Kòlòrzìyà 4 - Mokpwe: Bakwery (New Testament)

¹ Inyɔ hwatò ema e hwɛ̀ni hwàkòmì, e ohve hwàkòmì hwa anyu nà oma Lohwɛ̀ a àrzeyà, ndèŋgànɛlɛ e hwa ohve gbamù. È hwiye nanù ema inyɔ hvɛ e hwɛni mòtò o ŋmanyu yà lohwà ema inyɔ hvɛ e hwèlì o rze ya eni.

Pàwolò a ètirzɛ hwatò mèèmà

² È inyàmɛnɛ o màkanɛ̀. Ndèŋgànɛlɛ e kànɛ tɛ e rzɛŋgɛnɛ mèèmà me anyu o tɔ̀ mamɛ ema e arzana Lohwɛ̀, ndèŋgànɛlɛ e a mo eka.

³ È a jo kànɛlɛlɛ irzɔ hvɛ, aŋga nanù Lohwɛ̀ a jo lìhvoweya e njiya o lì ohwa ŋmɛ̀ndì lì hvomɛ̀nɛ̀ Krirztò, ema hwatò hwa rzi rzɔ̀ŋgìtɛ̀nɛ̀ o mòlòmɛ. Moŋgo ŋmɛ̀ndì ema imba na ohwa mɔ̀ ndi mo gbèyi ɔndèŋgàtɛ̀ imba na hwèlì o hwèwòwà.

⁴ Inyɔ e kànɛ nanù ema imba nà mà ohwe gbamù e ŋgànà ema imba na àŋgàmɛ̀nɛ̀yi lì mo òhwa.

⁵ È hwɛni lì aŋgowa nà oma inyɔ è gbèeyà nà hwaŋga hwatò ema hwa rza enje hwàlokelì hwa ama Krirztò. È gbeyàne ihveyo ja arzɛ ema e lùu o lì gbeyà gbamù.

⁶ Inyɔ nà wɔ̀ è tuwa tɛ mèndèŋgà, hwèyohwèlì hwe anyu hwe àŋgàmɛ̀nɛ̀yi lì lɔ̀wu nà lì tɛ̀ɛ̀. Inyɔ è gbeyà tɛ nanù, è hwiya nɛ è alàhwɛ̀ tɔ̀ ima mòtò ema à è ijo mììjòwèlì.

Ìikɔ̀mi ja lìrzùkù

⁷ Ŋmanyàŋgò wà arzu wà Krirztò wà ndìŋgɛ yà màlìŋgò Tàyìkìkùrzì, à è òhweyà hweyà ema hwe nò gbèèyɛ̀nɛ̀ anu, mɔ̀ hvɛ à hwèlì ndi mògbèèlì ema gbèeyà è Rzàŋgo nà ŋmèma mɔ̀kɔ nà imba.

⁸ Imba nà è òmeyà è mɔ̀, ò lì è ohweyà nɛ irzɔ i hwèlì nà ò lì ètìrzɛ̀ mèèmà mè anyu.

⁹ Nà mò òma nà Ònɛ̀rzìmùrzì. Ònɛ̀rzìmùrzì mɔ̀ hvɛ à hwèlì ndi ŋmanyàŋgò wà arzu wà Krirztò ema i lìŋgàni, mɔ̀ hvɛ à gbèeya ndi Krirztò nà ŋmèma mɔ̀kɔ. À hwèlì ndi mòtò ema à uwɛ̀lɛ̀lɛ̀yi ò mbowà ndɛnɛ yà anyu. Mɔ̀ nà Tàyìkìkùrzì hwa è ohweyà hweyà ema hwe gbèyɛ̀nɛ anu.

¹⁰ Arìrztàkùrzì, ema mɔ̀ hvɛ a hwèlì o hwèwòwà na imba, a e omelì ikɔ̀mi. Màkòrzì, ema a hwèlì Bànàbàrzì ŋmanyàŋgò wa eni mɔ̀ hvɛ a e omelì ikɔ̀mi. Nà ma màa lì e ohweyà lì hvomɛ̀nɛ̀ Màkòrzì mɔ̀ à jelì tɛ e mo kàrzɛ.

¹¹ Yerzù, ema hwa hwɛlɛ ema Jùrzìtùrzì, mɔ̀ hvɛ a e omelì ikɔ̀mi. Hwanu hwatò hwaayɛ mɛnɛ ndi hwa hwèlì hwatò hwa wònyà Yudà ema hwa lòkɛ̀ Krirztò. Irzɔ na wɔ ndi i gbeyà èwòlò ya lì ohwa ŋmɛ̀ndì mò gbamù lì hvomɛ̀nɛ̀ lìkànèyà la ama Lohwɛ̀. Wɔ hwà mà no ètìrzɛ̀ ŋmèma mo ami rzàyi-rzàyi.

¹² Èpàhvràrzì mɔ̀ hvɛ a e omelì ikɔ̀mi. Mɔ̀ hvɛ a hwèlì ndi mòtò ema a uwɛ̀lɛ̀lɛ̀yi o mbowà ndɛnɛ ya anyu ndeŋgànɛlɛ a hwèlì ndi mògbèèlì wa ama Yerzù Krirztò. Mɔ̀ a e kànɛlɛlɛ ihvonda ja arzɛ. Inyɛ̀ Lohwɛ̀ mɔ̀ ŋmitɛ-ŋmitɛ a gbeeye na e jɔ̀kɛ̀ eyà ema mɔ̀ à arza nanù ema inyɔ e gbeye. Ndèŋgana inyɔ e àŋgàmɛ̀nɛ̀yi lì e gbeye.

¹³ Imba mbiti na tɛmi mboŋgi nanù ema mɔ̀ à mà e gbèeyà èwòlò rzàyi-rzàyi na o hwatò hwa ama Krirztò ema hwa hwèlì o mambowà mà Làwòdèrzìyà na Hilàpolìrzi.

¹⁴ Lukarzi, e ŋgàŋga ya arzu ema i lìŋgàni mɔ̀ na Dèmàrzì wɔ hvɛ hwa e omelì ikɔ̀mi.

¹⁵ È no kɔmèya wònyànyàŋgo hwa arzu hwa ama Krirztò ema hwa hwèlì o mbowà ndɛnɛ ya Làwòdèrzìyà. È no kɔmèya Nimhva na hwàlòkèlì hwa arzɛ ema hwa taneya o ndawò ya eni.

¹⁶ È ma kulɛ tɛ o lì làŋga ini itita, e jo òme o mbowà ndɛnɛ ya Làwòdèrzìyà aŋga nanù i làŋgahwa na mondeŋge mo ŋmèmba ema mo hwèlì aŋga. Inyɔ hvɛ e ɛnɛ nanù ema e làŋgi itita ema na omelì hwatò hwa e mbowà ndɛnɛ ya Làwòdèrzìyà.

¹⁷ Ndeŋgànɛ̀lɛ̀ e ohweyà Achipurzi nanù ema, “A hwiye kɔ̀yi-kɔ̀yi nanù ema a hwɛni o lì kulɛ èwòlò ema Rzàŋgo a mo ŋgbelì o lì gbeyà.”

¹⁸ Imba Pàwolò ndi nà tilì ini ikɔ̀mi nà lìya là ami. È rzi hvoŋga nanù ema nà hwèlì ò hwèwòwà. Inyɛ̀ è ndèli yà ama Lohwɛ̀ è hwɛ nà inyɔ.