Lukàrzɛ̀ 23 - Mokpwe: Bakwery (New Testament)

Pìlatò à kàyìrzɛ Yerzù

¹ Hwatìmbèlì hwa mbòwà hwa àrzɛ rzìi, hwa tɛ̀mɛ̀, hwa ɛ̀ndɛnɛ Yerzù ò wòrzò wò ama Pìlatò.

² Aŋgà ndi hwa mà wòteya lì mò kùwa ewɛnyɛnyɛ, lì mò kìkòwa lì òhwà nanù ema, “Ò nò mòtò à hwèlì à hvùŋgùwà ekòmè ya arzu. À òhwà àma, ì rzì taŋga è njàŋge yà ama Kàyìrzà. À òhwà à mà Mɔ̀ ndì à Ɔ̀kirzɛ̀hwɛ̀yi, ama mɔ̀ ndì a hwèlì è kiŋgɛ̀.”

³ Pìlatò rzìi à ijòwa Yerzù nanù ema, “Ò wà ndi ò hwèlì è kiŋgɛ̀ yà wònyà Yudà e?” Yerzù rzìi à mò alàhwɛ̀ nanù ema, “Nà òmà ò òhwì.”

⁴ Pìlatò rzìi à ayèŋgòwɛ̀lɛ̀lɛ̀ Ipìlìrzì ndɛ̀nɛ nà è ŋgìndì, rzìi à hwa òhweyà nanù ema, “Nà rza lùwànì ònò mòtò lìtìŋgà ò lì mò tùlɛ.”

⁵ Ndi hwa mà tìnɛlɛ rzìi hwa òhwa nanù ema, “Hwèyòkòlèlì hwe ama ò nò mòtò, hwe hvɛhvi hwatò hwa arzɛ nà mèèrzɔ̀ɔ̀nì ò èrzòòkà yà àrzɛ yà Jùdeyà. À mà hwe wòteyà ò Galìlì rzìi à hwe jàni hvɛ anù.”

Hɛ̀rɔ̀dì à mà kàyìrzɛ̀ Yerzù

⁶ Nà òmà Pìlatò à mà hweye nanù, rzìi à ijòwa ŋgà Yerzù à hwèlì ndi mòtò wà Galìlì.

⁷ Nà òmà ekòmè yà Galìlì è mà hwɛ ndi ò lìkànèyà là ama Hɛ̀rɔ̀dì, Pìlatò à mà mò òmeya Yerzù. Liŋgi lìrzàkò Hɛ̀rɔ̀dì mɔ̀ hvɛ à mà hwɛ ò Jèrurzalɛ̀mù.

⁸ Hɛ̀rɔ̀dì à mà hwɛnɛ nyɔ̀ŋgi ò lì ɛnɛ̀ Yerzù lì hvomɛ̀nɛ̀ hweyà ema à mà mò hweyàne. À mà àrza lì ɛnɛ̀ nà òmà Yerzù a gbeyà mànyakà mà eni ma hweyà. O èŋgànɛ̀lɛ̀ à mà òka mɔ̀nyɛ̀ŋgì nà òmà hwa mà mò jàneya Yerzù.

⁹ Hɛ̀rɔ̀dì à mà ijòwa Yerzù mìijòwelì rzayì-rzayì, ndi Yerzù à rzi mò alàhwɛ̀.

¹⁰ Ipìlìrzì ndɛnɛ nà hwà-òkòlèlì hwa mbenda hwa mà tɛ̀mɛ̀ rzìi hwa mò kìkòwà.

¹¹ Hɛ̀rɔ̀dì nà hwaànèlì hwa eni hwa njùma hwa mà kìkòwa Yerzù. Hwa mà mò umbɛlɛlɛ mènìtò, rzìi hwa mò wɔ̀tìrzɛ mòŋgòmbè mò gbamù, rzìi hwa mò tìmbìrzɛlɛlɛ Pìlatò.

¹² O wòŋgò wùnyà mɛnɛ, Hɛ̀rɔ̀dì nà Pìlatò ema hwà mà àwòhvànɛ ehwa, hwa mà tìmba lì lɛŋgɛ̀.

È mbàkò yà e kpelì yà ama Yerzù

¹³ Pìlatò à ma rzàŋgà Ipìlìrzì ndɛnɛ, nà hwàtìmbèlì, nà hwahvɛhvɛ hwatò,

¹⁴ rzìi a hwa òhweyà nanù ema, “È nò jànelì ò nò mòtò rzìi e nò òhwèlì ema mɔ̀ ndì à jàni luhwànje ò mèyòhvò mè hwatò. Nàŋgɛ rzɔ̀, nà mà mò kàyìrzɛ ò wòrzò wò inyɔ hwa àrzɛ. Nà rza mò lùwànì tɔ̀ lìtìŋgà tɔ̀ lɔ̀kɔ, ò hweyà hwe àrzɛ ema è òhwì lì mò teŋgɛ̀nɛ̀.

¹⁵ Hɛ̀rɔ̀dì mɔ̀ hvɛ à rzi mò lùwànè lìtìŋgà ɔ̀ndeŋgàtɛ̀ à è tìmbirzɛlɛlɛ è mɔ̀. Ò jɔ̀kɛ̀, ò nò mòtò à rza gbèyi tɔ̀ eyà ema e uŋmɛ̀lɛ̀ ema a hwɛnì lì ŋwa.

¹⁶ O èŋgànɛ̀lɛ̀ rzɔ, nà òhwa ema e mò gbìyɛ̀ hvònjì, rzìi e mò hwɛ̀mɛ a ɛ̀ndɛ̀.”

¹⁷ Nàŋgɛ tɔ̀ ima ŋma ò è hvònda yà è ndèma yà lì Akà Ɔnɛyi, Pìlatò à mà hwɛnɛ lì rzòlòwà mòtò wà hwèwòwà mɔ̀kɔ.

¹⁸ È ŋgìndì yà àrzɛ è mà lòrzòwa nà ŋginyà nanù ema, “È wòwe ònò mòtò, è mò òŋwe! Ò jò rzòlòhweya Bàrabàrzì.”

¹⁹ (Bàrabàrzì à mà hwɛ ndi mòtò mɔ̀kɔ, ema à mà aŋgɛhwɛ ò hwèwòwà. Ò nò mòtò Bàrabàrzì à mà òŋwa mòtò, rzìi à jànà lùwànje ò mbòwà).

²⁰ Pìlatò à mà àrza lì hwɛ̀mɛ Yerzù, aŋga ndi à àtɛ̀kɛ̀ è ŋgìndì hvɛ.

²¹ Rzìi hwa lòrzòwa hvɛ nà ŋginyà, nanù ema “Ò mò wòmeya ò mbarza, ò mò wòmeya ò mbarza!”

²² Pìlatò rzìi à hwa ijòwa è ŋgèlì è ùkirzɛ̀ iyàwò nanù ema, “Ò mamɛ ndeŋgàtɛ e? Ì mà eyà yà wòhwe ònò mòtò à gbèyi e? Nà rza ɛni tɔ̀ eyà yà wòhwe ema ò nò mòtò à gbèyi ò lì òŋwahwa. Nà mò gbiyɛ̀ hvònji, rzìi nà mò hwɛmɛ à ɛ̀ndɛ̀.”

²³ Ndi è ŋgìndì è mà lòrzòwa ò ŋmanyu ema Yerzù à wòmàyɛ̀lɛ̀hwɛ̀ ò mbarza, lìnì lì lòrzòwà ndi lì mà hwa rzùulɛ̀.

²⁴ Aŋgà ndi Pìlatò à akɛlɛ è mbàkò ema è ŋgìndì e mà àrze.

²⁵ À ma hwa rzòlòhweya è mòtò ema hwa mà àrze. Òŋgò mòtò ema à ma òŋwa è mòtò, ema à ma jànà hvɛ lùwànje ò mbòwà. À mà hwa ŋgba Yerzù à ma hwa mò gbeyàne tɔ̀ mamɛ ema hwa mà àrze.

Yerzù à mà wòmàyɛ̀lɛ̀hwɛ̀ ò mbarza

²⁶ Hwaànèlì hwa njùma hwa mà tìmba Yerzù, ò èki ema hwa hvànɛ hwatò. Hwa mà taneya Rzìmɔ̀nì, mùnyanà wà è mbòwà yà Rzelìni. Hwa mà mò hvɔɔtɔ̀, rzìi hwa mò hwànirzɛ è mbarza yà ama Yerzù. À mà hwànɛ è mbarza, rzìi a òŋgama Yerzù ò mburzà.

²⁷ Ŋgindi ndɛnɛ̀ è mà òŋgama Yerzù. O èŋge ŋgìndì ema e ma òŋgama Yerzù, ò mà hwɛ hwalanà ema hwà mà hwɛ lì eyaa nà lì ɛhwɛ Yerzù.

²⁸ Yerzù à mà hwa ayèŋgòwɛ̀lɛ̀lɛ̀ mìirzɔ̀, rzìi a hwa òhwèyà nanù ema, “Ìi hwalanà hwa Jèrurzalɛ̀mù, è rza nò eyaa imba. Yà à eyɛɛ ndi inyɔ hwìti nà hwaanà hwa anyu.

²⁹ Meenya me ò jà, ema hwatò hwa ò òhwa nanù ema, ‘Mònàmɛ̀ na hwaŋga hwalanà ema hwa hwèlì yòmbà, nà hwaŋga ema hwa rzi ŋya, nà hwaŋga hvɛ ema hwa rzi nyɔ̀ŋgìrzɛ̀yi tɔ̀ ŋmanà!’

³⁰ Èŋge hvònda ndi hwatò hwa wòteyà lì òhweyà ihvàko, nanù ema, ‘È jò undeya,’ Rzìi hwa òhweyà hvɛ meyòlì nanù ema, ‘È jò hwande.’

³¹ Hwatò hwa tànɛyi tɛ lì gbeyà hwenè hweyà hwe arzɛ nàŋgɛ nanù, ema gbèe wò hwèlì wòhvènya, mamɛ hwa ò gbeyɛ e hvònda ema gbèe wò rzɔ̀njɔ e?”

³² Nàŋgɛ hvɛ hwà mà wòwa hwatò hwa wòhwe hwàhwàkɛ̀, ò lì ɛ̀ndɛ lì hwa wòmeyà ò mbarzà nà Yerzù.

³³ È hvònda ema hwa mà uke, ò èki ema è hwɛ̀lɛ̀hwɛ̀ Èkeke yà Mèyòhvò, rzìi hwa wòmeyà Yerzù ò mbarzà nà hwaŋga hwatò hwa wòhwe hwahwàkɛ. Mɔ̀kɔ ò lìya là eni là mòmɛ, ɔ̀nɛ̀yi hvɛ ò lìya là ŋmàlì.

³⁴ Yerzù à mà kànɛ̀ nanù ema, “Tatɛ̀ làkìrzɛ̀ hwanù hwatò, èhwanja hwa rzà hwi mamɛ ema hwa gbeyà.” Hwa mà òka mèrzɔ̀ɔ̀nì ò lì hwàà lìwɔti la eni.

³⁵ Nà òmà è ŋgìndì e mà tɛ̀mɛ̀ ò lì ɔŋgɔ̀ Yerzù, rzìi hwàtìmbèlì hwa lìmeya ndi lì kìkòwa Yerzù nanù ema, “À mà òŋgirzɛ hwànɛ̀yi, a àwòŋgìrzɛ̀ hvɛ mɔ̀ ŋmìti jò ɔ̀ŋgɔ, è hwèlì tɛ ema ò jɔ̀kɛ̀ mɔ̀ ndì Lohwɛ̀ a hvɔ̀rzì, ema a Ɔ̀kirzɛ̀hwɛ̀yi.”

³⁶ Hwàànèlì hwa njùma wɔ̀ hvɛ hwa mà mò kìkòwa. Hwa mà mò ŋgbà hwèkàkò hwe mimba.

³⁷ Hwaànèlì hwa njùma wɔ̀ hvɛ hwà mà mò òhwàna nanù ema, “Arzùŋgɛ̀ ò wa hwìti è hwèlì tɛ ema ò wa ndi ò hwèlì e kiŋgɛ̀ yà wònyà Yudà!”

³⁸ Ò ŋmanyu tènyi lì aka mòòhvò mò eni, ò mà tìlahwà nanù ema, “È kìŋgɛ yà wònyà Yudà ène.”

³⁹ Mòtò mɔ̀kɔ wà wòhwe ema à mà wòmàyɛ̀lɛ̀hwɛ̀ nà mɔ̀ rzìi à mò rzòrzòlɛ hwèyòlì nanù ema, “Rzèke ò wà ndi ò hwèlì è Mɔ̀ ema Lohwɛ̀ a Ɔkirzɛ e? Àwòŋgìrzɛ̀ ò wà hwìti ò jò òŋgirzɛ irzɔ hvɛ!”

⁴⁰ Ɔnɛ̀yi mòtò wà wòhwe rzi à mò kànja nanù ema, “Ò rza òka Lohwɛ̀ wɔ̀ŋgɔ̀ e? Ì lu ndi kɔ̀kìrzɛ̀ hvɔ̀kɔ nà ò nò mòtò ema à rza gbèyɛ tɔ̀ eyà.

⁴¹ Ì rzɔ ja àŋgàmɛ̀nɛ̀yi lì ŋwa, ò hweyà hwe arzu hwe wòhwe ema ì gbèyi. Ò nò mòtò a rza gbèyi tɔ̀ eyà ya wòhwe.”

⁴² Aŋgà ndi àyeŋgòwɛ̀lɛ̀lɛ̀ Yerzù, rzìi a mò òhweyà nanù ema, “Ìi Yerzù, ò rzì nò hvòŋgà ò ma uka tɛ ò lìkànèyà lì aŋgɔ̀.”

⁴³ Yerzù, rzìi a tìmbirzɛlɛlɛ nanù ema, “Nà ò òhweyà è jɔ̀kɛ̀ ema, yàwònò ò hwɛ nà ìmba ò pàlàdìrzì.”

È kpelì yà ama Yerzù

⁴⁴ Kɔ̀rzì ya ŋmèrze e mà ùke, rzìi jììtìtì ì lìŋgà èki ya àrzɛ natɛ̀ɛ nà ŋgɛ̀ŋgi iyàwò ja ŋmèrze.

⁴⁵ Lìhwàtù ema lì ma kahwa e Ndawò yà Lohwà lì mà nyàhweyà hwèhvàrzù hwèhwàkɛ̀.

⁴⁶ O lìnì lìrzàkò ndi Yerzù a mà tɛ mòrzeya nanù ema, “Ìi Tatà nà hwàkɛ èlìŋgɛ̀ ya amì ò màà mà aŋgɔ̀!” Ène mbɔrzi ndi à mà òhwe rzìi a rzìyòwa mùùlù mò eni mò lìrzùkù.

⁴⁷ È mòtìmbèlì wà hwàànèlì hwa njùma, à mà ɛ̀nɛ mamɛ ya àrzɛ ema e ma gbèyɛ̀nɛ̀, à mà eka Lohwɛ̀ rzìi a òhwa nanù ema, “Ò jɔ̀kɛ̀, ò nò mòtò à mà hwɛ ndi mòtò wà gbamù.”

⁴⁸ Nà òmà è ŋgìndì ema è ma ùkeya aŋga ò lì ɛnɛ̀ nɛ Yerzù a wòmahwɛlɛ ò mbarza e ma ɛ̀nɛ mamɛ e ma gbèyɛ̀nɛ̀, è mà tìmba nà ndùtù ò mèèmà.

⁴⁹ Hwàŋga hwa arzɛ ema hwà mà hwiya Yerzù, nà hwalanà ema hwa mà mò òŋgama, lì wòteyà ò Galìlì, hwa àrzɛ hwa mà tɛ̀mɛ̀ hvòò lì ɔŋgɔ̀ mamɛ ema è mà gbèyɛnɛ.

Lì làmìrzɛ̀ là ama Yerzù

⁵⁰ Ò mà hwɛ mùnyanà mɔ̀kɔ ema à ma hwɛ̀lɛ̀hwɛ̀ Jòrzɛ̀hvù wà è mbòwà yà Àrìmàtìyà. À mà hwɛ ndi mɔ̀kɔ wà lìkànèyà lì kàrzàmi, là wònyà Yudà.

⁵¹ Ò nò mòtò à rzi lìŋgànè è mbàkò nà hwègbèèlì hwe hwanɛ̀yi hwàtimbèlì nanù ema hwa òŋwe Yerzù. Mɔ̀ hvɛ à mà hwɛ lì ambɛ̀lɛ̀ Lìkànèyà lì ama Lohwɛ̀.

⁵² Ò nò mòtò Jòrzɛ̀hvù, a mà ɛ̀ndɛ ò ma Pìlatò ò lì mò rzòrzòmeyà, ò lì mò ŋgba ŋmìmba mò ama Yerzù.

⁵³ À mà rzìhwìrzɛ̀ èèmbè yà ama Yerzù ò mbarza. À mà lìŋgɛ̀lɛ̀ èŋge èèmbè nà mààtù ema mà wàmi, rzìi à è nàŋgɛlɛ ò rzɔ̀ŋgɔ̀. Èŋge rzɔ̀ŋgɔ̀ ema è rzi gbeyànɛhwɛ̀yi tɔ̀ wùnyà, è mà hvòkòwahwa ndi ò èkɔ̀kɔ̀ yà lìŋyayì.

⁵⁴ Wònò wùnyà wò mà hwɛ ndi wùnyà wò lì wòŋgirzɛnɛ ndeŋgàna Wùnya wò lì Arzìyòlɛ wò è wòteyà.

⁵⁵ Hwàŋga hwalanà ema hwa mà wòteya lì òŋgama Yerzù ema hwa mà uhwɛlɛlɛ ò Galìlì, hwa mà òŋgama Jòrzɛ̀hvù, ò lì ɔŋgɔ̀ è rzɔ̀ŋgɔ̀ ema hwa mà nàŋgɛlɛ Yerzù.

⁵⁶ Hwàŋga hwalanà hwa mà tìmba ò màndawò mà awu, ò lì wòŋgirzɛnɛ lìyɔki nà hwèlòŋgìrzànì hwe lì rzeeya èèmbè yà ama Yerzù. Wòŋgò wùnyà wò mà hwɛ ndi wùnyà wò màkanɛ̀, ò Wùnya wò lì Arzìyòlɛ̀ hwa mà à arzìyòlɛ nàa è mbenda yà ama wònyà Yudà è òhwì.