Lukàrzɛ̀ 13 - Mokpwe: Bakwery (New Testament)

È ayèŋgòwɛ̀ ò wòhwe e tìmbeyà Lohwɛ̀

¹ Nà òma Yerzù a mà hwɛ lì òhwa nanù, lòŋgò la hwatò hwà mà hwɛ aŋga hwa mà mò òhweyà nɛ Pìlatò à mà òŋwe hwatò hwa Gàlìlì è hvònda hwa mà hwɛ lì ŋgbà màahweyà ma hwèembè òma Lohwɛ̀.

² Yerzù à mà hwa alàhwɛ̀ nanù ema, “È ɔ̀ŋgɛ̀lɛ̀ èma hwaŋga hwatò hwa Gàlìlì ema hwà mà ŋwa enè nyayi yà kpèelì, hwà mà gbeyà wòhwe lì aka hwanɛ̀ hwatò hwa arzɛ hwa Gàlìlì èhwanja hwà mà ŋwa nanù e?

³ Jàyɛ̀! Nà è òhweyà ema, inyɔ hvɛ è rza hwɛmì tɛ wòhwe wò anyu lì tìmbeyà Lohwɛ̀ nanù òma inyɔ hwa arzɛ è kùwa lì ŋwa nàa wɔ̀.

⁴ Nɛ e ò hwɛ rzɔ nà lìnɛyi lìyòmɛ̀ la hwatò nà wàmbì, ema è ndawò è mà kàrzàma ò ŋmanyu rzayì-rzayì e mà rzuhweyà ò mbòwà yà Rzìlòwàmì rzìi hwa ŋwa e? O èŋgànɛ̀lɛ̀ e ɔ̀ŋgɛlɛ ema hwanù hwatò hwa mà gbeyà wòhwe, lì aka hwanɛ̀yi hwatò hwa arzɛ ema hwà mà hwɛ lì lìya ò Jèrurzalɛ̀mù e?

⁵ Jàyɛ̀! Nà è òhweyà ema, inyɔ hvɛ è rza hwɛmì tɛ wòhwe wò anyu lì tìmbeyà Lohwɛ̀ nanù òma inyɔ hwa arzɛ è kùwà lì ŋwa nàa wɔ̀.”

Ŋmàna mò yòmbà yà gbèe

⁶ Yerzù rzìi a hwa kpɛ̀ɛyà mònò ŋmàna nanù ema, “O mà hwɛ mòtò mɔ̀kɔ ema à ma òna gbèe wò hwehvùma ò wàŋgà yà èni. À mà hwɛ lì ɛ̀ndɛ ò wòŋgò gbèe ŋgɛ̀lɛŋgɛlɛ ò lì arza hwèhvùma. A mà ùke a rzi lùwè tɔ̀ èhvùma.

⁷ Oŋgò mòtò rzìi a òhweyà è mɔ̀ɔŋgèlì wà wàŋgà yà èni nanù ema, ‘Wà ɔŋgɔ̀ tɛ, meya meyawò menè yàwònò ema nà mà jèeya wònò gbèe, e ma na rzà lùùhwɛ tɔ̀ èhvùma. O wò kɛ ò rzè! Mamɛ wò nò kulɛnɛ manɔ̀nɔ̀ ma mɔ̀nyɛ̀ ŋgundɛ-ŋgundɛ e?’

⁸ È mɔ̀ɔ̀ŋgèlì wà wàŋgà rzìi a mò alàhwɛ̀ nanù ema, ‘Ìi rzàŋgò wa ami wa èwòlò, ò wò hwɛ̀mɛ̀ hvɛ ŋmàa mɔ̀kɔ. Nà wò rzɛ̀rzɛ̀ e tina yà eni, rzi nà wò kòmà ɛrzɔ̀mbɛ̀rzɔ̀mbɛ̀.

⁹ Wò nyayi tɛ hwèhvùma mònɛ̀yi ŋmàa, òma gbamù. Wò rzà nyayi hvɛ tɛ, wò kɛɛ̀hwɛ̀.’”

Yerzù à mà wɔ̀wìrzɛ̀ mòlanà wà mbòkò ò Wùnyà wò lì Arzìyòlɛ̀

¹⁰ Wùnyà wɔ̀kɔ wò lì arzìyòlɛ̀, Yerzù à mà hwɛ lì òkòlɛ̀ ò ndawò ya màkanɛ̀.

¹¹ O mà hwɛ mòlanà mɔ̀kɔ aŋga à ma hwɛnɛ èlìŋgɛ̀ ya wòhwe, è ma mò hwɛ ò nyò lìyòmɛ̀ la meya nà wàmbì, e mà gbeyà è mburzà yà èni è mà nùnàmà nyayi ema a rzi tanɛ lì tɛ̀nɛ̀nɛ̀.

¹² È hvònda ema Yerzù a mà mò ɛnɛ, rzi a mò hwɛlɛ, rzì a mò òhwàna nanù ema, “Nyàŋgò kòkò è nyàmbɛ yà aŋgɔ̀ ema ò òka ema kùwà.”

¹³ A mò hwàkɛ lìya la eni. O wòtɛmɛ̀tɛmɛ̀ òŋgò mòlanà a tɛnɛ̀nɛ, a wòteya lì ŋgbàà Lohwɛ̀ jeka.

¹⁴ È mòkànèlì wà èŋge ndawò ya màkanɛ̀ yà wònyà Yudà à mà tàta èhwanja Yerzù à mà wɔ̀wìrzɛ̀ òŋgò mòlanà ò Wùnya wò lì Arzìyòlɛ̀. Rzìi à òhweyà hwatò nanù ema, “O hwèlì mèenyà mòtòhwa me èwòlò. È arza tɛ lì wɔ̀wìrzɛ̀hwɛ e je ndi mèŋge menya, rzeketɛ ò Wùnya wò lì Arzìyòlɛ̀.”

¹⁵ È Rzàŋgò rzìi e tìmbirzɛlɛlɛ nanù ema, “Inyɔ hwatò hwa mèhvìlì! Njɛnɛ wà anyu anù ema à rza rzòlòwa è nyàkà, tɔ̀ jakàrzì ja eni ò ndawò yà eni ya hwèembe ò lì jɛ̀ndɛnɛ ò lì nyɔ màlìhwa ò Wùnya wò lì Arzìyòlɛ̀ e?

¹⁶ Ònò mòlanà à hwèlì ndì e ŋmanà wa ama Abràhamù, Mòkarzɛ̀ à mò kaki nà e nyàmbɛ ò lìnì lìyòmɛ̀ la meya nà wàmbì. Inyɔ è nò òhweyà ŋgà e hwèlì wòhwe lì rzòlòwà ònò mòlanà ò wùnyà wò lì arzìyòlɛ̀ e?”

¹⁷ Mamɛ Yerzù a mà òhwe, e ma gbeyà hwatò ema hwà mà mò teŋgɛ̀nɛ lì lɛmbeya ìrzɔnì, mòtò tɛ à mà òka mɔ̀nyɛ̀ŋgì lì hvomɛ̀nɛ̀ hweyà hwe mànyàka hwe arzɛ ema Yerzù a mà gbèye.

Meyàna mehwàkɛ me lìkànèyà la ama Lohwɛ̀: Ŋmàna mò e ŋmanà hvɔ̀ŋgɔ̀

¹⁸ Yerzù rzìi a hwa ijòwa hvɛ nanù ema, “Nɛ lìkànèyà là àma Lohwɛ̀ lì tànɛyì lì hwɛ e? Ima nyayi yà èmɛ̀nɛ̀nì na tànɛyi lì li kìtìrzɛ̀nɛ̀ e?

¹⁹ Lìkànèyà là àma Lohwɛ̀ lì hwèlì ndi nàa ŋmanà hvɔ̀ŋgɔ̀, ema mòtò a mà hvahve ò mòònda mò eni. È mà òŋgà rzìi e jà gbèe ema hwènɔ̀nì hwe ŋmanyu hwe ma òŋge mùùmbù ma awu ò hwèkɔ̀kɔ̀.”

Ŋmàna mò Èhwindì

²⁰ Yerzù rzìi a hwa ijòwa hvɛ nanù ema, “Mamɛ na tànɛyi lì kitirzɛnɛ lìkànèyà là àma Lohwɛ̀ e?

²¹ Lì gbèyi ndi nà èhwindi ema mòlanà a hvuŋguwani mèyɔnjɔ me hvìlawà meyawò natɛ̀ɛ me ita ò lì gbeyànahwa.”

Liyòhva ema lì ihvi

²² Nà òma Yerzù a mà hwɛ lì ɛ̀ndɛ ò Jèrurzalɛ̀mù à mà hwɛ lì òkòlɛ, lì akeyà ò màmbòwà màrzàlì nà mandɛnɛ̀.

²³ Mòtò mɔ̀kɔ à mà ijòwa Yerzù nanù ema, “Ìi Rzàŋgò ŋgùrzu ja hwatò mɛnɛ̀ ndi Lohwɛ̀ a rzùŋgà e?” Yerzù rzi a mò òhweyà nanù ema,

²⁴ “È kèkè ò lì kpèeyà ndi ò lìyòhva ema lì ihvi. Èhwanja ò jɔ̀kɛ̀, rzayì-rzayì ja hwatò hwa ò kèka ò lì kpèeyà, ndi hwa rzà ò tanɛ.

²⁵ È hvònda yò ò jà ema e mòhwɛnɛ wà ndawò a ò tɛ̀mɛ̀ ò ŋmanyu ò lì umba lìyòhva la eni. Èŋge hvònda inyɔ̀ è ò tɛ̀mɛ̀ ò èwòkà, lì kùmba lìyòhva rzìi ya òhwa nanù ema, ‘Rzàŋgò ò jò lìhvòweyà lìyòhva.’ A yà alàhwɛ̀ nanù ema, ‘Nà rza hwi òne e uwɛ̀lɛ̀lɛ̀yi.’

²⁶ Lìŋgi lìrzàkò rzì inyɔ ya òhwa nanù ema, ‘Ì mà làalɛnɛ, ì mà nyɔ̀lɛnɛ mimba nà ò wa. Ò mà jò òkòlɛ̀ hvɛ ò mambòwà ma àrzu.’

²⁷ È Rzàŋgò yà è ndawò ya àlahwɛ̀ nanù ema, ‘Nà rza è hwi. Nà rzà hwi hvɛ tɔ̀ èki ema e uwɛ̀lɛ̀lɛ̀yi. È nò anjiya ò mìirzɔ̀ ma ami. Inyɔ hwatò hwa wòhwe!’

²⁸ Inyɔ è ò eyaa. È ò kɔ̀kɔ̀ hvɛ marzòŋgà ma anyu lìrzàkò ema yò ɛnɛ Abràhamù, Irzàkì nà Jèkɔ̀bu, nà hwanɛ̀yi hwà-òhwèlì hwa arzɛ hwa hwèlìŋgɛ̀ ò Lìkànèyà là ama Lohwɛ̀. Hwanù hwatò hwa arzɛ è ò hwa ɛnɛ ò tenì yà ndawò ndi inyɔ è ò tɛ̀mɛ ndi ò èwòka.

²⁹ Hwatò hwa ò uhwɛlɛlɛ lɛ̀lu, mbɛ̀ŋgɛ̀, ɔnɛ̀yi, nà wàteŋyi hwa ò wòwa hwèlìyelì ò ndèma ò Lìkànèyà là ama Lohwɛ̀.

³⁰ O èŋge hvònda hwatò ema hwà mà lìiya ò mburzà, wɔ̀ ndi hwa lòma lì ja ò wòrzò. Hwàŋga hvɛ ema hwa ò hwɛ ò wòrzò, wɔ̀ ndi wò hwɛ ò mburzà.”

Yerzù à mà òkeya Jèrurzalɛ̀mù ìilì

³¹ O lìŋgi lìrzàkò lòŋgò la Ihvàlìrzàyì hwa mà jèeyà Yerzù, rzi hwa mò òhweyà nanù ema, “Anjiya anù, ò ɛ̀ndɛ̀ ehvɛhvɛ èki èhwanja kìŋgɛ̀ Hɛ̀rɔ̀dì à arza lì ò òŋwà.”

³² Yerzù rzìi a hwa alàhwɛ̀ nanù ema, “È ɛ̀ndɛ è òhweyà èŋge èrzò nanù ema, ‘Yàwònò nà ŋmɛlɛ nà hvaya hwèlìŋgɛ̀ hwe wòhwe, na wɔ̀wìrzɛ̀ hvɛ hwatò, wòrzihwàkɛ ò ma na kulɛ̀ èwòlò ya ami.’

³³ Ndi tɔ̀ nɛ na hwɛnì lì hwɛ ò njiya yàwònò, ŋmɛ̀ɛlɛ, nà wòrzihwàkɛ, èhwanja ò rza lɔ̀wu ema mòòhwèlì wà èlìŋgɛ̀ a ŋwèeyà ò ehvɛhvɛ èki lì aka tɛ ò Jèrurzalɛ̀mù.

³⁴ Jììyeyi! Ìi hwatò hwa Jèrurzalɛ̀mù, è òŋwi hwà-òhwèlì hwa hwèlìŋgɛ̀, ndeŋgàna è mà òŋwa hvɛ hwaŋga hwatò ema Lohwɛ̀ a è òmelì na mànyayi! Nà ma kèka lì è rzàŋgà ihvònda ja arzɛ, nàa e ŋmalì wà wuhwà a gbìyàmànà ìŋguma ja eni ndì e rza emèlì!

³⁵ È ɔ̀ŋgɔ tɛ! Lohwɛ̀ à ò kìnyɛlɛlɛ è ndawò ya aŋgɔ̀. Nà ò òhweyà ndi è tɛ̀ɛtɛ, ema ò rza nò ɛnɛ hvɛ natɛ̀ɛ è hvònda ò òhwa nanù ema, ‘Mònàmɛ̀ nà è mɔ̀ ema à jèlì ò lìna la è Rzàŋgò.’”