Makòrzì 7 - Mokpwe: Bakwery (New Testament)

Hwèyòkòlelì hwe ama hwaa Mbambɛ

¹ Lòŋgò la Ihvalìrzàyì nà hwà-òkòlèlì hwa mbenda hwa mà uhwɛlɛlɛ ò Jèrurzalɛ̀mù hwa mà arzàŋganɛ èki ema Yerzù à mà hwɛ, ò lì mò òkànèyà.

² Hwa mà ayèmbɛ nanù ema hwà-òkòwèlì hwà mà Yerzù hwà mà làa mòlelì na màà mà mbìndò ema mà rzi rzòrzahwɛ̀, e nyayi ema Ihvalìrzàyì hwà mà arze ema nàa ɛ̀ɛ̀mɛ̀ ya awu ma rzòrzahwe.

³ Ihvalìrzàyì nà e wɔ̀ hwa Yudà hwa arzɛ̀ hwa rza làa mòlelì e rzì hwɛ ema hwa rzòrzì màà mà awu. Nànù ndì ìmbamba ja awu ja kòhwà ì mà hwa òkòlɛ̀.

⁴ Mòtò ema à uhwɛlɛlɛ ò èlùwà, a rza tanɛ̀yi lì làa mòlèlì, e rzi hwɛ ema mɔ̀ à ɔki màlìhwa. Wɔ̀ hwa mà ika hvɛ hwɛ̀ɛ̀mɛ̀ hwe awu hwe rzayì-rzayì, nàa ò lì rzòrza la màwònde, hwèyɔ̀ŋgɔ̀, ìkòmbò ja hwɛ̀ɛkɛ na ì kètèlì.

⁵ Àŋga ndi Ihvàlìrzàyì na hwà-òkòlèlì hwa mbenda hwa ijòwa Yerzù, nanù ema, “Mamɛ ndèŋgàtɛ̀ hwà-òkòwèlì hwa aŋgɔ̀ hwa rza gbeyàna ɛɛ̀mɛ̀ ema hwa tatɛ̀ hwa mà jò lìiyà è? Mamɛ ndèŋgàtɛ̀ wɔ̀ hwa làa mòlelì mò awu na màa emà mà rza rzàŋgɛ̀ e?”

⁶ Yerzù rzìi a tìmbirzɛlɛlɛ nanù ema, “Mòòhwèlì wa Èlìŋgɛ̀ Àyìrzayà à mà hvòmɛ̀nɛ̀, lìrzàkò ema à mà òhwe e mbɔrzi ema Lohwɛ̀ à mà mò òme ema a òhwe lì e hvòmɛ̀nɛ̀ inyɔ hwatò hwa mèhvìlì. È tìlahwì nanù ema, ‘Hwanù hwatò hwa nò kàrzɛ̀ ndì na è mbɔrzi ya awu, ndi mèèmà me awu me rza ènje na ìmba.

⁷ È rza enje tɔ̀ wòlìtò ò wɔ̀ ò lì nò kanɛ̀ imba, èhwanja wɔ̀ hwa òkòlɛ̀ ndi imbenda ema hwatò hwa tɛ̀yirzɛ̀, nàa ò à ɛnɛ òma i hwèlì ndi imbenda ja ama Lohwɛ̀’

⁸ È ma hwɛmɛ̀ ì mbenda ja ama Lohwɛ̀ rzìi e nɔ̀ŋgi ndi hwèyòkòlèlì hwe hwatò.”

⁹ Yerzù à mà tìmba lì hwa òhweyà hvɛ nanù ema, “È hwɛnì meyànò me makpana lì tindà e mbenda yà amà Lohwɛ̀ rzìi è kakumɛnɛyi ndi e hwe anyu hwèyòkòlèlì.

¹⁰ Mòrzè à mà e kòkòwɛ̀lɛ̀ nanù ema, ‘È ŋgbè irzàŋgo nà inyàŋgò ja anyu elùhwe.’ À mà òhwa hvɛ nanù ema, ‘Tɔ̀ ima mɔ̀ ema a jemi rzàŋgɛ nà nyàŋgɛ a hwɛnì lì òŋwahwa.’

¹¹ Ndi inyɔ̀ e òkòlɛ̀ ndi ema mòtò a hwɛnì tɛ yòma ema a hwɛnì lì òŋgòwàna rzàŋgɛ na nyàŋgɛ, rzìi mɔ̀ à òhwa nanù ema, ‘Ène yòma e hwèlì ndi Kòbani,’ (e hwèlì ndi yòma ya ama Lohwɛ̀).

¹² Mòtò a gbèyi tɛ nanù, òmà a rza òhva lìtiŋga la lì òŋgòwàna rzàŋgɛ na nyàŋgɛ hvɛ.

¹³ Hwèyòkòlelì hwe anyu ema e òkòlɛ̀ hwatò hwe gbeyà e wòwa ndi Èya ya Lohwà nàa e rza enje tɔ̀ eyà. O hwèlì hvɛ hweyà rzayì-rzayì ema e gbeyà nanù.”

Hweyà ema hwe gbeyà mòtò a rza hwɛ wòtani ò wòrzò wò ama Lohwɛ̀

¹⁴ Yerzù rzìi à hwɛlɛ e ŋgìndì ò lì mò jèeyà rzìi a hwa òhweyà nanù ema, “Inyɔ̀ hwa arzɛ e nò òkànèyà, e rzɔ̀ŋgìtɛ̀nɛ̀ hvɛ kɔ̀yi-kɔ̀yi!

¹⁵ Ò rza ènje tɔ̀ yomà ema e wùrza ò èwòkà rzìi e kpèeyà mòtò, rzìi e mò gbeyà a hwɛ ŋmiŋgò, ò wòrzò wò ama Lohwɛ̀. Ndi eyà ema e wurza mòtò ò tenì, yɔ̀ ndi e mò gbeyà ema a rza hwɛ wòrzàŋgì, ò wòrzò wò ama Lohwɛ̀.”

¹⁷ Yerzù à mà hwɛ̀mɛ èŋge ŋgìndì rzìi a ɛ̀ndɛ ò ndawò, rzìi Hwà-òkòwèlì hwa eni hwa ja lì mò ùŋma ema a hwa tɛlɛlɛ mònò ŋmàna.

¹⁸ Yerzù rzìi a hwa òhweyà nanù ema, “Inyɔ hvɛ è rza rzɔ̀ŋgìtɛ̀nɛ̀ e? È rza ɛni nanù ema tɔ̀ ima yomà ema e kpèèlì mòtò rzìi e wurza, e rza mò gbeyà ema a hwɛ mbìndò ò wòrzò wò ama Lohwɛ̀ e?

¹⁹ Nà òmà e kpèeyà mòtò e rza uka ò ŋmèmà mò eni, e mò kpèeyà ndi ò lùùŋga rzìi e wurza.” (Yerzù à mà òhwa nanù ò lì uŋmɛ̀lɛ̀ nanù ema melelì mè arzɛ me lɔ̀wu ò lì làa).

²⁰ Yerzù rzìi a òhwa hvɛ nanù ema, “Èŋgè ema e wurzà mòtò yɔ ndi e mò gbeyà a rza hwɛ̀ɛ̀ wòtani ò wòrzò wò ama Lohwɛ̀.

²¹ Èhwanja ò tenì ya mèèmà me hwatò ɔndi màlùtèyà ma wòhwe nàa e ma mòrzònje, lì ihwà na lì òŋwa hwe uhwɛlɛlɛ.

²² Mòrzònje mò ndawò ya lìhwa, lì hwɛ wɔ̀, na lì gbeyà la hwehvɛhvɛ hweyà hwe wòhwe nàa ìilɔ̀ki, ìndɔ̀ki ja hweyà, merzàmbelì, ò lì òhwìrzɛ̀nɛ̀ mòtò wòhwe, e kumbà na lì gbeyà hwèètì hwe hweyà.

²³ Hwenè hweyà hwè arzɛ hwe wòhwe ndi hwe wùrza mòtò ò ŋmèma, rzìi hwe mò gbeyà a rza ɛneya wòrzaŋgi ò wòrzò wò ama Lohwɛ̀.”

Lìlòkɛ̀ là è mòlanà wa ŋmɛ̀ni

²⁴ Yerzù à mà anjiya ò èŋge erzòòkà rzìi a ɛ̀ndɛ ò erzòòkà ema e ma kòmbɛ̀nɛ̀ e mbòwà ya Tàyi na Rzidònì. À ma kpèeyà ndawò hvɔ̀kɔ ema à rzì arze nanù ema tɔ̀ mòtò tɔ̀ mɔ̀kɔ a hwìye nanù ema mɔ̀ à hwèlì aŋga. Ndi tɔ̀ nanù, hwatò hwà mà hwiya ema a hwèlì aŋga.

²⁵ Mòlanà mɔ̀kɔ ema e ŋmanà wà eni wa mòlanà à mà hwɛnɛ èlìŋgɛ̀ ya wòhwe, à mà hweye nanù ema Yerzù a hwèlì aŋga, lìwòkìmɛnɛ, rzìi a ɛ̀ndɛ, a kpa ò mataŋgà mà eni.

²⁶ Ònò mòlanà à mà uhwɛlɛlɛ ndi ò èkòmè ya Glìki, à mà ŋyahwɛlɛ ndi ò erzòòkà ya Rzilìyà, ema e ma hwɛ̀lɛ̀hwɛ̀ Hvɔ̀nìrzìyà. A rzòrzòmeya Yerzù nanù ema a wɔ̀wìrzɛ̀ e ŋmanà wa eni, ò èŋge èlìŋgɛ̀ ya wòhwe.

²⁷ Yerzù rzìi a mò alàhwɛ̀ nanù ema, “Inyɛ̀ ì lòme lì ŋgbà hwàna mòlelì mò awu hvɔnì, hwa lèè, ò rza lɔ̀ɔ̀ lì wòwa mòlelì mò hwàna rzìi ò mò aŋgbeyà iŋgba.”

²⁸ Oŋgò mòlanà rzìi a mò alàhwɛ̀ nanù ema, “Nà e jɔ̀kɛ̀ Rzàŋgò tɔ̀ iŋgba hvɛ ì nòŋgama ò rze ya tehwèlì ì làa hvɛ ì mbumbu ja mèlelì hwàna hwa undirzɛ.”

²⁹ Yerzù rzìi a mò alàhwɛ̀ nanù ema, “Kànatɛ ò nò alàhwɛ̀ nanù, tìmba ò ndawò ya aŋgɔ̀ èŋgè èlìŋgɛ̀ ya wòhwe e ma hwɛ̀mɛ e ŋmanà wà aŋgɔ̀.”

³⁰ A mà ɛ̀ndɛ rzɔ ò ndawò, a ùŋmanɛlɛ e ŋmanà wa eni a nàŋgayi ò lìnɔ̀ŋgɔ, èŋge èlìŋgɛ̀ ya wòhwe e ma mò hwɛmɛ nà e jɔ̀kɛ̀.

Yerzù à mà wɔ̀wìrzɛ̀ mòtò ema a rzi hvɔ̀ŋgɛ̀, a rzìi hwɛ lì òhwa hvɛ gbamù

³¹ Yerzù rzìi anjiya ò èŋge erzòòkà ya Tàyi rzìi a akeeya ò Rzidònì rzìi a ɛ̀ndɛ ò tòŋgòŋgò ya yùlu ya malìhwà mà Galìlì, rzìi a kpèeyà ò erzòòkà ema e ma òhva lìyòmɛ̀ la Mambòwà.

³² Lòŋgò la hwatò rzìi hwa mò jàneya mòtò ema a rzìi hvɔ̀ŋgɛ̀, a rzi tanɛ hvɛ lì òhwa gbamù. Hwa mà rzòrzòmeya Yerzù nanù ema a mò hwàkɛ màà mà eni.

³³ Aŋga ndi Yerzù a mà mò arzùukɛnɛ njùka hvɔ̀kɔ lì rzɔ̀lɛnɛ̀ na è ŋgìndì, rzìi a mò rzòkɛ hwèyɔ̀nɔ̀ hwè enì ò màtò ma eni. Rzìi à rzɔ hwèyɔlì, rzìi a tɔ̀tɔ̀ jɛ̀ɛ̀mɛ̀ je eni.

³⁴ Yerzù rzìi à ɔŋgɔ̀ ò ŋmanyu yà lohwà rzìi a rzìyòwa hvɔ̀ɔ rzìi a òhweyà òŋgò mòtò nanù ema, “Èhvàtà,” ene ŋgàna e hwèlì ndì nanù ema, “Lihvòweya.”

³⁵ Lìwòkìmɛnɛ à mà wòteya lì hwèya, jɛ̀ɛ̀mɛ̀ ja eni hvɛ ì mà wuluweya rzìi a wòteya lì òhwa gbamù.

³⁶ Yerzù rzìi a hwa kòkòwɛ̀lɛ̀ nɔ̀ke-nɔ̀ke ama hwa rzìi keka lì òhweyà tɔ̀ mòtò ene eyà, ndi tɔ̀ nɛ à mà òhwe nanù, wɔ̀ hwà mà hwatɛ ndi o lì òhwa nanù mɛnɛ.

³⁷ Tɔ̀ ima mɔ̀ ema a mà hwèya hwenè hweyà a mà hwe tameya rzayì-rzayì, rzìi hwa òhwà nanù ema, “A gbèyi hweyà hwe arzɛ gbamù. A gbeyà hvɛ hwetòòtò hwe hweyà, ìmbùke hvɛ jò òhwa.”