Lukàrzɛ̀ 5 - Mokpwe: Bakwery (New Testament)

Lì hwɛlɛ la Hwà-òkòwèlì hwa wòrzò

¹ Wùnyà wɔ̀kɔ, nà òmà Yerzù a mà tɛ̀mɛ̀ ò mòkòkò mò yùlu ya Gɛ̀narzalɛ̀tì, ŋgìndì ndɛnɛ è mà mò tòŋgà ò lì òkànèyà eyà ya ama Lohwɛ̀.

² À mà ɛ̀nɛ hwèhwɛ̀ɛ̀lì hwehwàkɛ hwe mɔlɔ̀ ema hwe ma rzɛ̀ɛhwɛ̀ ò rzàawà yà èŋge yùlù. Manù mɔlɔ̀, ma mà lìyahwa ndi nà hwatò hwa mèrzòmbò, ema hwà mà hwɛ lì rzòrza ì mbunja ja awu.

³ À mà kpèeyà ò tenì yà wɔ̀lɔ̀ wò ama Rzìmɔ̀nì, rzìi à lìya ò rze, rzìi à òhweyà Rzìmɔ̀nì ema, a wò rzɛkɛlɛ teŋyi ò tenì yà yùlù. Àŋga ndi à mà wòteya lì òkòlɛ̀ è ŋgìndì.

⁴ Nà òmà Yerzù a mà kulɛ̀ lì òhwà, rzìi a òhweyà Rzìmɔ̀nì nanù ema, “À lùkè wɔ̀ɔlɔ̀ ɔ̀nɛyi tenì yà màlìhwa, èki ema e rzɔ̀ŋgɔ̀wu, e kòmè ì mbunja ja anyu.”

⁵ Rzìmɔ̀nì à mà tìmbirzɛlɛlɛ nanù ema, “Rzàŋgò kòkò, ì kòmeyayi ì mbunja ja arzu wuwu wò arzɛ, ndi ì rza lɛ̀mbì tɔ̀ yòmà! Ndi nà gbeyà na òmà ò òhwi.”

⁶ Hwa mà gbèye nanù, hwa mà lɛ̀mbɛ nyàmà rzayì-rzayì, ema ì mà wòteya lì nyàawàna ì mbunja ja awu.

⁷ Àŋga ndi hwà à tɛ nà lì hvɛ̀tɛlɛ ì mbunda jà awu, ema hwà mà hwɛ wònɛ̀yi wɔ̀lɔ̀, nanù ema hwa jè hwa wò òŋgòwànè. Nà òmà hwa mà jèe, rzìi hwa òndìrzɛ̀ mɔɔlɔ̀ ma ahwàkɛ nà nyàmà, natɛ̀ɛ maŋga mɔɔlɔ̀ ma wòteya lì indà.

⁸ Nà òmà Rzìmɔ̀nì Pètrò a mà ɛ̀nɛ mamɛ e ma gbèyɛnɛ, a rzùmeya Yerzù màwɔ̀ŋgɔ̀ŋgɔ̀, rzìi a mò òhweyà nanù ema, “Yerzù kòkò, ò nò ànjiiya anù, nà rza kanɛ̀ lì ò kòmbɛ̀nɛ̀, nà hwèlì ndi mòtò wa wòhwe!”

⁹ Ènè èlɛ̀mbelì ya nyàmà, e mà tàmirzɛ Rzìmɔ̀nì Pètrò nà hwanɛ̀yi hwatò hwa mèrzòmbò hwa arzɛ.

¹⁰ Hwaana hwa ama Rzɛ̀bɛ̀dì, ema hwa hwɛ̀lɛ̀hwɛ̀ Jèmìrzì nà Yòwanìrzɛ̀ ema wɔ̀ hvɛ hwà mà hwɛ lì lɛ̀mbɛ inyàmà wɔ̀ hvɛ hwa mà jeja. Ɔ̀ndi Yerzù a òhweyà Rzìmɔ̀nì Pètrò nànù ema, “Ò rzi òka wɔ̀ŋgɔ̀! Lìwòteya nàŋgɛ ò rzèkeya mèèmà me hwatò ò lì nò òŋgama.”

¹¹ Nà òmà hwa mà rzɛ mɔɔlɔ̀ ma awu ò rzaàwà, hwa mà rzɔnjɛ̀lɛ̀ hweemà hwe àrzɛ, rzìi hwa wòteya lì òŋgama Yerzù.

Yerzù à mà wɔ̀wìrzɛ̀ mòtò wa mɔ̀lɔ̀ŋgɔ

¹² Wùnyà wɔ̀kɔ, Yerzù a mà hwɛ mbòwà hvɔ̀kɔ. Rzìi à ɛnɛ mòtò mɔ̀kɔ ema à mà òhva e nyàmbɛ yà mɔ̀lɔ̀ŋgɔ, na òmà òŋgò mòtò à mà ɛnɛ Yerzù, rzìi a anyɔ̀kɛ̀lɛ ò matàŋgà mà ama Yerzù, a mò atɛ̀kɛ nanù ema, “Ìi Rzàŋgò, ò emelì tɛ, ò nò rzaŋgirzɛ.”

¹³ Yerzù à mà enyòwa lìya la eni, rzìi a lì hwàkɛ òŋgò mòtò ò nyò ya eni, rzìi a òhwa nanù ema, “Nà lìŋgàni, rzàŋga!” O wòtɛmɛ̀tɛmɛ̀ èŋge nyàmbɛ e nyɔ̀ŋgɔ̀.

¹⁴ Yerzù rzìi à mò kànèyà nanù ema, “O rzìi keka lì òhweyà tɔ̀ mòtò tɔ̀ mɔ̀kɔ eyà ema e gbèyɛ̀nɛ̀. Ndi ò ɛ̀ndɛ wa awuŋmɛ̀lɛ̀ ò wa hwitì ò ma e Pìlìrzì a ò inje. Rzìi ò ŋgbe hvɛ jàhwèyà nàa e mbenda ya ama Mòrzè e òhwa ò lì uŋmɛ̀lɛ̀ nanù ema ò ma rzàŋga.”

¹⁵ Ndi tɔ̀ nanù, ŋmɛ̀ndì mò ma Yerzù mò mà eyalɛnɛ èki ya arzɛ. O èŋgànɛ̀lɛ̀ ŋgìndì ja hwatò ì mà jà ò lì mò òkànèyà, nà lì wɔ̀wìrzɛ̀hwɛ ò mèrziyò me awu.

¹⁶ Ndi e hvònda e ma ùke, Yerzù à mà ɛ̀ndɛ ò tòŋgòŋgò ya èki ya ŋmɛ̀ɛ ò lì kanɛ̀.

Yerzù à mà wɔ̀wìrzɛ̀ è mòtò wà njɛmbu

¹⁷ Wùnyà wɔ̀kɔ, Yerzù à mà hwɛ lì òkòlɛ̀ hwatò. Lòŋgò la ì Hvàlìrzàyì, nà hwà-òkòlèlì hwà mbenda wɔ̀ hvɛ hwa mà ùkeya. Wɔ̀ hwa arzɛ hwà mà uhwɛlɛlɛ ndi ò màmbòwà ma àrzɛ ma hwèrzòòkà hwe Galìlì nà Jùdeyà. Nà ò tenì yà è mbòwà yà Jèrurzalɛ̀mù. È ŋginyà ya àma Lohwɛ̀ è mà mò rzìhweyà ò lì wɔ̀wìrzɛ̀ hwà-òkèlì.

¹⁸ Hwa mà jànà mòtò hwà njɛmbu ema hwa mà hwànɛ ò lìkɔ̀kɔ̀. Hwa mà kèka lì àyinɛ̀lɛ̀ ò lì kpèeyà ò ndawò, ò lì mò nàŋgɛlɛ ò wòrzò wò ma Yerzù.

¹⁹ Hwa rzi lùwè èhvòlò ò lì kpèeyà ò ndawò, èhwanja è mòtò à mà akɛ̀lɛ̀nɛ̀. Àŋga ndi hwa à mò àgbàna ò lìkaàndò la èŋge ndawò. Hwa mà kɔrzɔ èki ò lìŋgi lìkaàndò, rzìi hwa mò rzìhwirzɛnɛ nà lìŋgi lìkɔ̀kɔ̀ ò tenì yà èŋge ŋgìndì ò wòrzò wò ama Yerzù

²⁰ Nà òmà Yerzù a mà ɛ̀nɛ lìlòkɛ̀ là hwaŋga hwatò, rzìi a òhweyà òŋgò mòtò wà njɛmbu nanù ema, “Ŋmàyi e, nà ò làkìrzɛ̀ wòhwe wa aŋgɔ̀.”

²¹ Hwà-òkòlèlì hwa mbenda nà Ihvàlìrzàyì rzìi hwa wòteyà lì arzàrzòhwɛ nanù ema, “Njɛnɛ ònò ema a hwɛ̀nyɛ̀ Lohwɛ̀ e? Njɛnɛ à tànɛyi lì làkìrzɛ̀ wòhwe lì akà Lohwɛ̀ e?”

²² Yerzù à mà hwiya màlùtèyà ma awu. Àŋga ndi à hwa ijòwa nanù ema, “Mamɛ ndeŋgàtɛ è lùteyà hwenè hweyà ò mèèmà me anyu e?

²³ Ì ma yɔ̀ e wɔ̀hwèlì, ò lì òhwà nanù ema, ‘Nà ò làkirzɛ wòhwe wò aŋgɔ̀,’ ŋgà ò lì òhwà nanù ema, ‘Tɛ̀mɛ̀nɛ̀ ò wòteyà lì ɛ̀ndɛ̀ e?’

²⁴ Nà e uŋmɛ̀lɛ̀ nanù ema è Ŋmanà wà è Mòtò wà Hwènàmà a hweni wònjà ya lì làkìrzɛ̀ wòhwe ò rze.” Yerzù rzìi a òhweyà òŋgò mòtò hwa e nyàmbɛ yà njɛmbu nanù ema, “Nà ò òhwèlì nanù ema, tɛ̀mɛ̀ ò wòwè lìkɔ̀kɔ̀ lì àŋgɔ, ò ɛ̀ndɛ̀ ò mààndà ma aŋgɔ.”

²⁵ Ò wòtɛmɛ̀tɛmɛ̀, òŋgò mòtò à mà tɛ̀mɛ̀nɛ̀ ò màrzò mà hwatò hwa arzɛ, rzìi à wòwà lìkɔ̀kɔ̀ là eni rzìi à tìmba ò ndawò yà èni, rzìi à eka Lohwɛ̀.

²⁶ Tɔ̀ ima mòtò à ma hwɛ aŋga à mà ònda nà hwètàmìrzèlì. Ò èŋgànɛ̀lɛ̀ hwa mà èka Lohwɛ̀ nà lì òndà nà wɔ̀ŋgɔ̀ rzìi hwà òhwa nanù ema, “Jà ɛnì hweyà hwe mànyakà yàwònò.”

Yerzù à mà hwɛlɛ Lɛ̀hvì

²⁷ O mburzà hvònda, Yerzù à mà anjiya ò èŋge èki. O hwɛ̀ɛ̀ndèlì hwe eni a ɛnɛ̀ mɔ̀kɔ̀tèlì mɔ̀kɔ wà è njàŋge yà lìkànèyà à ma hwɛ̀lɛ̀hwɛ̀ Lɛ̀hvì. À mà lìya ndi ò tenì ya èŋge ndawò ema a mà hwɛ lì rzàŋgeya è njàŋge yà lìkànèyà. Yerzù rzìi à mò òhweyà nanù ema, “O nò òŋgame.”

²⁸ Lɛ̀hvì a tɛ̀mɛ̀ ò ŋmanyu, a rzɔnjɛ̀lɛ̀ hwèèmà hwe àrzɛ, rzìi a òŋgama Yerzù.

²⁹ Lɛ̀hvì rzìi a rzèkeyà Yerzù ndèma ndɛnɛ̀ ò ndawò yà èni. Rzayì-rzayì ja hwàkɔ̀tèlì hwa è njàŋge yà lìkànèyà nà hwahvɛhvɛ hwatò hwa mà ùkeya aŋga.

³⁰ Ìhvalìrzàyì nà hwà-òkòlèlì hwà awu hwa mbenda, hwa a tɔ̀kirzɛnɛ, rzi hwa wòteya lì ijòwa hwà-òkòwèlì hwà mà Yerzù nanù ema, “Mamɛ ndeŋgàtɛ inyɔ è làa, nà lì nyɔ nà hwàkɔ̀tèlì hwa è njàŋge yà lìkànèyà nà hwahvɛhvɛ hwatò hwa wòhwe e?”

³¹ Yerzù rzìi a hwa alàhwɛ̀nɛ na ŋmàna nanù ema, “Hwàŋga hwatò ema hwa lìyayi gbamù, hwa rzà àrza ŋgàŋgà. Ndi è wɔ̀ ema hwa ɔ̀kìrzɛ̀ɛ ndi hwa tukànèyà e ŋgàŋgà.

³² Nà rza jɛ̀lɛ̀lɛ̀ ndi lì hwɛlɛ hwaŋga hwatò ema hwa tɛmi ehve-ehve na Lohwɛ̀, ndi nà jèlì ndi ò lì hwɛlɛ è wɔ̀ hwa wòhwe, ò lì tìkòwà.”

Mìijòwelì lì hvòmɛ̀nɛ̀ mòkìyà njàwò ò màkanɛ̀

³³ Ihvàlìrzàyì ì mà òhwàna Yerzù nanù ema, “Hwà-òkòwèlì hwà mà Yòwanìrzɛ̀ wɔ̀ hwa lìyà mòkìyà njàwò ò màkanɛ̀ hvònda tɛ. Hwà-òkòwèlì hwa Hvàlìrzàyì wɔ̀ hvɛ hwa gbeyà nanù mɛnɛ. Ndi mamɛ ndeŋgàtɛ è hwa aŋgɔ̀ wɔ̀ hwa hwèlì ndi ò lì làa la mòlelì, nà ò lì nyɔ la mimba e?”

³⁴ Yerzù rzìi a hwa alàhwɛ̀ nanù ema, “Nɛ hwatò ema hwa yòhwɛ̀hwɛ̀ ò ndèma yà lìhwa hwà tànɛyi lì lìya mòkìyà njàwò, wɔ̀ hwa hwèlì tɛ na e mòhwɛnɛ wa mɔ̀ɔ̀mbì e?

³⁵ Jàyɛ̀ hwa rzà tànɛ̀yi! Ndi o ò ja wùnyà ema hwa ò hwa wòwàna e mòhwɛnɛ wa mɔ̀ɔ̀mbì. O wòŋgò wùnyà ndi hwa ò lìya e mòkìyà njàwò ò màkanɛ̀.”

³⁶ Yerzù à mà hwa kpɛ̀ɛ̀yà hvɛ mònò ŋmàna nanù ema, “Mòtò à hwɛnì tɛ lì rzèeyà lìwɔtì, a rza kɛ èhvàhve ya lìhwàtù ò lìŋgi lìwɔtì lì hvènya ò lì rzèeyàneyà è mbòlòwa yà lìwɔtì. À gbèyi tɛ nanù, ò ma à mà nyààwà lìwɔtì lì hvènya, èhwanja èŋge èhvàhve ya lìŋgi lìwɔtì lì hvènya lì rza ò kìta na e mbòlòwa yà lìŋgi lìwɔtì.

³⁷ Nànù mɛnɛ hvɛ ndi e hwèlì ema mòtò a rza tànɛ̀yi lì wòwà mòkàkò mò mimba rzìi à mà rzɔ̀lɛ̀ ò tenì yà èlùnì ja kòhwà. Òŋgò mòtò à gbèyi tɛ nanù, mòŋgò mòkàkò mò hvùhvà, natɛ̀ɛ è kòhwà e kandeyà, ò ma maŋga mimbà ma mà rzòweyà, ò ma è kòhwà yɔ hvɛ e ma hvaŋgeyà.

³⁸ È hwɛ ndi ema mòkàkò mò mimba mò rzɔ̀lɛ̀hwɛ̀ ndi ò tenì ya kòhwà hvènya.

³⁹ Hwatò ema hwa nyɔ mìimbà hwa rza tànɛyi lì lòma lì nyɔ mbòlòwa yà mimbà, rzìi hwa wòteyà lì nyò mòkàkò mò mimba. Wɔ̀ hwa òhwa ndi nanù ema, ‘È mbòlòwa yà mìimbà mɔ̀ ndi ma lɔ̀wu.’”