Jèmìrzì 1 - Mokpwe: Bakwery (New Testament)

¹ Imba Jèmìrzì e mògbèèlì wa ama Lohwɛ̀ na Rzàŋgo Yerzù Krirztò ndi na tilì ene kààtì. Nà e kɔ̀mi inyɔ hwa arzɛ lìyomɛ la matumba na mahwakɛ ma wonyà Irzàyɛ̀lì ema e bùhwèlì o e rze ya mɔ̀nyɛ̀ ya arzɛ.

Jèmìrzì à mà hwatò hwa lòkɛ̀ Krirztò ndèŋgànà hwa hwɛnɛ lìhwiyè

² Ìi wònyàmòwe kòkò, tɔ̀ ima hvonda ema tɔ̀ ima lìtumba la màkekirzɛnɛ ma e uŋmànɛlɛ ye e wowe inyɔ hwiti nàa e lɔ̀wu ya nyo.

³ Inyɔ e hwiye nanù ema mànu màkekirzɛnɛ ema e luwa o nyòla lì lòkɛ̀ la anyu ema e ohvi lɔ̀ ndi lì e ètìrzɛ̀ mèèmà.

⁴ Inyɛ̀ mèèmà me anyu me e ete natɛ̀ɛ na o lìrzùkù, aŋga nanù ɛ̀ɛ̀mɛ̀ ya anyu e hwɛ gbamù ndèŋgànɛ̀lɛ̀ e onda, aŋga nanù e rza hwɛnɛ tɔ̀ ɛ̀ɛ̀mɛ̀ ya wòhwe o mòŋgɛ ma anyu.

⁵ Ndi tɔ̀ ima mɔ̀ wa anyu ema a rza hwɛnɛ lìhwiyè, a kànɛ Lohwɛ̀, a mo ŋgbàà e lɔ̀. Lohwɛ̀ ndi à gbeyàna ŋmèma mo eni mo awɔ̀kɛ o lì ŋgba tɔ̀ ima mòtò lìhwiyè. Mɔ̀ Lohwɛ̀ a rza timbana tɔ̀ mòtò mburzà ndèŋgànɛ̀lɛ̀ a mo ŋgba e lɔ.

⁶ Ndi inyɔ e kànɛ tɛ rzìi e a akowana Lohwɛ̀, inyɛ e lòkɛ̀ nanù ema a e ŋgba mamɛ ema e mo arzana, e rzi hwɛ inyɔ lì tàmà. È mòtò ema a tàmà, a hwèlì ndi nàa hwemunɛ hwe ŋmànja ema e mbɛ̀hvɛ̀nì e uŋgɛlɛ èki ya arzɛ.

⁷ Inyɛ̀ ene tumba mòtò a rzi lùtèyà nanù ema a o luwàna e Rzàŋgo tɔ̀ yoma.

⁸ A hwèlì ndi mòtò ema a ohvi ŋmèma mèhwàkɛ̀ mɔ̀ à rza lɛmbɛ èki yɔ̀kɔ o tɔ̀ mamɛ ema a gbeyà.

Mèlìrzà mè hwatò nà hwèwàŋgì hwe hwatò

⁹ Mòtò wa ama Krirztò ema a rza enje wòlìto ò worzo wo hwahvɛhvɛ hwatò a hwɛni lì àyekìrzɛ e hwèlì tɛ ema Lohwɛ̀ a mo kàrzɛ o ŋmanyu.

¹⁰ Mòtò wa ama Krirztò ema a hwɛni wòlìto ò worzo wo hwahvɛhvɛ hwatò, a hwɛni lì lìŋga e hwèlì tɛ ema Lohwɛ̀ a mo rzìhwirzɛ. Nà ohwa ndi nanù ehwànja mɔ̀ à hwɛni lì kuwa ndi nàa mbonji ya hwèwùlè ema e hwèlì o wàŋga.

¹¹ È hwèlì tɛ nanù ema igbe i hvànya ŋginyà-ŋginyà, eŋge etùmbàtùmbà e rzɛlɛ hwèwùlè ndèŋgànà iŋgi mbonji ja hweŋge hwèwùlè i hwɛni lì kòmeyà o rze ndèŋgànɛ̀lɛ̀ mòlòŋgà mo awu mo kuwa. Nànù hvɛ mɛ̀nɛ ndi hwèwàŋgì hwe hwatò hwe hwɛni lì kuwa nàa oma wɔ hwa oŋgama mònàmɛ̀ mo awu o mburza.

Makèkìrzɛ̀nɛ̀ ma rza uwɛlɛlɛ o ma Lohwɛ̀

¹² Mònàmɛ̀ mo hwɛ nà tɔ̀ ima mòtò ema à àjùlɛ̀ o tenì ya màkèkirzɛnɛ, ehwànja a kulɛ tɛ lì aka màŋga makèkirzɛ, Lohwɛ̀ a mo rzaweya morzawelì ema mo hwèlì ndi lòŋgɛ ema mɔ̀ à ohwi nanù ema a ŋgba hwatò ema hwa mo lìŋgàni.

¹³ È hwèlì tɛ nanù ema mòtò à lu tɛ lìkèkìrzɛ a rzà aŋgàmɛ̀nɛ̀yi lì ohwà nanù ema, “Lini lìkèkìrzɛ lì uwɛ̀lɛ̀lɛ̀yi ndi o mà Lohwɛ̀.” Tɔ̀ mòtò a rza tànɛ a kèkìrzɛ Lohwɛ̀ nà wòhwe, nyàyi hvɔ̀kɔ hvɛ mɛnɛ nàa oma Lohwɛ̀ a rza tanɛ a kèkìrzɛ mòtò o lì gbeyà wòhwe.

¹⁴ Màlùteyà ma wòhwe ma mòtò mɔ̀ ndi ma mo gbeyà a unda o tenì yà màkèkìrzɛ̀nɛ, eŋge hvondà ndi màkèkìrzɛ̀nɛ ma mo wowàna ŋmèma mo eni o lùuŋga rzìi ma mo kakana e ŋgɔ̀kɔ̀hwì.

¹⁵ Màlùteyà ma wòhwe ema mà hwɛ̀ɛ o tenì ya ŋmèma mo mòtò mɔ̀ ndi ma jànà wòhwe. Ndèŋgànɛ̀lɛ wòŋgo wòhwe wo òŋga tɛ mòtò o tenì wo mo jànèyà e kpèlì.

¹⁶ Ìi wònyànyàŋgò wà ami kòkò, e rzi keka lì alùkɛ̀lɛ̀nɛ inyɔ hwiti.

¹⁷ Tɔ̀ ima jàhwèyà ja gbamù nà tɔ̀ ima eyà ema e ondìrzɛhwɛyi gbamù, hwe uwɛ̀lɛ̀lɛ̀yi ndi o ma Tàtɛ ema a hwèlì o ŋmanyu yà lohwà. Tatɛ̀ ndi à weki hwèèmà hwe arzɛ ema hwe uŋmɛ̀lɛ̀ ŋmàye o ŋmanyu yà lohwà. Hwene hwèèmà hwe hvànya ŋmàye ndèŋgànɛ̀lɛ̀ mono ŋmàye mo ayèŋgowɛ̀ ndi Lohwɛ̀ a rza ayeŋgòwɛ̀.

¹⁸ Lohwɛ̀ à mà kàkɛ̀nɛ̀ nanù ema a jo ŋgba lòŋgɛ lì hvènya, e hvonda ema à mà jo ŋgbe eyà ya eni ya jɔ̀kɛ̀. A ma gbeyà ndi nanù, aŋga nanù o ìtììtènì ja ewèkelì ya eni ya arzɛ irzɔ i hwɛ ndi nàa e mbota ya eni ya worzo ema e mo ŋgbààhwà nàa làhweyà.

Hwàto hwa ama Lohwɛ̀ hwa gbèyè nà oma eyà ya Lohwà e ohwi

¹⁹ Wònyànyàŋgo hwa ami kòkò, e ɔ̀ŋgɛ̀lɛ̀ hwene hweyà. Tɔ̀ ima mòtò a àŋgàmɛ̀nɛ̀yi lì wàmirzɛ o lì okànèyà mamɛ ema ohvɛhvɛ mòtò a ohwa, tɔ̀ mòtò a rza àŋgàmɛ̀nɛ̀ lì wàmirzɛ o lì ohwa tɔ̀ eyà, tɔ̀ mòtò a rza àŋgàmɛ̀nɛ̀ lì wàmirzɛ o lì tààtà.

²⁰ Hwetato hwe mòtò hwe mo gbeyà a rza gbeyà hweyà ema Lohwɛ̀ a arza nanù ema a gbeye.

²¹ O eŋgànɛ̀lɛ̀ rzɔ, inyɔ e hwɛmɛ hweyà hwe arzɛ hwe mbindo na hweyà hwe arzɛ hwe wòhwe ema e gbeyà. Nà lì arzìirzɛ lì arzɛ inyɔ ye emeyà eyà ema Lohwɛ̀ à mà onɛ o mèèmà me anyu. Èŋge eyà ndi Lohwɛ̀ a gbeyàna o lì e rzùŋgànà mòŋgɛ ma anyu.

²² È gbeye ndi na oma eyà ya Lohwà e ohwa. È rza a ɔnjɛ inyɔ hwiti o lì okànèyà eyà ya Lohwà mɛnɛ.

²³ Tɔ njɛnɛ ema a hweyi eyà ya Lohwà rzìi a rzi gbeye mamɛ ema eyà ya Lohwà e ohwa, a hwèlì ndi nàa mòtò ema a ɔŋgɔ worzo wo eni o lìyɛ̀nì.

²⁴ A ɔ̀ŋgɛ mɔ̀ ŋmìti gbamù rzìi a ɛndɛ e ye eni o ŋgèlì hvɔ̀kɔ mɛnɛ mɔ̀ à hvoŋga lì hwiya nɛ worzo wo eni wo ɛneya.

²⁵ Ndi tɔ̀ njɛnɛ ema a ɔ̀ŋgɔ kɔ̀yi-kɔ̀yi e mbenda ya jɔ̀kɛ̀ ema e rzuŋga hwatò, ema a hwɛ ndi o lì e aŋgoweya, ema a rza hwɛ ndi o lì hweyà e mbenda mɛnɛ rzi a hvoŋga, ndi à hwɛ ndi mòtò ema a gbeyà mamɛ ema e mbenda e ohwa, oŋgo moto a o nàmìrzɛ̀hwɛ̀ na Lohwɛ̀ o mamɛ ya arzɛ ema mɔ̀ à gbeyà.

²⁶ Tɔ̀ ima mòtò ema a ɔ̀ŋgɛ̀lɛ̀ nanù ema mɔ̀ à gbeyà ndi nà oma Lohwɛ̀ a àrzeyà, rzìi a rzi kànèyà jɛ̀ɛ̀mɛ̀ ja eni, eŋge tumba mòtò a alukɛ̀lɛ̀ ndi mɔ̀ ŋmìti, ndèŋganɛlɛ èwòlò ya eni ema mɔ̀ à gbèeyà Lohwɛ̀ e hwèlì ndi ŋgundu.

²⁷ O lì gbèeyà Lohwɛ̀ o ŋgànà ema e hwèlì Wòrzàŋgì ndèŋgànà o jɔ̀kɛ̀ ya ama Tatɛ̀ Lohwɛ̀, e hwèlì ndi o lì ɔŋgeya i nyuhwe ja hwàna na mekurze me hwalana ema me tàka, na lì àwòhvɛ̀ la eni la gbamù e rzi hwɛ nanù ema hweyà hwe mbindo hwe e rze ya mɔ̀nyɛ̀ hwe mo atukɛ o nyo.