Judɛ 1 - Mokpwe: Bakwery (New Testament)

Judɛ a omi ikɔ̀mi

¹ Imba Judɛ, nà hwèlì ndi Jèmirzi ŋmanyàŋgò wà eni, nà è mògbèèlì wà ama Yerzù Krirztò. Imba ndi nà è tìleyà ene kààti inyɔ ema Lohwɛ̀ à hvɔ̀rzì. È hwɛni lì hwiyà nanù ema Tatɛ̀ Lohwɛ̀ à è lìŋgàni, ndèŋgànɛlɛ Yerzù Krirztò à hwèlì à è ɔ̀ŋgeyà.

² Inyɛ̀ ììlì jà ama Lohwɛ̀, ɛ̀yɔ̀lɛ̀ yà ama Lohwɛ̀ nà è ndìŋgɛ yà ama Lohwɛ̀ hwe onde nà inyɔ.

Hwà-okòlèlì hwa mòlàŋga

³ Imbùnda jà ami kòkò, nà hwèlì nà atàkìrzɛ̀ ò lì è tìleyà lì hvomɛ̀nɛ̀ lì rzùŋgàhwà ema Lohwɛ̀ à mà jò ŋgbɛ ò lì akeyà nà Yerzù Krirztò. Ndi o nàŋgɛ, na ɛnɛ nanù ema o lɔ̀wu nanù ema na e tìleya o lì hvomɛ̀nɛ̀ hwehvɛhvɛ hweyà. Nà e kɔ̀mɛ̀lɛ̀ nanù ema, e a alɛ̀mbɛ̀nɛ na ŋginyà e jɔ̀kɛ̀ ya ŋmɛ̀ndì mò gbamù. Mono ŋmɛ̀ndì mò gbamù mo rza àyèŋgòwɛ̀. Lohwɛ̀ à mà mo ŋgba hwatò hwa eni ŋgelì hvɔ̀kɔ o iŋgèlì ja arzɛ.

⁴ Nà ohwa ndi nanù èhwanja lòŋgò là hwatò ema hwa rza hwɛnɛ ɛ̀ɛ̀mɛ̀ yà ama hwatò hwa ama Lohwɛ̀, hwa mà kpèeyà ò ìtììtènì jà anyu ò jùtùtà. Hwaŋga hwatò hwa ohwa nanù ema, è ndèli ema Lohwɛ̀ à mà jò ŋgbɛ, ndèŋganɛlɛ nà oma à mà jò làkìrzɛ̀ wòhwe wò arzu, è mà jò ŋgbàà è wònjà ò lì gbeyà hweyà hwe mbindo. Lohwɛ̀ mɔ̀ à mà màa lì tɛ̀yirzɛ̀ è kɔ̀kìrzɛ̀ ema hwaŋga hwatò hwa ò lùwɛ natɛ̀ɛ nà è kòhwàa. Hwàŋga hwatò hwa rza emelì Yerzù Krirztò na oma è hwèlì nanù ema Yerzù mɛnɛ ndi à hwèlì è Rzàŋgo yà arzu nà è mòkànèlì wà arzu.

⁵ Tɔ̀ nɛ è hwi hwenè hweyà hwe arzɛ, nà arza ò lì è ɔ̀ŋgɛ̀lɛ̀nɛ nanù ema, ò hvonda hvɔ̀kɔ Rzàŋgo e ma rzùŋgà hwatò hwa Irzàyɛ̀lì o màà mà hwatò hwa èkòmè ya Ìjiptò. Ndi o mburza hvonda, à mà hvaŋga hwaŋga hwatò ema hwa rzi mo lòkɛ̀.

⁶ Nà arza ò lì è ɔ̀ŋgɛ̀lɛ̀nɛ hvɛ nanù ema iŋgi aŋgèlì ema ì rzìi lìya ò èki ema Lohwɛ̀ à mà hwa rzèkeyà, ndi ì mà kìnyɛ̀lɛ̀ èki yà awu yà jɔ̀kɛ̀ yà hwèlìyelì, Lohwɛ̀ à mà hwa ika ò hwèwòwà hwe jìtìtì ekì ema hwa hwɛ̀ɛ̀ natɛ̀ɛ tɔ̀ lì aka Wùùnyà wò hwèkàyìrzèlì wò ndɛnɛ.

⁷ È ɔ̀ŋgɛ̀lɛ̀ hvɛ màmbowà mà Rzodomi nà Gòmòrà nà màŋga màmbowà emà ma mà hwa kombɛ̀nɛ̀. Hwàto ema hwa mà hwɛ ò tenì yà màŋga màmbowà, hwa mà aŋgbɛ wɔ̀ hwiti ò lì gbeyà hweyà hwe mòrzònje, ndèŋgànɛlɛ wɔ̀ hwa mà hwɛ ndi ò lì oŋgàma hweyàrzèlì hwe e nyàma nyo ema e mòtò wa hwènàma a rza àŋgàmɛ̀nɛ̀yi lì gbeyà. Hwà mà luwa ɛkɔ̀kìrzɛ̀ ya mùnya ema mo rza lìma. Ène kɔ̀kìrzɛ̀ e hwèlì ndi o lì okolɛ hwahvɛhvɛ hwatò nanù ema ene eyà e tànɛyi e hwa gbèyɛ̀nɛ.

⁸ Ndi tɔ̀ nanù hwaŋga hwatò ema hwa kpèelì ò ìtììtènì jà anyu ò jùtùtà, wɔ̀ hvɛ hwa hwèlì hwa ɔ̀tɔ̀ indɔ̀tɔ̀ nanù ema lìkànèyà lì hwèlì ndi ò màa mà awu. Iŋgi ndɔ̀tɔ̀ ì hwa gbeyà ò lì gbèya hweyà hwe mbindo, ndeŋgànɛlɛ hwa rza ɛnɛ lìkànèyà là ama Lohwɛ̀ nàa tɔ̀ eyà, ndeŋgànɛlɛ wɔ̀ hwa hwɛnyɛ iŋginyà ema ì hwèlì ò ŋmanyu.

⁹ Ndi tɔ̀ Màyìkɛ̀lì è aŋgèlì ndɛnɛ à rzi hwɛnyɛ dɛhvùlì, è hvonda ema wɔ̀ nà mɔ̀ hwa mà hwɛ lì tɔ̀wɔ̀ ò lì hvomɛ̀nɛ̀ è mòtò ema à wòwà èèmbè ya ama Morzè. À mà mò ohweyà ndi nanù ema, “Rzàŋgo à ò kɔ̀kìrzɛ̀.”

¹⁰ Ndi hwaŋga hwatò ema hwa mà è kpèeyà ò ìtììtènì yà anyu, hwa ohwa wòhwe lì hvomɛ̀nɛ̀ hweyà ema hwa rza rzɔ̀ŋgìtɛ̀nɛ̀. Tɔ̀ mamɛ ema è hwa jɛ̀lɛ̀lɛ̀yi ò màlùtèyà mà awu, ɔndi hwa gbeyà. Wɔ̀ hwa gbeyà ndi hweyà nàa nyàmà ja waŋga. Hwèŋge hweyà mɛnɛ ndi hwe hwa jàneyà e kpelì.

¹¹ Èwoma na wɔ̀! Wɔ̀ hvɛ hwa gbeyà ndi na oma Keni à mà gbeye ema à mà oŋwe ŋmanyàŋgò wa eni. O nyòla wolì wɔ̀ hwa tànɛyi lì gbeyà tɔ̀ mamɛ nàa Bàlàamì. Maniyà mà awu mɔ̀ hvɛ ma mà hwa gbeyà o lì ŋwa nyayi hvɔ̀kɔ hvɛ na oma Kora à mà ŋwe ehwànja à rzi hweyàne Lohwɛ̀.

¹² Hwàŋga hwatò hwa rza ohvi irzɔ̀ni, ò eŋgànɛlɛ rzɔ̀, inyɔ nà wɔ̀ è arzàŋgànɛ tɛ ò lì laa mòlelì, ò lì uŋmɛ̀lɛ̀ è ndìŋgɛ yà ama è Rzàŋgo, wɔ̀ hwa hwɛ ndi nàa mbindo ò ìtììtènì jà anyu. Hwa àlùtàneyà ndi wɔ̀ hwiti. Hwa gbeì ndi nàa lìmbàki ema è mbɛ̀hvɛni è uŋgɛ̀lɛ ò lì uŋmɛ̀lɛ̀ nanù ema o ò yɔ̀ɔ̀ mbuwà ema è rza ò yɔ̀ɔ̀. Hwa gbèyi ndi nàa mayi ema mà rza ŋya hwehvùma tɔ̀ ò è hvonda ema màyi mà ŋya hwehvùma. Hwà mà màa ndi lì ŋwa nàa mayi ema mà wuŋguwahwi nà meyàŋga.

¹³ Hwanu hwatò hwa gbèyi ndi nàa hwèehwè hwe ndɛnɛ ema hwe hvemàa ò ŋmànja. Nà oma hwe hvema, hwe oma è mbindo ò mokòkò mò ŋmànja. Nànù ndi ɛ̀ɛ̀mɛ̀ ya awu ya wòhwe è wurza. Hwa gbèyi ndi nàa mbɛtɛtu ema jà amàmìyɛ̀nɛ̀ èki yà arzɛ. Jììtìti ema i rzɔ̀ɔŋgɔ̀wu ɔndi Lohwɛ̀ à mà hwa uteya ndèŋgànɛlɛ jò ò hwɛ̀ɛ natɛ̀ɛ nà ò gbìndèyà.

¹⁴ Ènɔ̀kù è mɔ̀ ema à mà ùkirzɛ̀ è nyɔ̀ŋgɔ̀nì lìrzamba ò mòtende mò ama Adàmu, à mà hwɛ à mà ohwa nà è kòòwà lì hvomɛ̀nɛ̀ mamɛ ema è ò gbèèyɛnɛ hwanù hwatò. À mà ohwa nanù ema, “È okànèyà tɛ! È Rzàŋgo è hwèlì è jà nà hwèkòlì nà hwèkòlì hwe aŋgèlì jà eni jà wòtani.

¹⁵ Mɔ̀ à ò kàyìrzɛ hwatò hwa arzɛ hwa è rze yà mɔ̀nyɛ̀. Hwàto hwa arzɛ ema ɛ̀ɛ̀mɛ̀ yà awu è rza enje nàa ɛ̀ɛ̀mɛ̀ yà hwatò hwa Lohwà mɔ̀ à hwa tùùlɛ̀ ŋmàŋgo, ndèŋgànɛlɛ à ò kɔ̀kìrzɛ̀ hwatò hwa wòhwe ema hwa rza oka Lohwɛ̀ wɔ̀ŋgɔ̀. À ò hwa kɔ̀kìrzɛ̀ ò nyòla hweyà hwe wòhwe ema wɔ̀ hwa ohwa ò lì mò tèŋgɛ̀nɛ̀.”

¹⁶ Hwanù hwatò hwa lìyelì ndi ò lì arzàrzòwɛ ndeŋgànɛlɛ hwa hwɛlɛ hwahvɛhvɛ hwatò. Hwa oŋgama è nyɔ̀ŋgì yà awu yà wòhwe, hwa à èkìrzɛ̀, nà lì ohwàna jɛ̀ɛ̀mɛ̀ ema ì tɛ̀ɛ̀ aŋga nanù hwa luwànà hwatò hwèèmà.

Lì ɛ̀ndɛ̀nɛ̀ là lìlòkɛ̀ là jɔ̀kɛ̀

¹⁷ Ndi imbùnda jà ami kòkò, inyɔ è àŋgàmɛ̀nɛ̀yi lì ɔ̀ŋgɛ̀lɛ̀ mamɛ ema i àpɔ̀rzìtòlò jà ama è Rzàŋgo yà arzu Yerzù Krirztò ì mà è òhweyà.

¹⁸ Hwa mà è ohweyà nanù ema, “Ò mèènyà mè lìrzukù ema mè ò jɛ̀ɛ̀, hwatò ema hwa è yɔ̀ɔ̀yeyà hwa ò jà, wɔ̀ ema hwa oŋgàma ndi hweyàrzèlì hwe awu hwe è nyàma nyo ema hwe rza enje hwetɛirzelelì hwe ama Lohwɛ̀.”

¹⁹ Hwanù hwatò ndi hwa gbeyà è à kahwanɛ̀ɛ. Wɔ̀ hwa oŋgàma ndi è nyɔ̀ŋgi yà hweyàrzèlì hwe awu hwe è nyàmà yà nyo ema è hwa kànèyà, ndèŋgànɛ̀lɛ̀ wɔ̀ hwa rza ohvi èlìŋgɛ̀ yà wòtani ò tenì yà awu.

²⁰ Ndi imbùnda jà ami kòkò, inyɛ lìlòkɛ̀ là wòtani ema è hwɛni lì hwɛ ndi ò lì ɔŋgɔ ò tenì yà anyu lì ɛndɛ ò worzo. È kànɛ nanù ema è ŋginyà yà Èlìŋgɛ̀ yà Wòtani yè è timbe.

²¹ È ɛ̀ndɛ̀nɛ̀ ndi lòŋgɛ là anyu ò worzo nyayi ema inyɔ e ayèmbɛ nanù ema Lohwɛ̀ a e lìŋgàni. È hwɛ ndi o lì ambɛ̀lɛ̀, ndeŋgànɛlɛ e àhvìtɛ̀ nanù ema e Rzàŋgo ya arzu Yerzù Krirztò e o jà, ndèŋgànɛlɛ mɔ̀ à o gbeyàna ŋmèma mo eni mo ììlì, inyɔ e o luwa lòŋgɛ la gbìndèyà. Mɔ̀ a o gbeyà ndi nanù ehwànja a e lìŋgàni.

²² È uŋmɛ̀lɛ̀ ììlì o hwaŋga hwatò ema hwa rza lòkɛ̀ na ŋmèma mɔ̀kɔ.

²³ È rzùŋge mòŋgɛ ma hwahvɛhvɛ hwatò ò lì hwa rzìima kàrzi-kàrzi lì anjiya o mùnya ema mo rza lìma. È uŋmɛ̀lɛ̀ ììlì o hwahvɛhvɛ hwatò, ndi o tɔ̀ nanù e àŋgàmɛ̀nɛ̀yi lì hwa oŋgowàna. È kɔɔ tɔ̀ màatù ma awu ema mà hwèlì ndi nàa hweyàrzèlì hwe hweyà hwe wòhwe hwe e nyàma nyo ya awu ndi e ma kɔ̀yirzɛ̀.

Lìkànɛ la jeka

²⁴ Èluhwe e hwɛ na Lohwɛ̀ ema a rza emeyà nanù ema e unde o tenì ya wòhwe. Mɔ̀ ŋmìti ndi à e jàni o èki ema mɔ̀ à hwèlì na ŋmàye mo eni. A o e jànà aŋga e rzi hwɛ tɔ̀ lìtɔ̀tì tɔ̀ lɔ̀kɔ la wòhwe o inyo ja anyu, ndèŋgànɛ̀lɛ̀ e o òka mɔ̀nyɛ̀ŋgì.

²⁵ Èluhwe ya arzɛ e hwɛ na mɔ̀. Mɔ̀ ŋmìti mɛnɛ ndi à hwèlì Lohwɛ̀, ema a jo rzùŋgà mòŋgɛ ma arzu o lì akeyà na hwègbèèlì hwe ama e Rzàŋgo ya arzu Yerzù Krirztò. Èluhwe, lì olowa, e ŋginyà, na màkànèyà ma arzɛ ma hwèlì ndi e ma eni, lì wòteyà o hwewotelì, o nàŋgɛ na o gbìndèyà. Inyɛ̀ wo lìya Nànù.