Kòlòrzìyà 2 - Mokpwe: Bakwery (New Testament)

¹ Nà lìŋgàni nanù ema e hwiye nɛ imba nà mà ahvahvɛ o lì e gbèeyà na o hwaŋga hwatò hwa e mbowà ndɛnɛ ya Làwòdèrzìyà. Ndeŋgànɛlɛ e hwiye hvɛ nɛ imba nà mà ahvahvɛ o lì gbèeyà hwanɛyi hwatò ema hwa rzi no ɛni na mìirzɔ ma awu.

² Nà gbeyà ndi nanù o lì hwa ètìrzɛ̀ mèèmà me awu. Aŋga nanù e ndìŋgɛ ema e hwèlì o ìtììtènì ja anyu e o gbèeyà o lì hwɛ mòtò mɔ̀kɔ. Imba na arza nanù ema o wa na wɔ e ika mèèmà me anyu me arzɛ nàa hwatò ema hwa rzɔ̀ŋgìtɛ̀nɛ̀ eyà ya ama Lohwɛ̀ ema hwatò hwa rzi rzɔ̀ŋgìtɛ̀nɛ̀. Èŋge eyà ya Lohwà e hwèlì ndi Krirztò mɔ̀ ŋmìti.

³ Krirztò mɔ̀ ndi à tànɛyi lì gbeyà ndèŋgànà inyɔ e rzɔ̀ŋgìtɛ̀nɛ̀ hweyà hwe ama Lohwɛ̀. Hweŋge hweyà hwe hwèlì wòlìto rzàyi-rzàyi.

⁴ Nà e ohweyà ene eyà aŋga nanù, tɔ mòtò tɔ̀ mɔ̀kɔ a rzi keka o lì e lukɛlɛ na mbùnakɛ̀ ya mòlaŋgà ema e o lùtèyà nanù ema eyà ema mɔ̀ à e ohweyà e hwèlì ndi e jɔ̀kɛ̀.

⁵ Tɔ nɛ na rza enje na inyɔ o nyo, na hwèlì na inyɔ o èlìŋgɛ̀. Tɔ nɛ imba na rza enje na inyɔ na ohvi mɔ̀nyɛ̀ŋgì nanù ema lì lòkɛ̀ la anyu o ma Krirztò lì imbami nanù mɛnɛ.

Hwàto hwa ama Krirztò hwa rza enje o rze ya e mbenda hvɛ

⁶ Kànàtɛ inyɔ e ma emeyà Yerzù Krirztò nàa e Rzàŋgo ya anyu, e hwɛ ndi o lì gbeyà hweyà na oma mɔ̀ à arza nanù ema e gbeye.

⁷ Nà oma o lòkɛ̀ hweyà ema hwanu hwà-òkòlèlì hwa e okòlɛ, hwene hweyà hwe hwèlì ndi e jɔ̀kɛ̀. Ndeŋgànɛ̀lɛ̀ e a ŋgbàà Lohwɛ̀ jeka o hweyà hwe arzɛ o ihvonda ja arzɛ.

⁸ È rzi emeyà nanù ema tɔ̀ mòtò a e wowe nàa hwàkòmì o lì oŋgama hwèyòkòlèlì hwe ŋgundu hwe mòlaŋgà ema hwa e okolɛ. Hwèokòlèlì ema hwa e okolɛ hwe hwèlì ndi hwèyòkòlèlì ema hwà mà wowane imbamba ja awu, ndèŋgànɛ̀lɛ̀ hweŋge hwèyòkòlèlì hwe oŋgama ndi imbenda ja hwèèmà hwe e rze ya mɔ̀nyɛ̀. Hweŋge hwèyòkòlèlì hwe uwɛ̀lɛ̀lɛ̀yi ndi o hwatò hwa hwènàmà hwa hvɔ̀rzɔ̀ rzeketɛ o ma Krirztò.

⁹ È rzi emeyà nanù ema hwaŋga hwà-òkòlèlì hwa mòlàŋga hwa e lukɛlɛ, ehwànja e ŋginyà na ɛ̀ɛ̀mɛ̀ ya ama Lohwɛ̀ e hwèlì o tenì ya e nyo ya e mòtò wa hwènàmà ya ama Krirztò.

¹⁰ Ò eŋgànɛlɛ rzɔ, è ohvi lòŋgɛ ema lì ondi, ehwànja è hwèlì mòtò mɔ̀kɔ nà Krirztò. Ndeŋgànɛlɛ mɔ̀ ndi à hwèlì è mɔ̀ ema à kànèyà iŋginyà nà màkànèyà mà arzɛ.

¹¹ Nà oma è hwèlì ò mòndeŋgè nà Krirztò, Krirztò à mà è endà. Rzeketɛ nà oma mòtò wà hwènàmà à endà mòtò. Krirztò ndi à hwèlì è mɔ̀ ema à yè endà ò èlìŋgɛ̀. À mà è ulɛ̀ ɛ̀ɛ̀mɛ̀ yà anyu yà wòhwe.

¹² È hvonda ema è mà lùhwìrzɛ̀hwɛ̀, è mà hwɛ ndi nàa è mà ŋwa, hwa imeya, rzìi Lohwɛ̀ à è hvùmùlɛ̀ nà Krirztò. Ène eyà è mà è gbèyɛ̀nɛ nanù ehwànja è mà lòkɛ̀ nanù ema, è ŋginyà yà ama Lohwɛ̀ ema è mà hvùmùlɛ̀ Krirztò è ò è hvùmùlɛ̀ inyɔ hvɛ.

¹³ Ò mòlòmɛ̀ inyɔ è mà hwɛ ndi nàa ò à ɛnɛ ema è mà ŋwa, ehwànja è mà hwɛ lì unda è mbenda yà ama Lohwɛ̀. Ndèŋgàna ò eŋge hvonda, ema Krirztò à è ulɛ̀ ɛ̀ɛ̀mɛ̀ ya anyu yà wòhwe ò nyo. Ndi ò nàŋgɛ Lohwɛ̀ à mà è ŋgba lòŋgɛ lì hvènya nàa oma à mà jò hvùmùlɛ̀ nà Krirztò. À mà jò làkìrzɛ wòhwe wò arzu wò arzɛ.

¹⁴ È gbèyì ndi nàa mɔ̀ à mà tìtòwà wòhwe wò arzu ò èki ema wò tìlàhwì. Èŋge ŋgànà è hwèlì ndi nanù ema woŋgo wòhwe wò rza enje hvɛ. Lohwɛ̀ à mà wòmeyà woŋgo wòhwe ò mbàrza nàa hwa mà wòmeyà Krirztò ò mbàrza rzìi à ŋwa.

¹⁵ Lohwɛ̀ à mà aka iŋginyà nà hwàkànèlì hwa ene rze. Nà oma à mà wà aka ò tenì è mà ɛnɛhwɛ nà tɔ̀ ima mòtò nà oma Krirztò à mà ŋwe ò mbàrza.

¹⁶ Ò eŋgànɛ̀lɛ rzɔ, è rza emeyà nanù ema hwatò hwa è ohweyà nanù ema, inyɔ è mà gbeyà lùurzè ehwànja è làa nyàyi jà melelì tɔ̀ ehwànja è nyɔ lòŋgo là hwènyɔ̀ɔ̀nì, tɔ̀ ehwànja è ukelì nyàyi jà ndèma, tɔ̀ ò è ndèma ema è ò hwɛ è ŋgbɛndɛ è wurzi tɛ ò ŋmanyu, tɔ̀ ò è ndèma yà Wùnyà wò lì Arzìyòlɛ.

¹⁷ Iŋgi mbenda jà arzɛ ì mà hwɛ ndi nàa èlìŋgɛ̀ ema è uŋmɛ̀lɛ̀ hwèèmà hwe gbamù ema Lohwɛ̀ à àŋgàmɛ̀nɛ̀yi lì oma. Ndeŋgànɛlɛ Krirztò ndi à ondìrzɛ̀ hweŋge hwèèmà hwe arzɛ.

¹⁸ È rzi keka o lì emeyà nanù ema tɔ̀ mòtò a e tindɛlɛ nanù ema e àŋgàmɛ̀nɛ̀yi lì arzìirzɛ. Ndeŋgànɛ̀lɛ̀ e rzi keka lì emeyà nanù ema tɔ̀ mòtò a e tindɛlɛ nanù ema e àŋgàmɛ̀nɛ̀yi lì kànɛ i aŋgèlì nàa oma mɔ̀ à ji kànɛ. Inyɔ e gbèyi tɛ nanù e wɔ̀lɛnɛ jàhwèyà ema Lohwɛ̀ a ohwi nanù ema a e ŋgba. Tɔ̀ njɛnɛ ema a okòlɛ nanù, a ohwa ndi nanù ema a ɛni jɛ̀nɛ̀ni. Èŋge tumba mòtò e ohvi ndi kumba ya ŋgundu na hweyà hwe wòhwe ema hwe wurza o ŋmèma mo eni, a rza ohvi tɔ̀ lìtiŋga o lì uŋmɛ̀lɛ̀.

¹⁹ Èŋge tumba mòtò a rzɔ̀njɛlɛ lì lòkɛ̀ Krirztò ema mɔ̀ ndi à hwèlì e mòtìmbèlì wa hwàlòkèlì. Nà oma mòòhvò mo kànèyà e nyàmà nyo ya arzɛ, ŋgànà hvɔ̀kɔ hvɛ ndi Krirztò a mɔ̀ hvɛ a kànèyà hwatò hwa arzɛ ema hwa mo lòkɛ̀ aŋga nanù hwa hwɛ ndi mòtò mɔ̀kɔ. Nà oma mèrzìrza me arzàŋgànɛ o lì lata matìŋgà mà e nyo ya mòtò o lì hwɛ mòtò mɔ̀kɔ, nanù hvɛ ndi Krirztò a rzàŋga hwatò ema hwa mo lòkɛ̀ o lì hwɛ mòtò mɔ̀kɔ o rze ya eni. Ndeŋgana eŋge ŋgindi e oŋga ndi nà oma Lohwɛ̀ a arza.

O lì ŋwa na lì hwɛ o lòŋgɛ na Krirztò

²⁰ È hwèlì ndi nàŋgɛ nanù, na oma Krirztò a ŋwelì inyɔ hvɛ e ŋwelì na mɔ̀. O eŋgànɛ̀lɛ̀ rzɔ, inyɔ e rza enje o rze ya e mbenda ya e rze ya mɔ̀nyɛ̀ hvɛ. Mamɛ rzɔ ndeŋgàtɛ inyɔ e hwèlì e oŋgama ndi iŋgi mbenda hvɛ o a ɛnɛ o ma e rze e hwèlì ye e kànèyà nanù mɛnɛ e?

²¹ Hwàŋga hwà-òkòlèlì hwa mòlàŋga hwa e ohweyà nanù ema, “È rza lɛmbɛ ene, e rza keka hvɛ eŋge o wàna, e rza lɛmbɛ hvɛ enɛyi.”

²² Iŋgi mbenda ja arzɛ ja ɛnɛ hweyà ema hwe rza enje tɔ̀ eyà hvɛ e hwèlì tɛ nanù ema mòtò à mà loma lì hwe gbeyàna. Iŋgi mbenda i hwèlì ndi mbenda na hwèyòkòlèlì ema hwatò hwa hwènàmà hwà mà wondɛ̀ na mahwiye ma awu.

²³ Iŋgi mbenda je ɛneya ndi nàa o a ɛnɛ oma jo òhvi lìhwiyè rzàyi-rzàyi o tenì ya awu, ehwànja jo òkolɛ hwatò nanù ema wɔ̀ hwiti hwa hwɛni lì hwɛnɛ mèèmà me lì gbeyà hweyà ema hwe ambi, o lì uŋmɛ̀lɛ̀ na e jɔ̀kɛ̀ nanù ema wɔ̀ hwa oŋgama Lohwɛ̀. Iŋgi mbenda jo òkolɛ hwatò nanù ema hwa arzìirzɛ̀ wɔ̀ hwiti, rzìi hwa a ikɛ inyo ja awu o lì atàkìrzɛ̀ la jɔ̀kɛ̀. Ndi tɔ̀ e hwɛ ndi nanù ema hwatò hwa ikayi iŋgi mbenda, iŋgi mbenda i rza tànɛyi lì hwa oŋgowàna ema hwa rza ohva màlùtèyà ma wòhwe.