Makòrzì 12 - Mokpwe: Bakwery (New Testament)

Ŋmàna mò hwàgbèèlì hwà Wòhwe

¹ Yerzù rzìi à wòteya lì hwa òhwìrzɛ̀nɛ̀ nà meyànà, a òhwa nanù ema, “Mòtò mɔ̀kɔ à mà òna è hvaya yà enì yà hwèhvùma ema hwa gbeyàna hwènyɔ̀ɔ̀nì. Oŋgò mòtò rzìi a kɔ e ŋgawò ò èŋge hvaya. À ma òŋga hvɛ lìyami ò lì mita hwèŋgè hwèhvùma, ò lì wurzirzɛ hwènyɔ̀ɔ̀nì. À mà òŋga hvɛ lìwòndò la ndɛkì ema hwatò hwà mà lìya ò lì hvayà hwenɔ̀ni. À mà aka hwatò ema hwà mà hwɛnɛ lì kahwa èŋge mbòtà nà mɔ̀, ndèŋgàna a ɛ̀ndɛ ò yɔ̀ndɔ̀.

² È hvònda ema è mbòtà è mà òŋwè, rzìi mɔ̀ à òma è mògbèèlì wa enì ò wàŋga ò hwàgbèèlì hwa èŋge hvayà ema hwa mò òmeya e la eni lìkàyi.

³ Ndi hwaŋga hwàgbèèlì hwa èŋge hvaya hwà mà lɛ̀mbɛ òŋgò mògbèèlì, hwa mò nyɔ̀kɔ njùma, rzìi hwa mò timbirzɛ màa ŋgundu.

⁴ È mɔ̀ ema à mà hwɛnɛ èŋge hvaya, rzìi à òmà ò hvɛhvɛ mògbèèlì ò ma hwaŋga hwatò. Hwàŋga hwàgbèèlì hwà mà mò hwènirzɛ mòòhvò, rzìi hwa mò rzambòlɛnɛ ìrzɔnì.

⁵ È mò hwɛnɛ wa hvaya rzìi a tìmba lì òma ò hvɛhvɛ mògbèèlì. Òŋgò mɔ̀, hwaŋga hwàgbèèlì hwà mà mò òŋwa lì òŋwa. À mà tìmba lì òma hwahvɛhvɛ. Lòŋgò ema à mà òme, hwà mà òŋwahwa, lòŋgò hvɛ hwà mà ananahwa.

⁶ Ò mà lìiya mòtò mɔ̀kɔ ò lì òma. Onò mɔ̀ à mà hwɛ ndi e ŋmanà wa eni wa mùnyanà ema à mà lìŋgàne rzayì-rzayì. Mɔ̀ ndi à mà òme ò lìrzukù. À òhwanɛ̀lɛ mɔ̀ ŋmìti nanù ema, ‘Nà òmà a hwèlì ndi e ŋmanà hwa ami, hwa mò ŋgba èluhwe.’

⁷ Ndi hwaŋga hwàgbèèlì hwa èŋge hvaya, nà òmà hwà mà ɛnɛ òŋgò ŋmanà, à ja, rzìi hwa awòhwànɛ̀lɛ wɔ̀ hwìti nanù ema, ‘Onò ndi à làa erzàŋgò. È jè ì mò òŋwe ò ma ì ma kùwàna ene erzàŋgò ya arzɛ.’

⁸ Rzìi hwa mò lɛ̀mbɛ, hwa mò òŋwa, hwa aŋgba èembè ya eni ò mburzà yà ŋgawò ya èŋge hvaya.”

⁹ Yerzù rzìi a ijòwa nanù ema, “Mamɛ hvɛ rzɔ e ma e mòhwɛnɛ wà èŋge hvaya a hwɛnì lì gbeyàna hwaŋga hwàgbèèlì hwa èŋge hvaya e? À hwɛnì lì ɛ̀ndɛ ò èŋge hvaya rzìi a òŋwa hwaŋga hwàgbèèlì, rzìi a ŋgbà hwahvɛhvɛ hwàgbèèlì ò lì ɔŋgeya èŋge hvaya.

¹⁰ Eyà ya Lohwà e òhwa nanù ema, ‘Lìnyayi ema hwà-òŋgèlì hwà mà hvake, lɔ̀ndi lì ma timbɛ lìŋyàyi lì endahwɛlɛ.

¹¹ È Rzàŋgò yɔ ndi è gbèyi ene, ndèŋgànɛ̀lɛ̀ e hwèlì ndi mànyàka ò mirzɔ̀ ma arzu. È rzi laŋgè nanù e?’”

¹² Hwakànèlì hwa Irzàyɛ̀lì hwa mà àrza lì lɛ̀mbɛ Yerzù, èhwanja wɔ̀ hwà mà hwiya nanù ema wɔ̀ ndi Yerzù a kpɛɛlì mònò ŋmàna. Ndi wɔ̀ hwa mà òka e ŋgìndì wɔ̀ŋgɔ̀, rzìi hwa mò hwɛmɛ, hwa ɛ̀ndɛ e ya awu.

Mìijowelì me lì taŋgà e njàŋge yà lìkànèyà

¹³ O èhvɛhvɛ hvònda hwahvɛhvɛ Hvàlìrzàyì nà e hwa èhvehva ya ama Hɛ̀rɔ̀dì, hwa mà òmahwa ò lì arzana Yerzù màtonà ò lì mò lɛ̀mbɛ.

¹⁴ Hwàŋga hwatò hwà mà mò jèeya rzìi hwa mò ijòwa nanù ema, “Ìi Mòòkòlelì, ì hwi nanù ema ò hwèlì ndi mòtò ema òhwa e jɔ̀kɛ̀, ndèŋgànɛ̀lɛ̀ hvɛ ò rza tìmbana tɔ̀ mòtò mburzà. O rza enje hvɛ tɔ̀ mòtò ema ò òka wɔ̀ŋgɔ̀ ò lì òhwa eyà. Ndi ò òkòlɛ̀ hwatò, eyà ya ama Lohwɛ̀ ò jɔ̀kɛ̀. È mbenda ya arzù e òhwi ndi ema ì rzaweyà Kayirzà è kiŋgɛ̀ yà Ròmànì e njaŋge ya lìkànèyà e?”

¹⁵ Ndi Yerzù à mà ayèmbɛ meeyànò me awu, rzìi a òhwa nanù ema, “Mamɛ ndèŋgàtɛ̀ e nò kèkìrzɛ nanù e? È nò jàneyà kahvà hvɔ̀kɔ ya ɛ̀ɛkɛ̀, na e inje.”

¹⁶ Hwà mà mò jàneyà èŋge kahvà rzìi a hwa ijòwà nanù ema, “Èlìŋgɛ̀ ya ama njɛnɛ ene e? Liinà la ama njɛnɛ lìni e?” Hwa mà mò alàhwɛ̀ nanù ema, “È hwe ama Kayirzà.”

¹⁷ Yerzù rzìi a hwa òhweyà nanù ema, “È ŋgbè Kayirzà mamɛ e hwèlì è ya ama Kayirzà, e ŋgbè hvɛ Lohwɛ̀ mamɛ e hwèlì è ya ama Lohwɛ̀.” Nà òma hwà mà hweye nanù, hwà mà tàmà.

Mijòhwèlì lì hvòmɛ̀nɛ̀ hwe hvùmùwèlì

¹⁸ Lòŋgò la Irzàdùrzì hwà mà jèeyà Yerzù. Hwa mà lòkɛ ema ò rza enje tɔ̀ Hwehvùmuwelì. Rzìi hwa òhwa nanù ema,

¹⁹ “Ìi Mòòkòlèlì, e mbenda ya ama Mòrzè è òhwà nanù ema, ‘Munyanà a hwàayi tɛ mòlanà rzìi òŋgò mùnyanà a ŋwa ema mɔ̀ nà òŋgò mòlanà hwa rza nyayi ŋmanà ŋmanyàŋgò wà eni hwa luuŋga lɔ̀kɔ a hwɛnì wònjà ò lì hwaa mòŋgò mòkurze ò lì ŋyayeya ŋmanyàŋgò wa eni hwàna.’

²⁰ O nàŋgɛ rzɔ, ò ma hwɛ lìrzamba la hwàna hwa wunyanà, hwa nyàŋgò hvɔ̀kɔ. È ŋmanà wa wòrzò à mà ŋwa, ndi mɔ̀ nà e jòjìyɛ̀ yà eni hwa rzi ŋya tɔ̀ ŋmanà.

²¹ È mɔ̀ ema à ma ùkirzɛ̀ hwàhwàkɛ̀ rzìi a rzàŋgòwa mòŋgò mòkurze. Mɔ̀ hvɛ à mà ŋwa e rzi hwɛ lì ŋya tɔ̀ ŋmanà, nanù ndi e ma hwɛ hvɛ na e ŋmanà wa mùnyanà, ema à mà ùkirzɛ̀ hwàyàwò.

²² Nàtɛ̀ɛ na lìŋgi lìrzamba la wùnyànà hwa hwàa mòŋgò mòkurze hwa ŋwa e rzi hwɛ lì ŋya tɔ̀ ŋmanà na mɔ̀. O lìrzukù òŋgò mòlanà mɔ̀ hvɛ a ŋwa.

²³ Nàŋgɛ rzɔ, ò Hwehvùmuwelì òŋgò mòlanà a ò hwɛ ndi è mòlanà wa ama njɛnɛ e? Èhwanja lìrzamba la arzɛ lì mà mò hwaa.”

²⁴ Yerzù rzìi a òhwa nanù ema, “È tòni, èhwanja è rza rzɔ̀ŋgìtɛ̀nɛ̀ mamɛ eyà ya Lohwà e òhwa, tɔ̀ e ŋginyà ya ama Lohwɛ̀.

²⁵ Hwàŋga ema hwà mà ŋwɛɛ, hwa hvùmù tɛ ò rza ò hwɛ tɔ̀ mahwà. Hwa ò hwɛ ndi nàa i aŋgèlì ja ŋmanyù ya lohwà.

²⁶ Nàŋgɛ rzɔ lì hvòmɛ̀nɛ̀ Hwehvùmuwelì hwe kpelì. È rzi laŋgi ò kààtì yà ama Mòrzè ehvarzù ema è òhwa lì hvòmɛ̀nɛ̀ è ŋmanà gbèe ema è mà rzèeyà e? Àŋga è tìlàhwì nanù ema nà òmà Lohwɛ̀ à mà hwɛ lì òhwìrzɛ̀nɛ̀ Mòrzè lì hvòmɛ̀nɛ̀ Abràhamù, Irzàkì, nà Jèkɔ̀bu ema hwa mà ŋwɛ̀ɛ̀, Lohwɛ̀ à mà òhwa nanù ema, ‘Imba ndi nà hwèlì Lòohwà là ama Abràhamù, Irzàkì nà Jèkɔ̀bù.’

²⁷ Èŋge ŋgàna è uŋmɛ̀lɛ̀ nanù ema hwa hwèlì lòŋgɛ. Lohwɛ̀ à hwèlì ndi Lohwà là hwatò ema hwa hwèlì lòŋgɛ rzeketɛ Lohwà la e wɔ̀ ema hwà mà ŋwɛɛ. Inyɔ e tòni rzayì-rzayì.”

Imbenda ja ahwakɛ ema ì imbami lì aka

²⁸ Mòòkòlèlì mɔ̀kɔ wa mbenda à mà hwɛ aŋga, rzìi a hwèya mamɛ hwa mà hwɛ lì òhwa. Nà òma à mà ayèmbɛ nanù ema Yerzù a mà ŋgba Irzàdùrzì ja alàhwɛ̀ ja gbamù rzìi a ijòwa Yerzù nanù ema, “Ìi Mòòkòlèlì ò imbenda ja arzɛ ima yɔ e hwèlì wòlìtò lì aka enɛyi e?”

²⁹ Yerzù rzìi a mò alàhwɛ̀ nanù ema, “È mbenda ema e òhvi wòlìtò lì aka ja arzɛ e hwèlì ndi è mbenda ema e òhwa nanù ema, ‘Ìi hwatò hwa Irzàyɛ̀lì e òkànèyà: Rzàŋgò Lohwà la anyu mɔ̀ mɛnɛ ndi à hwèlì e Rzàŋgò.

³⁰ Lìŋgàna e Rzàŋgò Lòohwà la aŋgɔ̀, na ŋmèma mò aŋgɔ̀ mò arzɛ nà èlìŋgɛ̀ ya aŋgɔ̀ ya arzɛ, na màlùtèyà, ò mò lìŋgàne nà e ŋginyà ya aŋgɔ̀ ya arzɛ.’

³¹ È yɔ ema e ùkirzɛ̀ ihwàkɛ ò wòlìtò e hwèlì ndi e yɔ ema e òhwa nanù ema, ‘Lìŋgàna ŋmànyàŋgò wa aŋgɔ̀ nà òmà ò alìŋgànɛ ò wa hwìti.’ O rzà ènje èhvɛhvɛ mbenda ema è òhvi wòlìtò lì aka ini jà ahwàkɛ.”

³² Rzìi òŋgò Mòòkòlèlì wa mbenda a òhweyà Yerzù nanù ema, “Mòòkòlèlì ò hvòmɛ̀nɛ̀yi. Ò òhwi ndi è jɔ̀kɛ̀ nanù ema Lohwà lɔ̀kɔ̀ ndi lì hwèlì, ò rzà enje lìhvɛhvɛ Lohwà lì aka tɛ mɔ̀ mɛnɛ.

³³ Mòtò a hwɛnì lì mò lìŋgàna na ŋmèma mò eni mò arzɛ, na màlùtèyà ma eni ma arzɛ, na e ŋginyà ya eni ya arzɛ na lì lìŋgàna hvɛ ŋmànyàŋgò wà aŋgɔ̀ nà òmà ò alìŋgànɛ ò wa hwìti. Ènè e hwèlì wòlìtò lì aka ò lì ŋgba Lohwɛ̀ màhwèyà ema mà rzɛlɛhwɛyi nà mahvɛhvɛ màhwèyà.”

³⁴ Nà òmà Yerzù à ma ɛnɛ nanù ema òŋgò Mòòkòlèlì wa mbenda a alàhwɛ̀ nà lìhwiyè, rzìi a mò òhweyà nanù ema, “Ò rza rzɔ̀lɛnɛ nà Lìkànèyà là ama Lohwɛ̀.” O mburzà nanù tɔ̀ mòtò a rzi tanɛ lì ijòwa hvɛ Yerzù tɔ̀ miijòwelì.

Mìijowelì lì hvòmɛ̀nɛ̀ è Mɔ̀ ema à Ɔ̀kirzɛ̀hwɛ̀yi

³⁵ Yerzù à mà hwɛ lì òkòlɛ̀ ò Ndawò yà Lohwà. Rzìi à ijòwa nanù ema, “Mamɛ ndèŋgàtɛ̀ hwà-òkòlèlì hwa mbenda hwa òhwa hwà ama, e Mɔ̀ ema à Ɔ̀kirzɛ̀hwɛ̀yi a uwɛ̀lɛ̀lɛ̀yi ndi ò lìwende la ama Dàhwitì e?

³⁶ Dàhwitì mɔ̀ ŋmìti, Èlìŋgɛ̀ yà Wòtani e mà mò kpèeyà rzìi a òhwa nanù ema, ‘È Rzàŋgò Lohwɛ̀ à mà òhweyà e Rzàŋgò wa ami ama, Lìyà ò lìya la ami la mòme, natɛ̀ɛ na e hvònda ema na gbeyà ò laala hwakɔ̀èlì hwa aŋgɔ̀ na mataŋgà mà aŋgɔ̀.’

³⁷ È hwèlì tɛ ema Dàhwitì mɔ̀ ŋmìti à mà lòma lì mò hwɛlɛ Rzàŋgò, nɛ rzɔ è Mɔ̀ ema à Ɔ̀kirzɛ̀hwɛ̀yi a tànɛyi lì hwɛ e ŋmanà hwa eni e?” È ŋgìndì è ma hwɛ lì òkànèyà Yerzù nà mɔ̀nyɛ̀ŋgì mò rzayì-rzayì.

Yerzù a gbèelì mayòwa lì hvòmɛ̀nɛ̀ hwà-òkòlèlì hwa mbenda

³⁸ Nà òmà Yerzù à mà hwɛ lì òkòlɛ̀ rzìi a òhwa nanù ema, “È àŋgòhweyà hwà-òkòlèlì hwa mbenda. Hwa lìŋgàni lì ɛ̀ndɛ ò èki ya arzɛ na meŋgòmbè me wahwi. Hwa lìŋgàni ema hwatò hwa hwà kɔmè nà èluhwe nàa ò hwèki hwe hwelùwa.

³⁹ Hwa lìŋgàni hvɛ ò lì lìyà ò kònda ja hwèluhwe ò ndawò ja màkanɛ̀ ja wònyà Yudà, hwa lìŋgàni hvɛ hwèki hwe hwèluhwe ò hwèwòka hwe ndèma.

⁴⁰ Hwa lùùmbana hvɛ mekurze erzàŋgò ya awu. Hwa lìŋgàni hvɛ lì ɔ̀jɔ̀nɔ̀ hwatò na màkanɛ̀ ma wahwi. Wɔ̀ hwa lùwa kɔ̀kìrzɛ̀ ya màwɔ̀ŋgɔ̀.”

Jàhwèyà ja mòkurze

⁴¹ Yerzù à mà lìyà ò tòŋgòŋgò ya iwòŋgò ema hwà mà ika màhwèyà ò Ndawò yà Lohwà. A ma hwɛ lì ɔ̀ŋgɔ nà òmà hwatò hwa mà hwɛ lì ika ìkahvà ja awu ò tenì ya iŋgi iwòŋgò. Rzayì-rzayì ja hwèwàŋgì wɔ̀ hvɛ hwà mà ika rzayì-rzayì ja kahvà,

⁴² ndi ò ma jà mòlìrzà mò mòkurze mò mòlanà à mà aŋgba kahvà ihwàkɛ rzàlì ja hwɛ̀ɛ̀kɛ. Iŋgi kahvà ì mà hwɛ ndi nàa lìyòmɛ̀ la hvilaŋgi.

⁴³ Yerzù rzìi a hvɛ̀tɛlɛ hwà-òkòwèlì hwa eni ema hwa je hwa mò kòmbɛ̀nɛ̀, rzìi a hwa òhweyà nanù ema, “Nà e òhweyà è jɔ̀kɛ̀ ema mònò mòlìrzà mò mòkurze mò mòlanà, mò ikayi lì aka hwèwàŋgì hwe arzɛ.

⁴⁴ Wɔ̀ hwa mà ika ndi ò hwèhvetɛ̀lɛ hwe awu hwe rzayì-rzayì, ndi mɔ̀ à ŋgbelì ndi ò lìtake la eni mamɛ ya arzɛ a òhvi ò lòŋgɛ.”