Makòrzì 4 - Mokpwe: Bakwery (New Testament)

Ŋmàna mò è mòònelì

¹ Yerzù à mà wòteyà lì òkòlɛ̀ hvɛ ò tòŋgòŋgò yà yùlù ya Gàlìlì. Hwatò ema hwà mà arzàŋganɛ lì mò tòŋga hwa mà aka lì kòka, ò èŋgànɛ̀lɛ̀ à mà kpeya ndi ò wɔ̀lɔ̀ rzìi a lìya. Wɔ̀ɔ̀lɔ̀ wò mà hwɛ ndi ò tenì ya màlìhwa. Ndi èŋge ŋgìndì yà hwatò ema lìya ndi ò mòkòkò mò eŋge yùlù.

² À mà hwa òkòlɛ̀ hweyà rzayì-rzayì nà meyànà. À mà hwa kpɛ̀ɛ̀yà ŋmàna nanù ema,

³ “È òkànèyà tɛ! Mòònèlì wà mbòtà mɔ̀kɔ à mà hwɛ lì mùŋgùlɛ̀ ihvɔ̀ŋgɔ̀.

⁴ Nà òmà a mà hwɛ lì mùŋgùlɛ̀ ìhvɔ̀ŋgɔ̀ ja eni, lòŋgò ì mà unda ò njìya, hwènɔ̀nì hwe mà ji rzòmà.

⁵ Lòŋgò la hvɔ̀ŋgɔ̀ i ma unda ò ŋmanyu yà èwòmà ya lìŋyàyi ema i rza òhvɛ mɔ̀nyɛ̀ mò kòki iŋgi hvɔ̀ŋgɔ̀ i ma hvùmùwà karzi-karzi èhwanja mɔ̀nyɛ̀ mò rzi kòkè aŋga.

⁶ È hvònda igbe ja ŋginyà ì mà wurze ì mà rzɛlɛ èŋge mbòtà rzìi e ùhwà, rzìi e ŋwa, èhwanja meyaŋgà me rzi rzɔŋgɔ̀ ò tenì yà mɔ̀nyɛ̀.

⁷ Lòŋgò la iŋgi hvɔ̀ŋgɔ̀ hvɛ i ma unda ndì ò tenì ya wàŋga ya hwènyɛ̀ŋgɛnyɛ̀ŋgɛ̀, rzìi hweŋge hwènyɛ̀ŋgɛnyɛ̀ŋgɛ̀ hwe òŋga, hwe lìŋgɛ̀lɛ̀ iŋgi hvɔ̀ŋgɔ̀ ema i ma kɛkɛ, rzìi e ùhwà è rzi tanɛ̀ lì ŋya.

⁸ Lòŋgò la iŋgi hvɔ̀ŋgɔ̀ ì mà unda ndi ò mɔ̀nyɛ̀ mò gbamù. Ì wurzà jò òŋga rzìi ì ŋyà. Rzìi lòŋgò la hwèŋge hwèrzòŋgò hwe mà ŋya rzàyiyàwò jà hvɔ̀ŋgɔ̀, lòŋgò hvɛ ì ma ŋya mènìmòtòhwa me hvɔ̀ŋgɔ̀, inɛ̀yi hvɛ ì ma ŋyàa ègbe ya hvɔ̀ŋgɔ̀.”

⁹ O lìrzukù rzìi Yerzù a òhwa nanù ema, “È mɔ̀ ema à òhvi màtò mɔ̀ à hweyè.”

Jànda ema Yerzù a mà kpɛ̀ɛya menè meyàna

¹⁰ È hvònda ema Yerzù a mà hwɛ mɔ̀ ŋmìti, lìyòmɛ̀ la eni la Hwà-òkòwèlì nà hwahwàkɛ, nà hwatò ema hwà mà hwɛ aŋga, hwa mà mò ijòwa nanù ema a hwa telɛlɛ mèŋge meyàna.

¹¹ À mà hwa òhweyà nanù ema, “Lohwɛ̀ à è ŋgbèlì è wònjà ò lì hwiyà è wùndɛ̀ yà Lìkànèyà la ama Lohwɛ̀. Ndi ò hwanɛ̀yi hwatò Lohwɛ̀ à hwa gbèyi ò lì hwiyà hwenè hweyà ò meyànà mɛ̀nɛ̀.

¹² À mà gbeyà ndi nanù ema, tɔ̀ hwa ɛnɛ̀ hwa rzà èmbàneyà, tɔ̀ hwa hweyà hwa rzà rzɔ̀ŋgìtɛ̀nɛ̀, èhwanja hwa rzɔ̀ŋgìtɛ̀nɛ̀yi tɛ hwa tìmba ò mà Lohwɛ̀ òma à mà hwa làkìrzɛ̀.”

Yerzù à mà hwa tèlɛlɛ jànda jà ŋmàna mò è mùŋgùlèlì wà mbòtà

¹³ Yerzù rzìi à hwa ijòwa nanù ema, “È rza rzɔ̀ŋgìtɛ̀nɛ̀ mònò ŋmàna e? È rza rzɔ̀ŋgìtɛ̀nɛ̀ tɛ mònò ŋmàna, nɛ è tànɛyi ò lì rzɔ̀ŋgìtɛ̀nɛ̀ mènɛ̀yi meyànà e?

¹⁴ È mùŋgùlèlì wà mbòtà mɔ̀ ndi à mùŋgùlɛ̀ɛ è mbɔrzi yà ama Lohwɛ̀.

¹⁵ Lòŋgò là hwatò hwa gbèyi ndi nàa ì hvɔ̀ŋgɔ̀ ema ì mà unda ò njìya. Hwa hweyi tɛ Èya yà Lohwà lìwòkìmɛnɛ Mòkarzɛ̀ à jà à è ulɛ̀ ò mèèmà mè awu.

¹⁶ Hwanɛ̀yi hvɛ nàa ìhvɔ̀ŋgɔ̀ ema jò undi ò èki yà hwèkɔ̀kɔ̀ hwe maŋyayi, è mà hwa hwèyì tɛ Eyà yà Lohwà lìwòkìmɛ̀nɛ̀ hwa è imànɛ̀lɛ̀ nà mɔ̀nyɛ̀ŋgì.

¹⁷ Ndi eŋge Èya yà Lohwà è rza ònahwa ò mèèmà mè awu, ndi hwa è lòkɛ̀ ndi ò ŋmanà hvòkà wà hvònda mɛnɛ. Ò èŋgànɛ̀lɛ̀ rzɔ ìndùtù tɔ̀ mètàkà me jelì tɛ, hwa akòohwɛ̀ ò mburzà ò lìwòkìmɛ̀nɛ̀.

¹⁸ Hwanɛ̀yi hwatò hvɛ hwa hwèlì ndi nàa ìhvɔ̀ŋgɔ̀ ema jò undà ò tenì ya hwènyɛ̀ŋgɛnyɛ̀ŋgɛ̀, hwa hwèlì ndi hwatò ema hwa hweyi Eyà ya Lohwà,

¹⁹ ndi hweyà hwe rze na è nyìrzɛ̀ ya lì hwɛnɛ̀ hwèèmà, nà è nyìrzɛ̀ ya lì arza hvɛ hwehvɛhvɛ hweyà, hwe hwa lìŋgɛ̀lɛ̀ mèèmà me awu nyàyi ema hwa rza tanɛ lì ŋya hwèhvùma.

²⁰ Hwanɛ̀yi hwatò hvɛ hwa hwèlì ndì nàa ìhvɔ̀ŋgɔ̀ ema ì undi ò mɔ̀nyɛ̀ mò gbamù, ema hwa hwèya eyà ya Lohwà, hwa imànɛ̀lɛ̀ nà è jɔ̀kɛ̀, rzìi e ŋya erzoŋgò ema e jàna rzayiyàwò ja hvɔ̀ŋgɔ̀, tɔ̀ mènì-mòtòhwa me hvɔ̀ŋgɔ̀, lòŋgò hvɛ ègbe ya hvɔ̀ŋgɔ̀.”

Ètùlù à rza utahwa

²¹ Yerzù rzìi a ijòwa èŋge ŋgìndì nanù ema, “Mòtò à kpeyàneyà tɛ ètùlù ema à mà hvààlɛ̀ ò tenì yà ndawò à e ika ndi ò rze ya èwòkì ŋga à e ika ò rze ya lìnɔ̀ŋgɔ̀ e? Rzèkɛ ò ŋmanyu yà e mbòkò ema hwa tɛ̀yìrzɛ etùlù ndi à e ika e?

²² O rzà ènje tɔ̀ eyà ema e utahwi ema e rzà ò wurza ò mòteŋyi. O rzà ènje hvɛ tɔ̀ eyà ema e utami ema e rzà ò hwiyɛ̀nɛ̀.

²³ Tɔ̀ ima mòtò ema à òhvi matò, a hweye.”

²⁴ Yerzù rzìi a ɛ̀ndɛ hvɛ ò wòrzò lì òhwa nanù ema, “È lùtèyà kɔ̀yi-kɔ̀yi mamɛ ema e hweyà! Limɛnì ema e gbeyàna nà hwanɛ̀yi hwatò, lìŋgi lìmɛnì mɛnɛ ndi Lohwɛ̀ mɔ̀ hvɛ à ò gbeyà nà ò lì è mɛneya. Li aka tɔ̀ mamɛ ema e gbeyànì ò lì mɛneya hwanɛ̀yi hwatò.

²⁵ È mɔ̀ ema a òhvi lì rzɔ̀ŋgìtɛ̀nɛ̀ ò e wùndɛ̀ ya Lìkànèyà là ama Lohwɛ̀, Lohwɛ̀ à mò ŋgbà lì rzɔ̀ŋgìtɛ̀nɛ̀ lì kòki. Ndi è mɔ̀ ema a rza òhvɛ, Lohwɛ̀ à mò wòwànà tɔ̀ è teŋyi ema a òhvì.”

Ŋmàna mò hvɔ̀ŋgɔ̀ e òŋga

²⁶ Yerzù rzìi a òhwa hvɛ nanù ema, “Lìkànèyà là ama Lohwɛ̀ lì hwèlì ndi nàa mòtò ema a ɛndi lì mùŋgùlɛ̀ ì hvɔ̀ŋgɔ̀ ò waŋga.

²⁷ À tìmba ò ndawò ya eni, a naŋga wuu, a tɛ̀mɛ̀ ŋmerze a gbeyà èwòlò ya eni. O èŋge hvònda, ì hvɔ̀ŋgɔ̀ ì hvùmùwà, ì òŋgà, ema a rza hwiyɛ nɛ e gbèyɛ̀nɛ̀yi.

²⁸ Mɔnyɛ ndi mò gbeyà ì mbòtà jo òŋga rzi ì ŋya hvɛ hwehvùma. Liirzɔ̀ ndi lì lòma lì wurzà, rzìi ò mburzà hvònda hwèyalì hwe ɔhvɛ hwe wurza, rzìi ò lìrzukù hwèrzòŋgò.

²⁹ Ndi hwèrzòŋgò hwe ma òŋwa tɛ, lìwòkimɛnɛ, è mòtò a wòwa è hvàwò à ɛndɛ ò rzàa èhwanja e mbòtà è mà òŋwa.”

Ŋmàna mò e ŋmanà hvɔ̀ŋgɔ̀ wa gbèe

³⁰ Yerzù rzìi a òhwa hvɛ nanù ema, “Mamɛ ì tanɛ lì òhwa nanù ema Lìkànèyà la ama Lohwɛ̀ lì ayèkɛnɛ̀ e? Tɔ̀ ima ŋmàna ì tanɛ lì gbeyàna ò lì òhwa nɛ Lìkànèyà là ama Lohwɛ̀ lì hwèlì e?

³¹ Lì gbèyi ndi nàa ìhvɔ̀ŋgɔ̀ ja wòŋgò gbèe ema mòtò a wò, rzi a hvàhva ò mòònda. Ini hvɔ̀ŋgɔ̀ ì tu rzayì-rzayì. O ji mɛ̀nɛ̀nì tɛ nà ihvɛ-hvɛ hvɔ̀ŋgɔ̀ ja ene rze.

³² Jò òŋga tɛ, jò òŋga lì aka hwèwùlè hwe arzɛ rzìi jo òhvi hwèkɔ̀kɔ̀ ema hwènɔ̀nì hwe òŋga mùùmbù ma awu.”

³³ Mònò ŋmàna nà mehvɛhvɛ meyàna me ɔ̀ndi Yerzù a mà gbeyàne ò lì hwa òkòlɛ̀ Èya ya Lohwà. A ma hwɛ lì hwa òhweyà nyayi ema hwa mà tanɛ lì rzɔ̀ŋgìtɛ̀nɛ̀.

³⁴ A rzi hwa òhweyà tɔ̀ Èya e rzìi hwɛ lì hwa kpɛ̀ɛyà ŋmàna. Ndi tɔ̀ ima hvònda ema a mà hwɛ mɔ̀ ŋmìti nà Hwà-òkòwèlì hwa eni mɛnɛ à mà hwa òhweyà jànda ja mene meyàna.

Yerzù à mà lɔ̀kɔ hwemunɛ̀

³⁵ O wòŋgò wùnyà na òma e ŋgòmbe ya lohwà e ma ùke, Yerzù à mà òhweyà Hwà-òkòwèlì hwa eni nanù ema, “Inyɛ̀, je ɛ̀ndɛ o enɛyi èhvarzù ya Yulu.”

³⁶ Hwà-òkòwèlì hwa eni rzìi hwa hwɛ̀mɛ̀ e ŋgìndì rzi hwa kpèeyà ò wɔ̀lɔ̀ ema Yerzù à mà hwɛ, rzìi hwa mò ɛ̀ndɛ̀nɛ̀. O mà hwɛ mahvɛhvɛ mɔ̀lɔ̀ aŋga.

³⁷ Mbɛ̀hvɛ̀nì ndɛnɛ è mà wòteya lì nèŋgìrzɛ̀ wòŋgò wɔ̀lɔ̀ rzi hwèmùnɛ̀ hwe wòteyà lì kpèeyà ò tenì yà wɔ̀lɔ̀, natɛ wò mà arza lì inda.

³⁸ Yerzù à mà hwɛ ò tenì yà wɔ̀lɔ̀ ò mburzà. À mà naŋga rzìi a ika mòòhvò mò eni ò mòmbòŋga. Hwa mà mò imòlɛ rzi hwa mò òhweyà nanù ema, “Ìi Mòòkòlèlì ò rza jò àŋgòhweyà na òma ì hwèlì ndi ò kpelì e?”

³⁹ Yerzù rzìi a tɛ̀mɛ̀ ò ŋmanyu a lòmeyà e mbɛ̀hvɛ̀nì nanù ema e yɔ̀yeyà, rzìi a òhweyà hwèmùnɛ̀ ema hwe lɔ̀kɔ̀meyà, è mbɛ̀hvɛ̀nì e yɔ̀yeyà rzìi èki ya arzɛ hvɛ e hwɛ ŋmɛ̀ɛ.

⁴⁰ A ijòwa Hwà-òkòwèlì hwe eni nanù ema, “Mamɛ ndèŋgàtɛ̀ è òka wɔ̀ŋgɔ̀ e? O èŋgànɛ̀lɛ̀ natɛ̀ɛ na nàŋgɛ e rza òhvi tɔ̀ lìlòkɛ̀ e?”

⁴¹ Hwa mà jeja nà wɔ̀ŋgɔ̀ wòndɛnɛ rzìi hwa ìjòwànɛ̀ mɔ̀kɔ nà ɔ̀nɛyi nanù ema, “Njɛnɛ hvɛ ònò e? Èma è mbɛ̀hvɛ̀nì nà hwèmùnɛ̀ hwe mò hweyànà e?”