Makòrzì 16 - Mokpwe: Bakwery (New Testament)

Yerzù à mà Hvùmùwà

¹ Ò mburzà yà Wùnyà wò lì Arzìyòlɛ̀, Màlìyɛ̀ Màdàlènì, Màlìyɛ̀ è nyàŋgò yà ama Jèmìrzì nà Rzàlòmɛ̀ hwa mà ànda màwɔ̀ki mà hvɛ̀ɛ̀hvɛ̀ ò lì nyààlɛ̀ ŋmììmbà mò ama Yerzù.

² O ekpààrzɛ̀ ya wùnyà wò wòrzò, wò wiki, ò e hvònda yà mòòmbe mò igbeyì, wɔ̀ hwa mà ɛ̀ndɛ ò rzɔ̀ŋgɔ̀.

³ Nà òmà hwà mà hwɛ lì ɛ̀ndɛ, rzìi hwa àyijòwànɛ̀ mɔ̀kɔ nà ɔ̀nɛyi nanù ema, “Njɛnɛ à jò iŋgòlɛlɛ lìŋgi lìyayi ema lì kekayi hwekpèèlì hwe èŋge rzɔ̀ŋgɔ̀ e?”

⁴ Ndi nà òmà hwà mà karzɛ mìirzɔ̀ ò lì inja èŋge rzɔ̀ŋgɔ̀, rzìi hwa ɛnɛ nanù ema lìŋgi lìyayi lì ndɛnɛ ema lì ma òlòwa, lì ma iŋgòlɛhwɛ ɔ̀nɛyi.

⁵ Nà òmà hwà mà àyinɛ̀lɛ̀ ò tenì ya èŋge rzɔ̀ŋgɔ̀, rzìi hwa ùŋmanɛlɛ mbèrza yɔ ndi è wɔti mòŋgòmbè, mò mbɔmi, e lìyayi ò èhvarzù ya mɔ̀ mò mòmɛ̀ la èŋge rzɔ̀ŋgɔ̀. Wɔ̀ hwa mà lɛmbeya wɔ̀ŋgɔ̀ wò ndɛnɛ̀.

⁶ Èŋge mbèrza rzìi e hwa òhweyà nanù ema, “È rza òka tɔ̀ wɔ̀ŋgɔ̀. Nà hwi nanù ema e àrza ndi Yerzù e mòtò wa Nàrzàrɛ̀tì, ema hwà mà wòmeya ò mbarza. Mɔ̀ à mà hvùmùwà! À rza enje anù. È ɔ̀ŋgɔ tɛ èki ema hwa mà mò nàŋgɛlɛ.

⁷ Ndi e ɛ̀ndɛ̀, e òhweyà hwà-òkòwèlì hwa eni na Pètrò nanù ema, Yerzù à mà hvùmùwà, ‘À hwèlì à ɛ̀ndɛ ò wòrzò wò anyu ò lì kpèeyà ò mbòwà ya Galìlì, aŋga ndi e mò ɛnɛ̀, nà òmà mɔ̀ à mà è òhweyà.’”

⁸ Hwàŋga hwalanà hwa mà lɛmbeya mòkambiya rzìi hwa òhva hvɛ hwètamirzelì ò hweyà hwe mànyakà ema hwà mà ɛnɛ. Hwà mà wurza ò tenì ya èŋge rzɔ̀ŋgɔ̀ rzìi hwa òba ò lì hwaŋgi. Mònyòlìnyòlì mò ma hwa lɛmbɛ, hwa rzi òhweyà tɔ̀ mòtò tɔ̀ èya.

Hwerzuwèlì hwèyɔ̀kɔ hwe kààtì yà Makòrzì ( 16.9-20 ) Yerzù à mà awuŋmɛ̀lɛ̀ mɔ̀ ŋmìti ò ma Màlìyɛ̀ Ma Màdalenà

⁹ Nà òmà Yerzù a mà hvùmùwè ò èŋge elele ya wùnyà wò wòrzò wò wiki, à mà lòma ndi lì awuŋmɛ̀lɛ̀ Màlìyɛ̀ Màdalenà. Ònò mòlanà mɔ̀ ndì Yerzù a mà hvaye hwèlìŋgɛ̀ lìrzàmbà hwe wòhwe ò nyò ya eni. Hwàŋga hwalanà rzìi hwa ɛ̀ndɛ lì òhweyà Pètrò nà hwatò ema hwà mà hwɛ nà mɔ̀ hweyà hwe arzɛ ema hwa mà, òhwahwɛlɛ, hwa mà utulɛ è mbɔrzi.

¹⁰ Ònò mòlanà a mà ɛ̀ndɛ lì òhweyà hwaŋga hwatò ema hwà mà hwɛ lì hwɛ nà Yerzù ì hvònda ja arzɛ. A ma hwa ùŋmanɛlɛ hwa mò ɛhwɛ nà lì ahvahvɛ ò e kpelì ya eni. O mburzà yà hwenè hweyà Yerzù mɔ̀ ŋmìti à ma òma hwatò ò rze ya arze ò lì òhwa Ŋmɛ̀ndì mò Gbamù. Mòŋgò Ŋmɛ̀ndì mò Gbamù mò Wòtani ema mò rza ayèŋgòwɛ̀, mòŋgò Ŋmɛ̀ndì mò Gbamù mò hwèlì ndi lì hvòmɛ̀nɛ̀ lòŋgɛ la gbìndèyà.]

¹¹ È hvònda ema hwà mà hwèya nanù ema Yerzù a hwèlì lòŋgɛ ndèŋgànɛ̀lɛ̀ hvɛ ema mɔ̀ Màlìyɛ̀ Màdalenà à mà mò ɛnɛ, wɔ̀ hwa rzi mò lòkɛ̀.

Yerzù à mà awuŋmɛ̀lɛ̀ mɔ̀ ŋmìti ò hwatò hwa eni hwahwàkɛ

¹² O mburzà yà eŋge hvònda, Yerzù rzìi a awuŋmɛ̀lɛ̀ mɔ̀ ŋmìti hvɛ hwahvɛhvɛ hwatò hwahwàkɛ na hwehvɛhvɛ hwɛnèlì, nà òmà wɔ̀ hwà mà hwɛ lì anjiya ò mbòwà.

¹³ Hwanù hwatò wɔ̀ hvɛ, hwà mà tìmba ò lì òhweyà hvɛ hwanɛ̀yi hwatò hwa arzɛ, ndi tɔ̀ wɔ̀ hvɛ hwa rzi hwa lòkɛ̀.

Yerzù à mà awuŋmɛ̀lɛ̀ mɔ̀ ŋmìti ò lìyòmɛ̀ la eni la Hwà-òkòwèlì na mɔ̀kɔ

¹⁴ O mburzà ya èŋge hvònda, Yerzù rzìi a wurzeya lìyòmɛ̀ la eni la Hwà-òkòwèlì nà mɔ̀kɔ, ò è hvònda ya awu ya hwèlèèlì. Wɔ̀ hwa rzi lòkɛ̀ hwaŋga hwatò ema hwà mà òhwa ema hwa mò ɛni ò mburzà hwè hvùmùwèlì hwa eni. O èŋgànɛ̀lɛ̀ à mà hwa kanja ema hwa rza òhvi lìlòkɛ̀ ndèŋgàna mèèmà me awu me eti.

¹⁵ À mà hwa òhweyà nanù ema, “È ɛ̀ndɛ̀, e àyinɛ̀lɛ̀ ò e rze ya arzɛ, e hwa òhweyà Ŋmɛ̀ndì mò Gbamù.

¹⁶ Tɔ̀ ima mòtò ema à lòkɛ̀yi rzìi a lùhwìrzɛ̀hwɛ̀ à ò kɔtɔ̀wɔ. Ndì tɔ̀ ima mòtò ema a rza lòkɛ̀ a ò kɔkìrzɛhwɛ̀.

¹⁷ Hwatò ema hwa lòkɛ̀yì hwa òhva ŋginyà ò lì gbeyà hweyà hwe mànyakà: Wɔ̀ hwa ò hvaya hwèlìŋgɛ̀ hwe wòhwe ò lìna la ami, wò òhwa hvɛ imbɔrzi hvènya.

¹⁸ Wɔ̀ wò ò lɛ̀mbɛ hvɛ màahwa na màà mà awu, ndi maŋga mààhwà mà rza ò hwa gbeyà tɔ̀ Èya. Tɔ̀ hwa nyɔ ndi tɔ̀ mamɛ ema e jɔ̀kɔ̀hwi, e rzà hwa gbeyà tɔ̀ Èya. Wɔ̀ hwa ò hwàkɛ màà mà awu ò hwatò ema hwa ɔ̀kìrzɛ, ndèŋgànɛ̀lɛ̀ hwaŋga hwà-òkèlì, hwa ò wɔ̀wìrzɛ̀hwɛ.”

Hwèkòòwèlì hwe ama Yerzù ò ŋmanyu yà lohwà

¹⁹ Ò mburzà hvònda ema Rzàŋgò Yerzù à mà hwa òhweyà hwenè hweyà, rzìi Lohwɛ̀ à mò gbeyà à kòòhwà ò ŋmanyu yà Lohwà. À mà lìyà ò lìya là mòmɛ̀ là ama Lohwɛ̀.

²⁰ Hwà-òkòwèlì rzìi hwa wùrza, hwa ɛ̀ndɛ lì òhwa Ŋmɛ̀ndì mò Gbamù ò èki ya arzɛ. È Rzàŋgò è mà hwɛ nà wɔ̀ rzìi à hwa ŋgba è ŋginyà ò lì gbeyà hweyà hwe mànyakà ò lì uŋmɛ̀lɛ̀ nanù ema màmɛ ema hwa òhwa e hwèlì ndì e jɔ̀kɛ̀. [