Makòrzì 3 - Mokpwe: Bakwery (New Testament)

Yerzù à mà wɔ̀wìrzɛ̀ è mòtò wà lìya la njɛmbu

¹ O ehvɛhvɛ hvònda Yerzù à mà kpèeyà ò ndawò yà màkanɛ̀ yà wònyà Yudà. O mà hwɛ munyanà mɔ̀kɔ aŋga ema à ma ɔ̀kirzɛ̀ mɔ̀ɔ̀ mò njɛmbu.

² O ma hwɛ hwatò aŋga ema hwà mà hwɛ lì arza ò lì mò lùwa njɔ̀mì. O èŋgànɛ̀lɛ̀ hwa mà mò ìnja lòŋgòlòŋgò ò lì ɔŋgɔ̀ ŋgà à wɔ̀wìrzɛ̀ òŋgò mòtò ò Wùnyà wò lì Arzìyòlɛ̀.

³ Yerzù à mà òhweyà òŋgò mòtò ema à ma ɔ̀kirzɛ̀ mɔ̀ɔ̀ mò njɛmbu nanù ema, “Jà ò tɛ̀mɛ̀ ò màrzò ma hwatò hwa arzɛ!”

⁴ Rzìi à hwa ijòwa nanù ema, “Mamɛ è hwèlì e mbenda ò Wùnyà wò lì Arzìyòlɛ̀ e? O lì gbeyà gbamù ŋga wòhwe. O lì rzùŋgà lòŋgɛ la mòtò ŋgà ò lì mò òŋwa e?” Ndi wɔ̀ hwa arzɛ hwa mà kina.

⁵ À mà hwa ɔ̀ŋgɔ nà hwètàtò rzìi, e mò tàtìrzɛ̀ ò ŋmèma mò eni. Rzìi à òhweyà òŋgò mòtò nanù ema, “Ènyòwa mòŋgò mɔ̀ɔ̀ mò àŋgɔ.” Nà òmà a mà mò enyòwe, mò mà wɔ̀wɔ̀.

⁶ Ihvalìrzàyì i mà wurza ò èwòkà, rzìi hwa ùŋmanɛlɛ hwatò hwa ehvehva ya ama Hɛ̀rɔ̀dì, rzìi hwa wòteyà lì arza ŋmanò nɛ wɔ̀ hwa tànɛyì lì òŋwa Yerzù.

Ŋgindi è mà òŋgama Yerzù ò yùlu ya Galìlì

⁷ Yerzù à mà ànjiya nà hwà-òkòwèlì hwa eni rzìi hwa ɛ̀ndɛ ò yùlu ya Galìlì. Ndi ŋgìndì ndɛnɛ̀ yà hwatò è mà hwa nɔ̀ŋgɔ aŋga. Hwaŋga hwatò hwa mà uwɛ̀lɛ̀lɛ̀yi ndi ò erzòòkà ya Galìlì, Jùdeyà,

⁸ Jèrurzalɛ̀mù, ò erzòòkà ya Èdùmeyà, nà ò hwèrzòòkà hwe ɛnɛyi èhvarzù ya Jɔdànì, nà mambòwà ema mà kòmbɛ̀nɛ̀ nà mambòwà mandɛnɛ ma Tàyi nà Rzidònì. Hwanù hwatò hwà mà jèeyà Yerzù èhwanja hwà mà hwèya hweyà ema a mà hwɛ lì gbeyà.

⁹ À mà òhweyà hwà-òkòwèlì hwa eni nanù ema hwa mò rzèkeya wɔ̀lɔ̀ èhwanja è ŋgìndì ema è ma mò àyìinɛ̀lɛ̀ è mà kòka.

¹⁰ Èhwànja Yerzù à mà wɔ̀wìrzɛ̀ rzayì-rzayì ja hwatò, ò èŋgànɛ̀lɛ̀ hwatò ema hwà mà ɔ̀kirzɛ na ihvɛ-hvɛ nyàmbɛ, hwa mà hwɛ lì àyìinɛ̀lɛ̀ ò lì mò uka nanù ema a hwa hwàkɛ màà mà eni.

¹¹ Tɔ̀ ima hvònda ema hwèŋge hwèlìŋgɛ̀ hwe wòhwe ema hwe ma hwɛ ò hwatò hwe mà mò ɛ̀nɛ, hwe mà kpìrzɛ hwaŋga hwatò ema hwe ma hwɛ ò tenì ya awu. Hwe hwa tɛ̀yìrzɛ merzeya nanù ema, “Ò hwèlì ndi è Ŋmanà wà àma Lohwɛ̀!”

¹² Yerzù à mà kòkòwɛ̀lɛ̀ hwaŋga hwatò nɔ̀ke-nɔ̀ke àma hwa rzi kèka lì òhweyà tɔ̀ mòtò njɛnɛ mɔ̀ à hwèlì.

Yerzù à mà hvɔ̀rzɔ̀ lìyòmɛ̀ la Hwà-òkòwèlì nà hwàhwàkɛ̀

¹³ Yerzù rziì a àgba ò ŋmanyu yà mòòlì, rzìi a hwɛlɛ hwatò ema mɔ̀ à mà arze, hwa mà mò jèeya.

¹⁴ Rzìi à hvɔ̀rzɔ̀ lìyòmɛ̀ la hwatò nà hwàhwàkɛ̀ ò lì hwɛ nà mɔ̀. Wɔ̀ ndi mɔ̀ à mà hwɛlɛ i àpɔ̀rzìtòlò ja eni. Rzìi à hwa òma ò lì òhwa Eyà ya ama Lohwɛ̀.

¹⁵ À mà hwa ŋgba è ŋginyà ò lì hvàya hwèlìŋgɛ̀ hwe wòhwe, ò nyò ja hwatò.

¹⁶ Lìŋgi lìyòmɛ la hwatò nà hwàhwàkɛ̀ hwa mà hwɛ ndi: Rzìmɔ̀nì ema Yerzù a mà kpɛ̀ɛ̀ lìinà Pètrò;

¹⁷ Jèmìrzì nà ŋmanyàŋgò wà èni Yòwanìrzɛ̀, hwàànà hwa ama Rzɛ̀bɛ̀dì (e ma Yerzù a mà kpɛ̀ɛ̀ lìinà àma Bòwànègèrzì, jànda ì hwèlì ndi hwààna hwa e ŋgàlà lohwà).

¹⁸ Àndèlè, Hvìlìpì, Bàtòlomìyò, Màtìyò, Tɔ̀màrzì, Jèmìrzì è ŋmanà wà àma Alìhvɔ̀rzì, Tàdìyòrzɛ̀, Rzìmɔ̀nì mòtò ema lì emeyà la eni lì rza àyèŋgòwɛ̀,

¹⁹ nà Jùdàrzì Ìrzìkarìyɔ̀tɛ̀ ema à ma àhwirzɛ̀ Yerzù.

Yerzù a hwɛ̀lɛ̀hwɛ̀yi Bɛ̀lrzɛ̀bùlì

²⁰ Yerzù rziì a kpèeyà ndawò hvɔ̀kɔ. Ŋgindi ndɛnɛ̀ è mà arzàŋganɛ aŋga. Ène ŋgàna è mà gbeyà ema mɔ̀ nà Hwà-òkòwèlì hwa eni hwa rzi hwɛnɛ hvònda ò lì làa.

²¹ Nà òmà lìtumba lì eni lì ma hweye nanù, lì mà ɛ̀ndɛ lì mò aŋgòhweyà èhwanja hwa mà hwèya hwatò hwa òhwà nanù ema, “Mɔ̀ à rza ènje gbamù.”

²² Lòŋgò la Hwà-òkòlèlì hwa mbenda ema hwà mà uhwɛlɛlɛ ò mbòwà yà Jèrurzalɛ̀mù rzìi hwa òhwa nanù ema, “À òhvì Bɛ̀lrzɛ̀bùlì ò nyò yà èni. Èŋge kiŋgɛ̀ yà hwèlìŋgɛ̀ hwe wòhwe yɔ ndi è mò ŋgba èŋgè wònjà ò lì hvayànà hwèlìŋgɛ̀ hwe wòhwe ò hwatò.”

²³ O èŋgànɛ̀lɛ̀ rzɔ Yerzù à ma hwa hwɛlɛ rzìi a hwa kpɛ̀ɛyà meyàna nanù ema, “Nɛ Mòkarzɛ̀ à tànɛyi lì hvayà Mòkarzɛ̀ e?

²⁴ È hwèlì tɛ ema hwatò hwa èkòmè yɔ̀kɔ hwa akahwanɛ tɛ, ema hwa rzà òhwa eyà yɔ̀kɔ èŋge èkòmè e rzà tanɛ̀ lì tɛ̀mɛ̀.

²⁵ È hwèlì tɛ ema ndawò ya akahwanɛ tɛ ema e rza òhwa Eyà yɔ̀kɔ, èŋge ndawò e rza tànɛyi lì tɛ̀mɛ̀.

²⁶ Ndèŋgàna hvɛ, Mòkarzɛ̀ à ateŋgɛ̀nɛ̀yi tɛ tɔ̀ mɔ̀ ŋmìti, rzìi à akahwanɛ, à rza tanɛ̀ lì tɛ̀mɛ̀. Ò mà lìrzukù la eni lì mà ukà.”

²⁷ “Inyɛ̀ nà è òhweyà, ò rza tànɛyi lì kpèeyà ò ndawò ya mòtò ema a imbami rzìi ò mò hvùmana erzaŋgò ya eni ema ò rza lòmɛ̀ lì mò kakà. O ma kùlɛ̀ tɛ lì mò kakà, lìŋgi lìrzàkò ɔ̀ndi ò mò wòwànà erzaŋgò ya eni ya arzɛ.

²⁸ Nà è òhweyà è jɔ̀kɛ̀ nanù ema, wòhwe wò àrzɛ nà ìrzìlàkò hwatò hwa òhwa, Lohwɛ̀ à hwa làkìrzɛ̀,

²⁹ ndi è mɔ̀ ema à òhwani Èlìŋgɛ̀ yà Wòtani lìhwena a rza ò làkìrzɛ̀hwɛ̀ tɔ̀ wùnyà, à gbèyi wòhwe wò rza làkìrzɛ̀hwɛ̀.”

³⁰ Yerzù à ma òhwa ndi nanù èhwanja hwatò hwa mà hwɛ lì òhwà nanù ema, “À òhvì èlìŋgɛ̀ ya wòhwe.”

Yerzù nyàŋgɛ nà wònyànyàŋgò hwa eni

³¹ Yerzù nyàŋgɛ nà wònyanyàŋgò hwa eni rzìi hwa jà aŋga. Nà òmà hwà mà tɛ̀mɛ̀ aŋga èwòka ya èŋge ndawò, rzìi hwa òmɛnɛ ŋmɛ̀ndì ò tenì yà èŋge ndawò ema hwa mò hwɛlɛ.

³² È ŋgìndì è mà mò tòŋga. Mòtò mɔ̀kɔ rziì a mò òhweyà nanù ema, “Nyàŋgɛ, nà wònyanyàŋgò hwa àŋgɔ, hwa hwèlì ò èwòkà hwa ò hwɛlɛ.”

³³ Yerzù rzìi à hwa alàhwɛ̀ nanù ema, “Njɛnɛ à hwèlì nyàŋgò wa ami, hwa njɛnɛ hvɛ hwa hwèlì wònyanyàŋgò wa amì e?”

³⁴ Yerzù rzìi a ɔ̀ŋgɔ hwaŋga hwatò ema hwà mà lìya lì mò tòŋga, rzìi a òhwa nanù ema, “È ɔ̀ŋgɔ tɛ, nyàŋgò hwa ami na hwa wònyanyàŋgò hwa ami wɔ̀ hwa anù!

³⁵ Tɔ̀ ima mɔ̀ ema à gbèyi lì emeyà la ama Lohwɛ̀, mɔ̀ ndi à hwèlì nyàŋgò wa ami, nà wònyanyàŋgò hwa amì.”