Hwèwulùwèlì 9 - Mokpwe: Bakwery (New Testament)

È aŋgèlì e ma tòŋga lìyɔ̀mi ema lì ma ùkirzɛ̀ mata

¹ È aŋgèlì ema e ma ùkirzɛ̀ ita e ma tòŋga lìyɔ̀mi la eni. Rzìi na ɛnɛ rzombe ema e ma akakowɛ o lìwòhwɛ la ŋmanyu rzìi e unda o rze ya mɔ̀nyɛ̀. Ène rzombe e ma ŋgbààhwà ilìhvowàni ja ehvɔ̀ndi ema e rza ohvɛ lìrzùkù.

² Ène rzombe e ma lìhvowa e wàna ya eŋge ehvɔ̀ndi ema e rza ohvɛ lìrzùkù. Yùutùtù e ma wurza o tenì ema e ma àyɛ̀kɛ̀nɛ̀ yutùtù ema e uwɛ̀lɛ̀lɛ̀yi o mùnya ema mo ahvi na gbambi. Èŋge yutùtù e ma gbeyà igbèyi ema i ma hwɛ lì hvànya i rzi tanɛyi lì hvànya hvɛ.

³ Megbambembe me ma uwɛ̀lɛ̀lɛ̀yi o tenì ya eŋge yutùtù, me rzihweyà e rze ya mɔ̀nyɛ̀. Ndeŋgànɛ̀lɛ̀ me ma ŋgbààhwà màyìmbì nàa màwohwɛ̀ mà mèhvendo emà mà hwèlì o e rze ya mɔ̀nyɛ̀.

⁴ Hwà mà ohweyà megbambembe nanù ema hwa rzi keka lì hvàŋga hwèwùlè, hweyàlì na mayi. Ndi hwà mà hwa ohweyà nanù ema, hwa hvàŋge ndi hwatò ema hwa rza kukɛhwɛ eembànelì ya ama Lohwɛ̀ o imbɔ̀mbɔ ja awu.

⁵ Mebgambembe me rzi ŋgbaahwe è wònjà o lì oŋwa hwaŋga hwatò. Ndi hwà mà ŋgbahwa wònjà o lì hwa tàkirzɛ o tenì ya ŋgbɛndɛ ita mɛnɛ. Morziyo ema hwaŋga hwatò hwa o hweyɛ e hwèlì tɛ nanù ema meŋge megbambembe me hwa uŋmi, e o hwɛ ndi nàa mòrziyò ema mòtò a hweyà e hwèlì tɛ nanù ema lìwohwɛ la mehvendo lì mo uŋmi.

⁶ O tenì ya iŋgi ŋgbɛndɛ ita, hwaŋga hwatò hwa o arza e kpelì ndi hwa rza o ye ɛnɛ. Hwa o lìŋgàna nanù ema hwa ŋwee, ndi e kpelì e o hwa hwàŋga.

⁷ Megbambembe me ma ɛneya ndi nàa wɔ̀rzi ema i woŋgirzɛhwɛyi o lì ɛndɛ lì ana njuma. Hwe ma wɔ̀tɔ̀ hwema o meyohvo me awu nàa hwèkòòtò hwe gòòlù. Ndeŋgànɛ̀lɛ̀ marzo ma awu ma mà àyɛkɛ̀nɛ marzo ma hwatò hwa hwènàmà.

⁸ Mahvumbu ma awu ma mà hwɛ ndi nàa mahvumbu ma hwalana, ndèŋgànɛ̀lɛ̀ marzoŋgà mà awu ma mà hwɛ ndi nàa marzoŋgà mà njila.

⁹ Wɔ̀ hwà mà wɔ̀tɔ̀ màwɔti o iŋgèŋgè ja awu emà ma mà hwɛ ndi nàa hwɛ̀ɛkɛ ema hwatò hwa wɔ̀tɔ̀ o lì iŋga iŋgèŋgè ja awu o e hvonda ya njuma. Mɔ̀tɔ̀wu ema mo ma uwɛ̀lɛ̀lɛ̀yi o mahvahve ma awu, mo mà hwɛ ndi nàa mɔ̀tɔ̀wu ema mo uwɛ̀lɛ̀lɛ̀yi o hwèhwàmbànì ema wɔ̀rzi rzayi-rzayi i lùùtà o lì ɛndɛ o njuma.

¹⁰ Wɔ̀ hwà mà ohva mèèyondò na mèhvèndò nàa màwòhwɛ̀ ma mèhvèndò. Meŋge mèèyondò ndi me ohvi màyìmbì ma lì hvaŋga hwatò o hvonda ya ŋgbɛndɛ ita.

¹¹ È kìŋgɛ ema e hwa kànèyà e hwèlì ndi e aŋgèlì ema e ɔŋgeya eŋge ehvɔ̀ndi ema e rza ohvɛ lìrzùkù. Lìinà la eni o e mbɔrzi ya Hibrù lì hwèlì ndi Abàdɔ̀ni, ndèŋgànɛ̀lɛ̀ o e mbɔrzi ya Grììkì lì hwèlì ndi Apolìyɔ̀ni (jànda i hwèlì ndi nanù ema, mòtò ema a hvaŋga).

¹² È hvonda ema mòjèmà mo worzo mo ma aka, o mburza nanù, mehvɛhvɛ mejema mehwakɛ me hwèlì me jà.

È aŋgèlì e ma tòŋga lìyɔ̀mi ema lì ma ùkirzɛ̀ mòtòhwa

¹³ È aŋgèlì ema e ma ùkirzɛ̀ mòtòhwa e ma tòŋga lìyɔ̀mi la eni. Rzìi na hweyà lìlo ema lì uwɛ̀lɛ̀lɛ̀yi o injuka ja aniyɛ ja ètàwo ya itùwà ya gòòlù ema e ma hwɛ o worzo wo ama Lohwɛ̀.

¹⁴ Lìŋgi lìlo lì ma ohweyà e aŋgèlì ema e ùkirzɛ̀ mòtòhwa ema à mà ohva lìyɔ̀mi nanù ema, “Rzolowa i aŋgèlì jàniyɛ ema Lohwɛ̀ à mà kake o morzo mo ndɛnɛ mo Yùhvrètìrzì.”

¹⁵ Èŋge aŋgèlì e ma rzolowa iŋgi aŋgèlì jàniyɛ. Wɔ̀ hwà mà rzekayɛlɛhwɛ o lì oŋwa lòŋgò lɔ̀kɔ o tenì ya moŋgo mayawo ma hwatò o lìŋgi lìrzàkò mɛnɛ, o woŋgo wùnyà mɛnɛ, o eŋge ŋgbɛndɛ mɛnɛ na o moŋgo ŋma mɛnɛ.

¹⁶ Hwà mà no ohweyà mɔ̀rzɔ̀ŋgi mo hwàanèlì hwa njuma ema hwa o lìya o ŋmanyu ya iŋgi wɔ̀rzi. Mo ma hwɛ hwègbe hwehwakɛ hwe hwèlùnì.

¹⁷ Nànù ndi nà mà ɛnɛ iŋgi wɔ̀rzi na hwatò ema hwa ji lìyayi o ŋmanyu o jɛ̀nɛ̀nì ja ami. Hwàŋga hwatò ema hwà mà ji lìya o ŋmanyu hwà mà wɔ̀tɔ̀ hwɛ̀ɛkɛ̀ ema hwe wɔ̀tɔ̀wɔ̀ o lì iŋga iŋgèŋgè e hvonda ya njuma. Hweŋge hwɛ̀ɛkɛ̀, hwe ma teeya ndi nàa mùnya, ndèŋgànɛ̀lɛ̀ hwe ma ohva mɔ̀rzɔ̀nɔ̀ nàa ndùtù, hwe ma ohva mɔ̀rzɔ̀nɔ̀ nàa mbòo. Meyohvo me iŋgi wɔ̀rzi, me ma hwɛ ndi nàa meyohvo me njila, mùnya, yutùtù na mùnya ema mo hwɛni mɔ̀rzɔ̀nɔ̀ nàa mbòo mo ma hwɛ lì wurza o iwàna ja awu.

¹⁸ Iŋgi kàndɛ̀ jàyɛ, eŋge ŋgànà e hwèlì ndi nanù ema mùùnya, Yùutùtù na mùnya ema mo ohvi mɔ̀rzɔ̀nɔ̀ nàa mbòo ema mo ma hwɛ lì wurza iŋgi wɔ̀rzi o iwàna ja awu, i ma oŋwa lòŋgò lɔ̀kɔ o tenì ya moŋgo mayawo ma hwatò hwa hwènàmà.

¹⁹ Màyìmbì ma iŋgi wɔ̀rzi ma mà hwɛ ndi o wàna na o mèeyòndo me awu. Mèeyòndo me awu ma mà hwɛ ndi nàa màahwa ema me ma ohva mèyòhvò ndèŋgànɛ̀lɛ̀ hwa me gbeyàna o lì hvàŋga hwatò.

²⁰ Hwanɛyi hwatò hwà hwènàmà hwa arzɛ ema ini kàndɛ i rzi oŋwɛ, hwa rzi hwɛmɛ o lì kànɛ mòohwà ema wɔ̀ hwiti hwà mà wèkè. Hwa rzi hwɛmɛ o lì gbèeyà hwèlìŋgɛ̀ hwe wòhwe, hwa rzi hwɛmɛ o lì gbèeyà mahvɛhvɛ mohwà, mohwà ema hwà mà wondɛ na gòòlù, na rzìlìhwà, na brɔ̀nrzi tɔ̀ màŋyàyi, tɔ̀ hwèhwàmbo, mohwà ema mà rza tanɛ lì ɛnɛ, ma rza tanɛ lì hweyà na e mɔ̀ ema mà rza tanɛ lì ɛndɛ.

²¹ Hwanu hwatò hwa rzi ayèŋgowɛ̀ ò wòhwe wo awu. Hwa rzi hwɛmi lì oŋwa la hwatò, hwa rzi hwɛmi o lì aŋgba la màaŋga, hwa rzi hwɛmi lòŋgɛ la morzonje ndèŋgànɛ̀lɛ̀ hwa rzi hwɛmi lì ihwa.