihvàlìrzàyì ja arza embànèlì

¹¹ Ihvàlìrzàyì hwà mà jà ò ma Yerzù rzi hwa wòteya e hvènda na mɔ̀, hwà mà mò arzana embànelì e uhwɛlɛlɛ ò ŋmanyu yà lohwà. Hwà mà gbeyà ndi nanù ò lì mò kèkirzɛ.

¹² A ma rzìyòwa hvɔ̀ɔ̀ rzìi a òhwa nanù ema, “Mamɛ ndèŋgàtɛ̀ ene nyɔ̀ŋgɔ̀nì ya arza embànèlì e? Nà e òhweyà e jɔ̀kɛ̀, nà rza e uŋmɛ̀lɛ̀ tɔ̀ embànèlì.”

¹³ Rzìi à hwa lìya aŋga a tìmba ò tenì ya wɔ̀lɔ̀ wò ndɛ̀nɛ rzi a aka a ɛ̀ndɛ ò ɛnɛyi èhvarzù ya yùlu.

Èhwindi ya Ihvàlìrzàyì

¹⁴ Nà òmà Hwà-òkòwèlì hwa ama Yerzù hwà mà ɛ̀ndɛ ò lì kpèeyà ò wɔ̀lɔ̀, hwà mà hvòŋga lì òhva hwèhvòòtò. Hwà mà òhva ndi ehvòòtò yɔ̀kɔ mɛnɛ.

¹⁵ Yerzù rzìi a hwa kòkòwɛ̀lɛ̀ nanù ema, “È àŋgòhweyà ehwìndi yà Ihvalìrzàyì nà è yà ama Hɛ̀rɔ̀dì.”

¹⁶ Rzìi hwa àwòhwànɛ̀lɛ̀ mɔ̀kɔ nà ɔ̀nɛyi nanù ema, “À òhwa ndi nanù èhwanja ì rza òhvi tɔ̀ èhvòòtò.”

¹⁷ À ma hwiyà mamɛ hwà mà hwɛ lì òhwa, rzìi a hwa ijòwa nanù ema, “Mamɛ ndèŋgàtɛ̀ e òhwa lì hvòmɛ̀nɛ̀ ema è rza òhvi tɔ̀ hwèhvòòtò e? Nàtɛ̀ɛ na nàŋgɛ è rza hwi tɔ̀ lì rzɔ̀ŋgìtɛ̀nɛ̀ e? Mamɛ ndèŋgàtɛ̀ mèèmà me anyu me eti e?

¹⁸ È òhvi mirzɔ̀, è rza ɛnɛ e? È òhvi matò, è rza hvɔ̀ŋgɛ̀ e? Nàtɛ̀ɛ na nàŋgɛ è rza tanɛ lì ɔ̀ŋgɛ̀lɛ̀ e?

¹⁹ È hvònda ema nà ma kahweyà hwekòlì hweta hwe hwatò hwèhvòòtò hweta, ŋgata itì ja mbùmbu ja hwehvetɛlɛ ja hwèhvòòtò ema e ma rzàŋge e?” Rzi hwa òhwa nanù ema, “Lìyòmɛ̀ là ŋgata na ihwàkɛ.”

²⁰ Rzìi à hwi ijòwa hvɛ nanù ema, è hvònda ema, “Nà ma kahweyà hwekòlì hweni hwe hwatò lìrzàmbà la hwèhvòòtò, ŋgata itì ja mbùmbu ja hwehvetɛlɛ ja hwèhvòòtò ema e ma rzàŋge e?” Rzìi hwa mò alàhwɛ̀ nanù ema, “Lìrzàmbà la ŋgata.”

²¹ A hwa ijòwa hvɛ nanù ema, “Nàtɛ̀ɛ na nàŋgɛ e rza òhvi lì rzɔ̀ŋgìtɛ̀nɛ̀ e?”

Yerzù a wɔ̀wìrzɛ̀yi e ndima mòtò

²² Yerzù nà hwà-òkòwèlì hwa eni hwa mà jà ò Bɛ̀trzàyìdà. Àŋga ndi lòŋgò la hwatò hwà mà jàne mòtò mɔ̀kɔ wa ndima rzìi hwa rzòrzòmeya Yerzù hwa ama a mò hwàkɛ lìya la eni.

²³ Rzìi à lɛ̀mbɛ eŋge ndima ya mòtò ò lìya la eni rzìi a mò tìmba à mò anjiyana èŋge mbòwà rzàlì. À rzɔ̀yeya èŋge ndima hweyɔ̀lì ò mirzɔ̀, Yerzù rzìi a mò hwàkɛ màà mà eni ò nyò ya eni, rzìi a mò ijòwa nanù ema, “Ò ɛni yòma e?”

²⁴ Oŋgò mòtò wa ndima à ɔŋgɔ̀ ò ŋmanyu rzìi à òhwa nanù ema, “Nà ɛnɛ hwatò, hwa ɛnɛya ndi nàa màyì ema mà ɛ̀ndɛ.”

²⁵ Yerzù rzìi a hwàkɛ màà mà eni ò mirzɔ̀ ma ama òŋgò mòtò hvɛ̀. Òŋgò mòtò à mà wòwa hvònda ò lì ɔŋgɔ̀, rzìi mìirzɔ̀ ma eni ma lìhvòhweyà, a wòteya lì ɛnɛ.

²⁶ Yerzù rzìi a mò timbirzɛ ò ndawò ya eni rzìi a mò òhweyà nanù ema, “Ò rzi keka lì timbeya ò èŋge mbòwà.”

Yerzù ndi à hwèlì e Mɔ̀ ema à Ɔ̀kirzɛ̀hwɛ̀yi

²⁷ Yerzù na hwà-òkòwèlì hwe eni hwà mà hwɛ lì ɛ̀ndɛ ò maŋga mambòwà lì kòmbɛ̀nɛ̀ erzòòkà ya Kàyìrzèrìyà Hvìlìpì. Nà òmà hwà mà hwɛ ò yɔ̀ndɔ yà awu Yerzù rzìi a hwa ijòwa nanù ema, “Njɛnɛ hwatò hwa òhwa nanù ema na hwèlì e?”

²⁸ Rzìi hwa mò alàhwɛ̀ nanù ema, “Lòŋgò hwa òhwa nanù ema ò hwèlì ndi Yòwanìrzɛ̀ è Mòlùhwìrzèlì, hwahvɛhvɛ hwa òhwa nanù ema ò hwèlì ndi Èlàyijà, hwanɛ̀yi hwa òhwa nanù ema ò hwèlì ndi Mòòhwèlì mɔ̀kɔ wà Èlìŋgɛ̀.”

²⁹ Yerzù rzìi a hwa ijòwa hvɛ nanù ema, “Njɛnɛ inyɔ hwìti e òhwa nanù ema na hwèlì e?” Pètrò rzìi a alàhwɛ̀ Yerzù nanù ema, “O wa ndi ò hwèlì e Mɔ̀ ema à Ɔ̀kirzɛ̀hwɛ̀yi.”

³⁰ Yerzù rzìi a hwa kòkòwɛ̀lɛ̀ ama, hwa rzi keka lì òhweyà tɔ̀ mòtò njɛnɛ mɔ̀ à hwèlì.

Yerzù a òhwi lì hvòmɛ̀nɛ̀ mètàkà nà è kpelì yà eni

³¹ Yerzù rzìi a wòteya lì òkòlɛ̀ hwà-òkòwèlì hwa eni nanù ema, “È Ŋmanà wà è Mòtò wà Hwènàmà à hwɛnì lì taka ò nyayi na nyayi ja hweyà. Hwàmbaki hwa hwatò, ipìlìrzì ndɛnɛ, na hwà-òkòlèlì hwa mbenda hwa hwɛnì lì mò ndinda. À hwɛnì lì òŋwàhwà, ndi ò mburzà ya menya meyàwò à ò hvùmùwà.”

³² Yerzù à mà hwa òhweyà hwenè hweyà tòlòlò. Pètrò à mà mò wòwa rzìi a mò ɛ̀ndɛnɛ ò tòŋgòŋgò, rzìi à mò kanja.

³³ Yerzù rzìi ayèŋgòwɛ̀ lì ɔ̀ŋgɔ hwà-òkòwèlì hwa eni, rzìi a lòmeyà Pètrò nànù ema, “Mòkarzɛ̀ ò nò anjiya ò wòrzò! Mèèmà mò aŋgɔ̀ mò rza enje ò hweyà hwe ama Lohwɛ̀, mò hwèlì ndi ò hweyà hwe hwatò.”

³⁴ Yerzù rzìi a hwɛlɛ èŋge ŋgìndì na hwà-òkòwèlì hwa eni, a hwa òhweyà nanù ema, “Tɔ̀ ima mɔ̀ ema a hwɛnì lì nò nɔ̀ŋgɔ a hwɛnì lì rzɔ̀rzɔ̀ hweyà hwe arzɛ rzìi a anjilɛ e mbarzà ya eni rzìi à nò nɔ̀ŋgɔ.

³⁵ Èhwanja tɔ̀ njɛnɛ ema à arzùŋgɛ̀ lòŋgɛ là eni à lì wɔ̀lɛnɛ. Ndi tɔ̀ njɛnɛ ema à wɔ̀lɛ̀nɛ̀yì lòŋgɛ là eni ò nyòla ami nà ò gbàmu wò mònò Ŋmɛ̀ndì mò Gbamù, à lùwa lòŋgɛ là gbìndèyà.

³⁶ Ima mɔ̀rzɛ̀ŋgì ema mòtò à lùwà à yàlɛ̀ tɛ è rze yà arzɛ, rzìi à wɔ̀lɛ̀nɛ̀ lòŋgɛ là eni e?

³⁷ È rza tànɛ̀ lì hwɛ nanù! Mamɛ mòtò à tànɛyi lì ŋgbà ò lì tikòwàna lòŋgɛ là eni e?

³⁸ È mɔ̀ ema à nò òkana imba nà Eyà yà Lohwà irzɔ̀ni, ò ene nyɔ̀ŋgɔ̀nì yà yàwònò ema è òŋgamà Lohwɛ̀ nà mèèmà mè hwàkɛ ema è hwèlì hvɛ ndi è nyɔ̀ŋgɔ̀nì yà wòhwe, è Ŋmanà wà è Mòtò wà Hwènàmà mɔ̀ hvɛ à mò òkana irzɔ̀ni è hvònda ema à jà nà i aŋgèlì jè eni jà wòtani nà èluhwe yà ama Tatɛ̀ wà eni.”