Jèmìrzì 2 - Mokpwe: Bakwery (New Testament)

Jèmìrzì à mà hwa wowe lòŋgo là hwatò wòlìto lì aka hwanɛyi

¹ Wònyànyàŋgo wa ami kòkò. Inyɔ nàa hwàlòkèlì hwa ama Rzàŋgo wa arzu Yerzù Krirztò, e Rzàŋgo ema èluhwe ya eni e kàrzàmi, inyɔ e rza àŋgàmɛ̀nɛ̀yi lì ɛnɛ tɔ̀ ima mòtò rzìi e mo wowa o a ɛnɛ oma a ohvi wòlìto tɔ̀ a rza ohvi wòlìto.

² Inyɛ̀ i wòwe nanù ema mòtò a kpèelì o èki ema e arzàŋgànɛ, rzìi a wɔ̀ti jɔ̀ndɔ jà gòòlù, rzìi a wɔ̀tɔ̀ hvɛ màwɔ̀ti ma gbamù, rzìi mòlìrza mo mòtò mɔ̀ hvɛ mo kpèeyà ema mo wɔ̀ti mààtù ma mbindo.

³ Inyɔ e uŋmɛ̀lɛ̀ tɛ oŋgo mòtò ema a wɔ̀ti màwɔ̀ti ma gbamù, èluhwe rzayi-rzayi rzìi e mo òhweyà nanù ema, “Liya ene mboko ya gbamù ema e hwèlì anu,” ndi e ohweyà mòŋgo molìrza mo mòtò nanù ema, “Tɛmɛ aŋga,” tɔ̀ ema, “lìya aŋga o rze ya mɔ̀nyɛ̀,”

⁴ Èŋge ŋgànà e hwèlì ndi nanù ema inyɔ e uŋmɛ̀lɛ̀ ndi nanù ema, lòŋgo la hwatò hwa akayi hwahvɛhvɛ hwatò, nanù oma e kàyìrzɛ ndi hwatò na màlùtèyà mà wòhwe.

⁵ Wònyànyàŋgo wa ami kòkò, e okànèyà. Rzeke e hwèlì ndi e jɔ̀kɛ̀ nanù ema Lohwɛ̀ mɔ̀ à mà màa lì hvɔ̀rzɔ̀ mèlìrzà me hwatò ema hwa hwɛ hwàlòkèlì hwa ama Krirztò e? Ndèŋgànɛlɛ lìŋgi lì lòkɛ̀ ndi lì hwèlì mònàmɛ̀ mo awu, ndèŋgànɛ̀lɛ mɔ̀ à mà hwa hvɔ̀rzɔ̀ nanù ema wɔ̀ ndi hwa hwèlì hwatò ema hwa o hwɛ lìkànèyà la eni. Ndeŋgànɛlɛ lìŋgi lìkànèyà ndi mɔ̀ à ohwi nanù ema, mɔ̀ à ŋgba hwatò ema hwa mo lìŋgàni.

⁶ Ndi inyɔ e rza ŋgbàà mèlìrzà me hwatò èluhwe. Rzeke hwèwàŋgì hwe hwatò hweyɔ ndi hwa e tàkirzɛ e? Rzeke e hwèlì e jɔ̀kɛ̀ nanù ema wɔ ndi hwa e ɛ̀ndɛ̀nɛ̀ o hwèkàyìrzèlì e?

⁷ Wɔ̀ ndi wɔ̀ hwa ohwa wòhwe o lì hvomɛ̀nɛ̀ lìinà la gbamù ema lì ma e ŋgbahwa.

⁸ Inyɔ yo ò gbeyà ndi eyà ya gbamù e hwèlì tɛ nanù ema e ikayi e mbenda ya lìkànèyà ema e hwèlì o tenì ya e kààti ya Lohwà ema e ohwa nanù ema, “O lìŋgàne ŋmànyɔ̀ŋgɔ̀ wa aŋgɔ̀ na oma o alìŋgànɛ̀yi o wà witi.”

⁹ Ndi inyɔ e wowa tɛ lòŋgo la hwatò wòlìto lì aka hwanɛyi hwatò nanù oma e gbeyà ndi wòhwe, aŋga nanù oma e mbenda ya ama Lohwɛ̀ yɔ hvɛ e ma e lɛmbɛ nàa hwatò ema wɔ hvɛ hwa undi mbenda.

¹⁰ Tɔ̀ njɛnɛ hvɛ ema a undi mbenda hvɔ̀kɔ nanù oma mɔ̀ à jo undi ja arzɛ.

¹¹ Èhwànja, oŋgo mòtò mɛnɛ ema à mà ohwa nanù ema, “È rzi gbeyà mòrzònje mo lìhwa.” A ma ohwa hvɛ nanù ema, “È rzi oŋwa.” Tɔ̀ e hwɛ ndi nanù ema e rza gbèyi mòrzònje mo lìhwa ndi o òŋwi mòtò nanù oma e ma unda e mbenda.

¹² È ohwe ndèŋgànɛ̀lɛ̀ e gbeye hweyà o a ɛnɛ oma e hwi nanù ema Lohwɛ̀ a o hwa kàyìrzɛ, na e mbenda ema e rzuulɛ hwatò.

¹³ Èhwànja Lohwɛ̀ a rza o uŋmɛ̀lɛ̀ ììlì ja eni e hwèlì tɛ nanù ema mɔ̀ à o kàyìrzɛ e mòtò ema mɔ̀ à rza uŋmɛ̀lɛ̀ ohvɛhvɛ ììlì. Ndi e mòtò ema a hwɛnelì hwahvɛhvɛ hwatò ììlì, mɔ̀ à rza o òka wɔ̀ŋgɔ̀ o wùnyà ema Lohwɛ̀ a o mo kàyìrzɛ.

Lìlòkɛ̀ lì rza gbèyi tɛ èwòlò lì ŋwa

¹⁴ Ìi wònyànyàŋgo wa ami kòkò, mòtò a ohwi tɛ nanù ema a lòkɛ̀yì Krirztò, rzìi a rzi gbeyà hweyà ema hwe uŋmɛ̀lɛ̀ nanù ema a ohvi lì lòkɛ̀ ima gbamù wo hwèlì aŋga e? Èŋge tumba lì lòkɛ̀ e tanɛyi e mo rzùŋgà lòŋgɛ la eni e?

¹⁵ Inyɛ̀ i wowe nanù ema ŋmanyàŋgò wa aŋgɔ wa ama Krirztò a rza ohvi tɔ̀ yoma ya lì wɔ̀tɔ̀ ndèŋgànɛlɛ a rza ohvi hvɛ tɔ̀ mòlelì ema a laa.

¹⁶ Rzìi mɔ̀kɔ wa anyu a mo òhweyà nanù ema, “Ɛndɛ gbamù, o luwe mamɛ ema o wɔ̀tɔ̀ ndèŋgànɛlɛ o luwe hvɛ mamɛ ema o ò lɛɛ.” È mo òhwèlì tɛ nanù, e rzi hwɛ a hwɛ nanù ema, e mo ŋgbelì hweyàrzèlì hwa eni, ima wotumba wo gbamù ema inyɔ e mo gbèelì e?

¹⁷ Nànù ndi lìlòkɛ̀ lì hwèlì. Mòtò a ohvi tɛ lìlòkɛ̀, rzìi a rzi gbeye nà oma lìŋgi lìlòkɛ̀ lì ohwa nanù oma lìŋgi lìlòkɛ̀ lì ma ŋwa.

¹⁸ Mòtò mɔ̀kɔ a no òhweyà nanù ema, “Ono mòtò a ohvi lìlòkɛ̀, ɔ̀nɛyi mɔ̀ hvɛ a gbeyà hweyà hwe gbamù.” Nà mo alàhwɛ̀ nanù ema, “O no uŋmɛ̀lɛ̀ nɛ mòtò a tànɛyi lì hwɛnɛ lìlòkɛ̀ ema a rza gbeyɛ hweyà hwe gbamù, na o uŋmɛ̀lɛ̀ lìlòkɛ̀ la ami o hweyà hwe gbamù ema na gbeyà.”

¹⁹ Inyɔ e lòkɛ̀yi nanù ema o hwèlì ndi Lohwɛ̀ lɔ̀kɔ e? Gbamù rzayi! Tɔ̀ hwèlìŋgɛ̀ hwe wòhwe hweyɔ hvɛ hwe lòkɛ̀yi nanù, hweyɔ hwe tumeya mòkàmbiya.

²⁰ O wa èèti ya mòtò o arza embànelì o lì o uŋmɛ̀lɛ̀ nanù ema e hwèlì tɛ nanù ema mòtò a ohvi lìlòkɛ̀ rzìi a rzi gbeeye nà oma lìŋgi lìlòkɛ̀ lì ohwa, nanù oma rzeke lìŋgi lìlòkɛ̀ lì hwèlì ndi ŋgundu e?

²¹ Mamɛ e ma gbeyà ndèŋgana Abràhamù e mbamba ya arzu a imànɛ̀lɛ̀hwɛ̀ o worzo wo ama Lohwɛ̀ nàa mòtò ema a tɛmi ehve-ehve e? Rzeke ehwànja mɔ̀ à mà emeyà lì ŋgba e ŋmanà wa eni Irzàkì nàa làhweyà e?

²² Rzeke e ɛnɛ nanù ema lìlòkɛ̀ la ama Abràhamù na hweyà ema à mà gbeye hwe ma ɛ̀ndɛ̀nɛ̀ hweyà. Ndeŋgànɛ̀lɛ̀ hweyà ema à mà gbeye hwe ma gbeyà lìlòkɛ̀ lì eni lì ma ondìrzɛ̀hwɛ̀.

²³ Ène eyà è mà gbeyà eyà yà Lohwà ò lì tɛ̀mɛ̀ è jɔ̀kɛ̀ nà oma è tìlahwì nanù ema, “Abràhamù à mà lòkɛ̀ Lohwɛ̀. Ène eyà è mà gbeyà Lohwɛ̀ à mò emeyà nàa è mòtò ema à gbeyà hweyà ema hwe hvomɛ̀nɛ̀yi.” O eŋgànɛlɛ rzɔ hwatò hwa mà hwɛlɛ Abràhamù nanù ema è mbunda yà ama Lohwɛ̀.

²⁴ Inyɔ è mà ɛnɛ nanù ema, hweyà ema hwatò hwa gbeyà hweyɔ̀ ndi hwe gbèeyà rzìi hwa emàhwɛ̀lɛ ò worzo wò ama Lohwɛ̀. Ndèŋgàna rzeketɛ lì lòkɛ̀ mɛnɛ.

²⁵ Nànù mɛnɛ ndi è mà hwɛ hvɛ nà è mòlana wà àkpàlà Làhàbì. A ma ikahwa ehve-ehve na Lohwɛ̀ ehwànja wònyà Yudà ema hwà mà omahwa o lì ɛndɛ lì injàneyà e mbowà ndɛnɛ o jututa, à mà hwa kàrzɛ, rzìi mɔ̀ à hwa ulɛ o tenì ya mbowà ndɛnɛ, rzìi a hwa akɛlɛ ehvɛhvɛ njiya o jututa.

²⁶ O eŋgànɛ̀lɛ̀ rzɔ, na oma e nyo ema e rza ohvɛ èlìŋgɛ̀ e ŋwaa, nanù mɛnɛ ndi lìlòkɛ̀ ema lì rza ohvɛ hwèwòlò lì ŋwaa.