Lukàrzɛ̀ 4 - Mokpwe: Bakwery (New Testament)

Li Kèkìrzɛ̀ lì ama Yerzù

¹ Yerzù à mà uhwɛlɛlɛ ò mòrzò mò Jɔdànì, à mà ònda nà Èlìŋgɛ̀ yà Wòtani, rzìi e mò lìyɛlɛ ò lì ɛ̀ndɛ ò mòrzanjɛ̀.

² Aŋga ndi Mòkarzɛ̀ a mà mò kèkirzɛ mènì menì me mèenyà. O mèŋge mèenyà me àrzɛ, à rzì le tɔ̀ yòmà ò èŋgànɛ̀lɛ̀ è njàwò è mà mò lɛ̀mbɛ.

³ Mòkarzɛ̀ rzìi a mò òhweyà nanù ema, “È hwèlì tɛ ema ò wa ndi ò hwèlì è ŋmanà wà ama Lohwɛ̀, ò kaneyà lìnì lìŋyayì lì tìmbè èhvòòtò.”

⁴ Ndi Yerzù à mà mò alàhwɛ̀ nanù ema, “È tìlàhwì ò e kààtì ya Lohwà nanù ema, ‘Rzèketɛ èhvòòtò mɛnɛ ndi mòtò a làa ò lì hwɛ lòŋgɛ.’”

⁵ Mòkarzɛ̀ rzìi a mò tìmbà, a mò agbana ò èkì ema è kàrzami lì aka, rzìi à mò uŋmɛ̀lɛ̀ ò èhvòhvò ya lìrzɔ̀ makànèyà ma è rze ya àrzɛ.

⁶ Rzìi à mò òhweyà nanù ema, “Nà ò ŋgbà ìŋginyà nà hwèluhwe hwe awu hwe àrzɛ, èhwanja hwe nò ŋgbàahwì, nà tànɛyì lì hwe ŋgbà tɔ̀ njɛnɛ ema na àrza lì ŋgbà.

⁷ O èŋgànɛ̀lɛ̀ ò nò ŋgbèlì tɛ èluhwe nà ò ŋgbà è hweyɔ hwe àrzɛ.”

⁸ Yerzù à mà mò alàhwɛ̀ nanù ema, “È tìlahwì ò Kaàti ya Lohwà nanù ema, kànɛ ndi Rzàŋgò Lòohwà là aŋgɔ̀, nà lì mò gbèeyà mɔ̀ ŋmìti mɛnɛ.”

⁹ Mòkarzɛ̀ rzìi a mò tìmbà a mò ɛ̀ndɛnɛ ò mbòwà ya Jèrurzalɛ̀mù. Rzìi à mò tɛ̀mɛ̀nɛ ò ŋmanyu ya e njòŋgò ya e Ndawò yà Lohwà. Rzìi à mò òhweyà nanù ema, “Ò hwèlì tɛ è Ŋmanà wà ama Lohwɛ̀, hvanja anù ò undè ò rze.

¹⁰ È tìlahwì ò Kààtì ya Lohwà nanù ema, ‘Lohwɛ̀ à ò kànèyà i aŋgèlì jà eni ò lì ò nyàŋgà,’

¹¹ ‘Hwa ò hwanɛ̀ ò ŋmanyu, aŋga nanù ò rza àyɛ̀rzɛ̀ lìtàŋgà lì aŋgɔ̀ ò lìŋyàyi.’”

¹² Ndi Yerzù à mò àlàhwɛ̀ nanù ema, “È tìlahwì ò Kààtì ya Lohwà nanù ema, ‘Ò rza kèkìrzɛ̀ Rzàŋgò Lòohwà là aŋgɔ̀.’”

¹³ Nà òmà Mòkarzɛ̀ à mà kulɛ lì kèkirzɛ Yerzù manù màkèkìrzɛ̀nɛ mà arzɛ, rzìi à mò hwɛmɛ ò lì àrza è hvɛhvɛ hvònda.

Yerzù à mà rzɔ̀rzɔwɔ ò Nàrzàrɛ̀tì

¹⁴ Yerzù à mà tìmba ò Galìlì. Èlìŋgɛ̀ yà Wòtani ema hwɛ nà mɔ̀, rzìi ŋmɛ̀ndì mò eni mò eyàlɛ̀nɛ̀ ò erzòòkà yà arzɛ.

¹⁵ A mà òkòlɛ̀ hwatò ò màndawò mà awu mà màkanɛ̀, hwatò hwa arzɛ hwa mà mò èka.

¹⁶ Yerzù à mà ɛ̀ndɛ ò mbòwà yà èni yà Nàrzàrɛ̀tì e ma a mà kòkeya, rzìi a kpèeyà ò ndawò yà màkanɛ̀ ò Wùnyà wò lì Arzìyòlɛ̀ nà òma a ma nyàmɛ̀lɛ ò lì gbeyà. Rzìi à tɛ̀mɛ̀, ò lì laŋgà e mbɔrzi.

¹⁷ À ma tɛtirzɛhwɛ yòwò ya mòtìlà mò ama è Mòòhwèlì wà Èlìŋgɛ̀ Àyìrzayà. A mà e wuluwe, rzìi a ɛnɛ èki ema e tìlahwi nanù ema,

¹⁸ “Èlìŋgɛ̀ yà ama è Rzàŋgò è hwèlì nà ìmba, èhwanja Lohwɛ̀ à nò hvɔ̀rzì, ò lì òhweyà mèlìrza me hwatò, Ŋmɛ̀ndì mò Gbamù. À nò òmì nà ŋmɛ̀ndì, ema hwatò ema hwa kakahwi ì ŋgɔ̀kɔ̀hwi hwa ò ulɛhwɛ ò iŋgi ŋgɔ̀kɔ̀hwi, ndèŋgàna hwaŋga hwatò ema hwa hwèlì ndima hwa ò ɛnɛ hwaŋga hwatò hvɛ ema hwa tàkàà ò màa mà hwahvɛhvɛ hwatò, imba nà hwa ulɛ̀ ò mèŋge mètàkà.

¹⁹ Ndèŋgà ò lì òhwa ema, e hvònda e ma uka ema, Lohwɛ̀ a uŋmɛ̀lɛ̀ hwatò ììlì ja eni.”

²⁰ Nà òma Yerzù a ma kulɛ lì laŋga, rzìi a lìŋgɛ̀lɛ̀ èŋge yòwò ya mòtìlà, a e timbirzɛlɛlɛ è Mòkànèlì wà è ndawò yà màkanɛ̀, rzìi a lìya ò rze. Hwatò hwa arzɛ ema hwà mà hwɛ aŋga, hwa mà mò rzòkɛ mìirzɔ̀ hvɛ̀nyɛ-hvɛ̀nyɛ.

²¹ Rzìi à wòteya lì hwa òhweyà nanù ema, “Ène mbɔrzi ema e hweyi nanù, e ma òndìrzɛ̀hwɛ yàwònò.”

²² Hwa arzɛ hwa mà mò eka, ndèŋgà hwa mà tàmeya hweyà hwe gbamù ema hwe ma wurza ò wàna yà èni. Rzìi hwa à ijòwà nanù ema, “Rzèke è ŋmanà wà ama Jòrzɛ̀hvù ònò e?”

²³ Yerzù à mà hwa òhweyà nanù ema, “O Jɔ̀kɛ̀ è ò nò kpɛ̀ɛya mònò ŋmàna, ‘Ŋgàŋgà ò à wɔ̀wìrzɛ̀ ò wà hwìti.’ Ndèŋgàna e ò no òhweyà hvɛ ema, hweyà ema e hweyi ema nà mà gbeyà ò mbòwà yà Kàpɛ̀nàwɔ̀mì ema nà mà hwɛ, na hwe gbeye anù mbòwà ya ami.”

²⁴ Rzìi à òhwa nanù ema, “Nà è òhweyà è jɔ̀kɛ̀ nanù ema, Mòòhwèlì wà Èlìŋgɛ̀ à rza ŋgbààhwà èluhwe ò mbòwà yà èni.

²⁵ È hwiye nanù ema, è hvònda ya àma Èlàyijà, ò mà hwɛ mekurze rzayì-rzayì ò Irzàyɛ̀lì. O èŋge hvònda ò rzi yɔ mbuwà meya meyawò nà èhvàrzù. O èŋgànɛ̀lɛ̀ ò mà hwɛ njàwò ndɛnɛ̀ ò èkòmè ya Irzàyɛ̀lì ya àrzɛ.

²⁶ Ndi Lohwɛ̀ à rzi hwa òmeyà Èlàyijà. Ndi a mà mò òma ndi ò ma mòkurze mɔ̀kɔ ema mò ma hwɛ ò èkòmè ya Rzidònì ò mbòwà ya Rzàlɛhvati.

²⁷ Ndèŋgàna ò mà hwɛ hvɛ rzayì-rzayì ja hwatò hwa mɛ̀lɔ̀ŋgɔ̀ ò Irzàyɛ̀lì, ò hvònda yà ma Èlìyèrzì è Mòòhwèlì wà Èlìŋgɛ̀, ndi tɔ̀ mɔ̀kɔ wà awu à rzi wɔ̀wìrzɛ̀hwɛ̀, lì akà tɛ Nàmànì, mòtò ema à mà uhwɛlɛlɛ ò èkòmè ya Rzìlèyini.”

²⁸ Hwatò hwa arzɛ ema hwà mà hwɛ ò ndawò yà màkanɛ̀, hwa mà hweye nanù, hwa mà ònda nà hwètàtò.

²⁹ Hwa mà tɛ̀mɛ̀ rzìi hwa à mò tindɛ̀lɛ̀, ò lì mò hvayà ò mbòwà yà àwu. Rzìi hwa mò àgbana ò ŋgòndoŋgòndò yà mòòlì kanatɛ aŋga ndi hwà mà òŋge, ema hwa mò hvìmbe ò rze yà èŋge mbèmbè yà mòŋgò mòòlì.

³⁰ Ndi Yerzù à mà akeyà ò ìtììtènì ja awu, rzì a ɛ̀ndɛ è ya eni.

Yerzù à mà hvaya èlìŋgɛ̀ ya Wòhwe

³¹ Yerzù à mà ɛ̀ndɛ ò Kàpɛ̀nàwɔ̀mì, ò erzòòkà yà Galìlì, rzìi a wòteyà lì òkòlɛ̀ hwatò ò Wùnyà wò lì Arzìyòlɛ̀.

³² Wɔ̀ hwa arzɛ hwa mà tàmeyà hwèyòkòlèlì hwe eni, èhwanja ŋmɛ̀ndì mò hwèyòkòlèlì hwe eni mò mà òhva màyìmbì.

³³ O tenì yà èŋge ndawò yà màkanɛ̀ ema à mà hwɛ lì òkòlɛ̀, ò mà hwɛ mòtò ema èlìŋgɛ̀ ya wòhwe ema hwɛ lì kànèyà. Òŋgò mòtò à mà tɛ̀ɛ̀ nà lìlò lì Karzami nanù ema,

³⁴ “Jìyeyi! Ìi Yerzù wà Nàrzàrɛ̀tì, mamɛ ò jò àrzàna e? Ò jelì ndi lì jò hvàŋga e? Nà hwi njɛnɛ ò hwèlì, ò hwèlì ndi è mɔ̀ ema Lohwɛ̀ a òmi, ema à Tanì.”

³⁵ Yerzù à mà kànèyà èŋge èlìŋgɛ̀ ya wòhwe nanù ema, “Andama! O mò wurze ò nyò.” Rzìi èŋge èlìŋgɛ̀ ya wòhwe e kpìrzɛ̀ òŋgò mòtò ò rze, ò ìtììtènì ja hwatò hwa arzɛ, rzìi e mò wurza ò nyò, e rzì hwɛ lì mò hwènirzɛ.

³⁶ Hwatò hwa arzɛ hwa mà jeja, rzìi hwa àyijòwànɛ̀ mɔ̀kɔ nà ɔ̀nɛ̀yi nanù ema, “Ima lìtumba la mbɔrzi lìni e? Nɛ mòtò a tànɛyi lì kànèyà hwèlìŋgɛ̀ hwe wòhwe nà ŋginyà, rzìi hwe wurzà e?”

³⁷ Rzìi ŋmɛ̀ndì mò ama Yerzù, mò eyàlɛ̀nɛ̀ èŋge erzòòkà ya àrzɛ, ò hweyà ema à mà hwɛ lì gbeyà.

Yerzù à mà wɔ̀wìrzɛ̀ rzayì-rzayì ja hwatò

³⁸ Yerzù à mà uhwɛlɛlɛ ò ndawò yà màkanɛ̀, rzìi a ɛ̀ndɛ ò ndawò ya àma Rzìmɔ̀nì, Rzìmɔ̀nì nyàŋgò wà èni wà lìhwa à mà kòmeya ŋgɔ̀wu yà mòrzòrzòmbe. Àŋga, ndi hwa àkòwàna Yerzù ema, a mò wɔ̀wìrzɛ̀.

³⁹ Yerzù rzìi a tòmbeya ò tòŋgòŋgò yà èni, a ujama rzi a kànja èŋge ŋgɔwu ema e mò hwɛ̀mɛ̀, ò wòtɛmɛ̀tɛmɛ̀ èŋge ŋgɔwu rzìi e mò hwɛ̀mɛ̀. Rzìi à tɛ̀mɛ̀ a hwa kàrzɛ̀.

⁴⁰ È hvònda igbe ì mà wòteya lì ɔ̀ndɔ̀meyà, hwa mà mò jàneya hwà-òkèlì hwa nyayi nà nyayi ja nyàmbɛ. À mà kùwa lì hwa hwàkɛ màà mà eni, rzìi hwa arzɛ hwa wɔ̀wɔ̀.

⁴¹ Hwèlìŋgɛ̀ hwe wòhwe hwe mà anjiya hvɛ rzayì-rzayì ja hwatò ò nyò ja awu na mèrzeya nanù ema, “Ò wa ndi ò hwèlì è Ŋmanà wà ama Lohwɛ̀!” À mà hwa kanja, rzìi a rzì hwa ŋgbe hvɛ tɔ̀ èhvòlò ò lì òhwà, èhwànja hwa mà hwiya ema mɔ̀ ndì à hwèlì è Mɔ̀ ema a Ɔ̀kirzɛ̀hwɛ̀yi nà Lohwɛ̀.

Hweyòhwèlì hwe ama Yerzù ò ndawò ya màkanɛ̀

⁴² O hwèyawèlì hwe wùnyà, Yerzù à mà anjiya ò èŋge mbòwà, rzìi a ɛ̀ndɛ èki ya njuka. Hwatò hwa mà wòteya ò lì mò àrzà. Nà òma hwà mà mò ɛnɛ, hwa rzìi mò ŋgbe tɔ̀ ehvòlò ya lì ɛ̀ndɛ tɔ̀ èki.

⁴³ Ndi à mà hwa òhweyà nanù ema, “Nà hwɛnì lì òhweyà ma hvɛhvɛ mambòwà Ŋmɛ̀ndì mò Gbamù mò Lìkànèyà là ama Lohwɛ̀. Mònò Ŋmɛ̀ndì mò Gbamù ndeŋgàtɛ Lohwɛ̀ à nò òmì.”

⁴⁴ O èŋgànɛ̀lɛ̀ rzɔ à mà hwɛ ndi ò lì òhwa Ŋmɛ̀ndì mò Gbamù ò ndawò ja màkanɛ̀ ja erzòòkà ya Jùdeyà.